Papilo ga Hubye yi Fumako

Vamakabye va hina vo randzeka:

A ku randza Nungungulu ni vanhu zvi hi kuca a ku ‘famba . . . hi va maha vapizani a vanhu va matiko wontlhe, hi va bhabhatisa’. (Mat. 28:19, 20; Mar. 12:28-31) A lirandzo lo kala ku xengetela li na ni ntamu nguvhu! Loku hi hi ni lirandzo la tshamela lego, hi nga khumba timbilu ta lava va “[longileko] ku amukela a wutomi ga pindzukelwa”. — Miti. 13:48.

A kale, a kungo ga hina ku wa hi ku zama ku khoma magezu ya ku sangula mabhulo hi hloko ni ku avela mabhuku. Kanilezvi zvezvi hi fanele ku ti karatela ku chukwatisa a wutlhari ga hina ga ku bhula ni vanhu. Hi lava ku va kombisa lirandzo vanhu hi ku bhula navo hi timhaka ti va tsakisako. Lezvo zvi wula ku hi fanele kuva vanhu vo olova hi tlhela hi ti karatela ku pola lezvi zvi karatako a vanhu ni lezvi zvi va tsakisako. A broxura legi gi nga hi vhunisa kuyini a ku maha lezvo?

A broxura legi gi na ni 12 wa zvigondzo zvi hi gondzisako a matshamela lawa hi faneleko ku ti karatela kuva nawo kasi hi zvi kota ku va kombisa lirandzo vanhu ni ku maha vapizani. A cigondzo cin’we ni cin’wani ci seketelwa ka matimu ya Bhibhiliya ma wulawulako hi tshamela go kari legi Jesu kutani maKristu yo sangula ma gi kombisileko kuchumayeleni. A kungo ga hina a hi ku khoma magezu ya ku sangula mabhulo hi hloko, kanilezvi ku hlota tindlela ta ku komba ku ha va randza vanhu. Hambu lezvi zvi lavekako ku hiva ni matshamela wontlhe laha hi nyikako wukustumunyu, hi ta wona lezvi a matshamela yo kari ma nga hi vhunisako zvona, nguvhunguvhu a cikhati hi sangulako mabhulo xungetano hi Bhibhiliya, hi mahako marevhizita kutani hi fambisako a zvigondzo zva Bhibhiliya.

Laha u gondzako a cigondzo cin’we ni cin’wani, ehleketa khwatsi hi lezvi u nga kombisisako zvona a tshamela lego a cikhati leci u bhulako ni vanhu va lomu cipandzeni ca wena. Zama ku engetela lirandzo la wena hi Jehovha ni vanhu. A lirandzo lelo hi lona li to ku vhuna a ku u zvi kota ku maha vapizani, a ku hundza ni gihi wutlhari u nga nago.

Ha gi bonga nguvhu a thomo hi nga nago ga ku tira na wena hi mbilu yin’we. (Zef. 3:9) Ngha Jehovha a ku katekisa nguvhu laha u simamako ku randza vanhu ni ku maha vapizani!