Xini xi hi kucako ku xumayela?

1. Kuyelana muni ku nga kona xikari ka liranzo ni wutireli ga hina?

¹ A ku xumayela a mahungu yo saseka ya Mufumo wa Nungungulu hi wona a ntiro wa lisima nguvu hi nga wu mahako nyamutlha. Kunene, hi ku maha ntiro lowu, hi komba ku ha ingisa a milayo yimbiri ya hombe, ku nga ku ranza Jehova ni ku ranza muakelani wa hina. (Mar. 12:29-31) A liranzo hi lona li hi kucako nguvu lezaku hi hiseka wutirelini. — 1 Joh. 5:3.

2. Xana a wutireli ga hina gi kombisisa kuyini liranzo la hina hi Jehova?

² Liranzo la hina hi Jehova: A liranzo la hina hi Munghana wa hina wa hombe nguvu, Jehova, li hi kuca ku mu yimela. I kari a lumbetiwa hi Satani hi xipimo xa 6.000 wa malembe. (2 Kor. 4:3, 4) Hikwalaho, a vanhu va kholwa lezaku Nungungulu wa hisa vanhu tilweni, yena vanharu laha ka kunwe, niku a nga khatali hi vanhu. A vanwani vaza va wula lezaku Nungungulu a nga kona. A ho ku xuva lezaku a vanhu vontlhe va tiva lisine xungetano hi Dadani wa hina wa le tilweni! A mizamo ya hina kasi ku maha vakustumunyu va Nungungulu ya mu tsakisa nguvu yi tlhela yi zangarisa Satani. — Mav. 27:11; Maheb. 13:15, 16.

3. Xana a wutireli ga hina gi kombisisa kuyini liranzo la hina hi muakelane?

³ Liranzo la hina hi muakelane: Khati ni khati hi xumayelako munhu, ho kombisa liranzo hi yena. A vanhu va na ni xilaveko xa hombe xa kuzwa a mahungu yo saseka xikhatini lexi xa zikarato. A kutala kabye va fana ni vaNiniva va masikwini ya Jona lava va nga kala va nga zi tivi “a ku hambanyisa a woko gabye ga xinene ni le’ga xibhabha.” (Jona 4:11) A wutireli ga hina gi gonzisa vanhu a ndlela ya ku hanya a wutomi ga gi nene ni go tsakisa. (Isa. 48:17-19) Gi va nyika kutsumba. (Rom. 15:4) Loku va ingisela va tlhela va hanya hi lezi va zi gonzako, va “ta hanyiswa.” — Rom. 10:13, 14.

4. Xini xi to kala xi nga rivakelwi hi Jehova?

⁴ A vanana va va nene a va kombisi liranzo hi vapswali vabye ka zikhati zo kari ntsena. Va ti karatela ku kombisa liranzo xikhati xontlhe. Hi kufanana, a liranzo la hina lo eta hi Nungungulu ni muakelane li ta hi kuca a kuva hi hlota tindlela ta ku nyika wukustumunyu xontlhe xikhati, na ku nga hi ntsena loku hi hi sinwini. Hi ta xumayela hi nga tsiki. (Miti. 5:42) A liranzo lelo cima li nga ta rivakelwa hi Jehova. — Maheb. 6:10.