“Ndlela, Ni Zinene, Ni Wutomi”

1, 2. Hikuyini a kutshinela ka Jehova zi nga kotekiko hi ka hina ha hoce, niku zini lezi Jesu Kristu a hi maheleko xungetano hi lezo?

XANA wa tshuka u lahleka? U nga ha alakanya a xikhati xo kari lexi u nga enzela a munghana kutani xaka na u nga yi kumi ndlela. A xikhati lexi u nga famba hi ndlela leyi u nga yi tiviko, u nyimile u wutisa ndlela ka wo kari? Alakanya lezi u nga wa ta ngha u ti zwisile zona loku a wutshanwini ga ku ku leletela, a munhu loye wa wuxinji i wa ku byela lezi: “Nzi lanzele ntsena. Nzi ta ku yisa kona.” A hi kurula loku u nga wa tava nako!

² Ku nga wuliwa lezaku Jesu Kristu i maha zo fana ni lezo ka hina. Hina ha hoce, a ku tshinela ka Nungungulu zi wa nga ta koteka. Hi kota ya ku thapelwa hi xionho ni kungambheleli, a vanhu va lahlekile, “va hambene ni kuhanya ka Nungungulu.” (Va Le Efesusi 4:17, 18) Hi lava xivuno kasi hi kuma ndlela. Jesu, a Xikombiso xa hina xa wuxinji, a nga nyiki a wusungukati ni wukongomisi ntsena; yena i maha zo hunza lezo. Kota lezi hi zi wonileko ka Xipimo 1, Jesu wa hi ramba, aku: “Ngona u nzi lanzela.” (Marku 10:21) Hambulezo, yena kambe wa hi nyika a xigelo xi kucako xa ku vumela xirambo lexo. Ka khati go kari, Jesu i te ngalo: “Mina nzi ndlela, ni zinene, ni wutomi; a nga kona a tako ka Dadani, loku a ngati ha mina.” (Johani 14:6) A hi kambisiseni a zigelo zo kari lezi zi kombako lezaku a kutshinela ka Dadani zi koteka ntsena hi ka N’wana. Zonake na hi alakanyela a zigelo lezo, hi ta wona lezi Jesu hakunene a nga “ndlela, ni zinene, ni wutomi” ha zona.

Ntiro Wa Lisima Ka Khungo Ga Jehova

3. Hikuyini a ku tshinela ka Nungungulu zi kotekako hi ka Jesu?

³ A xo ranga ni xa lisima nguvu hi lezaku a ku tshinela ka Nungungulu zi koteka hi ka Jesu hakuva Jehova i zi wonile na zi faneleka a ku nyika a N’wana wakwe a ntiro wa lisima nguvu ka yontlhe.a Dadani i mu mahile ava yena tshinya kutatisekeni ka makungo Yakwe wontlhe. (2 Va Le Korinte 1:20; Va Le Kolosi 1:18-20) Kasi ku zwisisa a ntiro wa lisima wa N’wana, hi fanele ku alakanya lezi zi nga humelela sinwini ga Edeni, lomu a patswa wo sangula wa vanhu wu nga ti patsa na Satani kuhluwukeni mahlweni ka Jehova. — Genesisi 2:16, 17; 3:1-6.

4. Xana a wuhluwuki ga le Edeni gi vuxile mhaka yihi, niku zini lezi Jehova a bohileko ku zi maha kasi ku lulamisa mhaka leyo?

⁴ A kuhluwuka ka le Edeni ku vuxile a mhaka ya lisima ya wuako gontlhe: Xana Jehova wa tirisa khwatsi a wuhosi gakwe hehla ka zivangwa zakwe? Kasi ku lulamisa a mhaka leyi ya lisima, Jehova i lo boha lezaku a n’wana wa moya wo mbhelela i wa fanele kuya misaveni. A ntiro lowu a n’wana loyi a nga wa ta wu maha wu wa nga tava wo hehuka — ku nyikela a wutomi gakwe kasi ku lwela a wuhosi ga Jehova ni ku tira kota nzhiho kasi ku hanyisa vanhu. Hi ku simama na a tsumbekile kala kufeni, a n’wana a hlawulilweko i wa ta maha lezaku zi koteka a ku lulamisa zikarato zontlhe zi vuxilweko hi kuhluwuka ka Satani. (Maheberu 2:14, 15; 1 Johani 3:8) Kanilezi Jehova i wa hi ni timiliyoni ta timiliyoni ta vana va moya vo mbhelela. (Danieli 7:9, 10) Xana i hlawulile mani lezaku a maha a ntiro lowo wa lisima nguvu? Jehova i lo hlawula a “N’wana wakwe a belekilweko yece,” loyi anzhako a nga tibyiwa kota Jesu Kristu. — Johani 3:16.

5, 6. Xana Jehova i kombisile kuyini lezaku i wa tsumba a N’wana wakwe, niku a kutsumba loko ku wa seketelwa ka yini?

⁵ Hi fanele ku hlamaliswa hi kuhlawula ka Jehova? Ne ni kutsongwani! Dadani i wa hi ni kutsumba ka hombe nguvu hi N’wana wakwe a belekilweko yece. Mazana ya malembe mahlweni ka kuta ka N’wana wakwe laha misaveni, Jehova i wulile na ka ha hi mahlweni lezaku a N’wana wakwe i wa ta simama ku tsumbeka na ku nga khataliseki a tixanisa ta tixaka tontlhe leti a hunzileko hi ka tona. (Isaya 53:3-7, 10-12; Mitiro 8:32-35) Ehleketa hi lezi zi patsekako ka lezo. A N’wana, a kufana ni zivangwa zinwani zontlhe zi pimisako, i wa hi ni wuzikoti ga kutihlawulela, na a zi kota ku hlawula lezi a zi lavako. Kanilezi Jehova i wa hi ni kutiyiseka loko laha ka kuza a wula na ka ha hi mahlweni lezaku a N’wana wakwe i wa ta tsumbeka. Xana a kutiyiseka loko ku wa seketelwa ka yini? Hi ndlela ya ku tsema, ku wa seketelwe ka wutivi. Jehova wa mu tiva khwatsi a N’wana wakwe niku wa zi tiva lezaku a N’wana wakwe i lava ku Mu tsakisa kuya chikela kwihi. (Johani 8:29; 14:31) A N’wana wa mu ranza a Dadani wakwe, niku hi tlhelo gakwe, Jehova wa ranza N’wana Wakwe. (Johani 3:35) A liranzo leli Jehova ni N’wana va nga nalo munwe ka munwani li maha xiboho xa wumunwe ni kutsumbana lexi xi nga tsemekiko. — Va Le Kolosi 3:14.

⁶ Hi kota ya ntiro wa lisima wa N’wana, a kutsumba loku Dadani a nga nako ha yena, ni liranzo leli li bohako Dadani ni N’wana, xana zi nga ha hlamalisa lezi a ku tshinela ka Nungungulu zi kotekako hi ka Jesu ntsena? Hambulezo, ku na ni xinwani xigelo xa kuva N’wana yece a zi kota a ku hi yisa ka Dadani.

Ntsena A N’wana Hi Yena A Mu Tivako Khwatsi Dadani

7, 8. Hikuyini Jesu a zi kotileko ku wula hi kufaneleko lezaku a ku na munhu a mu tivako khwatsi Dadani, “sine N’wana yece”?

⁷ Ku na ni zilaveko hi faneleko ku zi tatisa loku hi lava a ku tshinela ka Jehova. (Tisimu 15:1-5) Himani a zi tivako khwatsi lezi zi lavekako kasi ku tatisa a milayo ya Nungungulu ni ku amukeleka ka Yena? Jesu i te ngalo: “Zilo zontlhe zi nyikilwe ka mina hi Dadani; a ku na munhu loyi a tivako N’wana, sine Dadani yece; hambu ni wa ku tiva Dadani, sine N’wana yece, ni wihi loyi a N’wana a ranzako ku mu wonekelisa ka yena.” (Mateu 11:27) A hi woneni lezaku hikuyini Jesu a nga zi kota ku wula, hi lisine na a nga hunzisi mpimo, lezaku a ku na munhu a tivako khwatsi Dadani, “sine N’wana yece.”

⁸ Kota “matewula ya zivangwa zontlhe,” a N’wana i na ni wuxaka ga laha kusuhani a ku hunza vontlhe na Jehova. (Va Le Kolosi 1:15) Hi nga alakanya hi kuzwanana ka laha kusuhani nguvu ka Dadani ni N’wana loku va ku hlakuleleko nzeni ka xikhati xi nga hlayiwiko laha va nga hi vona voce vambiri — kusukela kusanguleni ka kuvanga kala ku vangiwa a zinwani zivangwa za moya. (Johani 1:3; Va Le Kolosi 1:16, 17) Ehleketa ntsena hi lungelo ga lisima legi a N’wana a nga hi nago hi kuva reveni ga Dadani wakwe, a kuma wutivi Gakwe xungetano hi timhaka ni ku gonza hi kuranza Kakwe, milayo, ni mamahela yakwe. Hakunene, a hi ku hunzeleta a ku wula lezaku Jesu wa mu tiva khwatsi Dadani a ku hunza vontlhe. A kuzwanana loko ka laha kusuhani hakunene ku mahile lezaku Jesu a tivekisa Dadani wakwe hi ndlela yaku ni munwani a nga zi koti a ku maha lezo.

9, 10. (a) Hi ka tindlela muni leti Jesu a tivekisileko ha tona a Dadani wakwe? (b) Kasi ku amukeleka ka Jehova, zini hi faneleko ku maha?

⁹ A tigonzo ta Jesu ti wa kombisa a kutiva kakwe hi kuetileko lezi Jehova a pimisisako zona ni lezi a ti zwisako zona ni lezi Yena a zi lavako ka vakhozeli Vakwe.b Jesu i tivekisile a Dadani wakwe hi yinwani ndlela yo eta kambe. Jesu i te ngalo: “Loyi a wonileko mina, i wonile ni Dadani.” (Johani 14:9) Hi kumbhelela, Jesu i pimanyisile a Dadani wakwe zilweni zontlhe lezi a zi wulileko ni ku zi maha. Hikwalaho, loku hi gonza ha Jesu lomu ka Biblia — a magezu ya ntamu ni ya kukhongotela lawa a ma tirisileko kugonziseni kakwe, a tipswalo leti ti mu kucileko a ku hanyisa vanwani, ni kuzwela wusiwana loku ku mu mahileko a rila — ​hi nga alakanyela khwatsi Jehova na a wula ni ku maha a zilo zalezo za zinwe. (Mateu 7:28, 29; Marku 1:40-42; Johani 11:32-36) A mamahela ni kuranza ka Dadani zi kombisiwa hi kumbhelela magezwini ni mitirweni ya N’wana. (Johani 5:19; 8:28; 12:49, 50) Hizalezo, kasi ku amukeleka ka Jehova, hi fanele ku ingisa a tigonzo ta Jesu hi tlhela hi lanzela a xikombiso xakwe. — Johani 14:23.

¹⁰ Kota lezi Jesu a mu tivako khwatsi Jehova na a mu pimanyisa khwatsi, a zi hlamalisi lezi Jehova a bohileko lezaku a N’wana ava ndlela ya ku tshinela ka Dadani. Na hi hi ni xiseketelo lexi xa ku zwisisa a ku hikuyini hi zi kotako ku tshinela ka Jehova ntsena ha Jesu, makunu a hi kambisiseni a tlhamuselo wa magezu ya Jesu: “Mina nzi ndlela, ni zinene, ni wutomi; a nga kona a tako ka Dadani, loku a ngati ha mina.” — Johani 14:6.

“Mina Nzi Ndlela”

11. (a) Hikuyini hi zi kotako kuva ni kuzwanana ko amukeleka na Nungungulu ntsena ha Jesu? (b) Xana a magezu lawa ma tsalilweko ka Johani 14:6 ma dlunyatisisa kuyini a xikhundla xo hlawuleka xa Jesu? (Wona tlhamuselo wa lahasi.)

¹¹ Hi sina hi gonzile lezaku a ku na kutshinela ka Nungungulu handle ka Jesu. Ehleketa, khwatsi-khwatsi, lezaku lezo zi wula yini ka hina. Jesu i “ndlela” hi lezaku ntsena hi ka yena ha zi kota kuva ni kuzwanana ko amukeleka na Nungungulu. Hikuyini zihi tano? Hi kuva a tsumbekile kala kufeni, Jesu i lo nyikela wutomi gakwe kota muphahlo wu tirulako. (Mateu 20:28) Ahandle ka lulamiselo legi ga nzhiho, zi wa nga ta koteka ka hina a ku tshinela ka Nungungulu. A xionho xi vanga libhiyo xikari ka vanhu na Nungungulu, hakuva Jehova i basile niku hikwalaho, a nga tshuki a vumela xionho. (Isaya 6:3; 59:2) Kanilezi a muphahlo wa Jesu wu susile a libhiyo, wu enelisa lezi zi nga laveka, kutani ku nyika nzhiho wa xionho. (Maheberu 10:12; 1 Johani 1:7) Loku hi vumela a lulamiselo ga Nungungulu ga ku tirisa Kristu hi tlhela hi kholwa ka gona, ha zi kota ku amukeleka ka Jehova. A ku na ndlela yinwani ya kuva hi ‘tlhanganyiswa na Nungungulu.’c — Va Le Roma 5:6-11.

12. Xana Jesu i “ndlela” hi ka matshamela muni?

¹² Jesu i “ndlela” hi ka mukhongelo. Ntsena ha Jesu hi kona hi zi kotako ku tshinela ka Jehova hi mukhongelo na hi tiyiseka lezaku a zikombelo za hina za mbilu yontlhe zi ta zwiwa khwatsi. (1 Johani 5:13, 14) Jesu wutsumbu i te ngalo: “Zontlhe lezi mu ta nga kombela ka Dadani hi vito ga mina i ta mu nyika zona. . . . Kombelani, mu ta nyikiwa, kasi a kutsaka ka nwina ku fela ku mbhelela.” (Johani 16:23, 24) Hi kufaneleko, a vitweni ga Jesu, ha zi kota ku tshinela ka Jehova hi mukhongelo hi tlhela hi Mu vitana a ku “Dadani wa hina.” (Mateu 6:9) Jesu i “ndlela” hi ka matshamela manwani — hi xikombiso xakwe. Kota lezi hi zi wonileko kusanguleni, Jesu i pimanyisile a Dadani wakwe hi kumbhelela. Hikwalaho, a xikombiso xa Jesu xi hi komba lezi hi faneleko ku hanyisa zona kasi ku tsakisa Jehova. Makunu, kasi ku tshinela ka Jehova hi fanele ku lanzela a nkonzo wa Jesu. — 1 Pedro 2:21.

“Mina Nzi . . . Zinene”

13, 14. (a) Xana Jesu i wa hi zinene kuwulawuleni kakwe hi ndlela muni? (b) Kasi Jesu ava “zinene,” zini a mahileko, niku hikuyini?

¹³ Jesu xikhati xontlhe i wa wulawula zinene xungetano hi mhaka ya Dadani wakwe ya wuprofeti. (Johani 8:40, 45, 46) Cima a ku kumiwangi kukanganyisa nonwini wa Jesu. (1 Pedro 2:22) Hambu a vakaneti vakwe va vumelile lezaku yena i wa gonzisa “a ndlela ya Nungungulu hi zinene.” (Marku 12:13, 14) Hambulezo, a xikhati lexi Jesu a nga ku ngalo “mina nzi . . . zinene,” i wa nga wuli ntsena lezaku i tivekisile zinene kuwulawuleni, kuxumayeleni, ni kugonziseni kakwe. A ku hunza lezo — i mahile za kuhunza ku wulawula.

¹⁴ Alakanya lezaku a mazana ya malembe na ka ha hi mahlweni, Jehova i pimisele a vatsali va Biblia lezaku va tsala a ziprofeto zo tala xungetano hi Messia, kutani Kristu. A ziprofeto lezo zi wulawulile na ka ha hi mahlweni hi timhaka tontlhe xungetano hi wutomi, wutireli, ni kufa kakwe. Ku nga hi lezo ntsena, a Nayo wa Mosi wu wa hi ni ziruti, kutani zikombiso za wuprofeti, lezi zi nga komba Messia. (Maheberu 10:1) Xana Jesu i wa ta tsumbeka kala kufeni, hi ndlela leyo a tatisa zilo zontlhe lezi zi profetilweko ha yena? Ntsena makunu Jehova i wa ta kombiswa a hi Nungungulu wa wuprofeti ga lisine. A wutihlamuleli lego ga hombe nguvu gi lo vekwa makatleni ya Jesu. Hi ndlela leyi a nga hanya hi yona — a magezu wontlhe lawa a nga ma wulawula ni mitiro yontlhe a yi mahileko — ​Jesu i mahile lezaku a zikombiso za wuprofeti ziva za lisine. (2 Va Le Korinte 1:20) Hikwalaho, Jesu i wa hi “zinene.” Lezo zi wa ku khwatsi a lisine la magezu ya Jehova ya wuprofeti ma lo chikela hi ka Jesu. — Johani 1:17; Va Le Kolosi 2:16, 17.

“Mina Nzi . . . Wutomi”

15. Zi wula yini a ku kholwa ka N’wana, niku xana a ku maha lezo zi nga yisa ka yini?

¹⁵ Jesu “wutomi,” hakuva ha zi kota ku kuma wutomi hi ka yena ntsena — ku nga “wutomi legi gi nga wutomi hizinene.” (1 Timote 6:19) A Biblia gi ngalo: “Loyi a kholwako ka N’wana i na ni wutomi ga pinzukelwa; kanilezi loyi a nga ingisiko N’wana a nga ta wona wutomi, hakuva a khulo ga Nungungulu gi tshamile hehla kakwe.” (Johani 3:36) Xana zi wula yini a ku kholwa ka N’wana wa Nungungulu ke? Zi wula ku ngalo hi na ni kutiyiseka ka lezaku a hi nge zi koti ku kuma wutomi ahandle ka yena. Tlhatakumbiri, zi wula lezaku hi kombisa a kukholwa ka hina hi mitiro, hiya mahlweni hi gonza ka Jesu, hi tlhela hi maha zontlhe lezi hi zi kotako kasi ku lanzela a tigonzo ni xikombiso xakwe. (Jakobe 2:26) Hikwalaho, a ku kholwa ka N’wana wa Nungungulu zi yisa wutomini ga pinzukelwa — ku nga wutomi ga moya ga kungafi ka “ntlhambi wu tsongwani” wa maKristu ma totilweko hi moya zinwe ni wutomi go mbhelela ka “xidlemo xa tsanza-vahlayi” xa “tiyivu tinwani” paradiseni laha misaveni. — Luka 12:32; 23:43; Kuvululelwa 7:9-17; Johani 10:16.

16, 17. (a) Xana Jesu i ta ti kombisa kuyini kuva “wutomi” hambu ka lava va fileko? (b) Kutiyiseka muni loku hi zi kotako a kuva nako?

¹⁶ Hi nga kuyini hi lava va sinako va file? Jesu “wutomi” ka vona kambe. Xikhatanyana mahlweni ka kuva a vuxile a munghana wakwe Lazaru hi ka vafileko, Jesu i lo byela Marta, a makabye wa Lazaru: “Mina nzi kuvuka ni wutomi; loyi a kholwako ka mina, hambu loku a file, i ta hanya.” (Johani 11:25) Jehova i nyikile N’wana wakwe a “tipfhungulo ta kufa ni ta wutshamu ga vafileko,” a tlhela a mu nyika ntamu wa ku vuxa vafileko. (Kuvululelwa 1:17, 18) Hi tipfhungulo leto, Jesu loyi a tlakusilweko i ta vulula a tivati ta wutshamu ga vafileko niku hi ndlela leyo a tlhatlha vontlhe lava va khomilweko hi xilahla xa vanhu vontlhe. — Johani 5:28, 29.

¹⁷ “Mina nzi ndlela, ni zinene, ni wutomi” — hi magezu yo olova, Jesu i lo songa a xigelo xa wutomi ni wutireli gakwe laha misaveni. A magezu lawa ma na ni tlhamuselo wa hombe nguvu ka hina inyamutlha. Alakanya lezaku Jesu i simamile ni magezu lawa hi ku wula aku: “A nga kona a tako ka Dadani, loku a ngati ha mina.” (Johani 14:6) A magezu ya Jesu nja lisima inyamutlha a ku fana ni xikhati lexi a nga ma wula ha xona. Hikwalaho, ha zi kota kuva ni kutiyiseka ko mbhelela ka lezaku loku hi lanzela Jesu, cima hi nga ta lahleka. Yena, niku yena yece, i ta hi komba a ndlela yi yako “ka Dadani.”