XIWUTISO 10

A Biblia gi nga nzi vunisa kuyini?

HIKUYINI ZI NGA ZA LISIMA?

A Biblia gi ngalo: ‘Yontlhelele mitsalo yi pimisilwe hi Nungungulu.’ (2 Timote 3:16) Loku lezo zi hi lisine, a Biblia gi nga ku nyika wusungukati legi gi lavekako.

LOKU KU WA HI WENA, U WA TA MAHA YINI?

Ehleketa hi xiyimo lexi: Davidi i laha doropeni ni wusiku ga xinyama xa hombe. A nga zi tivi ku i kwihi hakuva ku phumile. Kanilezi, wa zi wona lezaku i lahlekile. Zi komba ku i phazamile ndlela ka wutshamu go kari a xikhati lexi a nga kari a famba.

Loku ku wa hi wena Davidi, u wa ta maha yini?

NYIMA U PIMISA!

Kuzilava u wa ta:

Wutisa ndlela.
Tirisa foki.
Simama ku famba na u rinzela lezaku u ta tshuka u kuma ndlela u yi tivako.

Zi te dlunya lezaku a mawonela ya wunharu a ma vuni nguvu.

Lawa ya wumbiri i chukwana ku hunza lawa yo sangula hakuva a foki u ta wona hi gona laha u fambako.

A Biblia gonawu gi nga ku vunisa lezo!

A bhuku legi gi xavisiwako nguvu ku hunza wontlhe,

gi nga ku vuna loku u kumana ni zikarato
gi nga ku vuna ku ti tiva ni kuva munhu wa mu nene
gi nga ku vuna ku hanya wutomi ga gi nene nguvu

GI NYIKA MIHLAMULO YA ZIWUTISO ZA LISIMA WUTOMINI

Loku ha hi vanana, hi maha ziwutiso zo kota lezi:

Hikuyini a tilo gi nga ga azuli?
A tinyeleti ti mahilwe hi yini?

Laha hi kulako, hi sangula ku maha ziwutiso zi yelanako ni lezi zi humelelako laha misaveni.

Hikuyini ku humelelako zilo za kubiha?
Hikuyini a vanhu va fako?

Ahati loku ku hi lezaku a mihlamulo ya kona yi kona lomu ka Biblia kusukela kale?

A kutala ka vanhu ve a Biblia gi tele hi mitsheketo ni tikaringani. Ve gi hunzelwe niku ga karata ku gi zwisisa. Xana lezo lisine, niku hi lezi a vanhu va zi alakanyako? Kutani va no byeliwa zo kala zi nga hi zona?

Hi xikombiso, a vanhu va alakanya lezaku Nungungulu hi yena a fumelako misava. Kanilezi, zi nga mahisa kuyini lezo? Phela a misava leyi a yi fumeki. Yi tele hi kubayisa ni kuxaniseka; mababyi ni kufa; wusiwana ni makhombo. A Nungungulu wa liranzo a nga vangisa kuyini a zikarato lezo?

Wa zi lava ku tiva a hlamulo wa kona? Lezi a Biblia gi zi wulako xungetano hi loyi a fumelako misava kuzilava zi nga ku hlamalisa!

Kuzilava u zi wonile lezaku a wusungukati gi nga lomu ka broxura legi, ga lomu ka Biblia. A Timboni ta Jehova ti kholwa hi kumbhelela lezaku a Biblia gi na ni wusungukati go tsumbeka. Zi tano hakuva gona gi ‘pimisilwe hi Nungungulu’ niku ga “vuna kugonziseni, ni kukawukeni, ni kululekeni.” (2 Timote 3:16, 17) Hikwalaho, u fanele ku kambisisa a bhuku legi ga ha vunako kala nyamutlha hambu lezi gi tsalilweko kale!