U nga kombisa kuyini ku wa bonga a hakhelo ya kutlhatlhisa?

1-2. A hakhelo ya kutlhatlhisa ya Jesu yi fanele ku hi susumeta ku maha yini niku hikuyini? (2 Va Le Korinte 5:14, 15) (Wona ni mufota.)

LOKU a wo humesiwa lomu ka nhulu ya yindlu yi hohlokileko, u wa nga ta tizwa na u hi ni mangava ni loyi a ponisileko wutomi ga wena? Hambu loku ku hi lezvaku ku ni van’wani u nga ponisiwa navo, u wa ta xuva ku kombisa hi wece ku wa bonga, kasi ku komba ku wa zvi zwisisa ku a munhu loye i ku tlhatlhisile hi kota ya wuxinji gakwe na ku nga hi lezvaku i wo kurumeteka ku ku tlhatlhisa.

² Kota lezvi zvi tlhamuselweko ka ndzima yi nga hundza, a hi nge zvi koti ku ti tlhatlhisa ha hoce ka mawuyawuya ya ciwonho leci ci hi thapeleko. Kanilezvi, a hakhelo ya kutlhatlhisa ya Jesu ya zvi kota ku hi tlhatlhisa hi ku maha lezvaku: Co sangula, hi tsetselelwa zviwonho. Ca wumbiri, hiva ni kutsumba ka ku tlhatlhiswa ka ciwonho hi kumbhelela, ni ca wunharu, ku hi vhuna ku vhuxa kuzwanana na Nungungulu. Hi cigelo leco, hi na ni kutsumba ka ku hanya kala kupindzuka misaveni yiswa ya Jehovha. Kunene, a hakhelo ya kutlhatlhisa yi kombisa a lirandzo la Jesu hi vanhu — ku nga lirandzo a nga sina a hi nalo na a nga seta a ta pswaliwa kota munhu wo mbhelela. (Mav. 8:30, 31) Mupostoli Pawule i tsalile lezvi: “A lirandzo la Kristu la hi susumeta”. (Lera 2 Va Le Korinte 5:14, 15.) Lezvo zvi wula ku a lirandzo leli Jesu a hi kombisileko li fanele ku hi kuca ku maha cokari kasi hi komba lezvaku a hi woni hakhelo ya kutlhatlhisa kota nchumu wu hi ringanako.

3. Hikuyini a munhu ni munhu a nga kombisako kubonga hakhelo ya kutlhatlhisa hi ndlela yo hambana?

³ A lulamiselo ga lirandzo ga hakhelo ya kutlhatlhisa gi ku susumeta hi ndlela muni? A hlamulo wa wena wu nga hambana ni wa mun’wani. Kasi ku fananisa ku zvi kotekisa kuyini, alakanyela vanhu vanharu va lavako ku endza vaya ka wutshamu galegi ga gin’we, a mun’we ni mun’wani na a sukela ka dhoropa gakwe. A tindlela va to ti tirisa ta hambana. Hi kufanana, a “ndlela” leyi u to yi tirisa kasi u chikela lomu u yako kona kutani ku tatisa kungo ga wena ga ku kombisa ku wa bonga a hakhelo ya kutlhatlhisa yi taya hi laha u yimileko kona zvezvi, ku nga lezvi a wunghana ga wena na Jehovha gi nga tshamisa zvona. Na hi alakanya lezvo, ka ndzima leyi hi ta wulawula hi mitlawa yinharu ya vanhu. Wo sangula: Zvigondzani zva Bhibhiliya. Wa wumbiri: Makristu ma bhabhatisilweko. Wa wunharu: Tiyivhu ti hambukileko ntlhambini.

ZVIGONDZANI ZVA BHIBHILIYA

4. Jehovha i ti zwisa kuyini hi zvigondzani zva Bhibhiliya?

⁴ Loku ku hi lezvaku u lomu ka ku gondza Bhibhiliya, ehleketa hi mhaka leyi: A kuva u vhumela ku gondza mahungu ya manene zvi komba ku u mun’we wa lava Jehovha a va kokako kasi va ta maha vanghana vakwe. (Joh. 6:44; Miti. 13:48) “Jehovha hi yena a hlolako a timbilu”. Lezvo zvi wula ku yena wa zvi wona lezvi u ti karatisako zvona kasi u gondza hi yena niku wa tsaka a cikhati leci a ku wonako na uba mazambo yo sangula kasi u kula hi tlhelo ga moya ni laha u cicako zvokari wutomini ga wena kasi u ti zwananisa ni milayo yakwe. (Mav. 17:3; 27:11) A hakhelo ya kutlhatlhisa hi yona yi mahako lezvaku zvi koteka ku uva ni wunghana na Jehovha. (Rom. 5:10, 11) U nga tshuki u zvi rivala lezvo!

5. A zvigondzani zva Bhibhiliya zvi nga gi tirisisa kuyini a wusungukati gi nga ka Va Le Filipi 3:16?

⁵ Loku u hi cigondzani ca Bhibhiliya u nga kombisa kuyini ku wa bonga a hakhelo ya kutlhatlhisa? A yin’we ya tindlela ku tirisa wusungukati legi mupostoli Pawule a nga nyika Va Le Filipi, gaku: “Kani hi buvhile kala kwihi, a hi simameni ku famba hi kufaneleko ndleleni yaleyi”. (Filp. 3:16) A wuhundzuluseli gin’wani ga Bhibhiliya gi hundzulusele vhesi legi, giku: “A hi simameni ku famba hi kongoma lomu hi cuwukileko kona zvezvi.” Hikwalaho, landzela wusungukati legi u nga tsiki nchumu wu ku tsikisa ku famba ndleleni yi yisako wutomini. — Mat. 7:14; Luka 9:62.

6. Zvini lezvi a zvigondzani zva Bhibhiliya zvi nga mahako loku zvi zvi karatela ku cica lezvi zvi lavekako? (Dhewuteronome 30:11-14) (Wona ni mufota.)

⁶ Makunu zvini u nga mahako loku ku hi lezvaku ku na ni mhaka yo kari u gondzileko lomu ka Bhibhiliya yi ku karatelako ku yi kholwa? Kambisisa a gondzo leyo u tlhela u khongela ka Jehovha u mu kombela lezvaku a ku vhuna ku yi zwisisa khwatsi. (Lis. 86:11) Loku zvi simama ku ku karatela ku yi zwisisa, yi veke hi tlhelo — kanilezvi u nga tsiki ku gondza Bhibhiliya. Ahati loku zvi ku karatela ku tsika ku maha zvilo zvo kari zvi koniwako hi Bhibhiliya? Alakanya lezvaku Jehovha a nga hi kombeli ku hi maha zvilo a zvi tivako ku a vanhu vo kala kumbhelela a va nge zvi koti ku maha. U nga zvi kota ku maha lezvi zvi mu tsakisako. (Lera Dhewuteronome 30:11-14.) Jehovha i tsumbisa ku ku vhuna. (Isa. 41:10, 13; 1 Kor. 10:13) Hikwalaho, u nga godholi. Wutshan’wini ga ku tshama hi ku gayela a cikarato leci u kumanako naco, veka kupima ka zvontlhe lezvi Jehovha a ku mahelako, a ku patsa ni lulamiselo ga hakhelo ya kutlhatlhisa. Laha a lirandzo la wena hi Jehovha li kulako, u ta wona lezvaku “a milayo yakwe a yi karati”. — 1 Joh. 5:3.a

7. Zvini lezvi a vaswa va nga ni vapswali va nga maKristu va faneleko ku ehleketa hi zvona?

⁷ Ahati n’wina vaswa mu wundliwako hi vapswali va nga maKristu? N’winawu mu zvigondzani zva Bhibhiliya. Kasi ku wula lisine, mu zvigondzani zva lisima nguvhu zva Bhibhiliya ka vapswali va n’wina. A Bhibhiliya gi wula lezvi: “Tshinelani ka Nungungulu, na yena i ta tshinela ka n’wina.” (Jak. 4:8; 1 Kro. 28:9) Loku mu sangula hi n’wina muba mazambo ya ku tshinela ka Jehovha, yenawu i ta tshinela ka n’wina. Jehovha a nga mu woni kota zviro zva ntlawa wo kari ntsena. Yena i koka a mun’we ni mun’wani, a ku patsa ni lava a vapswali vabye va nga lisineni. Zvini lezvi Jehovha a mahileko kasi zvi koteka ku uva ni wunghana ga wena wutsumbu naye? I ku nyikile a hakhelo ya kutlhatlhisa, ku nga nchumu u nga faneliko ku tshuka u wu rivala. (Rom. 5:1, 2) Hikwalaho, na u nga seya Cialakanyisweni ca lembe legi, ti nyike cikhati ca ku ehleketa hi lezvi wena u vhunekisako zvona hi kufa ka Jesu. Andzhako ka lezvo, ehleketa hi lezvi u lavako ku hanyisa zvona ni mixuvo leyi u lavako ku ti vekela kasi u komba ku wa bonga a hakhelo ya kutlhatlhisa leyi Jehovha a ku nyikileko hi ku tirisa N’wana wakwe.b

MAKRISTU MA BHABHATISILWEKO

8. A maKristu ma bhabhatisilweko ma zvi kombisa kuyini ku ma kholwa ka hakhelo ya kutlhatlhisa?

⁸ Loku u hi muKristu a bhabhatisilweko, u sina u kombisile kukholwa ka hakhelo ya kutlhatlhisa hi tindlela to tala. Hi cikombiso, u bile mazambo yo kari kasi ku tshinela ka Jehovha ni ku hanya hi milayo yakwe. U ingisile cileletelo ca Jesu ca ku maha vapizani hi ku bhulela van’wani lezvi u zvi kholwako. U nyikele wutomi ga wena ka Jehovha u tlhela u bhabhatisiwa. Kuzvilava u vhukelwe hi kota ya lezvi u tirelako Jehovha. (2 Tim. 3:12) A kutimisela ka wena hi kutsumbeka ku komba ku wa mu randza Jehovha niku wa bonga a hakhelo ya kutlhatlhisa leyi a nyikeleko hi ku tirisa N’wana wakwe. — Mah. 12:2, 3.

9. I mhango muni leyi a maKristu ma bhabhatisilweko ma faneleko ku ti wonela ka yona?

⁹ Kota maKristu ma bhabhatisilweko, ku na ni mhango hi faneleko ku ti wonela ka yona. Laha a cikhati ci yako ci hundza, hi nga tshuka hi sangula ku nga kombisi kubonga hi hakhelo ya kutlhatlhisa. Zvi nga mahekisa kuyini lezvo? Ehleketa hi lezvi zvi nga humelela maKristu ya zana ga malembe go sangula le Efesusi. Andzhako ka loku a vhuxilwe hi ka vafileko, Jesu i ma dzundzile hi kota ya kutimisela ka wona. Hambulezvo, i no ma byela lezvi: “Ndzi na ni cisolo leci ka wena: u tsikile a lirandzo leli u nga hi nalo kusanguleni”. (Kuv. 2:3, 4) Kota lezvi a magezu ya Jesu ma kombako, a wukhozeli ga maKristu lawo hi kutsongwani-kutsongwani gi wa sangula kuva ga ku fela ku tatisa nayo. A munhu wa tshamela lego a nga khongela, aya mitlhanganweni ni kuchumayeleni kanilezvi na a zvi mahela ku hundzisa ntungu, na a nga ha susumetiwi hi lirandzo. Makunu zvini u nga mahako loku uzwa ku a lirandzo la wena hi Jehovha a la ha tiyangi a ku fana ni kale?

10. U nga gi tirisisa kuyini a wusungukati legi Pawule a nga nyika Timote? (1 Timote 4:13, 15)

¹⁰ Mupostoli Pawule i byelile Timote lezvaku a “ehleketa” a tlhela a “veka kupima” ka mitiro yakwe kota muKristu. (Lera 1 Timote 4:13, 15.) Hi kuyelana ni wusungukati lego, zama ku ehleketa hi tindlela ta kuva u ti tsitsirita wukhozelini ga wena kasi u simama ku ‘vhura moyeni’. (Rom. 12:11; wona nota ya cigondzo laha kaku: “Sejam fervorosos no espírito.”) Hi cikombiso, kuzvilava u nga chukwatisa lezvi u dembisako zvona ndleve mitlhanganweni hi kuva u ti longisela khwatsi. Kutani u nga maha cigondzo ca wena wutsumbu ci bhindzulako hi ku ti nyika cikhati ca ku tshama wece kasi u zvi kota ku ehleketa hi lezvi u gondzako. A ku khwatsi hi lezvi a ndzilo wu lavako ku hlanganyetiwa kasi wu simama ku vhura, u fanele ku ti tsitsirita ka zvipandze lezvo kasi u simama ku bonga zvontlhe lezvi Jehovha a ku nyikako, a ku patsa ni hakhelo ya kutlhatlhisa. A cin’wani kambe, na ku kiyela mavhiki matsongwani kasi a Cialakanyiso ci chikela, ehleketa hi makatekwa lawa hi ti buzako hi wona hi lezvi hi nga Vakustumunyu va Jehovha ya ku a van’wani a va ma kumi. Handle ko kanakana, lezvo zvi ta ku maha u engetela ku bonga a hakhelo ya kutlhatlhisa — ku nga yona yi mahako lezvaku zvi koteka ku uva munghana wa Jehovha.

11-12. A ku loku u nga ha hiseki hi cikhati co kari zvi wula ku Nungungulu a nga ha ku nyiki moya wakwe wo basa? Tlhamusela. (Wona ni mufota.)

¹¹ Loku ka cikhati co kari u tshuka u zvi zwisa ku khwatsi a wa ha hisekeli wukhozeli ga lisine a ku fana ni kale, u nga mbheli ntamu kutani ku tsutsumela ku ti byela ku Nungungulu a nga ha ku nyiki moya wakwe wo basa. Alakanya lezvi mupostoli Pawule a nga tsalela Va Le Korinte xungetano hi ntiro wakwe wa kuchumayela. I te: “Hambu loku ndzi maha na ndzi nga zvi randzi, a ntiro wona ndzi sina ndzi nyikilwe”. (1 Kor. 9:17) I wa lava ku wula yini hi magezu lawo?

¹² Ka zvikhati zvo kari Pawule i wa nga hi na kuxuva ka ku chumayela. Kanilezvi i wa ti yimisele ku timisela ntirweni wakwe wa kuchumayela na ku nga khataliseki lezvi a nga ti zwisa zvona. Wenawu ti yimisele ku maha lezvo. Ti yimisele ku maha lezvi zvi nga zvinene hambu loku a mbilu yi nga zvi lavi. Hikwalaho, kombela Jehovha lezvaku a ku nyika “kuxuva ni ntamu wa ku zvi maha”. (Filp. 2:13) U nga tsiki a longoloko wa wena wa moya. Tiyiseka lezvaku hi kufamba ka cikhati lezvi u mahako zvi ta khumba a kutizwa ka wena zvi tlhela zvi hlanganyeta a lirandzo leli la ha hiko mbilwini ya wena.

13. Hi nga simamisa kuyini ku ti hlota kasi hi tiva lezvaku hi “kukholweni ke”?

¹³ Zvi nene ku hi tshamela ku ti hlola hi ku yelana ni cileletelo ci nga ka 2 Va Le Korinte 13:5, ci nge: “Tshamani hi ku ti hlola a ku mu kukholweni ke; tshamani hi ku ti kamba a ku mu vanhu va tshamela muni.” Hi cikombiso, hi nga ti wutisa lezvi: ‘Ndza rangisa Mufumo wa Nungungulu wutomini ga mina?’ (Mat. 6:33) ‘A mihlakano leyi ndzi yi hlawulako ya komba ku ndza venga zvakubiha?’ (Lis. 97:10) ‘Ndza vhuvhumisa kurula ni kuzwanana cikari ka maKristu-kulori?’ (Efe. 4:2, 3) A Cialakanyiso, ku nga cikhati leci hi ehleketako nguvhu hi lulamiselo ga Jehovha ga hakhelo ya kutlhatlhisa, ci hi nyika thomo ga ku hi ti hlola ni ku tiyiseka lezvaku a hi ti hanyeli ga hina wutsumbuc kanilezvi hi hanyela Kristu.

TIYIVHU TI HAMBUKILEKO NTLHAMBINI

14. Zvini zvi mahako a maKristu yo kari ma hambuka ntlhambini?

¹⁴ A maKristu yo kari ma nyimile ku khozela zvin’we ni bandla, andzhako ka tihweti to kari kutani malembe na ma tirela Jehovha hi kutsumbeka. Hikuyini? A yo kari ma bindziwa hi “karateka hi wutomi”. (Luka 21:34) A man’wani ma no khunguvanyisiwa hi magezu kutani hi zvokari zvi nga mahiwa hi muKristu-kuloni. (Jak. 3:2) Niku a man’wani ma mahile zviwonho zva hombe ma tlhela ma nga lavi ku kombela civhuno. Kani cini ci ku mahileko u hambuka ntlhambini, zvini u nga mahako kasi u wuya? Zvini lezvi a lulamiselo ga lirandzo ga hakhelo ya kutlhatlhisa gi ku susumeta ku maha?

15. Jehovha i zvi kombisa kuyini ku wa khatala hi tiyivhu ti hambukileko ntlhambini? (Ezekiyeli 34:11, 12, 16)

¹⁵ Ehleketa hi lezvi Jehovha a ti zwisako zvona hi lava va hambukileko ntlhambini. Phela a nga va chokolangi. Wutshan’wini ga lezvo, i kari a hlota tiyivhu ti lahlekileko. Wa ti gisa ni ku ti vhuna lezvaku ti tlhelela kakwe. (Lera Ezekiyeli 34:11, 12, 16.) A ku Jehovha i kari a ku mahela lezvo wenawu? Ina! Phela a kuva u gondza mahungu lawa zvi komba ku a mbilu ya wena yi xuva ku maha zvakululama. A ku khwatsi hi lezvi Jehovha a wonileko zvilo zva zvinene mbilwini ya wena a cikhati leci a nga ku kota uta lisineni, wa ha wona zvilo zva zvinene ka wena niku i lava ku u tlhelela ngangweni wakwe.

16. Zvini zvi nga vhunako tiyivhu ti lahlekileko a ku tlhelela ka Jehovha? (Wona ni mufota.)

¹⁶ A broxura Wuya ka Jehova gi na ni magezu yo tiyisa, yaku: ‘Tiyiseka lezvaku Jehovha i ku rindzele kasi ku ku amukela hi matsenya a cikhati leci u to wuya kakwe. I ta ku vhuna ku yimisana ni kukarateka, kukhunguvanyiswa, a tlhela a ku vhuna a ku kuma kurula ka maalakanyo ni ka mbilu loku ku kumiwako hi kuva ni livhalo li basileko. Hi kumaha loko, u nga tlhela u kuceka ku tirela Jehovha na u hi zvin’we ni vakhozeli-kuloni.’ Alakanya kambe lezvaku a madhota ma longile ku ku vhuna. Ma ngava “wutumbelo ka moya, ni ku khwatsi wuchavelo ka cingulo”. (Isa. 32:2) Kota ndlela ya ku kombisa ku wa yi bonga a hakhelo ya kutlhatlhisa, ti wutise lezvi: ‘Mazambo muni ndzi nga bako zvezvi kasi ndzi “lulamisa timhaka” na Jehovha?’ (Isa. 1:18; 1 Ped. 2:25) Hi cikombiso, a ku u nga zvi kota kuya mutlhanganweni Salawini ya Mufumo? U nga bhula ni dhota go kari u gi kombela ku gi ku vhuna hi tlhelo ga moya, lezvi kuzvilava zvi nga patsako ku u fambiselwa cigondzo ca Bhibhiliya hi kukhandzakanya hi cikhati co kari? Tiyiseka lezvaku Jehovha i ta katekisa zvontlhe lezvi u mahako kasi u tlhelela kakwe ni ku kombisa ku wa yi bonga a hakhelo ya kutlhatlhisa.

U NGA KOMBISA KUYINI KU WA BONGA?

17-18. Hi nga ci tirisisa kuyini cikhati ca hina hi wutlhari na ku nga se chikela Cialakanyiso ca lembe legi?

¹⁷ Jesu i wulile lezvaku ku nyikelwe a hakhelo ya kutlhatlhisa “kasi ni wihi loyi a kombisako kukholwa kakwe a nga lovisiwi, kanilezvi a kuma wutomi ga pindzukelwa”. (Joh. 3:16) A hakhelo ya kutlhatlhisa i ndlela leyi Jehovha a yi tirisako kasi ku hi tlhatlhisa ka mawuyawuya ya ciwonho ni kufa. A hi lavi ku tshuka hi rivala ku kombisa ku ha yi bonga a hakhelo ya kutlhatlhisa. (Rom. 3:23, 24; 2 Kor. 6:1) Na ku kiyela masiku yo kari kasi hi maha Cialakanyiso, ti nyike cikhati ca ku ehleketa hi lirandzo leli Jehovha na Jesu va li kombisileko. A lirandzo lelo li fanele ku hi susumeta ku kombisa kubonga.

¹⁸ A hakhelo ya kutlhatlhisa yi ku susumeta ku kombisa kuyini kubonga? A munhu ni munhu a nga hlamula hi ndlela yo hambana. Kanilezvi a co tiya ku Jehovha i ta katekisa a kutikarata ka wena ni ka timiliyoni ta vanhu va mu khozelako, lava va kalako va nga ‘ha ti hanyeli, kanilezvi va hanyelako loyi a nga va fela’. — 2 Kor. 5:15.