A Bhibhiliya gi gondzisa yini xungetano hi ku wulawula hi tirimi?
Hlamulo wa Bhibhiliya
A ku “wulawula hi tirimi” ku wuliwa cihlamaliso ci mahekileko ka maKristu yo sangula ca ku ma wulawula tirimi to kala ma nga rangangi hi ku gondza. (Mitiro 10:46, A Biblia Go Basa) Loyi a nga wulawula i wa zwisisiwa khwatsi hi vontlhe va nga tiva lirimi lelo. (Mitiro 2:4-8) A ku wulawula hi tirimi ku wa hi cin’we ca zvinyikiwo zva moya wo basa lezvi Nungungulu a nga nyikile maKristu yo kari ya zana ga malembe go sangula. — Mahebheru 2:4; 1 Va Le Korinte 12:4, 30.
A ku wulawula hi tirimi zvi sangulele kwihi niku rini?
A cihlamaliso leci ci mahekile khati go sangula le Jerusalema ni mixo ka Mubuzo wa vaJudha wa Pentekosta, hi 33 Nguveni ya Hina. Ku wa tlhangene cipimo ca 120 wa vapizani va Jesu laha ‘vontlhe va nga tala hi moya wo basa, va sangula ku wulawula hi tirimi to tsalangana.’ (Mitiro 1:15; 2:1-4) A citshungu ca hombe ca vanhu “va matiko wontlhe ya laha misaveni” ci no hlengeletana, niku “a mun’we ni mun’wani wabye i no vazwa na va wulawula hi lirimi lakwe”. — Mitiro 2:5, 6.
Gi wa hi gihi a kungo ga ku wulawula hi tirimi?
Kasi ku komba lezvaku Nungungulu i wa seketela maKristu. Cikhatini ca kale, Nungungulu i tirisile zvihlamaliso kasi ku komba lezvaku i wa vhuna vanhu vo tsumbeka vo kota Mosi. (Eksodhusi 4:1-9, 29-31; Mitsengo 17:10) A ku wulawula hi tirimi zvonawu zvi wa hi ni kungo galego, ga ku komba lezvaku Nungungulu i wa seketela a bandla ga wuKristu legi gi nga ha hi ku yimisiwa. Mupostoli Pawule i tsalile lezvi: “A tirimi a hi cikombiso ka lava va kholwako kanilezvi ka lava va nga kholwiko.” — 1 Va Le Korinte 14:22.
Kasi ku vhuna maKristu lezvaku ma nyika wukustumunyu go mbhelela. Lava va ngazwa a valandzeli va Jesu ka siku ga Pentekosta va te: “Ha vazwa na va wulawula hi tirimi ta hina xungetano hi mitiro ya ntamu ya Nungungulu.” (Mitiro 2:11) Hikwalaho, a kungo gin’wani ga lisima ga cihlamaliso leci ku wa hi ku vhuna maKristu lezvaku ma “nyika wukustumunyu go mbhelela” ni ku “va maha vapizani a vanhu va matiko wontlhe”, kota lezvi va nga layilwe hi Jesu. (Mitiro 10:42; Matewu 28:19) Kwalomo ka 3000 wa vanhu lava va nga wona a cihlamaliso leco ni ku ingisela a wukustumunyu gi nga nyikiwa va no maha vapizani ka siku galego. — Mitiro 2:41.
A ku wulawula hi tirimi zvi wa ta simama kala kupindzuka?
Ahihi. A zvinyikiwo zva moya wo basa, a ku patsa ni leci ca ku wulawula hi tirimi, zvi wa hi zva cikhatana. A Bhibhiliya gi phrofetile ku: “A ku phrofeta ku ta hundza; ni ku wulawula tirimi zvi ta mbhela.” — 1 Va Le Korinte 13:8.
Zvi gumesile rini ku wulawula hi tirimi?
A zvinyikiwo zva moya wo basa zvi wa tolovela ku hundziselwa a maKristu man’wani hi vapostoli, laha a kutala ka zvikhati a vapostoli va nga ma tlhateka a mandla yabye a makholwa-kulobye. (Mitiro 8:18; 10:44-46) Zvi wonekisa ku khwatsi lava va nga amukela zvinyikiwo zva moya wo basa hi ka vapostoli va wa nga hundziseli van’wani. (Mitiro 8:5-7, 14-17) Hi cikombiso, a munhu a tirako ka mufumo a nga mahela munhu a karta ga ku fambisa movha, kanilezvi a munhu loye a nga na fanelo ya ku mahela van’wani. Zvi wonekisa ku khwatsi a ku wulawula hi tirimi zvi gumesile a cikhati leci ku ngafa a vapostoli ni lava va nga amukele a cinyikiwo leci hi ka vapostoli.
Ka ha wulawuliwa hi tirimi nyamutlha?
Zvi wonekisa ku a cihlamaliso ca cinyikiwo ca ku wulawula hi tirimi ci gumesile kumbheleni ka zana ga malembe go sangula Nguveni ya Hina. Inyamutha a ku na munhu a nga tiyisako ku i wulawula hi tirimi hi ntamu wa Nungungulu.a
A maKristu ya lisine ma nga tivisiwa kuyini?
Jesu i te a lirandzo la hombe hi van’wani li wa ta tivekisa a vapizani vakwe. (Johani 13:34, 35) Hi kufanana, mupostoli Pawule i gondzisile lezvaku a lirandzo li wa tava lona cifungo ca kala kupindzuka ci tivekisako a maKristu ya lisine. (1 Va Le Korinte 13:1, 8) I kombile lezvaku a moya wa Nungungulu wu wa ta vhuna maKristu lezvaku ma kombisa a matshamela lawa ma wuliwako ku “mihandzu ya moya” leyi a tshamela go ranga ku nga lirandzo. — Va Le Galatiya 5:22, 23.
a Wona a ndzima “Falar em línguas é da parte de Deus?”