Nzi wa alakanya lezaku nzo hanya wutomi go tsakisa

KALE KA MINA:

Nzi pswalilwe ka xidoropana xa le Polônia, kusuhani ni laha mbhinganweni wa Alemanya. Kota lezi nzi nga ranzelwe hi makhwati ni matshamu ya ku hlayisa zifuyo, nzi wa hi ni wutomi go rula. A vapswali va mina va liranzo va wa nzi kuca kuva munhu wa mu nene, nzi humelela khwatsi xikoleni, nzi tlhela nziva ni ntiro wo chaviseka.

A zikarato zi sangulele laha nzi nga sangula ku gonza milayo le universidade, doropeni ga Wrocław. Kota lezi nzi nga hi kule ni vapswali va mina, nzi lo maha wunghana ni vanhu vo biha. Kale ni kale nzi wa yi ranza bhola, kanilezi hi ku kucetelwa hi vanghana va mina va vaswa, nzi lo maha mukhuzeli wa hombe wa bhola. A ntlawa lowu nzi nga khuzela wona wu wata hi le Warsaw, niku kumbheleni ka viki nzi wa va lanzela ni kwihi va ngaya va ya bela kona. Ka tipfhumba leto hi wanwa ku hunza mpimo, ku dzaha, niku ka zikhati zinwani hi walwa ni vaseketeli va mitlawa leyi yinwani. Nzi wa zi wona kota ndlela yo hungula kukarateka ka siku ni siku, hambu lezi nzi nga zi tiva lezaku loku nzo tshuka nzi khonwa zi wa ta onha ntiro wa mina wa ku gonzela nayo.

Mina ni vanghana va mina hi wa ranza kuya lomu madiskoteka ni lomu zingwereni. Loku hi hi kwaseyo, a kutala ka zikhati hi walwa lomu maruweni. Ka zikhati zo tala nzi wa khomiwa hi maphoyisa, kanilezi xontlhe xikhati nzi wa maha xokari kasi nzi potsa timhaka ta hombe ta ku yelana ni nayo — ka zikhati zo kari nzi wa maha lezo hi ku xavelela. Hi lisine nzi wa alakanya lezaku nzo hanya wutomi go tsakisa. Hambu zi hi tano, mbilwini nzi wa zi tiva lezaku lezi nzi nga kari nzi maha zi wa bihile. Sonto ni Sonto nzi waya chechini na nzi mahela ku a livalo la mina li nga nzibi.

LEZI A BIBLIA GI NGA CICISA ZONA A WUTOMI GA MINA:

Hi 2004, a Timboni timbiri ta Jehova ti lota laha kaya ka mina, zonake nzi lo vumela ku gonza nato a Biblia. Kota lezi nzi nga gonzile zo tala xungetano hi lezi zi wulako zona kuva muKristu wa lisine, a livalo la mina li lo sangula ku nziba. Nzi lo wona lezaku nzi fanele ku nyima kunwa nguvu, ku dzaha, ni ku ti tlhanganyisa ni vanhu va nga hanyiko hi matshinya ya milayo ya Biblia. Nzi lo tlhela nzi wona lezaku nzi fanele ku cica mahanyela ya mina ya tihanyi. Hambu lezi nzi nga zi tiva lezaku nzi fanele ku cica, a nzi cicangi nchumu.

A zilo zi cicele ka wusiku go kari laha nzi nga sangula kulwa ni 8 wa vavanuna. Nza alakanya a xikhati lexi va nga nzi wumbulutela laha ruweni, va nziba ni ku nzi khavetela hloko. Na nzizwa lezaku nzi laha kusuhani ni kufa, nzi lo khongela nziku: “Nzi tsetselele Jehova, hi ku kala nzi nga chelangi kota hi Mhaka ya wena. Loku nzo pona, nzi tsumbisa ku gonza Biblia ni Timboni ta Jehova nzi tlhela nzi cica mahanyela ya mina.” Lexi xi hlamalisako hi lezaku nzi ponile futsi. Nzi lo tatisa a xitsumbiso xa mina xa ku gonza Biblia.

Hi 2006, nzi lo rura nziya Inglaterra. A mixuvo ya mina ku wa hi ku kuma mali ya ku tlhela hi yona le Polônia kasi nzi ya engetela zigonzo za mina za ku gonzela nayo. Kota lezi nzi simamileko ni ku gonza Biblia, a mutsalo wo kari wu lo nzi khumba nguvu. Mupostoli Paule i tsalile lezi: “Nza alakanya zilo zontlhe kulahlekelwa hi kota ya kusaseka ka ku tiva Kristu Jesu a Hosi ya mina; hakuva nzi lahlekelwe hi zilo zontlhe hi kota ya yena, nzi zi alakanya lezaku i chaka, kasi nzi fela ku bhinzula Kristu.” (Va Le Filipi 3:8) A ku fana na mina, mupostoli Paule i wa kumile gonziselelo ya nayo — niku yenawu ive wanuna wa tihanyi nguvu. (Mitiro 8:3) Hambulezo, i lo wona lezaku ku na ni ndlela yinwe ntsena ya yi nene wutomini — ku nga ku tirela Nungungulu ni ku maha zontlhe a zi kotako kasi ku pimanyisa Jesu. Loku nzi ehleketile hi xikombiso xa Paule, nzi lo wona lezaku a ntiro wu holelako a mali yo tala ni mahanyela ya tihanyi, ku wa nga hi yona hlowo ya litsako. Nzi lo tiyiseka lezaku loku ku hi lezaku Paule i zi kotile ku cica, minawu nzi nga zi kota. Hikwalaho, nzi lo maha xiboho xa ku simama Inglaterra nzi rivala ku engetela zigonzo za mina za milayo.

Laha nzi ngaya nzi gonza nguvu hi Jehova, nzi lo tshinela nguvu kakwe. Nzi lo khumbiwa nguvu hi xitsumbiso xakwe xa ku tsetselela lava va ti yimiseleko ku cica. (Mitiro 2:38) Niku a xikhati nzi nga ehleketa hi bhuku ga 1 Johani 4:16, legi gi wulako lezaku “Nungungulu liranzo,” nzi lo pola lezaku hikuyini Nungungulu a vengako tihanyi.

Nzi lo tlhela nzi khumbiwa nguvu hi mahanyela ya Timboni. Nzi lo zi wona kubaseni lezaku va hanya hi mahanyela ya ma nene nguvu ma gonzisiwako hi Biblia. Nzi lo xuva ku lumba wumakabye gabye ga misava yontlhe legi va ti buzako hi gona. Anzhako ka kuva nzi lwile nzi cica wutomi ga mina, nzi lo bapatizwa kota Mboni ya Jehova hi 2008.

LEZI NZI NGA VUNEKISA ZONA:

A Biblia gi lo cica wutomi ga mina lezaku nzi nga ha khataleli za mina ntsena, kuva wa tihanyi, ku dzaha, kunwa nguvu, ni kuva mukhuzeli wa hombe wa bola, kanilezi nzi maha nanza ga Nungungulu legi ti buzako hi ku gonzisa vanwani Biblia. Nza ha yi ranza bola, kanilezi nzi ti yimisele ku veka mihlakano wutshanwini ga yona.

Zalezi nzi na ni wukati go tsakisa na Esther, a nga mukhozeli-kulori wo ranzeka wa Jehova. Hi kuma litsako la lisine hi ku gonzisa Biblia ka vanhu va wulawulako xiPolonia leno mupela-gambo wa Inglaterra. Cima nzi pswaliwa nzi wa nga se tshuka nzizwa litsako lo kota leli nzi li zwako makunu. Nzi na ni livalo li basileko, niku nzi hanyela xo xi tiva.