“Rwalani A Pingu Wa Mina”
1 Tikweni legi gi teleko hi mitshikelelo ni zikarato, hi kuma kutlhatlheka ka lisine hi ku vumela a xirambo xa liranzo xa Jesu xa lezaku hi kuma a kuhumutwa loku ku kumekako hasi ka pingu wakwe. (Mat. 11:29, 30) A ku vumela a pingu wa kuva mupizani zi wula ku nghenela ntiro wu lavako a kutikarata kanilezi wu humutako. Zi patsa ku xumayela a mahungu yo saseka ya Mufumo ni ku vuna vanwani lezaku va kuma kuhumula zinwe na hina hasi ka pingu wa wu nene wa Jesu. — Mat. 24:14; 28:19, 20.
2 A Wutireli Ga Humuta: Jesu a nga byelangi valanzeli vakwe lezaku va tlhateka a nzhwalo wakwe hehla ka leyi va nga sina va rwele. A ku hambana ni lezo, i lo va ramba lezaku va cica a nzhwalo wabye wo binza hi lowu wakwe wo hehuka. A ha ha binziwi hi kukarateka ni kuvumaleka ka kutsumba ka mafambisela lawa ya zilo, ge hambu ku karatekela kuva ni titshomba ti nga tiyangiko. (Luka 21:34; 1 Tim. 6:17) Hambu lezi hi khomekileko, na hi fanele ku tira lezaku hi enelisa a zilaveko za hina za siku ni siku, a wukhozeli ga Nungungulu hi gona hi gi nyikako nguvu lisima wutomini ga hina. (Mat. 6:33) Loku hi simama kuva ni mawonela ma nene xungetano hi lezi zi nga za lisima nguvu, xontlhe xikhati hi ta zi wona lezaku a wutireli ga humuta, a hi nzhwalo. — Fil. 1:10.
3 Hi ntumbuluko, hi tsakela ku wulawula hi nchumu wihi ni wihi lowu hi wu ranzako nguvu ka lezi zi nga mbilwini ya hina. (Luka 6:45) A maKristu wontlhe ma khatala nguvu ha Jehova ni makatekwa ya Mufumo lawa yena a ma tsumbisako. Hizalezo, a zo ku humuta a ku rivala zikarato za hina za siku ni siku, hi wulawula hi “mahungu yo saseka” a xikhati lexi hi nga wutirelini! (Rom. 10:15) Hi lisine, a xikhati lexi hi phindaphindako ku maha nchumu wo kari, hi engetela a wuzikoti ga hina hi tlhela hi kuma litsako lo engeteleka hi ku wu maha. Hi kota ya lezo, a ku tira nguvu wutirelini, loku hi zi kota, zi ta maha lezaku a kuhumula ka hina konawu ku engeteleka. Niku a hi kutsakisa ka zona loku a vanhu va amukela a kuxumayela ka hina! (Miti. 15:3) Hambu loku a vanhu lava hi va kumako va nga tsakeli kutani loku va hi kaneta, hi ta zizwa lezaku a wutireli ga humuta loku hi tshama na hi alakanya ku a mizamo ya hina yi tsakisa Jehova ni lezaku a wuyelo gihi ni gihi go tsakisa gi ta koteka hi kota ya kukatekisa kakwe. — Miti. 5:41; 1 Kor. 3:9.
4 Hi ku vumela a xirambo xa Jesu, hi ti buza hi lungelo ga ku tira zinwe naye kota Timboni ta Jehova. (Isa. 43:10; Kuv. 1:5) A ku na nchumu wunwani lowu wu zi kotako ku hi humuta nguvu a ku hunza lowo!