Xigonzo 17

Kasi Kuva Ni Munghana, Ku Laveka Kuva Munghana

Wunghana gi seketelwa liranzweni. Loku u gonza nguvu hi Jehova, u ta mu ranza nguvu. Laha a liranzo la wena hi Nungungulu li engetelako, a kuxuva ka wena a ku mu tirela na konawo ku ta engeteleka. Lezi zi ta ku kuca ku maha mupizani wa Jesu Kristu. (Mateu 28:19) Hi ku ti patsa ni ngango wo xalala wa Timboni ta Jehova, xontlhe xikhati u ta zi kota kuva ni wunghana ga Nungungulu. Xana u fela ku maha yini ke?

Wena u fela ku komba lezaku wa mu ranza Nungungulu hi ku ingisa milayo yakwe. “A ku mu ranza Nungungulu hi ku hlayisa milayo yakwe; ni milayo yakwe a yi karati.” — 1 Johani 5:3.

Tirisa lezi u gonzako. Jesu i hlawutele timu legi gi nga mufananiso wa lezo. Munhu a tlharihileko i lo aka yindlu yakwe hehla ka ribye. Munhu wa phuphulu i lo aka yindlu yakwe vunyeni. Laha ku ngata a vula ya ntamu ni bhubhutsa, a yindlu yi nga akilwe hehla ka ribye a yi wangi, kanilezi a yindlu yi nga akilwe vunyeni yi lowa hi kuwa ka hombe. Jesu i te ngalo lava va zwako a tigonzo takwe ni ku ti tirisa va fanana ni munhu a tlharihileko, loyi a nga aka hehla ka ribye. Kanilezi lava va zwako tigonzo takwe va nga ti tirisi va fanana ni munhu wa phuphulu, loyi a nga aka vunyeni. Xana hi wihi ka vanhu lavo u lavako ku fanana na yena ke? — Mateu 7:24-27.

Kutihendleleta. Ku ti hendleleta zi wula kuya ka Jehova hi mukhongelo ni ku mu byela lezaku u lava ku maha kuranza kakwe kala kupinzuka. Hi ku maha kuranza ka Nungungulu, wena u komba lezaku u mupizani wa Jesu Kristu. — Mateu 11:29.

Kubapatizwa. “Bapatizwa, u hlaziwa a zionho za wena, na u kari u khongela vitweni gakwe.” — Mitiro 22:16.

Ti patse hi kumbheleleko kumaheni ka ku ranza ka Nungungulu. “Kani hi xihi lexi mu xi mahako, xi maheni hi mbilu; khwatsi hi loku mu tirela Hosi, na ku nga hi vanhu.” — Va Le Kolosi 3:23.