Zviwutiso zva vagondzi

Hikuyini a matimu ya wun’wanana ga Jesu ka bhuku ga Matewu ma hambanako ni lawa ma nga ka bhuku ga Luka?

A matimu ya Matewu xungetano hi kupswaliwa ka Jesu ni wun’wanana gakwe ma hambene ni lawa ya Luka hakuva a mun’we ni mun’wani wabye i vekile kupima ka maalakanyo ni zvimaho zva munhu wo hambana.

Matewu i veka kupima ka lezvi zvi khumbako Josefa. I tlhamusela lezvi Josefa a nga khumbekisa zvona a cikhati a nga tiva ku Mariya i na ni nyimba, lezvi a ngilozi yi nga mu tlhamusela hi noro, ni lezvi a nga landzelisa zvona a zvileletelo zva ngilozi leyo. (Mateu 1:19-25) I tlhamusela kambe lezvaku a ngilozi yo kari yi tlharihisile Josefa hi noro lezvaku a teka ngango wakwe va tsutsuma vaya Gibhite niku i ingisile. Hi kulandzela Matewu i hi byela lezvaku Josefa ive ni noro wun’wani laha a ngilozi yo kari yi nga mu byela lezvaku i wa tlhele tikweni ga Izrayeli niku i tlhelile a ya tshama ni ngango wakwe le Nazareta. (Mateu 2:13, 14, 19-23) Ka zvipimo zvimbiri zvo sangula zva Ivhangeli yakwe, Matewu i kumbuka vito ga Josefa 7 wa makhati, kanilezvi Mariya i kumbukiwa mune wa makhati basi.

Kanilezvi Luka i veka kupima ka lezvi zvi khumbako Mariya. I wulawula hi kuendzelwa ka Mariya hi ngilozi Gabriyeli, ni lipfhumba lakwe la kuya ka xaka gakwe Elizabheti, zvin’we ni magezu yakwe ya ku dhumisa Jehovha. (Luka 1:26-56) I tlhela a tlhamusela lezvi Simeyoni a nga byela Mariya xungetano hi lezvi Jesu a nga wa ta xanisiswa zvona. Hi kulandzela, Luka i wulawula hi khati legi Jesu a ngaya tempeleni ni ngango wakwe na a hi ni 12 wa malembe. Ka khati legi kambe, Luka i tshaha magezu ya Mariya, na ma nga hi ya Josefa, a tlhela a hi byela lezvaku Mariya i khumbilwe nguvhu hi zvimaho lezvo. (Luka 2:19, 34, 35, 48, 51) Ka zvipimo zvimbiri zvo sangula zva Ivhangeli yakwe, Luka i kumbuka vito ga Mariya 12 wa makhati, kanilezvi le’ga Josefa i gi kumbuka kunharu basi. Hikwalaho, Matewu i hi byela lezvi Josefa a nga zvi pimisa ni lezvi a nga maha. Kanilezvi Luka i veka kupima ka maalakanyo ni zvimaho zva Mariya.

A lixaka leli Jesu a nga huma ka lona lonawu li hlawutelwa hi ndlela yo hambana ka tiIvhangeli leti. Matewu i hlawutela a lixaka la Josefa a tlhela a komba lezvaku Jesu ciga-tshomba hi nayo ca wuhosi ga Dhavhidha, kota n’wana wa Josefa wa ku mu wundla. Hikuyini? Hakuva Josefa i huma hi ka Dhavhidha hi laha ka n’wana wakwe Solomoni. (Mateu 1:6, 16) Kanilezvi Luka i hlawutela a lixaka la Mariya a tlhela a komba lezvaku Jesu i na ni fanelo ya mabeleko ya ku kuma a wuhosi ga Dhavhidha “hi tlhelo ga miri.” (Va Le Roma 1:3) Hikuyini? Hakuva Mariya i huma hi ka Dhavhidha hi laha ka n’wana wakwe Natani. (Luka 3:31) Kanilezvi hikuyini Luka a kalako a nga kumbuki Mariya kota n’wana wa Heli, a nga papayi wa Mariya ke? Hi lezvaku a matimu ya tixaka ma wa patsa a vito ga wanuna wa muti basi. Hikwalaho, loku Luka a veka Josefa aku i n’wana wa Heli, a vanhu va wazwa ku Josefa i mwane wa Heli. — Luka 3:23.

A matimu ya lixaka la Jesu ka Ivhangeli ya Matewu ni ya Luka ma tiyisa lezvaku Jesu i wa hi yena Mesiya loyi a nga tsumbisilwe hi Nungungulu. A ku Jesu i huma ka Hosi Dhavhidha yi wa hi mhaka yo tiveka nguvhu; hambu a vaFarisi ni vaSadhusi va wa nga hi na ku zvi kaneta. A tlhamuselo wa Matewu ni wa Luka xungetano hi lixaka la Jesu yi tiyisa a kukholwa ka hina niku yi hi maha hi tsumba lezvaku a zvitsumbiso zvontlhe lezvi zvin’wani zva Nungungulu zvi ta tatiseka.