Kuvuxeta Ka Xikola Xa Wutireli Ga Nungungulu
A ziwutiso lezi zi lanzelako zi ta kambisiswa ka Xikola Xa Wutireli Ga Nungungulu ka viki gi sangulako hi 25 ka Fevereiro wa 2008. Hi 30 wa timeneti, a muwoneleli wa xikola i ta fambisa a kuvuxeta ku seketelwako ka timhaka ti gonzilweko ka ziavelo za maviki ya 7 ka Janeiro kala 25 ka Fevereiro wa 2008. [Cuwuka: Laha ku kalako ku nga kombiswangi lomu a hlamulo wa xiwutiso wu kumekako kona, u fanele ku kambisisa ha wece lezaku u kuma a mihlamulo. — Wona Escola do Ministério, pp. 36-7.]
MATSHAMELA YA WUKANELI
1. Zini hi faneleko ku maha kasi ku vuna a vaingiseli lezaku va zwisisa a tlhamuselo wa mitsalo, niku hikuyini zi faneleko ku mahiwa lezo? [be p. 228 tinz. 2-3] Hi fanele ku mbheta xikhati xi ringanako kasi ku tlhamusela ni ku komba a matirisela ya mitsalo leyi hi yi lerako. Hi ku maha lezo hi “tlhamusela” a mitsalo leyo hi kudlunyatekileko. (Neh. 8:8, 12) A xikhati lexi hi kombako a matirisela ya mitsalo, hi vuna vaingiseli lezaku va wona lezi a mahungu lawo ma faneleko ku khumbisa zona a wutomi gabye.
2. Hikuyini zihi za lisima a ku maha lezaku a tikanelo ta hina ti vuna vaingiseli, niku xana hi nga zi mahisa kuyini lezo? [be p. 230 tinz. 3-5, bhokisa] A ku byela vanhu lezi va sinako va zi tiva ntsena a zi zi koti ku koka a kupima kabye. A khungo ga hina ku kuca kupimisa ni ku maha a vaingiseli va wona lezaku va gonzile zilo zi nyawulako. Ha zi kota ku maha lezo hi ku kambisisa lezi a vaingiseli va sinako va zi tiva xungetano hi hloko ya mhaka ni ku wonelela a matsutsumela ya kanelo wa hina — hi wu hatlisisa lomu ka timhaka leti ti tivekako nguvu ni ku wu nonokisa lomu ka timhaka ta tiswa.
3. Xana a kukambisisa ku nga engetelisa kuyini a mahungu ma gonzisako tikanelweni ta hina? [be p. 231 tinz. 1-3] A kukambisisa ku ta hi vuna a ku nyika mitlhamuselo yi gonzisako a ku hunza ku wulawula zilo zi tolovelekileko. Hi nga ha kuma matinwanyana ya lisine ma tivekako kutani magezu yo kari ma ha hi ku wuliwako lomu ka zihaxa-mahungu lawa ma nga wa ta kombisa khwatsi a mhaka leyi hi lavako ku yi kanela.
4. Zini lezi hi nga zi mahako kasi a kutlhamusela ka hina a mitsalo yi tolovelekileko nguvu kuva loku ku gonzisako? [be p. 231 tinz. 4-5] Hi fanele ku ti nyika xikhati xa ku tlhamusela ni ku anzisa a zipanze zo kari za mutsalo lowu hi wu kambisisako. Hlawula a magezu lawa ma yelanako ni hloko ya mhaka. Hi xikombiso, loku hi tlhamusela Mika 6:8, hi nga ha tlhamusela nguvu lezi a kululama kutani kutikoramisa zi nga zona. Kutani hi nga ha tlhamusela hi mufananiso lezi a ku “ranza wuxinji” zi wulako zona.
5. Hikuyini zi nga za lisima a ku tlhamusela a mitsalo leyi hi gonzako? [be p. 232 tinz. 3-4] A xikhati lexi hi tlhamuselako Mitsalo, hi vuna vanhu a ku gonza a Mhaka ya Nungungulu hi wukheta va tlhela va zwisisa a mitlhamuselo yo eta leyi va nga wa ta ngha va yi hunzile. (Mat. 22:41-45) Hi nga maha lezo hi ku va komba manwani mahungu ma yelanako ni mutsalo lowo, a matshamela ya lomu wu nga tsaliwa kona, kutani a ku tivekisa a muwulawuli kutani muingiseli wa wona.
XIAVELO N.° 1
6. Xini lexi xi kombako lezaku a bhuku ga Mateu gi tsalilwe na ku alakanyelwa nguvu a vaJuda? [bsi08-1 p. 4 tinz. 6-7] A mhaka ya lezaku a bhuku ga Mateu gi lo tsaliwa na ku alakanyelwa nguvu a vaJuda yi woneka hi xaxameto wa yona wa xixaka, lowu wu kombako Jesu kota xizukulwana xa nayo kusukela ka Abrahama, ni kukumbuka ka yona a Mitsalo ya xiHeberu hi kukhanzakanya, leyi yi nga komba lezaku a mitsalo leyo yi wa xungeta a kuta ka Messia. Kambe ku na ni xikombiso xa lezaku a kusangula Mateu i tsalile a Ivangeli yakwe hi xiHeberu.
7. Xana hi nga longiselisa kuyini a timbilu ta hina lezaku hi amukela a gonziselelo ya Nungungulu hi laha xiluvelweni? (2 Kro. 20:33, Tradução do Novo Mundo) [be p. 13 nzi. 4–p. 14 nzi. 5] A yinwe ya tindlela ta lisima ta ku longisela a timbilu ta hina lezaku hi amukela a gonziselelo ya Jehova ku khongelela a moya wa kubonga. (Tis. 27:4; 95:2) Hi nga tlhela hi khongelela a kurula ka maalakanyo ni ka mbilu kasi ku hlongola a ‘kukarateka ka mbilu’ kwihi ni kwihi loku ku zi kotako ku hi hambukisa kupima. (Tis. 94:19) A ku cuwuka mukaneli hi tlhela hi lanzela a kugonziwa ka mitsalo lomu ka maBiblia ya hina zi nga hi vuna a ku kongomisa a kupima ka hina.
8. Zini lezi a vapswali va nga zi mahako kasi ku gonzisa vana vabye lezaku va maha vo ‘tlhariha, va kala va hanyiswa’? (2 Tim. 3:15) [be p. 16 tinz. 3-4] A vapswali va fanele ku maha mizamo yontlhe lezaku vata ni vana vabye mitlhanganwini ya wuKristu, mitlhanganwini ya hombe, ni lomu migotsovanyweni. Laha kaya, a vapswali va zi kota ku lava xikhati xa ku tshamisa vanana va rula, va cuwukela zithombe lomu ka mabhuku ya hina ya wuKristu. A vana va nga ha lavelwa a mabhuku yabye wutsumbu lawa ma ta nga tiriswa lomu mitlhanganwini ya hina. Hi kufamba ka xikhati, a vapswali va zi kota ku vuna a vana vabye a ku longisela mihlamulo yo koma.
9. Xana a Ivangeli ya Mateu yi khanyisisa kuyini a kutatiseka ka wuprofeti ga Biblia? [bsi08-1 p. 5 nzi. 32] A Ivangeli ya Mateu yi na ni mitshaho yo tala ya lomu ka Mitsalo ya xiHeberu niku yi komba lezi a ziprofeto lezo zi nga tatisekisa zona. Hi xikombiso, Mateu 13:14, 15 gi tshaha Isaya 6:9, 10; Mateu 21:42 gi komba a kutatiseka ka Tisimu 118:22, 23; niku Mateu 26:31, 56 gi yisa kupima kutatisekeni ka Zakaria 13:7. A kutatiseka loko ku hi nyika xiseketelo xo tiya xa ku kholwa lezaku Jesu hi yena Messia ni xa ku tsumba a ziprofeto lezi Jesu wutsumbu a zi nyikileko, lezi zi tsalilweko hi Mateu.
10. Hambu lezi a Ivangeli ya Mateu yi tlhamuselako Jesu kota Messia loyi a tsumbisilweko tlhelo Hosi, xana a Ivangeli ya Marku yi mu tlhamuselisa kuyini? [bsi08-1 p. 7 tinz. 7-8] A Ivangeli ya Marku yi tlhamusela Jesu kota N’wana wa Nungungulu a mahako zihlamaliso ni Muhanyisi. Yi kumbuka hi kukongoma a 19 wa zihlamaliso hi wutsongwani ga kona. Marku i khanyisa a mitiro ya Jesu wutshanwini ga kugonzisa kakwe. Hambulezi a nayo wa Mosi ni xaxameto wa lixaka la Jesu zi nga kumbukiwiko nguvu lomu ka Ivangeli ya Marku, a mikhuwo ya xiJuda ya tlhamuselwa, lezi zi kombako lezaku Marku i tsalile kasi ku vuna nguvunguvu a vaRoma.
KUGONZA KA BIBLIA KA VIKI NI VIKI
11. Xana a ku kombisa zanga zi bihile nguvu a ku hunza ku simama na u zangarile? (Mat. 5:21, 22, NM ) [w08 15/1 “A Palavra de Jeová É Viva — Destaques do livro de Mateus”] Jesu i tlharihisile lezaku a ku ‘simama na u zangarele makabye wa wena zi bihile a ku fana ni ku daya. Hambulezo, a ku kombisa zanga hi ku wula gezu ga kuchepeta zi bihile nguvu, laha ka kuza zi yisa munhu kulamulweni hi hlengeletano a ku hunza ku lamulwa hi hubye.
12. Xana a maKristu ma hlayisisa kuyini a ‘tihlo gi cuwukako hi kutshonometa’? (Mat. 6:22, 23) [w06 1/10 p. 29] A tihlo gi cuwukako hi kutshonometa ga tsumbeka, gi na ni zigelo zi nene, niku a gi na matshanza ni kumbilukela. A kuva ni tihlo gi cuwukako hi kutshonometa a zi wuli ku hanya wusiwaneni ga magumo kutani ku nga khataleli a wutihlamuleli ga hina ga wuKristu. A ku hambana ni lezo, zi wula ku kombisa kutikhoma a xikhati lexi hi rangisako a ntiro wa Jehova. (2 Tim. 1:7)
13. I mhaka muni leyi Jesu a nga kari a yi khanyisa a xikhati lexi a nga wutisa a vapizani vakwe aku: “Mu ti pimile a timhaka tontlhe leti ke?” (Mat. 13:51, 52) [w08 15/1 “A Palavra de Jeová É Viva — Destaques do livro de Mateus”] Jesu i wa khanyisa a lisima la ku zwisisa a zinene za Mufumo. A ku zwisisa a zinene za Mufumo ku neha a wutihlamuleli ga ku gonzisa vanwani ni ku hlengela navo a titshomba leto.
14. Hikuyini Jesu a nga tolovela ku laya lava a nga va hanyisa lezaku “va nga mu zwatisi”? [w87 15/5 p. 9; cl pp. 93-4] Jesu i wu tirisile khwatsi a ntamu wakwe. Yena a nga mahangi zihlamaliso kasi ku ti kulisa. (Mat. 4:5-7; Luka 23:8, 9) I wa nga lavi lezaku a vanhu va mu tiva hi wuzikoti gakwe ga ku maha zihlamaliso.
15. Xana Jesu i wa lava ku wula yini xungetano hi “mpimo” lowu munhu a “pimako” ha wona? (Mar. 4:24, 25) [w80 15/12 p. 12; gt xip. 43] Loku hi nga mu khataleli nguvu Jesu, a hi zi koti ku rinzela ku amukela zo tala ka yena. Kanilezi loku hi mu khatalela hi kumbheleleko, yena i ta hi hlamula hi ku hi nyika mahungu ni wutlhari ga ku zwisisa Mitsalo za ku hunza lezi hi nga zi rinzele. Hi ndlela leyo hi ta vuneka nguvu hi tlhela hi zi kota khwatsi a ku gonzisa a kuzwisisa loko vanwani.