3. a) Timote i mahisile kuyini muKristu, niku i mahile yini hi lezvi a nga zvi gondza? b) Zvilo muni zva zvinharu lezvi Pawule a nga byela Timote xungetano hi kugondza?

³ Mupostoli Pawule i yile Listra hi lembe ga 47. Kuzvilava kuve ka cikhati caleco Timote a nga tiva hi cona a tigondzo ta Jesu, na a ha hi muswa. I sangulile ku hanya hi lezvi a nga zvi gondza, niku andzhako ka malembe mambiri i sangulile ku fambafamba na Pawule. Andzhako ka 16 wa malembe, Pawule i no mu tsalela lezvi: “Namarela ka lezvi u zvi gondzileko, ni lezvi u tiyisilweko ha zvona, na u kari u tiva a vagondzisi va wena; ni lezvaku a kusukela wuhlangini ga wena u tivile a mitsalo yo basa, leyi yi nga ni ntamu a ku ku maha u tlhariha, u kala u hanyiswa hi kukholwa loku ku nga ka Kristu Jesu.” (2 Timote 3:14, 15) Wona lezvaku Pawule i te Timote 1) i tivile a mitsalo yo basa, 2) a tiyisiwa ka lezvi a nga zvi gondza, a tlhela 3) a tlhariha kasi ku hanyiswa hi ku kholwa ka Kristu Jesu.

“LEZVI U TIYISILWEKO HA ZVONA”

5. a) A ku “u tiyisilweko” zvi wula kuyini? b) Hi zvi tivisa kuyini lezvaku Timote i kholwisilwe a mahungu yo saseka xungetano hi Jesu?

⁵ A ku gondzisa vana va wena xungetano hi vanhu ni zvimaho zva lomu ka Bhibhiliya basi a zvi eneli. Alakanya lezvaku Timote i tlhelile a ‘tiyisiwa’ ka zvona. A magezu ya ciGreki lawa Pawule a nga ma tirisa ma wula ku “kholwisiwa lezvaku a mhaka yo kari lisine”. Timote i tivile a Mitsalo ya ciHebheru “kusukela wuhlangini”, lezvi zvi wulako ku, na a ha ni n’wanana nguvhu. Hi kufamba ka cikhati, i no tiyiseka lezvaku Jesu hi Mesiya. A kukholwa ka Timote ku wa hi ka hombe nguvhu laha ka kuza a bhabhatiswa a tlhela a tira na Pawule kota Murumiwa.

6. U nga vhunisa kuyini vana va wena lezvaku va kholwa ka Mhaka ya Nungungulu?

⁶ U nga vhunisa kuyini vana va wena lezvaku va ‘tiyiseka’ lezvi va zvi gondzako a ku fana na Timote, kasi vava ni kukholwa ke? Vana ni lihlazva-mbilu. Zvi teka cikhati kasi ku a munhu ava ni kukholwa ko tiya. U nga alakanyi ku loku wena u kholwa nchumu wo kari, a vana va wena va taku halahala va kholwawo. A n’wana mun’we ni mun’wani i fanele “ku tirisa kupima” kakwe kasi a kholwa lezvi a Bhibhiliya gi gondzisako. (Gondza Mahebheru 5:14.) Kota mupswali, u nga va vhuna nguvhu a vana va wena lezvaku va tiyisa kukholwa kabye, nguvhunguvhu loku va maha zviwutiso. A hi woneni lezvi hi nga zvi gondzako ka cikombiso ca papayi wo kari.

7, 8. a) A mupswali wo kari wa muKristu i kombisa kuyini lihlazva-mbilu a cikhati a gondzisako n’wana wakwe? b) Hi rini u wonako ku u fanele kuva ni lihlazva-mbilu hi n’wana wa wena?

⁷ Thomas i bika lezvaku a n’wana wakwe wa 11 wa malembe wa tshuka a wutisa zvilo zvo kota ku: “Jehovha a ngo no tirisa evholusawu kasi ku maha zvilo lezvi zvi hanyako laha misaveni?” kutani ku “Hikuyini hi kalako hi nga ti patsi ni vanhu van’wani, hi zama ku chukwatisa zvilo, hi cikombiso hi ku hlawula hosi hi yi lavako?” A zvikhati zvin’wani zvi lava ku a ti khoma kasi a nga mu byeli lezvi a faneleko ku zvi kholwa a nyima kwalaho. Thomas wa zvi tiva ku leci ci kholwisako munhu a ku leli lisine a hi mhaka yin’we yo kongoma. Kanilezvi zvilo zvo tala zva zvi tsongwani.

⁸ Thomas wa zvi tiva kambe lezvaku i fanele kuva ni lihlazva-mbilu kasi ku gondzisa n’wana wakwe. Hi lisine, a maKristu wontlhe ma fanele kuva ni lihlazva-mbilu. (Va Le Kolosi 3:12) Thomas wa zvi zwisisa ku zvi lava cikhati ni ku bhulisana hi kuphindaphinda kasi a n’wana wakwe a tiyiseka hi yece. I fanele ku pimisana naye hi lezvi a zvi gondzako lomu ka Bhibhiliya. Thomas i ngalo: “Nguvhunguvhu ka timhaka ta lisima, mina ni sati wa mina hi zama ku tiva ku a n’wana wa hina wa kholwa hakunene lezvi a gondzako niku i zvi wona na zvi zwisiseka ke. Loku a maha zviwutiso, ho tsaka. Hi lisine, ndzi wa ta karateka loku i wo vhumelela zvontlhe na a nga mahi zviwutiso.”

9. U nga vhunisa kuyini vana va wena lezvaku va kholwa ka Mhaka ya Nungungulu?

⁹ Loku a vapswali va gondzisa na va hi ni lihlazva-mbilu, hi kufamba ka cikhati a vana vabye va ta zwisisa “a kuanama ni kuleha ni kueta” ka kukholwa. (Va Le Efesusi 3:18) Hi nga va gondzisa hi ndlela yi zwananako ni tanga yabye zvin’we ni hlokwana yabye. Laha va yako va kholwa lezvi va zvi gondzako, zvi ta va olovela ku zvi yimela mahlweni ka van’wani, a ku patsa ni zvigondzani-kulobye. (1 Pedro 3:15) Hi cikombiso, xana a vana va wena va zvi kota ku tirisa Bhibhiliya kasi ku tlhamusela lezvi zvi humelelako loku hifa? Va zvi wona na zvi zwisiseka lezvi a Bhibhiliya gi wulako hi mhaka leyo?a (Wona tlhamuselo wa lahasi.) Alakanya lezvaku u fanele kuva ni lihlazva-mbilu kasi ku vhuna n’wana wa wena lezvaku a kholwa ka Mhaka ya Nungungulu, kanilezvi a mabhindzu ya kona ya hombe. — Dhewuteronome 6:6, 7.

10. Zvini u nga faneliko ku zvi siya ndzhako kugondziseni ka wena?

¹⁰ A cikombiso ca wena conawu ca lisima kasi ku vhuna vana va wena lezvaku vava ni kukholwa. Stephanie, a nga mamani wa vanhanyana vanharu, i ngalo: “Kusukela na va ha hi va tsongwani nguvhu, ndzita na ndzi ti wutisa ku: ‘Ndza bhula ni vana va mina xungetano hi leci ci ndzi kholwisako ku Jehovha i kona, wa ndzi randza, niku a tindlela takwe ti lulamile ke? Xana zva woneka ka vana va mina lezvaku hakunene ndza mu randza Jehovha?’ A ndzi nge rindzeli ku a vana va mina va tiyiseka kuveni mina a ndzi tiyiseki.”