Kwadro Ga Ziwutiso

◼ Xana a “nanza gi tsumbekileko ni go tlhariha” ga yi vumelela a mitlawa yi ti hambanyisileko ya Timboni leyi yi tlhanganako kasi ku nghenela a kukambisisa kutani ku xuxisana hi mitsalo? — Mat. 24:45, 47.

Ahihi, a gi yi vumeleli. Hambulezo, zipanzeni zo hambanahambana za misava, a va tsongwani va hlengelako ni hlengeletano ya hina va wumbile a mitlawa yi ti hambanyisileko lezaku va kambisisa a timhaka ti yelanako ni Biblia. A vo kari va mahile a mitlawa yi ti hambanyisileko ya xigonzo xa Biblia xa Mitsalo ya Xiheberu ni ya Xigreki kasi va hlola a kumbhelela ka Tradução do Novo Mundo. A vanwani va kambisisa a timhaka ta Siensia ti yelanako ni Biblia. Vona va mahile a maWeb sites ni machat rooms kasi ku bhulisana zinwe ni ku xuxisana hi mawonela yabye. Vona kambe vona va maha a mitlhangano va tlhela va humesa a mabhuku kasi ku kombisa lezi va zi polileko ni ku seketela lezi zi kumekiswako hi mitlhangano ya hina ya wuKristu ni mabhuku ya hina.

Misaveni yontlhe, a vanhu va Jehova va amukela a gonziselelo wunyingi wa moya ni kutiyiswa lomu mitlhanganwini ya bandla, mitlhanganwini ya hombe, ni lomu ka migotsovanyano, zinwe ni lomu ka mabhuku ya hlengeletano ya Jehova. Hasi ka kongomiso wa moya wakwe wo basa ni hi ku tirisa a Mhaka yakwe ya zinene, Jehova i kumekisa lezi zi lavekako lezaku vontlhe vanhu va Nungungulu va “zwanana hi kualakanya ni kupima” ni ku simama va “tiyiswa kukholweni.” (1 Kor. 1:10; Kol. 2:6, 7) Hakunene ha bonga a malulamiselo ya Jehova ya moya masikwini lawa yo gumesa. Hizalezo, a “nanza gi tsumbekileko ni go tlhariha” a gi vumeleli a mabhuko, mitlhangano, kutani ma Web sites lawa ma nga humeswiko kutani ku lulamiswa hasi ka wuwoneleli ga gona. — Mat. 24:45-47.

Va dzunziwa a vanhu lava va lavako ku tirisa a wuzikoti gabye ga kualakanya kasi ku vunetela a mahungu yo saseka. Hambulezo, a ku na ntiro wu faneleko wu hambukisa lezi Jesu a zi tatisako hi ku tirisa a bandla gakwe misaveni inyamutlha. Ka zana go sangula, mupostoli Paule i tlharihisile xungetano hi ku ti patsa ka timhaka to karata, ti gako xikhati, to kota “tikaringani ni ku lanzelela ziloso zi nga hetekiko, lezi zi vangako kukanetisana, loku ku nga vuniko a ntiro wa Nungungulu lowu wu nga wa kukholwa.” (1 Tim. 1:3-7) Wontlhe a maKristu ya lisine ma fanele ma ti karatela a ku “nyenya timhaka ta wupumbu, ni mabhuku ya ziloso, ni kukanetisana ni kulwa hi kota ya nayo, hakuva a zi na bhinzu, a zi vuni nchumu.” — Titusi 3:9.

Ka lava va lavako ku maha a xigonzo xi engetelekileko xa Biblia ni kukambisisa, hi kuca lezaku va hlola a Estudo Perspicaz das Escrituras, “Toda a Escritura É Inspirada por Deus e Proveitosa,” ni mabhuku manwani ya hina, yo kota lawa ma wulawulako hi ziprofeto zi kumekako lomu ka mabhuku ya Biblia ya Danieli, Isaya, ni Kuvululelwa. Wona ma na ni timhaka tinyingi ta xigonzo xa Biblia ni kualakanyela, lezaku hi fela ku ‘tatiswa hi ku tiva [ka Nungungulu] a kuranza kakwe nzeni ka wutlhari gontlhe ni kupima kontlhe ka moya, lezaku hi famba hi laha ku faneleko Hosi, hi yi xalalisa ka zontlhe, ni ku pswala mihanzu mitirweni yontlhe yo saseka, hi kula kutiveni ka Nungungulu.’ — Kol. 1:9, 10.