Hina vanhu hi vekelwe siku legi hi tofa hi gona ke?

Hlamulo wa Bhibhiliya

Ahihi. Hina vanhu a hi vekelwangi siku ga kufa hi gona. Wutshanwini ga ku sekela a gondzo ya lezvaku hina vanhu hi vekelwe siku legi hi tofa hi gona, a Bhibhiliya gi wula lezvaku a kufa i nchumu wu ‘dzukako wu humela’ munhu. — Mutshawuteli 9:11.

Kasi a Bhibhiliya a gi wule lezvaku ‘ku na ni cikhati ca kufa’ ke?

Ina ga wula. A bhuku ga Mutshawuteli 3:2 gi wula lezvaku “ku na ni cikhati ca ku belekiwa, ni cikhati ca kufa; a cikhati ca ku byala, ni cikhati ca ku tsuwula lezvi zvi byalilweko.” Kanilezvi, a mongo wa vesi legi wu komba lezvaku gi wulawula hi lezvi a wutomi gi tshamisileko zvona, lezvi zvi tolovelako ku maheka. (Mutshawuteli 3:1-8) Nungungulu a nga vekangi siku legi a mun’we ni munw’ani wa hina a tofa hi gona, a ku fana ni lezvi a nga kurumetiko murimi lezvaku a byala hi siku go kari. A cipandze leci ci komba lezvaku a hi faneli ku karatekela zvilo zva wutomi ga hina ga siku ni siku laha ka kuza hi rivala a Muvangi wa hina. — Mutshawuteli 3:11; 12:1, 13.

Hi nga hanya hi cikhati co leha

Hambu lezvi hi nga zvi tiviko zva mandziko, a kutala ka zvikhati hi nga hanya hi cikhati co leha loku hi maha zviboho zva zi nene wutomini ga hina. A Bhibhiliya gi wula lezvi: “A gondziselelo ya wutlhari cibuka ca wutomi, kasi ku ponisa vanhu mitlhan’wini ya kufa.” (Mavingu 13:14, Tradução do Novo Mundo) Mosi yenawu i byelile vaIzrayeli lezvaku a masiku yabye ma wa “ta andza” loku va ingisa milayo ya Nungungulu. (Dewuteronome 6:2) Hi tlhelo gin’wani, loku hi maha zvilo zva kubiha kutani zva wupumbu, hi nga komisa wutomi ga hina na hi nga zvi tivi. — Mutshawuteli 7:17.

A lisine hi lezvaku hambu loku ho ti wonela nguvhu kutani hi maha zvilo zva zvi nene ku kota kwihi, hi tafa. (Va Le Roma 5:12) Hambulezvo, lezo zvi ta cica, hakuva a Bhibhiliya gi tsumbisa lezvaku cikhatini ci tako “ku nga ta hava ni kufa.” — Kuvhululelwa 21:4.