7. a) Xini lexi Hana a nga funga, niku hikuyini? b) Ma vile wahi a magumo ya zona? c) A xifungo xa Hana xi wa wula yini ka Samueli? (Wona tlhamuselo wa lahasi.)

⁷ Hana yenawu i mahile xifungo ka Nungungulu xikhatini xo nonoha nguvu wutomini gakwe. I wa bayiseka nguvu hi lezi a nga hi ngonwa, niku i wa poyilelwa hi kota ya lezo. (1 Samueli 1:4-7, 10, 16) I lo bikela Jehova lezi a nga ti zwisa zona, a tlhela a mu tsumbisa lezi: “Jehova wa tiyimpi, loku u wa cuwuka a hlomulo wa nanza ga wena, u nzi alakanya, u nga rivali a nanza ga wena, u nyika a nanza ga wena a nwanana wa mufana, minawu nzi wa ta mu nyikela ka Jehova wontlhe masiku ya kuhanya kakwe, ni likari cima li nga ta henya a hloko yakwe.”a (Wona tlhamuselo wa lahasi.) (1 Samueli 1:11) Jehova i ingisile a mukhongelo wa Hana, niku ka lembe gi nga lanzela i lo pswala n’wana, ku nga Samueli. Hana a nga no ku tsaka! Hambulezo a nga rivalangi a xifungo xakwe ka Nungungulu. A xikhati lexi a nga pswala a mufana wakwe, i te ngalo: “Nzi mu kombelile ka Jehova.” — 1 Samueli 1:20.