Xumayela Hi Xihatla!
1. Kululeka muni ka Paule loku hi faneleko a ku ku nyika nguvu lisima inyamutlha?
1 “Kanela a mhaka; pinyama [ka yona hi xihatla, Tradução do Novo Mundo].” (2 Tim. 4:2) Hikuyini a kululeka ka Paule ku nga ka lisima nguvu inyamutlha? Xana a magezu lawa ma gi khumbisa kuyini a wutomi ga hina zinwe ni ga vanwani?
2. Hikuyini hi ti karatelako a ku langutela lava va kalako va nga sezwa a mahungu yo saseka?
2 A Wutomi Gi Le Mhangweni: A vanhu va timiliyoni misaveni yontlhe va ha fanele kuzwa a mahungu yo saseka lawa ma zi kotako a ku va ponisa. (Rom. 10:13-15; 1 Tim. 4:16) Ka kumiwa a vanhu vo tala va timbilu ti nene matshanwini lawa ma tiriwako hi kukhanzakanya. Loku hi va enzela hi masiku kutani zikhati zo hambanahambana, hi nga ha kuma a vanhu vanwani. A ku langutela vanhu hi ndlela leyo ku ta hi siya na hihi ni livalo li basileko na hi nga hi na nanzu wa nkhata. — Miti. 20:26.
3. Xana hi nga xi tirisisa kuyini a xikhati hi wutlhari wutirelini?
3 Hambu lezi ma nga yimisana ni kukanetwa ka tihanyi, a maKristu ya zana ga malembe go sangula ma ‘tatisile Jerusalema hi kugonzisa ka wona.’ (Miti. 5:28) Xana hinawu hi ti yimisele a ku “kustumunya hi ivangeli”? (Miti. 20:24) Loku hihi wutirelini, xana ha xi tirisa khwatsi a xikhati? Loku hi kari hi rinzela vokari va mahako a lienzo lo wuyela, xana ha ti karatela ku bhula ni lava va hunzako?
4. Xana a ku xumayela hi xihatla ku hi vunisa kuyini a ku tshama na hi rinzele?
4 Ku Hi Vuna A Ku Tshama Na Hi Hanyanya: Kota lezi a kugumesa ka mafambisela lawa ya zilo ku nga laha kusuhani, hi fanele ku hanyanya, hi tshama na hi rinzele. (1 Tes. 5:1-6) A xikhati lexi hi bhulako hi kukhanzakanya xungetano hi kutsumba ka hina ka Mufumo, hi potsa a ku binziwa hi mafambisela lawa ya zilo. (Luka 21:34-36) Kota wuyelo ga kona, a xikhati lexi hi tshamako na hi alakanya a siku ga Jehova, hi kuciwa a ku engetela a kuhlengela ka hina ntirweni wa kuxumayela, lowu wu ponisako wutomi. — 2 Ped. 3:11, 12.
5. Xana a ku kombisa xichawo hi wutomi ku hi kucisa kuyini wutirelini?
5 Loku hi xumayela hi xihatla hi pimanyisa a mawonela ya Jehova xungetano hi wutomi: ‘A nga ranzi lezaku ku lova ni munwe, kanilezi i ranza lezaku vontlhe va hunzuluka.’ (2 Ped. 3:9; Ezek. 33:11) Ngha hi ti yimisela a ku wulawula ni vanhu vo tala hi laha zi kotekako ha kona xipanzeni xa hina, na hi lwela lezaku Jehova a dumiswa! — Tis. 109:30.