“Zana ga malembe na ku huwelelwa a Mufumo!” — A timhaka leti ti susilwe ka bhuku Testemunhas de Jeová — Proclamadores do Reino de Deus

Maphajina 259 ni 260

A Zigonzani za Biblia a zi tlhanganangi ka gotsovanyano lowu na zi alakanya lezaku zo longisela ntiro lowu wu nga wa ta mahiwa laha misaveni hi makume ya malembe ma nga hata. Hi lisine, zi wulile lezaku lowu wu wa tava gotsovanyano wo gumesa mahlweni “ko tlhatlhiswa ka chechi . . . lezaku yi nghena ka makungo ya le tilweni Mufunweni wa Nungungulu, niku hi lisine zi ta maheka mahlweni ka Hosi ya hina ni Nungungulu wa hina.” Kanilezi, hambu lezi a xikhati xi nga hi xi tsongwani, va wa rangisa nguvu a ku maha kuranza ka Nungungulu. Na va hi ni lezo maalakanyweni, hi Wazihlanu, 8 ka Setembro, Makabye Rutherford i lo veka kanelo yi nga rivalekiko yi ngaku “A Mufumo.”

Na ku nga se maheka lezo, ka matshamu yo hambanahambana laha ka gotsovanyano ku wa gwimbilwe tinguwo ta hombe ti nga tsalilwe a maletela ADV. A tlhamuselo wa maletela lawa wu lo sangula ku tiveka laha a mukaneli a nga kuca vaingiseli aku: “Ngha mu tsumbeka Hosini mu tlhela muva timboni ta lisine. Yanani mahlweni mulwa kala mu fuvisa masema wontlhe ya mawunwa ya Babuloni. Huwelelani a mahungu matshanwini wontlhe. A tiko gi fanele ku zi tiva lezaku Jehova i Nungungulu ni lezaku Jesu Kristu i Hosi ya tihosi tlhelo Mufumeli wa vafumeli. Nyamutlha i siku ga hombe ka wontlhe. Langutani, a Hosi ya fuma makunu! Nwina mu vahuweleli va yona. Hikwalaho, huwelelani, huwelelani, huwelelani, a Hosi ni mufumo wa yona.” Zalezo, ku lo gwimbiwa a nguwo ya 11 wa timetro a kuleha mahlweni ka vaingiseli. Ka nguwo leyo ku wa tsalilwe a magezu “Huwelelani [hi xiNgiza Advertise, gi yimelwako hi ADV] a Hosi ni Mufumo.” Xi vile xikhati xo tsakisa nguvu. A vaingiseli va loba mandla hi kuhiseka ka hombe. Makabye Pfannebecker, loyi a nga khosahele, a nga hi ka ntlawa wa vayimbeleli ka mutlhangano lowo, i lo tlakusa viyola hehla ka hloko yakwe a kanyuluka hi xiAlemão aku: “Ach, Ya! Und now ve do it, no (Ina! Niku makunu hi ta maha zalezo, a hi zona)?” Niku va mahile zalezo futsi.

Anzhako ka mune wa masiku, na gotsovanyano wa haya mahlweni, Makabye Rutherford i lo hlengela zinwe ni vatsombani vanwani ntirweni wa ku huwelela Mufumo hi muti ni muti ka pfhuka wa 72 wa tikilometro kusukela laha va nga mahela kona gotsovanyano. A zi gumesangi laho ntsena. A ntiro wa ku huwelela a Mufumo wu lo vuvumiswa nguvu hi ndlela ya kuva wu chikela misaveni yontlhe. Ka lembe lego, xipimo xo hunza a 17.000 wa vatiri vo hiseka ka matiko ya 58 va lo hlengela kunyikeleni ka wukustumunyu. Makume ya malembe nzhako, George Gangas, loyi a nga hi kona ka gotsovanyano lowo ni loyi hi nzhako ka xikhati a ngava xiro xa Hubye yi Fumako, na a wulawula hi longoloko lowo le Cedar Point i te ngalo: “Zi vile zilo zi tsalilweko ka maalakanyo ni lomu mbilwini ya mina hi ndlela ya kuva zi nga vinyeki, lezi nzi to zi rivala hi kufa.”