A hweti ya Agosto yi tava ya lisima nguvu ka matimu ya ntiro!
Xiphephana xiswa xi to avelwa misaveni yontlhe
1. I tsima muni go hlawuleka gi to mahiwa misaveni yontlhe, laha hi tshinelako ka kuva a Mufumo wu tlhanganyisa a 100 wa malembe?
1 A Mufumo wa Nungungulu wu laha kusuhani ni ku tlhanganyisa a 100 wa malembe na wu fuma. Hi nga wona lezi zi sasekisako zona a kuva hi dumisa Jehova hi tsima go hlawuleka! Hi Agosto hi tava ka tsima ga misava yontlhe ga ku nyikela a xiphephana xiswa xi nga ni hloko ya mhaka Hi nga yi kuma kwihi a mihlamulo ya ziwutiso za lisima za wutomi? A xiphephana lexi xi kuca vagonzi lezaku va lava a mihlamulo lomu ka Biblia xi tlhela xi tlhamusela lezi va nga vuniswako zona hi jw.org.
2. Hi nga patsekisa kuyini ka ku ‘kanyuluka hi maha guwa ga hombe ga ku dumisa Jehova’ ka hweti ya Agosto?
2 Maha guwa ga hombe ga ku dumisa: Kasi ku vuna vahuweleli lezaku va anzisa wutireli gabye, ku mahilwe lulamiselo go hlawuleka ka ni wihi a lavako ku maha phayona go vunetela ka hweti ya Agosto. Nzeni ka hweti leyi, a vahuweleli va bapatizilweko va ta vumelelwa a kuva va teka a wuphayona go vunetela ga 30 wa tihora. Kota lezi a hweti ya Agosto yi nga ni ntlhanu wa va Wazihlanu, Milongiso, ni tisonto, a vahuweleli vo tala lava va tirako xikari ka viki kutani lava va yako xikoleni va nga zi kota ku maha a maphayona yo vunetela. Loku u hi ni xigonzani xi ringanelwako hi kuva muhuweleli kutani n’wana a lavako ku maha muhuweleli, tekela ku byela a mutlhanganyisi wa hubye ya madota. Hi nga alakanyela lezi zi to va tiyisisa zona hi kuva va ti patsa na hina kota vahuweleli ka hweti leyi ya lisima nguvu! Hambu lezi a maphayona ya xikhati xontlhe ma ti nyikako maferiya nzeni ka hweti ya Agosto anzhako ka ku ngha ma enetile a tihora tabye ta lembe ni lembe, zi nga ha koteka lezaku ma cica a longoloko wa wona kasi ma zi kota a ku hlengela hi kumbheleleko ka tsima legi go hlawuleka. Lexi xikhati xa lezaku a mingango yi bhula hi lezi yi to patsekisa zona ka ku ‘kanyuluka yi maha guwa ga hombe ga ku dumisa Jehova’ ka hweti ya Agosto. — Ezra 3:11; Mav. 15:22.
3. Kutsumba muni hi nga nako ka tsima legi go hlawuleka?
3 Hambu lezi hi tshukileko hiva ni tsima go fana ni legi, hi na ni kutsumba ka lezaku legi gi tava ga lisima nguvu. Xana hi nga zi kota a ku chikela ka ntsengo wa hombe wa tihora, wa vahuweleli ni wa maphayona yo vunetela hi Agosto? Laha hi chikelako magumo ka lembe ga ntiro ga 2014, ngha Jehova a katekisa a kutikarata ka vanhu vakwe va misava yontlhe lezaku va maha a hweti ya Agosto yiva ya wukustumunyu ga hombe go hunza tontlhe ti tshukileko tiva kona! — Mat. 24:14.