Kuvuxeta Ka Xikola Xa Wutireli Ga Nungungulu
PHEPHA GA MIHLAMULO YA KUVUXETA KA XIKOLA XA WUTIRELI GA NUNGUNGULU GI ENETAKO A ZIAVELO ZI SUKELAKO KA VIKI GA 7 KA SETEMBRO KUYA KA 26 KA OUTUBRO WA 2009.
MABHUKU MA TO TIRISWA: A Biblia Go Basa ni A Sentinela [w].
ZILELETELO: A munwe ni munwani i fanele kuva ni ziwutiso za kuvuxeta lezi zi longiselweko lomu ka Wutireli Ga Hina Ga Mufumo. A kuvuxeta ku fanele ku komba a lisima la timhaka leti ti kambisisilweko ka Xikola Xa Wutireli Ga Nungungulu nzeni ka tihweti timbiri leti ti hunzileko. Loku a xikhati xi vumelela, a muwoneleli wa xikola a nga ha maha ziwutiso zinwani, kasi ku dlunyatisa a timhaka ta lisima, ku khanyisa a zigelo za mihlamulo, kutani ku kuca vaingiseli lezaku va nyika mihlamulo yi kombako a ndlela leyi a timhaka ti tirako ha yona. A hi xikhati xontlhe zi kotekako lezaku a phepha ga mihlamulo giva ni mihlamulo yontlhe yi lavekako; hikwalaho a hlamulo wihi ni wihi lowu lava va nga kona va wu nyikako na wu faneleka ni kuva wu yelana ni kuzwisisa loku hi nga nako zalezi wa amukeleka, hambu loku a mhaka leyo yi nga kumeki lomu ka phepha ga mihlamulo. Loku ku hi lezaku a mu se maha a kuvuxeta loku, a phepha ga mihlamulo a gi faneli ku nyikiwa a vamakabye lezaku va gonza, kanilezi gi nga ha tiriswa hi muwoneleli wa xikola kasi gi mu kongomisa ka timhaka leti a lavako ku ti khanyisela bandla. A kuvuxeta a ku faneli ku hunza a 20 wa timeneti.
XIALAKANYISO KA VAWONELELI VA XIKOLA: Mahani wuxinji mu hlawula a mugonzi a ringanelwako wa Xigonzo xa A Sentinela lezaku a ta gonza laha xiluvelweni a mitsalo yi kumekako nzeni kutani anzhako ka xiwutiso xinwe ni xinwani, hi kuyelana ni lezi a xiwutiso xi tisako zona lomu ka Wutireli Ga Hina Ga Mufumo. Hi tolovelo, a mitsalo leyo yi fanele ku gonziwa na mu nga se maha a xiwutiso. Hi kota ya lezi a xikhati xa kuvuxeta xi nga xi tsongwani, mu nga ha tirisa wutlhari ga nwina kasi ku boha a ku xana a mitsalo yo leha leyi yi kumbukilweko yi fanele ku gonziwa kutani ku songiwa ntsena.
A siku gi tsalilweko anzhako ka xiwutiso gi komba a viki legi a timhaka ti gonzilweko ka gona.
1. Lezi ku nga Jehova a byelileko Balaami lezaku a famba ni vavanuna va Balake, hikuyini Jehova a zangareleko Balaami a xikhati lexi a nga famba navo? (Mitse. 22:20-22) [7 ka Set., w04 1/8 p. 27 nzi. 2] A zanga ya Jehova yi lo vukela Balaami hi kota ya makangwa ya muprofeti loyi. Balaami i lo famba ni vavanuna va Balake na a ti yimisele a ku rukatela Israeli. I wa lava ku tsakisa a hosi ya Moabi zonake a amukela a nchachazelo. A xikhati lexi Balaami a nga kurumetiwa a ku katekisa a vaIsraeli wutshanwini ga ku va rukatela, yena i lo nyika mawonela ya lezaku ku tiriswa a vavasati lava va nga khozela Baali lezaku va khohlisa a vavanuna va Israeli. (Mitse. 31:15, 16) Lezi zi mahile lezaku kufa a 24.000 wa vanhu.
2. Xana a kuva Fineasi a ‘pinyamele’ Jehova zi hi vunisa kuyini lezaku hi alakanyela hi kutihendleleta ka hina ka Nungungulu? (Mitse. 25:11) [7 ka Set., w95 1/3 p. 16 nzi. 13] Fineasi i wa hi xikombiso xo hlawuleka xa kuhiseka. Yena i pinyamele Jehova hi kumbhelela. A hi faneli ku vumelela ni xihi xilo lezaku xi teka a wutshamu legi gi lumbako a kutihendleleta ka hina ka Jehova. A ku fana na Fineasi, a ku mu pinyamela ka hina Jehova ku hi kuca a ku hlayisa bandla na gi basile hi ku bika a xionho xa hombe ka madota, hi nga xi vumeleli.
3. Hikuyini Joxua a hlawulilwe a kuva muvaleti wa Mosi? (Mitse. 27:15-19) [14 ka Set., w02 1/12 p. 12 nzi. 1] Jehova i wa wonile a kukholwa ka Joxua zinwe ni wuzikoti gakwe niku i mu tlhamusele kota “munhu loyi a nga ni moya.” A ku fana na Joxua, lava va ti karatelako ku chikelela a malungelo lomu bandleni inyamutlha va ta kuma wutlhari ni kuhumelela loku va lera a Mhaka ya Nungungulu siku ni siku va tlhela va maha lezi va gonzako.
4. Xana a bhuku ga Mitsengo 31:27 gi nga ma tiyisisa kuyini a maKristu inyamutlha? [21 ka Set., w05 15/3 p. 24] A vesi legi gi komba lezaku Jehova wa va nyika lisima lava va mahako a mitiro ya kuvunetela lomu bandleni. Hikwalaho, kani hi xihi lexi hi xi mahako, a hi xi ‘maheni hi mbilu; khwatsi hi loku hi tirela Hosi, na ku nga hi vanhu.’ (Kol. 3:23)
5. Xana a lulamiselo ga miti ya wuponelo gi wa va vunisa kuyini a vanhu le Israeli? (Mitse. 35:11, 12) [28 ka Set., w95 15/11 p. 14 nzi. 17] Gi wa khanyisela a mudayi loyi a deleko munhu hi mhango lezaku a wutomi gi basile. A ku alakanyela hi lulamiselo legi ga tipswalo handle ko kanakana zi wa ta mu kuca a ku kombawu a tipswalo ka vanwani. A lulamiselo ga Nungungulu ga miti ya wuponelo gi tlhela gi alakanyisa a vanhu vontlhe a xilaveko xa ku ti wonela nguvu kasi ku nga dayi munhu hi mhango.
6. Hikuyini a kupima ku nene ku hi tshamela ga lisima nguvu ga wuKristu, niku hi gihi a wuyelo ga kona? (Deut. 1:13) [5 ka Out., w03 15/1 30; w00 1/10 p. 32 tinz. 1-3] A munhu a nga ni kupima ku nene i kombisa a wutlhari hi mawulawulela ni mahanyela yakwe. Loyi a nga ni kupima ku nene a nga byabyatsi. Wa pimisa na a nga se wulawula niku wa zwanana ni vanwani. A ‘kupima kakwe ka ku nene’ ku mu maha a hlawula khwatsi a magezu. (Mav. 12:8, Tradução do Novo Mundo)
7. Xana a Nayo wa Mosi wu wa kombisa a kululama ka Nungungulu hi tindlela muni? (Deut. 4:8) [12 ka Out., w02 6/1 p. 14 nzi. 8–p. 15 tinz. 9-10] Hi ku tirisa a Nayo wa Mosi, Jehova i lo veka kubaseni a milayo yakwe yo lulama xungetano hi lezi zi nga zi nene ni lezi zi bihileko. A Nayo wu wa wulawula hi zilo zi fambelanako ni wukhongeli, mabhinzu, kutekana, kulamula, magela, ni kubasa. Hambu lezi a Nayo wu nga tsayisa lava va nga wu tshova, wona wu wa nga suseli vanhu a kutlhatlheka kabye ni litsako. Hi lisine, lava va nga ranza Jehova va wa tsakiswa nguvu hi zileletelo zakwe zo lulama.
8. Tlhamusela a ndlela yi faneleko ni ndlela yi nga faneliko ya ku ringa Jehova, hi kuyelana ni Deuteronome 6:16-18. [12 ka Out., w04 15/9 p. 27 nzi. 1] A vaIsraeli va kombisile a ndlela yi nga faneliko ya ku ringa Nungungulu hi ku kurumeta Jehova vaku: ‘Loku u hi xikari ka hina, hikuyini u nga hi nyikiko mati hinwa?’ (Ekso. 17:2, 3, 7) A ndlela yi faneleko ya ku ringa Jehova yi kombiwa ka vesi 18 — ku tsumba a zitsumbiso za Nungungulu hi tlhela hi rinzela a kuva a katekisa a mizamo ya hina a xikhati lexi hi lanzelelako a zileletelo zakwe.
9. Xana a zilaveko za vaIsraeli zi enetisilwe kuyini hi timhaka ta Jehova, niku xana a timhaka leto ti nga zi enetisa kuyini a zilaveko za hina inyamutlha? (Deut. 8:3) [19 ka Out., w99 15/8 pp. 25-26] Hi kota ya magezu, kutani timhaka, ti humileko hi nonwini wa Jehova, a vaIsraeli va lo kuma a zilo zi wonekako, zo kota zakuga ni tinguwo. (Deut. 8:3, 4) Na va nga kumangi ni xinwe xa lezo loku Jehova i wa nga layangi lezaku va zi kuma. Hikwalaho, hi kukongoma a vaIsraeli va wa hanya hi “timhaka tontlhelele,” kutani zilayelo, “zi humako nonwini wa Nungungulu.” Inyamutlha ha giswa hi ku gonza a zileletelo za Jehova zi kumekako Mhakeni yakwe. A ku hunza lezo, hi ku khegela ka Jehova, a kukholwa ka hina ka tiyiswa a xikhati lexi hi wonako a ndlela yo hlamalisa leyi yena a hi vunako ha yona.
10. Xana Deuteronome 12:16, 24 gi ma khumbisa kuyini a mawonela ya hina xungetano hi machumela lawa ma patsako a kutiriswa ka nkhata wa hina wutsumbu? [26 ka Out., w00 15/10 p. 30 nzi. 7] Ka zikhati zo kari, a dokodela i ta kuca a mubabyi lezaku a nyikela a nkhata wakwe wutsumbu na ka ha sele a maviki yo kari lezaku a mahiwa a wuhanzuli kasi loku kuva ni xilaveko, a mubabyi a fela ku cheliwa a nkhata wa yena wutsumbu lowu wu nga hlengeletilwe ka wutshamu go kari. Hambulezo, a kususiwa, kuhlengeletwa, ni kucheliwa loko ka nkhata ku lwisana hi kukongoma ni lezi a Mitsalo yi pimisilweko yi wulako. (Levi 17:13; Deut. 15:23) A nkhata a wu faneli ku hlengeletwa; wu fanele ku halatwa — wu tlheliselwa ka Nungungulu hi ndlela yo fananisa. A maKristu ya lisine ma ti yimisele a ku ‘tsika nkhata.’ (Mit. 15:29) Hikwalaho, a hi nyikeli a nkhata wa hina, ne a hi hlengeleteli a nkhata wa hina wutsumbu hakuva wu fanele ku ‘halatwa.’