Ti mahele ciboho ca lisima ka zvontlhe ca kuva u bhabhatiswa!

Jesu i gondzisile lezvaku a maKristu ma fanele ku bhabhatiswa. (Lera Matewu 28:19, 20.) Kanilezvi cini a ku bhabhatisa? Kona zvini lezvi a munhu a faneleko ku maha kasi a ringanelwa hi kubhabhatiswa?

1. Cini a ku bhabhatisa?

A gezu ku “bhabhatisa” gita hi ka gezu ga ciGreki gi wulako ku “ku peta” lomu matini. Hi zvalezvi zvi nga maheka a cikhati leci Jesu a nga bhabhatiswa le congweni wa Jordhani; wontlhe a miri wakwe wu no petiwa lomu matini. Ha zvi tiva lezvo hakuva andzhako ka ku bhabhatiswa i no “huma hi lomu matini”. (Marku 1:9, 10) A ku fana na Jesu, a cikhati leci a maKristu ya lisine ma bhabhatiswako, a miri wontlhe woya hi ku petiwa lomu matini.

2. Zvini lezvi a munhu a zvi kombisako a cikhati leci a bhabhatiswako?

A cikhati leci a munhu a bhabhatiswako i kombisa lezvaku i nyikele a wutomi gakwe ka Jehovha Nungungulu. A munhu i ti nyikelisa kuyini? Na a nga se bhabhatiswa, a munhu i maha mukhongelo na a hi yece a byela Jehovha lezvaku i lava ku mu tirela kala kupindzuka. I tsumbisa lezvaku i ta khozela Jehovha ntsena niku i ta rangisa a ku maha kurandza kakwe wutomini gakwe. I maha ciboho ca ku ‘ti tsika . . . a simama ku landzela’ a tigondzo ni cikombiso ca Jesu. (Matewu 16:24) A cikhati leci a munhu a ti nyikelako a tlhela a bhabhatiswa i vhululekelwa hi ndlela ya lezvaku ava ni wunghana go tiya na Jehovha ni vakhozeli vakwe.

3. Zvini lezvi a munhu a faneleko ku maha kasi a ringanelwa hi kubhabhatiswa?

Na u nga se bhabhatiswa u fanele ku gondza xungetano hi Jehovha u tlhela uva ni kukholwa ko tiya kakwe. (Lera Mahebheru 11:6.) Laha u yako u gondza zvotala hi Jehovha ni laha a kukholwa ka wena ku toya ku tiya, a lirandzo la wena hi Jehovha lonawu li taya li engetela ku kula. Handle ko kanakana, u ta navela ku chumayela hi yena ni ku hanya hi milayo yakwe. (2 Timote 4:2; 1 Johani 5:3) A cikhati leci a munhu a kombisako lezvaku i lava ku hanya ‘hi ndlela yi fanelako Jehovha, a mu tsakisa hi kumbhelela,’ kuzvilava a nga maha ciboho ca ku nyikela wutomi gakwe ka Jehovha a tlhela a bhabhatiswa. — Va Le Kolosi 1:9, 10.a

GONDZA ZVI ETA

4. Hi gondza zvotala ka kubhabhatiswa ka Jesu

Lerani Matewu 3:13-17, kasi ku gondza zvin’wani xungetano hi kubhabhatiswa ka Jesu. Andzhako ka lezvo, bhulani hi zviwutiso lezvi:

• Xana Jesu i bhabhatisilwe na a hi n’wanana?

• Jesu i bhabhatisisilwe kuyini? A ku i noya hi ku n’watsekelwa mati?

Andzhako ka ku bhabhatiswa, Jesu i no sangula ku maha a ntiro wo hlawuleka lowu Nungungulu a nga mu nyikile. Lerani Luka 3:21-23 na Johani 6:38, mu gumesa mu bhula hi ciwutiso leci:

• Andzhako ka ku Jesu a bhabhatisilwe, i ntiro muni a nga wu rangisa wutomini gakwe?

5. U nga zvi kota ku tatisa a mixuvo ya wena ya kuva u bhabhatiswa

Kusanguleni, kuzvilava u nga zvi wonisa ku khwatsi a ku ti nyikela ka Jehovha ni ku bhabhatiswa zvilo zvo bindza zva ku a wu nge zvi koti ku zvi maha. Kanilezvi, laha u toya u gondza zvotala hi Jehovha u tlhela u hanya hi lezvi yena a wulako, u taya u tiyiseka lezvaku u nga zvi kota kuba zambo legi ga lisima. Kasi ku wona a zvikombiso zva vanhu vo kari va zvi kotileko a kuba a zambo legi, bisani VHIDHIO.

VHIDHIO: Tiyisa a wunghana ga wena na Jehovha (1:11)

Lerani Johani 17:3 na Jakobe 1:5, mu gumesa mu bhula hi ciwutiso leci:

• Zvini zvi nga vhunako munhu a kuva a ringanelwa hi ku bhabhatiswa?

1. Hi ti nyikela ka Jehovha a cikhati leci hi mu byelako lezvaku hi lava ku mu tirela kala kupindzuka

2. A cikhati leci hi bhabhatiswako, hi komba vanhu lezvaku hi nyikelile wutomi ga hina ka Jehovha

6. A cikhati leci hi bhabhatiswako hi maha zviro zva ngango wa Jehovha

A cikhati leci hi bhabhatiswako, hi maha zviro zva ngango wu boheneko wa misava yontlhe. Hambu lezvi hi tako hi ka matshamu ni midhawuko yo hambana, hontlheni hi kholwa zvalezvi zva zvin’we niku hi landzela milayo yaleyi ya yin’we ya Bhibhiliya ya mahanyela. Lerani Lisimu 25:14 na 1 Pedro 2:17, mu gumesa mu bhula hi ciwutiso leci:

• Andzhako ka ku a munhu a bhabhatisilwe, kuzwanana muni a vako nako na Jehovha zvin’we ni vanhu van’wani lava va mu khozelako?

LEZVI HI NGA GONDZA

Jesu i gondzisile lezvaku a maKristu ma fanele ku bhabhatiswa. Kasi lezvo zvi koteka, a munhu i fanele ku tiyisa a kukholwa kakwe ka Jehovha, ku hanya hi milayo yakwe ni ku nyikela wutomi gakwe ka yena.

Zviwutiso zva kuvhuxeta

• Cini a ku bhabhatisa niku hikuyini ku nga ka lisima?

• Kuyelana muni ku nga kona cikari ka ku ti nyikela ni ku bhabhatiswa?

• Mazambo muni lawa a munhu a faneleko kuba na a nga se ti nyikela ni ku bhabhatiswa?

GONDZA ZVIN’WANI

Gondza u tiva a ku cini a ku bhabhatisa ni lezvi zvi nga hiko zvona.

“Zvi wula yini a kubhabhatiswa?” (Ndzima yi nga ka jw.org)

Gondza u tiva lezvi a munhu a faneleko ku maha kasi a ringanelwa hi kubhabhatiswa.

“A ku randza Jehovha zvi ta ku kuca ku bhabhatiswa” (A Murindzeli, Março wa 2020)

Gondza u tiva ku cini ci kucileko a wanuna loyi lezvaku a bhabhatiswa.

“Va wa lava lezaku nzi kuma a lisine hi nzoce” (A Murindzeli wa 1 ka Fevereiro wa 2013)

Gondza u tiva ku hikuyini u faneleko ku ti vekela mixuvo ya kuva u bhabhatiswa niku u nga ti longiselisa kuyini.

“Ndzi bhabhatiswa ke?” (Os Jovens Perguntam – Respostas Práticas, Vholume 2, cipimo 37)