A Bhibhiliya gi nga ndzi vhuna loku ndzi karatekile?

Hlamulo wa Bhibhiliya

Ina, hakuva a civhuno ca ci nene cita hi ka “Nungungulu loyi a chavelelako lava va karatekako.”​ — 2 Va Le Korinte 7:6.

Zvini lezvi Nungungulu a va nyikako lava va karatekileko kasi ku va vhuna?

• Ntamu. Nungungulu ‘wa ku tiyiseta ni ku ku nyika ntamu’, na a ngayi hi ku susa a zvikarato zvontlhe zva wena, kanilezvi hi ku hlamula mikhongelo ya wena loku u kombela a ntamu wa kulwa ni zvikarato. (Va Le Filipi 4:13) Tiyiseka lezvaku i longile ku ku ingisela, hakuva a Bhibhiliya gi ngalo: ‘Jehovha i kusuhi ni lava va tshovekileko timbilu; a hanyisa lava va nga ni moya wu pandzekileko.’ (Lisimu 34:18) Kunene, Nungungulu a ngazwa a kurila ka wena ka ku lava ku vhuniwa hambu loku u zvi tsandzeka a ku wula lezvi u ti zwisako zvona hi magezu.​ — Va Le Roma 8:26, 27.

• Zvikombiso zva zvinene. A mun’we wa vatsali va Bhibhiliya i no khongela aku: ‘Ndziba huwa ka wena na ndzi hi lomu kueteni lahasi.’ Leci ci nga vhuna a mutsali loyi wa lisimu a kulwa ni kukarateka kakwe, ku alakanya lezvaku Nungungulu a nga hi rwexi nandzu. Kanilezvi i te ngalo ka Nungungulu: “Loku a wo xaxameta a zviwonho zva hina, himani a nga wa ta pona ku koniwa? Kanilezvi wena wa hi tsetselela, hikwalaho ha ku chava.”​ — Lisimu 130:1, 3, 4, Bíblia na Linguagem de Hoje.

• Kutsumba. Wutshan’wini ga ku hi chavelela ka cikhati leci basi, Nungungulu i tsumbisa ku susa zvontlhe zvi hi vangelako kukarateka. A cikhati leci a to tatisa a citsumbiso leco, ‘a zvilo zva kale [a ku patsa ni kukarateka ka maalakanyo] zvi nga ta ha alakanyiwa, ge hambu ku wuya lomu [mbilwini].’​ — Isaya 65:17.

Tiva lezvi: Hambu lezvi a Vakustumunyu va Jehovha va kholwako ku Nungungulu wa vhuna, va vhumela kambe a ku tiriwa a mababyi hi cipitali, yo kota kukarateka ka maalakanyo (depressão). (Marku 2:17) Hambulezvo, a hi nyiki mawonela ya matirelwa yo kari yo kongoma; a mun’we ni mun’wani i fanele ku ti mahela ciboho ca yena n’winyi timhakeni leti.