Ku humelela yini loku hifa?

Hlamulo wa Bhibhiliya

A Bhibhiliya gi ngalo: ‘A vahanyako va zvi tiva lezvaku va tafa, kanilezvi a vafileko a va tivi nchumu.’ (Mutshawuteli 9:5; Lisimu 146:4) Hikwalaho, loku hifa, a ha ha hi kona. A vafileko a va pimisi, a va mahi nchumu ne kuzwa nchumu.

“U ta tlhelela tshurini”

Nungungulu i tlhamusele lezvi zvi humelelako loku hifa a cikhati leci a nga wulawula na Adhamu, a munhu wo sangula. Hi kota ya lezvi Adhamu a nga kala ku ingisa, Nungungulu i te ngalo kakwe: “Wena u tshuri, u ta tlhelela tshurini.” (Genesisi 3:19) Mahlweni ka kuva Nungungulu a vanga Adhamu “hi tshuri wa misava”, Adhamu i wa nga hi kona. (Genesisi 2:7) Hi kufanana, a cikhati leci Adhamu a ngafa, i no tlhelela ntshurini a nga havi kona.

Hi zvalezvo zvi mahekako ka lava va fako ka cikhati leci. Na gi wulawula hi vanhu ni zvihari, a Bhibhiliya gi ngalo: ‘Zvontlhe zvi mahilwe hi ntshuri, hikwalaho zvontlhe zvi tlhela zviya ntshurini.’ ​— Mutshawuteli 3:19, 20.

A kufa a hi magumo ya zvontlhe

A kutala ka zvikhati, a Bhibhiliya gi fananisa a kufa ni ku etlela. (Lisimu 13:3; Johani 11:11-14; Mitiro 7:60) A munhu loyi a etleleko wurongo ga tshongotshongo a nga zvi tivi lezvi zvi mahekako matlhelweni yakwe. Hizvalezvo, a vafileko a va tivi nchumu. Hambulezvo, a Bhibhiliya gi gondzisa lezvaku Nungungulu a nga vhuxa vafileko a ku khwatsi o va vhuxa hi wurongweni zvonake a va nyika wutomi kasi va hanya kambe. (Joba 14:13-15) Lava Nungungulu a to va vhuxa hi ka vafileko, a kufa ku nga tava magumo ya zvontlhe.