“Ngona U Nzi Lanzela” — Xana Jesu I Wa Lava Ku Wula Yini?

1, 2. Hi xihi a xirambo xa chukwana ka zontlhe lexi munhu a nga xi amukelako, niku hi xihi a xiwutiso lexi hi nga ti wutisako?

HI XIHI a xirambo xa wuchukwana lexi u tshukileko u xi amukela? U nga ha alakanya a xikhati lexi u nga rambiwa ka ximaho xo hlawuleka, kuzilava kuve muchado wa vanhu vambiri u va ranzako nguvu. Kutani u nga ha alakanya a siku legi u nga rambiwa lezaku u ya nyikwa ntiro wa lisima. Loku ku hi lezaku wa tshuka u amukela a zirambo lezo, handle ko kanakana u tsakile nguvu, hambu ku tizwa na u hi munhu, hi kuva u zi kumile. Hambulezo, a lisine hi lezaku u amukelile a xirambo xa chukwana nguvu ka lezo. A munwe ni munwani wa hina i xi amukelile. Niku a ndlela leyi hi yi hlawulako kasi ku vumela ha yona a xirambo lexo ya hi khumba nguvu. Loko kuhlawula ka chukwana ka kontlhe loku hi ta nga ku maha wutomini.

² Hi xihi a xirambo lexo? Xita hi ka Jesu Kristu, a N’wana a belekilweko yece wa Nungungulu wa Ntamu Wontlhe, Jehova, niku xi tsalilwe lomu ka Biblia. Ka Marku 10:21, hi gonza a magezu ya Jesu: “Ngona u nzi lanzela.” Hi lisine la kona, a xirambo lexo xa Jesu xita ka munwe ni munwani wa hina. Hi maha khwatsi hi ku ti wutisa wutsumbu ga hina: ‘Xana nzi ta xi hlamulisa kuyini?’ A hlamulo wa kona wu nga ha woneka ku khwatsi a wu karati. Himani a to ala a xirambo lexo xa lisima nguvu? Lexi xi hlamalisako hi lezaku a vanhu vo tala va xi ala. Hikuyini?

3, 4. (a) Zini zi kotekako ku ngha zi luselwe ka wanuna loyi a tshineleko ka Jesu lezaku a ta wutisa xungetano hi wutomi ga pinzukelwa? (b) Matshamela muni ya ma nene lawa zi kotekako ku ngha Jesu a ma wonile ka jaha legi ga mufumeli gi nga hi ni kufuma ka hombe?

³ Wona kota xikombiso a wanuna loyi a amukeleko a xirambo lexo hi ka Jesu hi kukongoma kwalomu ka 2.000 wa malembe ma hunzileko. Yena i wa hi wanuna wo chaveka nguvu. Kutsongwani ka kona i wa hi ni zilo zinharu lezi vanhu va byekelelako ku zi navela, hambu ku zi lusela — wujaha, titshomba, ni kufuma. A tlhatlhambuto wa Biblia wu mu tlhamusela kota “jaha,” na a hi ni “kufuma ka hombe,” ni kuva “mufumeli.” (Mateu 19:20; Luka 18:18, 23) Hambulezo, ku wa ni nchumu wo kari wa lisima nguvu xungetano hi jaha legi. Gi wa zwile zo kari hi Mugonzisi wa Hombe, Jesu, niku gi tsakelile lezi gi nga zi zwile.

⁴ A vafumeli vo tala va masiku lawo va wa nga nyiki Jesu a xichawo lexi a nga fanelwe hi xona. (Johani 7:48; 12:42) Kanilezi a mufumeli loyi i mahile zo hambana. A Biblia gi hi byela lezi: “Laha [Jesu] a nga huma a goxometa ndleleni, a munhu i lo tsutsumela kakwe, a khizama mahlweni ka yena, a mu wutisa, aku: Mugonzisi wa nene, nzi ta maha yini, kasi nzi fela kuga a tshomba ya wutomi ga pinzukelwa ke?” (Marku 10:17) Wona lezi a wanuna loyi a nga xuvisa zona a ku wulawula na Jesu, laha ka kuza a mu tsutsumela laha kubaseni, a ku khwatsi hi lezi a munwe wa vanhu va zisiwana ni va nyalidede a nga wa ta zi maha. A kuhunza lezo, i lo khizama hi xichawo mahlweni ka Kristu. Hikwalaho yena i wa hi ni kutikoramisa ko kari niku i wa tiva a xilaveko xakwe xa zilo za moya. Jesu i nyikile lisima a matshamela lawo ya ma nene. (Mateu 5:3, Tradução do Novo Mundo; 18:4) Hizalezo, a zi hlamalisi lezaku “Jesu na a mu cuwuka i lo mu ranza.” (Marku 10:21) Xana Jesu i hlamulisile kuyini a xiwutiso xa jaha lego?

A Xirambo Xo Hlawuleka Nguvu

5. Jesu i hlamulisile kuyini a jaha go fuma, niku xana hi zi tivisa kuyini lezaku a wusiwana gi wa nga hi “xilo xinwe” lexi xi nga vumaleka ka yena? (Wona kambe a tlhamuselo wa lahasi.)

⁵ Jesu i kombile lezaku a Dadani wakwe i wa sina a nyikile hlamulo wa xiwutiso xa lisima xungetano hi ku kuma a wutomi ga pinzukelwa. I lo komba Mitsalo, niku a jaha gi wulile lezaku gi wa lanzela a Nayo wa Mosi hi kutsumbeka. Hambulezo, Jesu, hi ku tirisa wutlhari gakwe ga hombe, i lo wona za ku hunza lezi zi nga hi kubaseni. (Johani 2:25) I lo wona xikarato hi tlhelo ga moya ka mufumeli loyi — xikarato xa hombe nguvu. Hikwalaho, Jesu i te ngalo: “Wa ha vumala xilo xinwe.” Xi wa hi xihi a ‘xilo lexo xa xinwe’? Jesu i te ngalo: “Famba u ya xavisa zontlhe lezi u nga nazo, u nyika zisiwana.” (Marku 10:21) Xana Jesu i wa wula lezaku a munhu i fanele kuva xisiwana kasi a tirela Nungungulu? Ahihi.a Kristu i komba xilo xa lisima la hombe.

6. Xirambo muni lexi Jesu a xi nyikileko, niku xana a hlamulo wa jaha legi gi fumileko wu kombile yini xungetano hi mbilu ya gona?

⁶ Kasi ku komba lexi xi nga vumaleka, Jesu i nyikile a wanuna loye a lungelo go hlamalisa: “Ngona u nzi lanzela.” Hi nga alakanya lezi — a N’wana wa Nungungulu a Hunzeleleko Kutlakuka i lo ramba a wanuna loye, nghohe ni nghohe, kasi ku mu lanzela! Jesu kambe i mu tsumbisile a nchachazelo wu nga kotekiko ku alakanyelwa. Yena i te ngalo: “U tava ni tshomba le tilweni.” Xana a mufumeli loyi wa jaha a fumileko i tekele ku vumela a lungelo legi, a xirambo lexi xo dzunzeka? A tlhatlhambuto wu ngalo: “I lo tshuvika nghohe hi legi gezu, a famba na a karateka; hakuva i wa hi ni titshomba to tala.” (Marku 10:21, 22) Hikwalaho a magezu ya Jesu ma nga kala ma nga rinzelwangi ma kombile a xikarato mbilwini ya wanuna loyi. Yena i wa khomelele nguvu titshombeni takwe niku, handle ka kukanakana, i wa khomelele kufumeni ni ka wudzunzo gi ngata hi kota ya lezo. Lexi xi nga tsakisiko, a liranzo lakwe zilweni lezo li wa hunza nguvu a liranzo leli a nga hi nalo ha Kristu. Zonake a “xilo xinwe” lexi xi nga vumaleka ku wa hi liranzo la mbilu yontlhe, ni la kutikarata ha Jesu na Jehova. Hi kota ya lezi a jaha gi fumileko gi nga vumala a liranzo lelo, gi lo ala a xirambo lexo xo hlawuleka nguvu! Xana wena u patsekisa kuyini ka xirambo lexi?

7. Hikuyini hi zi kotako ku tiyiseka lezaku a xirambo xa Jesu xi patsa na hina inyamutlha?

⁷ A xirambo xa Jesu xi wa ngayi ka wanuna loye yece; ge hambu kuya ka vanhu vatsongwani ntsena. Jesu i te ngalo: ‘Loku munhu a xuva ku nzi lanzela, ngha . . . a nzi lanzela xikhati xontlhe.’ (Luka 9:23, NM) Wona lezaku a “munhu” wihi ni wihi wa zi kota kuva mulanzeli wa Jesu loku yena hi lisine “a xuva” ku maha lezo. Nungungulu i kokela ka N’wana wakwe a vanhu lavo va timbilu ti tsumbekileko. (Johani 6:44) Na ku nga hi vanhu va fumileko ntsena, ge hambu zisiwana, vanhu va lixaka kutani tiko go kari ntsena, hambu lava va hanyileko xikhatini lexo ntsena kanilezi a vanhu vontlhe va nyikiwa a lungelo ga ku vumela a xirambo xa Jesu. Hizalezo, a magezu ya Jesu “Ngona u nzi lanzela” ma tira ka wena hakunene. Hikuyini u faneleko ku xuva a ku lanzela Kristu? Niku xana zini zi patsekako laha ka ku mu lanzela?