A Kuxumayela Zi Lava Kutimisela
1 Hi xikhati xa ku hunza 30 wa malembe, mupostoli Paule i ti buzile hi ntiro wo xalalisa kota muvangeli. A ku fana ni kutikarata kwihi ni kwihi ku faneleko, a ntiro wakwe wa kuxumayela wu wa hi ni zikarato za wona. (2 Kor. 11:23-29) Hambulezo, Paule a nga mbhelangi ntamu. (2 Kor. 4:1) I wa zi tiva lezaku a ntamu wa ku timisela a xikhati lexi a nga tatisa a wutireli gakwe wu wata hi ka Jehova. (Fil. 4:13, Tradução do Novo Mundo) Hi kota ya xikombiso xakwe xa kutimisela hi kutsumbeka, Paule i zi kotile ku wula lezi: “Mahani vapimanyisi va mina, kotisa mina nzi nga mupimanyisi wa Kristu.” — 1 Kor. 11:1.
2 Ku Timisela Minzhingo Inyamutlha: Siku ni siku, a kutala ka vamakabye va hina va yimisana ni kutseketselwa, kukanetwa, kutani kungakhatali zi mahiwako hi ziro za ngango, vatiri, kutani zigonzani-kulobye. (Mat. 10:35; Joh. 15:20) Kuzilava lezo za ku mahekela. Hi tlhelo ginwani, u nga hava na u lwisana ni mababyi, kutani ku ngha na ulwa yimpi ya siku ni siku ya ku potsa a zilo zi pengisako mapimo ni ziringo lezi zi ringako a kukholwa ni kutimisela ka wena. Ha zi kota ku kuma ntamu hi ku kambisisa a zikombiso za malanza yo tsumbeka ya kale zinwe ni lezi za maKristu-kulori inyamutlha lawa ma yimisanako ma tlhela ma hlula a zikarato. — 1 Ped. 5:9.
3 Ha zi kota ku kuma ntamu wa ku simama hi tiyile wutirelini ga hina hi ku maha zontlhe kasi ku ‘hloma a matlhari wontlhe ya Nungungulu.’ (Efe. 6:10-13, 15) A ku khongelela a kutimisela zonawu za lisima. Nungungulu wa hi nyika a moya wakwe wa ku basa lezaku hi zi kota ku timisela a minzhingo. (2 Kor. 6:4-7) Kasi hi humelela kulweni ka hina ka moya, hi fanele ku ingisa a zikhumbuxeto za Nungungulu za kuva hi maha luswa a moya wa hina. (Tis. 119:24, 85-88) A ku fana ni n’wana loyi a nga ha gonzako hi kuphindaphinda a papilo gi tsalelweko yena hi dadani wakwe wa liranzo, a kugonza ka hina a Biblia siku ni siku ku tiyisa a kuzwanana ka hina na Jehova. A xigonzo xo khanzakanya xa munhu wutsumbu xi hi nyika wutlhari ga ku yimisana ni minzhingo, niku lezo zi vumelela a kupima ka Nungungulu lezaku ku kuca a ziboho za hina ku tlhela ku tiyisa a kutsumbeka ka hina. — Mav. 2:10, 11.
4 A Kutimisela Ku Neha Makatekwa: Kota lezi zi mahekeleko Paule, a kutimisela ka hina ko tsumbeka a xikhati lexi hi tatisako a wutireli ga hina ku maha a mbilu ya Jehova yi tsaka ku tlhela ku neha makatekwa ka hina ni ka vanwani. (Mav. 27:11) Ngha hi ti yimisela a ku timisela wutirelini, hi ku maha lezo hi komba lezaku a kukholwa ka hina ka simasima niku ku na ni “tsengo wa hombe ku hunza nzalama leyi yi lovako, hambu loku yi hlolilwe hi nzilo.” — 1 Ped. 1:6, 7.