Xigonzo 15

Vanghana Va Nungungulu Va Maha Zo Saseka

Loku wena u hi ni munghana loyi u mu hlamalako ni kuva ni xichavo ka yena, wena u zama ku fanana na yena. “Jehova i nene ni kululama”, ku wula a Biblia. (Tisimu 25:8) Kasi kuva vanghana va Nungungulu, hi fela kuva va nene ni va lulamileko. A Biblia gi ngalo: “Mahani vapimanyisi va Nungungulu, khwatsi hi vanana va ranzekako, mu famba hi liranzo.” (Va Le Efesusi 5:1, 2) A tindlela to kari ta ku maha lezi hi leti:

Ngha uva wa xivuno ka vanwani. “A hi tireni lezi zi nene ka vanhu vontlhe.” — Va Le Galatia 6:10.

Tira hi ku ti karata. “Ngha loyi a nga hi khamba a nga ha yivi kambe; kanilezi a ti karate a tira lezi zi sasekileko hi mandla yakwe.” — Va Le Efesusi 4:28.

Hlayisa kuhlazeka ka miri ni ka mahanyela. “A hi ti hlazeni kunyenyezeni kontlhe ka miri ni moya, hi mbhelelisa a kubasiswa ka hina a kuchaveni ka Nungungulu.” — 2 Va Le Korinte 7:1.

Tirisana ni ziro za ngango wa wena hi liranzo ni xichawo. “Ngha na nwinawu munwe ni munwani a ranza sati wakwe kota lezi a ti ranzako wutsumbu; na yena wasati ngha ava ni xichawo ka nuna wakwe. Vanana, ingisani a vapswali va nwina.” — Va Le Efesusi 5:33 — 6:1.

Komba liranzo ka vanwani. “A hi ranzaneni, hakuva a liranzo lita hi ka Nungungulu.” — 1 Johani 4:7.

Ingisa milayo ya tiko. “Ngha na munwe ni munwani a ingisa a mufumo . . . Nyikani ka vontlhe lezi zi va faneleko: a khupo ka loyi a faneleko ku khupelwa.” — Va Le Roma 13:1, 7.