Xigonzo 7

Xialakanyiso Xa Xikhati Xi Hunzileko

Jehova a nga ta vumela lezaku vanhu vobiha va onhetela Paradise. Kona ku ta hanya ntsena vanghana vakwe. Zini zi to humelela ka vobiha? Kasi ku tiva hlamulo, alakanyela matimu ya lisine ya Noa. Yena i hanyile makume ya mazana ya malembe nzhako. I wa hi munhu wa mu nene loyi xontlhe xikhati a nga ti kurumeta ku maha kuranza ka Jehova. Kanilezi vanwani Misaveni va wa maha zilo zo biha. Hi kota ya lezo Jehova i lo byela Noa lezaku Yena i wa ta neha a ntalo kasi ku lovisa vontlhe vanhu vobiha. I lo leletela Noa a ku aka taru, kasi ku yena ni ngango wakwe va ngafi laha ku nga ta chikela Ntalo. — Genesisi 6:9-18.

Noa ni ngango wakwe va lo aka taru. Noa i lo tivisa vanhu lezaku ku wa ta a Ntalo, kanilezi vona a va mu ingisangi. Va lo simama ku maha zilo zo biha. Laha a taru gi nga mbhelile, Noa i lo enghenisa zihari, niku yena ni ngango wakwe va lo enghenawo ka gona. Zonake Jehova i lo neha vula ya hombe. Yi lona 40 wa masiku ni 40 wa wusiku. A mati ma lo khulunga Misaveni yontlhe. — Genesisi 7:7-12.

A vobiha va lo lova, kanilezi Noa ni ngango wakwe va lo hanyiswa. Jehova i lo va hanyisa Ntalweni a va yisa Misaveni yi nga tlhatlhekile kubiheni. (Genesisi 7:22, 23) A Biblia gi ngalo xata xikhati lexi Jehova a ta nga lovisa lava va alako ku maha lezi zi lulamileko. Vanhu va va nene va nga ta loviswa. Va ta hanya kala kupinzuka Misaveni ya paradise. — 2 Pedro 2:5, 6, 9.

Xikhati lexi, vanyingi va maha zilo zo biha. A tiko gi tele hi zikarato. Xikhati ni xikhati Jehova i rumela Timboni takwe kasi ku tivisa vanhu, kanilezi vanyingi va vona a va zi lavi ku ingisa timhaka ta Jehova. Vona a va zi lavi ku hunzulusa mahanyela yabye. A va zi lavi ku vumela lezi Nungungulu a wulako hi lezi zi lulamileko ni zi bihileko. Zini zi ta nga humelela ka vanhu vakunghahi? Xana va ta hunzuluka ginwani siku ke? Vanyingi cima va nga ta hunzuluka. Ku tata xikhati lexi a vobiha va to loviswa niku cima va nga ta hanya. — Tisimu 92:7.

A Misava yi nga ta hahlulwa; yona yi ta hunzuluswa yiva paradise. Lava va mahako vanghana va Nungungulu va ta hanya kala kupinzuka Paradiseni laha Misaveni. — Tisimu 37:29.