Xana a Bhibhiliya gi nga ku vhuna ku hanya ni mababyi ya hombe ma nga chumiwiko?

Hlamulo wa Bhibhiliya

Ina. Nungungulu wa khatala hi nandza gakwe legi gi babyako. A Bhibhiliya gi tsumbisa lezvi: ‘Jehovha i ta mu tiyiseta loku a hi sangweni ga kubabya.’ (Lisimu 41:3) Loku u hanya ni mababyi ya hombe ma nga chumiwiko, a matshinya lawa ya manharu ma landzelako ma nga ku vhuna:

1. Khongela u kombela ntamu kasi u zvi kota ku timisela. “A kurula ka Nungungulu loku ku hundzako a kupima kontlhe” ku ta hungula a kukarateka zvonake ku ku nyika ntamu wa ku timisela.​ — Va Le Filipi 4:6, 7.

2. Talela ka zvazvinene. A Bhibhiliya gi ngalo: ‘A mbilu yi tsakileko i muri wu nene. Kanilezvi a moya wu tshovekileko wu womisa marambu.’ (Mavingu 17:22) Ti karatele kuva munhu wa mahleko, hakuva a tshamela lego gi ta ku nyika litsako masikwini lawa zvi bavako gi tlhela gi chukwatisa a lihanyo la wena.

3. Tiyisa kutsumba ka wena hi zvamandziko. A kutsumba ko tiya ku nga ku vhuna a kuva ni litsako hambu loku u hanya ni mababyi ya hombe ma nga chumiwiko. (Va Le Roma 12:12) A Bhibhiliya gi phrofeta hi cikhati leci ne ‘muaki ni mun’we a ta ngaku: Ndza babya.’ (Isaya 33:24) Ka cikhati leco, Nungungulu i ta chuma mababyi ya hombe lawa a siensia nyamutlha yi nga zvi kotiko ku ma chuma. Hi cikombiso, a Bhibhiliya gi tlhamusela lezvi a kukhosahala ku to fuvisiswa zvona, ni vanhu vontlhe vava vaswa hi ndlela leyi: ‘A nyama yakwe yi wa tlhele yiva yiswa a ku hundza ni ya n’wanana; i wa tlhelele masikwini ya ntamu wa wuswa gakwe.’ ​— Joba 33:25, Tradução do Novo Mundo.

Tiva lezvi: Hambu lezvi va zvi tivako ku Nungungulu wa nyika civhuno, a Vakustumunyu va Jehovha va lavetela a vadhokodhela kambe kasi va va chuma a mababyi ya hombe. (Marku 2:17) Hambulezvo, a hi leleteli ne machumela man’we lezvaku hi wona ya manene; hi alakanya ku i chukwana ku a mun’we ni mun’wani a ti mahela zviboho zvakwe ha yece xungetano hi lihanyo lakwe.