Kwadru Ga Ziwutiso
◼ Xana za faneleka lezaku a munwe wa Timboni ta Jehova a chumiwa ka xipitali xi rangelwako hi hlengeletano yo kari ya wukhongeli?
Ku na ni tihlengeletano to tala ta wukhongeli leti ti rangelako zipitali kutani miti yi hlayisako vanhu va khosaheleko leyi yi khatalelako vanhu va nga ni mababyi ya simasima. A kutala ka zikhati, a zipitali lezo a zi mahelwi ku tlakusa Babuloni loyi wa Hombe. (Kuv. 18:2, 4) Za koteka ku ngha hi kusanguleni zi akilwe hi hlengeletano yo kari ya wukhongeli lezaku yi kuma mali. Inyamutlha, a zipitali zo kari zi no sala ni vito ga wukhongeli ntsena, kuveni a zinwani zi simama kuva ni vatiri va nga varangeli va wukhongeli.
Loku a munwe wa Timboni ta Jehova a lava ku tiriwa hi xipitali xo kari, i fanele ku maha xiboho xakwe wutsumbu xa kuya kutani ku ngayi ka xipitali lexi zi kotekako ku ngha xi fambelana ni hlengeletano yo kari ya wukhongeli. A livalo la munhu wo kari li nga ha mu vumelela kuya, kanilezi a livalo la munwani li nga ha mu beletela. (1 Tim. 1:5) Ku na ni ziyimo zo kari lezi zi nga ha kucetelako a xiboho xa munhu wo kari, niku zi nene a ku zi kambisisa.
Hi xikombiso, za koteka ku ngha a xipitali lexi xi rangelwako hi hlengeletano ya wukhongeli xi hi xona xoce xi nga laha kusuhani ni laha u tshamako kona. Kutani loku ku hi lezaku zi kona zinwani laha kusuhani, za koteka ku ngha lexi xi fambelanako ni wukhongeli go kari na xi hi xona xi khatalelako vanhu hi ndlela ya chukwana. Za koteka kambe ku ngha lexi xi nga ni vito ga wukhongeli na xi hi xona xa xinwe xi zi kotako ku chuma mababyi yo kari, kutani ku ngha na ku hi kona ntsena laha ku nga ni dokodela. Ka zikhati zo kari, za koteka ku ngha a zipitali lezi zi rangelwako hi wukhongeli zi kombisa xichawo ka mawonela ya wena kota muKristu xungetano hi matirisela ya nkhata, na lezi za mufumo zi nga kombisi xichawo. Leto timhaka to kari leti u faneleko ku ti kambisisa a xikhati lexi u mahako xiboho xungetano hi lomu u ta nga ya chumelwa kona.
Loku u boha ku tirisa xipitali lexi xi fambelanako ni wukhongeli, za koteka ku ngha u zi wona na zi fana ni ku riha a munhu wo kari loyi a zi kotako ku maha ntiro lowu u wu lavako. U nga ha zi wona na zi fana ni loku a hlengeletano leyo ya wukhongeli yi hi ni bhinzu go kari, niku a ku xava zilo ka yona na zi nga fani ni ku maha muhlengo wa ku seketela a wukhongeli ga mawunwa hi kukongoma. U wa tava na u riha mali hi kota ya nchumu wo kari lowu va ku xaviseleko kutani ntiro wo kari lowu va ku maheleko.
Ina, ka ziyimo zo fana ni lezo, kota muKristu u fanele ku ti wonela lezaku u nga ngheneli ni xinwe xa zimaho za wukhozeli ga mawunwa. Kambe a wu faneli ku tirisa zikhundla zo toloveleka za wukhongeli zo kota “Paderi” kutani “Irmã” na u wula vanhu lava va tirako kutani lava va tako va ta vuxela a xipitali lexo. (Mat. 23:9) U fanele ku alakanya lezaku u yele ku ya chumiwa u tlhela u riha mali ntsena, na ku nga hi ku ya maha zinwani.
Loku zi vumeleleka laha xipitali, u nga ha va byela lezaku wena u munwe wa Timboni ta Jehova niku u wa ta tsakela ku vuxelwa hi madota ya bandla ga wena. Lezo zi ta maha lezaku u vuniwa khwatsi hi tlhelo ga moya a xikhati lexi u nga le xipitali. — 1 Tes. 5:14.
A ziro za ngango lezi zi nga makholwa, madota ya bandla, ni vanwani lomu bandleni va fanele ku khatalela khwatsi a zilaveko za moya za vamakabye vontlhe va khosaheleko, lava va hanyako lomu ka miti ya zikhosana, nguvunguvu leyi yi rangelwako hi hlengeletano yo kari ya wukhongeli. A kupinyama mhakeni leyi zi ta va tiyisa nguvu a vanhu lavo va khosaheleko zi tlhela zi va vikela lezaku lava va rangelako wutshamu lego va nga va patsi na va nga zi tivi ka mitiro ya wukhongeli, kualakanya masiku yo kari yo hlawuleka, kutani mitiro yinwani yo fana, yi mahiwako ka matshamu lawo.
Na hi alakanyela lezo, a munwe ni munwani i fanele ku kambisisa a ziyimo zontlhe zi patsekako a tlhela a maha xiboho xakwe wutsumbu xungetano hi xipitali lexi a ta nga hlawula kuya chumiwa kona. — Gal. 6:5.