Vakhosaheleko — mu va lisima nguvhu lomu bandleni!

Kuzvilava wenawu a wa ha zvi koti ku maha lezvi u nga maha na wa ha hi muswa hi kota ya tanga. Hambu lezvi u tireleko Jehovha hi kutsumbeka hi malembe yo tala, kuzvilava u ngava ni maalakanyo ya hava hi wena wutsumbu hi kota ya kugumelwa loku u nga nako zvezvi. Hi cikombiso, u nga ringiwa ku fananisa lezvi u nga maha kale ni lezvi u mahako zvezvi. Loku zvi hi lezvo, cini ci nga ku vhunako a ku hlula maalakanyo lawo?

ZVINI LEZVI JEHOVHA A ZVI RINDZELAKO KA WENA?

Ti wutise lezvi: ‘Zvini lezvi Jehovha a zvi rindzelako ka mina?’ U nga chavelelwa hi magezu ma nga ka Dhewuteronome 6:5, ma nge: “Randza Jehovha, a Nungungulu wa wena, hi mbilu ya wena yontlhe, ni muhefemulo wa wena wontlhe, ni ntamu wa wena wontlhe.”

Hi kuya hi vhesi legi, Jehovha i rindzela lezvaku u mu tirela hi mbilu ya wena yontlhe, ni muhefemulo wa wena wontlhe, ni ntamu wa wena wontlhe. Lezvo zvi ta ku vhuna ku u nga ti fananisi ni van’wani, kutani ku fananisa lezvi u mahako zvezvi ni lezvi a kale u nga zvi kota ku maha.

Ehleketa hi lezvi: A cikhati leci u nga hi n’wanana, zvini u nga kari u nyika Jehovha? A kutala ka vanhu va Jehovha va wa ta wula ku ndzi wa mu nyika zvontlhe zvi nga hi ntan’wini wa mina. Phela lezvo zvi wa hi zvona zva zvinene zva kona hi kuya hi ciyimo ca wena ka cikhati leco. Zvezvi zvini u zvi kotako ku nyika Jehovha? Hi lezvi zvi nga ntan’wini wa wena hi kuya hi ciyimo ca wena nyamutlha — ku nga lezvi u zvi kotako ku maha zvezvi. Loku u wona zvilo hi mawonela lawo, u ta wona lezvaku lezvi u mahelako Jehovha zvezvi zva fana ni lezvi u nga kari u mu mahela kale. U wa mu mahela zvontlhe zvi nga hi ntan’wini wa wena niku zvezvi wa ha simama ku mu mahela.

A WUTLHARI GA WENA GI NGA VHUNA VAN’WANI

A mhaka yin’wani yo tiya hi leyi: Wutshan’wini ga ku veka kupima ka lezvi u nga ha zvi kotiko ku maha, zama ku hlota tindlela ta ku vhuna van’wani kota munhu wa hombe. Hi lisine, kota muKristu a kulileko hi tanga, zvezvi u nga maha zvilo zva ku u wa nga zvi koti ku maha a cikhati leci u nga hi muswa. Hi cikombiso, u nga maha lezvi zvi landzelako:

Va hlawutele matshango ya wena van’wani. Wona magezu ma landzelako ma nga lomu ka Bhibhiliya:

Hosi Dhavhidha i te: “Ndzi wa hi jaha, makunu ndzi khosahele, kanilezvi a ndzi se tshuka ndzi wona a wakululama na a tsikilwe, ne hambu a vana vakwe na va kombela pawa.” — Lis. 37:25.

Joxuwa i te: “Kota lezvi mu zvi wonako, ndzi laha kusuhani ni kufa; ma zvi tiva khwatsi hi mbilu ya n’wina yontlhe ni muhefemulo wa n’wina wontlhe lezvaku a ku na gezu ni gin’we ka zvontlhe a zvitsumbiso zva zvinene lezvi Jehovha, a Nungungulu wa n’wina, a mu tsumbisileko gi wileko hasi. Wontlhe ma tatisekile ka n’wina. A ku na gezu ni gin’we ka wona gi wileko hasi.” — Jox. 23:14.

Kuzvilava wenawu u tshuka u wula zvo fana. Dhavhidha na Joxuwa, a mun’we ni mun’wani wabye, va wulawulile hi zvilo va zvi hanyileko vona wutsumbu. Kota lezvi ka ku a malandza lawo yo tsumbeka ya Jehovha ma wo ti tshandza hi lezvi ma zvi wonileko ni ku zvizwa ka malembe yo tala ma mbhetileko na ma cuwukisela, a magezu yabye ma vile ni ntamu nguvhu.

Loku ku hi lezvaku u kari u tirela Jehovha hi malembe yo tala, wenawu u nga hlawutela matshango ya lezvi u wonileko Jehovha na a ku mahela kutani ku mahela van’wani. U na ni tshango go kari gi ku tsakisako u gi alakanyako ga cikhati leci u nga wona Jehovha na a katekisa vanhu vakwe? Tlhatlheka ku hlawutela van’wani! Lezvo zvi nga va tangalisa a ku khwatsi hi lezvi zvi nga ku tangalisawo. Hi cigelo leco, loku a van’wani vazwa matshango lawa wena u vileko nawo ntirweni wa Jehovha, va nga tiyisiwa nguvhu. — Rom. 1:11, 12.

A yin’wani ndlela u nga tiyisako van’wani hi yona kuva kona mitlhanganweni ya bandla hi civiri, contlhe cikhati u zvi kotako. Loku u hi seyo u nga tiyisa vakhozeli-kuloni u tlhela u vhunekawo. Connie, a kumbukilweko kusanguleni, i ngalo: “A kuya mitlhanganweni zvi ndzi vhuna ku ndzi nga mbheli ntamu. Kona zvi nga kotekisa kuyini ku ndzi mbhela ntamu, na ndzi kari ndzi kombisiwa lirandzo la hombe Salawini ya Mufumo? Ndzi ti karatela ku kombisa kubonga van’wani hi ku va nyika zvinyikiwo zva zvitsongwani. Niku ndzi ti karatela ku simama ndzi maha mitiro ya moya ni vamakabye.”

JEHOVHA WA WU NYIKA LISIMA A NTIRO U MU MAHELAKO HI KUTSUMBEKA

Lomu ka Bhibhiliya ku na ni zvikombiso zvo tala zva vanhu lava hambu lezvi va nga hi ni kugumelwa ko kari va nga randziwa hi Jehovha. Ehleketa hi Simeyoni, a cidhalana ca muIzrayeli, loyi a nga ha hanya a cikhati leci Jesu a nga pswaliwa. A cikhati leci Simeyoni a ngaya Tempeleni kuzvilava i wa wona majaha na ma maha mitiro yo hambanahambana seyo. Ahati Simeyoni ke? Hi kuya hi mawonela ya munhu, kuzvilava na a alakanyile ku lezvi a nga khosahele i wa nga hi wa lisima ka Jehovha. Kanilezvi Jehovha i wa nga mu wonisi lezvo. I wa wona Simeyoni kota munhu wo ‘lulama ni wa ku chava Nungungulu’ niku i no mu chachazela hi ku mu nyika thomo ga ku wona Jesu na a ha hi n’wanana. Ahandle ka lezvo, Jehovha i tirisile Simeyoni kasi ku bika a ciphrofeto xungetano hi Mesiya loyi a nga hata. (Luka 2:25-35) Zva dlunyateka lezvaku loku Jehovha a cuwuka Simeyoni, i wa nga woni miri wo khanyana basi hi kukumba, kanilezvi i wa wona wanuna wa kukholwa ko tiya loyi a “moya wo basa wu [nga] hi hehla kakwe”.

Wenawu u nga tiyiseka lezvaku Jehovha wa wu nyika lisima a ntiro lowu u mu mahelako hi kutsumbeka, hambu lezvi u nga ni kugumelwa. Mahlweni ka Jehovha, “a cinyikiwo ca amukeleka nguvhu hi kuya hi lezvi a munhu a nga nazvo, na ku nga hi lezvi a nga hava.” — 2 Kor. 8:12.

Na u ehleketa hi mhaka leyo, veka kupima ka lezvi u zvi kotako ku maha. Hi cikombiso, hi tihi tindlela ta ku nyika wukustumunyu u nga zvi kotako ku patseka ka tona, hambu kova hi cikhatana citsongwani? A ku u nga zvi kota ku vhuna van’wani hi ku va fonela zva cikhatana kutani ku va tsalela cikartawana? A zvilo zvitsongwani zva ku kombisa lirandzo zvi nga va khumba nguvhu a vakhozeli-kulori, nguvhunguvhu loku zvi mahiwa hi makabye a nga ni malembe yo tala na a tirela Jehovha.

A vokari va na ni kugumelwa hi tlhelo ga nyama. Hi nga wona a tshango ga makabye wo kari wa cisati wa le Mutsuwuka-gambo wa África, ka kwadru gi nga ka ndzima leyi, gi nge: “Zvi ponisile wutomi gakwe.”

Alakanya lezvaku a matimu ya wena ya kukholwa ni kutsumbeka ma nga tiyisa van’wani. Phela wena u cikombiso co hanya ca munhu wa ku timisela! Hikwalaho, tiyisekani lezvaku “Nungungulu a hi loyi a nga lulamangiko wo kala a rivala a ntiro wa n’wina ni lirandzo leli mu nga li kombisa vitweni gakwe hi lezvi mu tireleko vobasa, ni lezvi ma ha simamako ku va tirela”. — Mah. 6:10.

SIMAMA KU HISEKA HI LAHA ZVI KOTEKAKO HI KONA

A vakambisisi va polile lezvaku a vanhu vo tala va khosaheleko lava va ti karatelako ku vhuna van’wani va na ni lihanyo linene, va pimisa khwatsi niku va hanya wutomi go leha.

Lisine ku a ku maha zvazvinene zvi nga ta susa a zvikarato zvi vangiwako hi tanga. Mufumo wa Nungungulu woce wu to zvi susa hi ku fuvisa a cinya ci mahako ku hi khosahala hi tlhela hifa, ku nga ciwonho. — Rom. 5:12.

Hambulezvo, a ntiro lowu u mahelako Jehovha, wu patsako ku vhuna van’wani lezvaku va mu tiva, wu engetela ku tiyisa kutsumba ka wena wu tlhela wu ku vhuna ku uva ni lihanyo la linene. Vamakabye va khosaheleko, ha mu khongotela lezvaku mu tiva ku Jehovha wa zvi nyika lisima lezvi mu mahako ntirweni wakwe niku a vamakabye lomu bandleni va vhuneka hi cikombiso ca n’wina ca kukholwa!