A ngango wa wena wu nga li kumisa kuyini litsako? — Cipandze 2

A vana cinyikiwo ci tako hi ka Jehovha. Yena i rindzela ku a vapswali va ci khatalela khwatsi a cinyikiwo leco. Jehovha wa va nyika a wusungukati ga ginene a vapswali kasi va zvi kota ku maha lezvo. A wusungukati gakwe gi vhuna kambe ni vana a ku wona lezvi va nga mahako kasi a ngango wuva ni litsako.

1. Wusungukati muni legi Jehovha a nyikako vapswali?

Jehovha i lava ku a vapswali va randza a vana vabye va tlhela va tshama navo a cikhati co tala hi laha zvi kotekako hi kona. I lava kambe lezvaku a vapswali va vhikela vana vabye ka timhango ni ku va va gondzisa hi ku tirisa matshinya ya milayo ya Bhibhiliya. (Mavingu 1:8) I byela vapswali, aku: ‘Simamani ku wundla [vana va n’wina] hi . . . kulaya ka Jehovha.’ (Lera Va Le Efesusi 6:4.) Jehovha wa tsaka loku a vapswali va landzela a nayo wakwe laha va wundlako vana vabye, va nga teki a ntiro lowo va nyika mun’wani munhu.

2. Wusungukati muni legi Jehovha a nyikako vana?

Jehovha i byela vana, aku: “Ingisani vapswali va n’wina.” (Lera Va Le Kolosi 3:20.) Loku a vana va va kombisa cichavo a vapswali vabye va tlhela va va ingisa, va tsakisa Jehovha ni vapswali vabye. (Mavingu 23:22-25) Jesu i vekile a cikombiso ca cinene a cikhati leci a nga hi n’wanana. Hambu lezvi yena a nga mbhelele, i ingisile a vapswali vakwe vo kala kumbhelela a tlhela a va kombisa cichavo. — Luka 2:51, 52.

3. A ngango wu nga maha yini kasi wu tiyisa a wunghana ga wona a Jehovha?

Loku u hi mupswali, handle ko kanakana wa zvi lava ku a vana va wena va randza Jehovha a ku fana ni lezvi wena u mu randzisako zvona. Zvi nga kotekisa kuyini lezvo? Hi ku maha lezvi a Bhibhiliya gi wulako, zvaku: “U fanele ku gondzisa a vana va wena a [timhaka ta Jehovha], u wulawula hi tona loku u tshamile lomu ndlwini ya wena, ni loku u kari u famba laha ndleleni.” (Dhewuteronome 6:7) Hi kuya hi tlhamuselo wa lahasi ka Dhewuteronome 6:7, a gezu “gondzisa” gi nga ha hundzuluselwa kambe gi wula ku “ku phindaphinda kutani ku nameka”. Kuzvilava wa zvi tiva ku kasi a vana wa wena va khoma nchumu, u fanele ku wu phindaphinda hi makhati yo tala. A mutsalo lowu wu wula ku u fanele ku hlota tindlela ta ku bhula ni vana va wena hi kukhandzakanya xungetano hi Jehovha. Zvi nene a ku vhiki ni vhiki a ngango wu ti vekela cikhati ca ku wu mu khozela zvin’we Jehovha. Loku u nga hi na vana, u nga vhuneka hi ku ti vekela cikhati vhiki ni vhiki ca ku gondza a Mhaka ya Nungungulu.

GONDZA ZVI ETA

4. Gondzisa vana va wena hi lirandzo

A ku gondzisa vana zvi nga tshuka zvi karata. Makunu a Bhibhiliya gi nga ku vhunisa kuyini? Lerani Jakobe 1:19, 20, mu gumesa mu bhula hi zviwutiso lezvi:

• A vapswali va nga li kombisisa kuyini lirandzo a cikhati leci va bhulako ni vana vabye?

• Hikuyini a mupswali a nga faneliko ku laya a vana vakwe na a zangarile?a

5. Vhikela vana va wena

Kasi ku vhikela a vana va wena, zva lisima nguvhu a ku bhula ni n’wana mun’we ni mun’we hi timhaka ta masango. A ku maha lezvo zvi nga wonekisa ku khwatsi zva karata. Bisani VHIDHIO, mu gumesa mu bhula hi zviwutiso zvi landzelako.

VHIDHIO: Vhikela vana va wena ka ‘zva kubiha’ (2:58)

• Hikuyini a vapswali vo kari zvi va karatelako ku bhula ni vana vabye hi timhaka ta masango?

• Hi yihi ndlela leyi a vapswali vo kari va yi tirisileko kasi ku tlhamusela vana vabye a timhaka ta masango?

Kota lezvi zvi nga sina zvi phrofetilwe, a tiko ga Sathani giya gi biha nguvhu. Lerani 2 Timote 3:1, 13, mu gumesa mu bhula hi ciwutiso leci:

• A vanhu vo kari va kubiha lava va kumbukiwako ka vhesi 13 va xakela vanana hi tlhelo ga masango. Hikwalaho, hikuyini zvi nga zva lisima a ku a vapswali va bhula ni vana vabye hi timhaka ta masango ni ku va gondzisa lezvi va nga ti vhikelisako zvona ka vanhu lava va xakelako vanana?

U wa zvi tiva?

A Vakustumunyu va Jehovha va humesa mabhuku yo tala ma vhunako a vapswali ku va bhula ni vana vabye hi timhaka ta masango ni ku va gondzisa lezvi va nga ti vhikelisako zvona ka vanhu lava va xakelako vanana. Hi cikombiso, wona:

• Vhikela vana va wena (vhidhio)

• Gonza ka Mugonzisi wa Hombe, zvipimo 32

• “Bhula ni vana va wena hi timhaka ta masango” (Khindlimuka! N.° 5 wa 2016)

6. Va kombise cichavo a vapswali va wena

VHIDHIO: Ndzi nga bhulisa kuyini ni vapswali va mina? (2:19)

• Hikuyini zvi nga zvinene ku a vaswa va ti karatela ku bhula ni vapswali vabye?

• A muswa a nga mahisa kuyini kasi ku bhula ni vapswali vakwe hi ndlela ya cichavo?

Lerani Mavingu 1:8, mu gumesa mu bhula hi ciwutiso leci:

• A muswa i fanele ku maha yini loku a vapswali vakwe va mu byela lezvi a faneleko ku maha?

7. Khozelani Jehovha kota ngango

A mingango ya Vakustumunyu va Jehovha yi ti vekela cikhati co kongoma vhiki ni vhiki kasi ku khozela zvin’we. Gi nga mahisiwa kuyini a wukhozeli lego? Bisani VHIDHIO, mu gumesa mu bhula hi zviwutiso zvi landzelako.

VHIDHIO: Wukhozeli ga ngango — Zvikarato ni mabhindzu (8:04)

• Zvini lezvi a ngango wu nga mahako kasi wuva ni programa ya Wukhozeli ga ngango hi kukhandzakanya?

• Zvini lezvi a mupswali a nga mahako kasi a Wukhozeli gi vhuna gi tlhela gi tsakisa? — Wonani mufota wu nga laha kusanguleni ka cigondzo leci.

• Zvini zvi nga mahako ku zvi karata ku a ngango wa wena wu gondza zvin’we?

A kale ka vaIzrayeli, Jehovha i wa lava lezvaku a mingango yi bhula hi kukhandzakanya xungetano hi Mitsalo. Lerani Dhewuteronome 6:6, 7, mu gumesa mu bhula hi ciwutiso leci:

• U nga gi tirisisa kuyini a tshinya legi ga nayo ga Bhibhiliya?

Mawonela ya mamahela ya Wukhozeli ga ngango:

• Ku longisela mitlhangano ya bandla.

• Ku lera ni ku bhula hi matimu ya Bhibhiliya lawa a ngango wa wena wu to ma tsakela.

• Loku u hi ni vana va vatsongwani, va chisele a zvigondzo zva vanana lomu ka jw.org u tlhela u imprimira.

• Loku u hi ni vana va nga vaswa, bhula navo hi ndzima yo kari ya vaswa yi nga ka jw.org.

• Maha drama ni vana va wena mu pimanyisa vanhu vo kari va lomu ka Bhibhiliya.

• Sixtirani vhidhio yo kari ya lomu ka jw.org mu tlhela mu bhula hi yona.

LEZVI HI NGA GONDZA

Jehovha i lava lezvaku a vapswali va randza vana vabye, va va gondzisa va tlhela va va vhikela; i lava lezvaku a vana va ingisa vapswali vabye va tlhela va va kombisa cichavo, niku i lava ku a mingango yi mu khozela zvin’we.

Zviwutiso zva kuvhuxeta

• A vapswali va nga va gondzisisa kuyini a vana vabye ni ku va vhikela?

• A vana va nga kombisisa kuyini cichavo hi vapswali vabye?

• Hi wahi mabhindzu ya ku a ngango wu ti vekela cikhati vhiki ni vhiki ca ku khozela zvin’we?

GONDZA ZVIN’WANI

Zvigondzo muni zvi nga vhunako n’wana wa wena loku a kula?

“6 wa zvigondzo lezvi a vanana va faneleko ku gondzisiwa” (Khindlimuka! N.° 2 wa 2019)

Wona a wusungukati ga Bhibhiliya legi gi nga vhunako lava va hlayisako a vapswali vabye va kumbileko.

“Zvini lezvi a Bhibhiliya gi wulako xungetano hi ku hlayisa a vapswali va kumbileko?” (Ndzima yi nga ka jw.org)

Wona lezvi zvi nga vhuna a wanuna wo kari, loyi a nga kala a nga zvi tivi ku a va wundlisa kuyini a vana vakwe, a kuva maha papayi wa mu nene.

Jehovha i hi gondzisile ku wundla vana va hina (5:58)

Wona lezvi a vapapayi va nga mahako kasi vava vanghana va hombe va vana vabye.

“Vapapayi, mu nga kombisa kuyini lirandzo ni kukhatala hi vafana va n’wina?” (A Murindzeli wa 1 ka Novembro wa 2011)