1. Hi nga wu tirisisa kuyini a mukhongelo wu tsalilweko ka Mateu 6:9-13 wutirelini ga hina?

A VANHU vo tala va ma tiva hi hloko a magezu ya Mukhongelo wa Hosi. Wutirelini ga hina ga muti ni muti, hi tolovela ku wulawula hi mukhongelo lowu kasi ku vuna vanhu lezaku va zwisisa ku a Mufumo wa Nungungulu mufumo wa lisine lowu wu to neha kucica ko hlamalisa misaveni. Kutani hi nga ha kumbuka a xikombelo xo sangula xa mukhongelo lowu kasi ku komba lezaku Nungungulu i na ni vito, legi gi faneleko ku basiswa kutani ku woniwa kota vito go basa. — Mat. 6:9.

2. Hi zi tivisa kuyini lezaku Jesu i wa nga lavi lezaku a mukhongelo wa xikombiso wu phindiwa gezu ni gezu khati ni khati hi khongelako?

² Xana Jesu i wa lava lezaku hi phindaphinda a mukhongelo lowu hi gezu ni gezu a makhati wontlhe hi khongelako, a ku fana ni lezi a votala va mahako nzeni ka wuKristu ga mawunwa ke? Ahihi. Na a nga se nyika xikombiso lexi xa mukhongelo, Jesu i te ngalo: “Loku mu khongela, mu nga wuli zilo zalezi za zinwe hi kuphindaphinda.” (Mat. 6:7, Tradução do Novo Mundo) Ka khati ginwani, i lo phinda mukhongelo lowu kanilezi i tirisile magezu yo hambana. (Luka 11:1-4) Hi ndlela leyo, Jesu i lo hi vuna ku tiva a zilo lezi hi faneleko ku kombela ni kugamana ka zona hi kuya hi lisima la zona. Hikwalaho, za fanela ku wu vitana ku mukhongelo wa xikombiso.

3. A xikhati hi kambisisako a mukhongelo wa xikombiso, ziwutiso muni hi nga ehleketako hi zona?

³ Ka nzima leyi ni leyi yi lanzelako, hi ta kambisisa a magezu ya mukhongelo wa xikombiso. Laha hi mahako lezo, ti wutise lezi, ‘A mukhongelo lowu wa xikombiso wu nga nzi vunisa kuyini ku chukwatisa a mikhongelo ya mina? Niku a xa lisima nguvu, xana nza hanya hi kuyelana ni mukhongelo wa xikombiso ke?’

“DADANI WA HINA WA LE TILWENI”

4. A magezu “Dadani wa hina” ma hi alakanyisa yini, niku Jehova i “Dadani” wa maKristu lawa ma to hanya laha misaveni hi ndlela muni?

⁴ A magezu “Dadani wa hina” wutshanwini ga “Dadani wa mina” ma hi alakanyisa lezaku hi lumba hlengeletano ya “vamakabye” va ranzanako misaveni yontlhe. (1 Ped. 2:17) Hi nga wona a lungelo lego! A maKristu ma totilweko, lawa ma mahilweko vana va Nungungulu va nga ni kutsumba ko ya hanya tilweni, va vitana Jehova hi kufaneleko lezaku i “Dadani” wa vona hi matlhelo wontlhe. (Rom. 8:15-17) A maKristu lawa ma nga ni kutsumba ka ku hanya laha misaveni wonawu ma wona Jehova kota “Dadani.” Hi yena Munyiki wabye wa wutomi, niku i khatalela a zilaveko za vontlhe a vakhozeli vakwe va lisine. Lava va nga ni kutsumba ka ku hanya misaveni va ta maha vana va Nungungulu hi matlhelo wontlhe anzhako ka kuva va kumile wutomi go mbhelela va tlhela va kombisa kutsumbeka kabye kuringweni ko gumesa. — Rom. 8:21; Kuv. 20:7, 8.

5, 6. Xinyikiwo muni lexi a vapswali va nga nyikako vana vabye, niku zini lezi a nwanana munwe ni munwani a faneleko ku maha hi xona? (Wona mufota kusanguleni ka nzima.)

⁵ A vapswali va va nyika xinyikiwo xi nene a vana vabye loku va va gonzisa ku khongela va tlhela va va vuna ku wona Jehova kota Papai wa le tilweni a khatalako hi vona. A makabye wo kari loyi zalezi a tirako kota muwoneleli wa xipanze le Afrika Dzonga i alakanya lezi: “Kusukela ka siku legi a vanhanyana va hina va nga pswaliwa hi gona, nzi wa khongela navo ka wusiku ginwe ni ginwani, ahandle ka loku nzi nga hi kona laha kaya. A vanhanyana va hina va tolovela ku wula lezaku a va ma alakanyi khwatsi a magezu ya mikhongelo leyi hi nga maha ni wusiku. Kanilezi, va alakanya a xiyimo xa kona, a kubasa ka mabhulo ya hina ni Dadani wa hina, Jehova, zinwe ni kurula ni kutshamiseka. Neti va nga sangula ku zi kota ku maha mukhongelo, nzi lo va kuca ku khongela hi gezu go zwala kasi nzizwa a maalakanyo yabye zinwe ni magezu ya kutizwa kabye ka Jehova. Xi wa hi xikhati xa xi nene nguvu kasi ku tiva lezi zi nga timbilwini tabye. Hi ndlela leyo, nzi wa zi kota ku va vuna hi wunene lezaku va patsa zilo za lisima za mukhongelo wa xikombiso kasi a mikhongelo yabye yiva ni xiseketelo xo tiya.”

⁶ Kunene, a vanhanyana va makabye loyi va lo kula khwatsi hi tlhelo ga moya. Zalezi va chadile niku va na ni litsako wukatini gabye. Va kari va maha kuranza ka Nungungulu ni vanuna vabye ntirweni wa xikhati xontlhe. A ku na xinyikiwo xa hombe lexi a vapswali va nga nyikako a vanana vabye ku hunza ku va vuna kuva ni wunghana ga laha kusuhani na Jehova. Kunene, zi khegele ka munwe ni munwani ku hlayisa wunghana legi ga lisima. Lezo zi patsa ku gonza ku ranza a vito ga Nungungulu, ni ku kombisa xichawo xa hombe hi gona. — Tis. 5:11, 12; 91:14.

‘A VITO GA WENA A GI BASISWE’

7. I lungelo muni legi a vanhu va Nungungulu va nga nago, kanilezi zini zi lavekako ka hina?

⁷ Hi na ni lungelo ga hombe ga ku tiva vito ga Nungungulu ni kuva ‘vanhu va vitanwako hi vito gakwe.’ (Miti. 15:14; Isa. 43:10) Hi khongela ka Dadani wa hina wa le tilweni hiku: ‘A vito ga wena a gi basiswe.’ A ku maha xikombelo lexi zi nga ku kuca ku kombela Jehova lezaku a ku vuna ku potsa ku maha kutani ku wula zilo zi to chakisa vito gakwe go basa. A hi lavi ku fana ni vokari va zana ga malembe go sangula lava va nga kala va nga mahi lezi va nga xumayela. Mupostoli Paule i lo va tsalela lezi: “A vito ga Nungungulu ga rukatelwa xikari ka vamatiko hi kota ya nwina.” — Rom. 2:21-24.

8, 9. Nyika xikombiso xa lezi Jehova a katekisisako zona lava va ti karatelako ku basisa vito gakwe.

⁸ Hi lava ku basisa a vito ga Nungungulu. Anzhako ka ku felwa hi nuna wakwe, a makabye wo kari wa xisati wa le Noruega i lo sala yece ni n’wana wa malembe mambiri. I ngalo: “Xive xikhati xo nonoha nguvu wutomini ga mina. Nzi wa khongela siku ni siku, hora ni hora, na nzi kombela ntamu kasi nziva ni kuringanisela ka lezi nzi nga ti zwisa zona lezaku nzi nga mu nyiki xigelo Satani xa kuva a ruka Jehova hi kota ya xiboho xa wupumbu kutani kungatsumbeki ka mina. Nzi wa lava ku basisa a vito ga Jehova, niku nzi wa lava lezaku a n’wana wa mina a tlhela a wona papai wakwe Paradiseni.” — Mav. 27:11.

⁹ Xana Jehova i hlamulile a mikhongelo leyo? Ina. A makabye loyi i lo kuma xivuno hi ku tlhangana hi kukhanzakanya ni maKristu-kulobye. Anzhako ka ntlhanu wa malembe, i lo chada ni dota. A n’wana wakwe, loyi zalezi a nga ni 20 wa malembe, makabye a bapatizilweko. I ngalo: “Nzi tsaka nguvu hi lezi a nuna wa mina a nga nzi vuna ku mu wundla.”

10. Xini xi lavekako kasi a vito ga Nungungulu gi basiswa hi kumbhelela?

¹⁰ Xini xi lavekako kasi ku a vito ga Nungungulu gi basiswa hi kumbhelela gi tlhela gi suselwa ziruko zontlhe ke? Kasi ku lezo zi maheka, Jehova i fanele ku lovisa vontlhe lava va alako wuhosi gakwe ha womu. (Gonza Ezekieli 38:22, 23.) Hi kutsongwani-kutsongwani, a vanhu va taya va kuma kumbhelela. Hi rinzela hi mahlo yo pswhuka a xikhati lexi a zivangwa zontlhe zo tlhariha zi to wona vito ga Jehova kota vito go basa! Hi laho makunu a Dadani wa hina wa liranzo wa le tilweni a tova “zontlhe ka vontlhe.” — 1 Kor. 15:28.

“A WUTE MUFUMO WA WENA”

11, 12. Kuvululelwa muni loku a maKristu ya lisine ma nyikilweko kumbheleni ka zana ga malembe ga wu 19 ke?

¹¹ Na Jesu a nga se tlakukela tilweni, a vapostoli wakwe va lo mu wutisa lezi: “Hosi, u ta tlhelisela a mufumo ka Israeli hi lexi xikhati ke?” A hlamulo wa Jesu wu lo komba lezaku xi wa nga se chikela a xikhati xa kuva va tiva lezaku a Mufumo wa Nungungulu wu ta sangula rini ku fuma. I lo va byela lezaku va veka kupima ka ntiro wa lisima wa kuxumayela lowu va nga fanele ku wu maha. (Gonza Mitiro 1:6-8.) Hambulezo, Jesu i lo gonzisa valanzeli vakwe lezaku va rinzela a kuta ka Mufumo wa Nungungulu. Hikwalaho kusukela masikwini ya vapostoli, a maKristu ma kari ma khongela, ma kombela lezaku wuta.

¹² Laha xi nga tshinele a xikhati xa lezaku a Mufumo wa Nungungulu mandleni ya Jesu wu sangula ku fuma le tilweni, Jehova i lo vuna vanhu vakwe lezaku va zwisisa a zimaho zi nga komba lembe ga kusangula ka wona. Hi 1876, ku lo humesiwa nzima yi tsalilweko hi Charles Taze Russell ka revista Muhloli wa Biblia (Bible Examiner). A nzima leyo, yi ngaku: “Zikhati za vamatiko: Zi ta mbhela rini?” (Gentile Times: When Do They End?) yi lo komba lezaku a 1914 gi wa tava lembe go hlawuleka. Yi lo zwananisa a “ntlhanu wa zikhati ni zimbiri” za xiprofeto xa Danieli ni “xikhati xa vamatiko” lexi Jesu a wulawulileko hi xona.a — Dan. 4:16; Luka 21:24.

13. Zini zi nga humelela hi 1914, niku a zimaho za tiko zi komba yini kusukela ka lembe lego?

¹³ Hi 1914, ku lo vuka yimpi xikari ka matiko ya Europa — leyi yi nga hangalaka yi tata misava yontlhe. A xikhati yi nga mbhela hi 1918, ku wa hi ni tindlala ta hombe niku ku wa hi ni ntungu wa funzeketa lowu wu deleko vanhu vo tala ku hunza lava va delweko hi yimpi. Hi ndlela leyo, a “xiwoniso” lexi Jesu a nyikileko kasi ku komba a kuvakona kakwe kota Hosi yiswa ya misava, na a nga woneki, xi lo sangula ku tatiseka. (Mat. 24:3-8; Luka 21:10, 11) Ku na ni zikombiso zo tala zi xungetako a lembe ga 1914 kota lembe legi Hosi Jesu Kristu a nga “nyikwa xidlodlo.” I “lo huma kota muhluli a yako kuhluleni.” (Kuv. 6:2) I lo basisa matilo hi yimpi a lwileko na Satani ni madimoni yakwe, lava va nga hlongolwa vata hanya kusuhani ni misava. Kusukela kwalaho, a vanhu va kari va wona a kutatiseka ka magezu lawa ma pimisilweko: “Nwina misava ni bimbi mu na ni khombo, hakuva Satani i relele ka nwina, na a zangarile nguvu, hakuva wa zi tiva lezaku a xikhati lexi xi mu saleleko xi tsongwanyani.” — Kuv. 12:7-12.

14. a) Hikuyini za ha hiko za lisima a ku khongelela lezaku a Mufumo wa Nungungulu wuta? b) I lungelo muni hi nga nago?

¹⁴ A xiprofeto xi tsalilweko ka Kuvululelwa 12:7-12 xi tlhamusela a ku hikuyini a kupswaliwa ka Mufumo wa Nungungulu ku nga kotlana ni kusangula ka zimaho za makhombo lezi zi xanisako vanhu ni nyamutlha. Jesu, a Hosi ya Mufumo wa Nungungulu, i lo sangula ku fuma xikari ka valala vakwe. Kala a mbhetisa kuhlula kakwe ni ku mbheta wubihi misaveni, hina hi ta simama ku kombela lezaku a Mufumo wa Nungungulu wuta. Hi fanele ku hanya hi kuyelana ni mikhongelo ya hina kambe hi ku hlengela kutatiseni ka xipanze xo hlamalisa nguvu va “xiwoniso” lexi. Jesu i lo wula lezi hi mahlweni: “A ivangeli leyi ya mufumo yi ta kanelwa misaveni yontlhe, kasi yiva wukustumunyu ka matiko wontlhe; hi kona ku ta nga chikela a kugumesa.” — Mat. 24:14.

“KURANZA KA WENA A KU MAHIWE MISAVENI”

15, 16. Hi nga hanyisa kuyini hi kuyelana ni xikombelo xa kuva a kuranza ka Nungungulu ku maheka misaveni?

¹⁵ Kwalomo ka 6.000 wa malembe ma hunzileko, a kuranza ka Nungungulu ku wa mahiwa hi kumbhelela misaveni. Hi zalezo zi nga maha ku Jehova a cuwuka masangulo lawo ya vanhu aku: “Zi wa sasekile nguvu.” (Gen. 1:31) Satani i lo hluwuka, niku kusukela kwalaho, vanhu vatsongwani ntsena va mahako kuranza ka Nungungulu laha misaveni. Kanilezi inyamutlha hi na ni lungelo ga ku hanya xikhatini lexi ku nga ni xipimo xa 8 wa timiliyoni ta Timboni leti ti khongelelako lezaku a kuranza ka Nungungulu ku maheka misaveni ti tlhela ti ti karatela ku hanya hi kuyelana ni mukhongelo lowo. Ti maha lezo hi mahanyela ya tona ni kuhiseka ka tona ntirweni wa ku maha vapizani.

¹⁶ Hi xikombiso, a makabye wo kari wa xisati a bapatizilweko hi 1948, loyi a nga tira kota murumiwa le Afrika, i ngalo: “Hi kuyelana ni xipanze lexi xa mukhongelo wa xikombiso, nzi tolovela ku khongelela lezaku a vanhu vontlhe vo fana ni tiyivu va enzelwa va tlhela va vuniwa ku tiva Jehova a xikhati na xa ha hi kona. Niku loku nzi lava ku xumayela munhu, nzi kombela wutlhari kasi ku khumba a mbilu ya munhu loye. Xungetano hi vanhu vo fana ni tiyivu lava va sinako va kumilwe, nzi khongela ka Jehova lezaku a katekisa mizamo ya hina ya ku va vuna.” A zi hlamalisi kuva a makabye loyi wa 80 wa malembe a bhinzula wutirelini gakwe, niku hi kuvuniwa hi vanwani, i vunile votala lezaku va maha Timboni ta Jehova. Handle ko kanakana ku na ni zikombiso zinwani za zi nene u zi alakanyako za vanhu va mahako zontlhe va zi kotako kumaheni ka kuranza ka Nungungulu hambu lezi va nga ni zikarato za kukhosahala. — Gonza Va Le Filipi 2:17.

17. U ti zwisa kuyini hi lezi Jehova a to maha kasi ku hlamula a mukhongelo wa hina wa lezaku a kuranza kakwe ku maheka misaveni?

¹⁷ Hi ta simama ku kombela lezaku a kuranza ka Nungungulu ku mahiwa misaveni kala a valala vontlhe va Mufumo wa Nungungulu va loviswa misaveni. Hi xikhati xa kona, hi ta wona kuranza ka Nungungulu na ku maheka nguvu a xikhati lexi ku to vuxiwa vanhu va tibiliyoni misaveni ya paradise. Jesu i te ngalo: “Mu nga hlamali hi lexi, hakuva xikhati xa hata, laha vontlhe va nga le zilahleni va ta ngazwa a gezu [ga mina], va huma.” (Joh. 5:28, 29) Hi nga alakanya a kutsakisa ka zona a ku hanya ka xikhati lexo kasi ku hoyozela varanzekako va hina va fileko! Nungungulu “i ta kulula mihloti yontlhe mahlweni [ya hina].” (Kuv. 21:4) A kutala ka lava va to vuxiwa hi ka vafileko ku tava “va nga lulamangiko,” lava va ngafa na va nga gonzangi lisine xungetano hi Jehova Nungungulu ni N’wana wakwe. Gi tava lungelo a ku vuna vanhu lava va to vuxiwa lezaku va tiva a kuranza ka Nungungulu ni kungo gakwe, kasi va ringanelwa hi “wutomi ga pinzukelwa.” — Miti. 24:15; Joh. 17:3.

18. Hi zihi a zilaveko za vanhu za hombe ka zontlhe?

¹⁸ A kurula ni kuzwanana ka misava yontlhe zi khegele ka kubasiswa ka vito ga Jehova hi ku tirisa a Mufumo wa Nungungulu. Hikwalaho, a hlamulo wo mbhelela wa zikombelo zinharu zo sangula za mukhongelo wa xikombiso wu ta tatisa a zilaveko za vanhu za hombe ka zontlhe. Hambulezo, ku na ni zilaveko zinwani za lisima zi kumbukiwako ka mune wa zikombelo za mukhongelo wa Jesu wa xikombiso lezi za ha seleko. Hi ta wulawula hi zona ka nzima yi lanzelako.

1-3. Xini xi tiyisileko makabye wo kari wa xisati lezaku Jehova wa zi tiva lezi hi zi lavako?

LANA a nga ta tshuka a rivala lezi zi nga humelela ka siku go kari le Alemanya ximunwini xa 2012. I alakanya lezaku ku hlamulilwe mikhongelo yakwe ya yimbiri yo kongoma. I mahile mukhongelo wo sangula na aya xitichini xa zihaha-pfhuka. I lo kombela Jehova lezaku a mu vululela ndlela yo nyika wukustumunyu. I lo maha mukhongelo wa wumbiri anzhako ka kuva a chikele xitichini xa zihaha-pfhuka, a tiva lezaku a lipfhumba lakwe li thindilwe, kala manziko wa kona. Lana i lo khongela ka Jehova hakuva i wa tirisile a xipanze xa hombe xa mali yakwe, kanilezi i wa nga hi na wutshamu go etlela.

² Na a ha hi ku mbheta mukhongelo wakwe wa wumbiri, Lana i lozwa munhu na aku: “Lana, u tira yini laha?” A jaha lego gi nga mu angula gi wa hi xigonzani-kulobye xa kale. Gi wa hi ni mamani wa gona ni kokwani, lava va nga gi heleketa lezaku gi ya nghena xihaha-pfhuka giya Djoni. Laha a nga tiva a xiyimo xa Lana, a mamani wakwe, Elke, i lo mu ramba hi matsenya lezaku a ya tshama navo. Elke ni mamani wakwe va lo rurela Lana va tlhela va mu maha ziwutiso zo tala xungetano hi kukholwa kakwe ni ntiro wakwe kota muvangeli wa xikhati xontlhe.

³ Hi manziko wa kona ni mixo, anzhako ka kunwa caya yi longiselweko khwatsi, Lana i lo hlamula ziwutiso zinwani za Biblia, a tlhela a teka mahungu ya ku va kuma hi wona kasi ku hlakulela a kutsakela kabye. Lana i lo tlhela kaya na a hlayisekile niku i simama a tira kota phayona ga xikhati xontlhe. I alakanya ku a ‘Muzwi wa mikhongelo’ ive ni canja ka ndlela leyi a zilo zi nga famba hi yona. — Tis. 65:2.

4. Zilaveko muni hi to wulawula hi zona?

⁴ Loku hi kumana ni xikarato hi xitshuketi, a zi nge hi karateli ku maha mukhongelo hi kombela xivuno, niku Jehova wa xalala hi kuzwa a mikhongelo leyo ya malanza yakwe yo tsumbeka. (Tis. 34:15; Mav. 15:8) Hambulezo, loku hi ehleketa hi mukhongelo wa xikombiso, hi nga ha pola lezaku ku na ni zilaveko zinwani za hombe lezi hi nga tshukako hi zi rivala. Hi xikombiso, ehleketa hi lezi a zilaveko za hina za moya zi bhoxiswako zona ka zikombelo zinharu zo gumesa za mukhongelo wa xikombiso. Xana ku na ni zinwani hi nga mahako kasi hi hanya hi kuyelana ni xikombelo xa wumune, xi wulawulako hi kuga ka hina ka siku ni siku ke? — Gonza Mateu 6:11-13.

“HI NYIKE NYAMUTLHA A KUGA KA HINA KA SIKU GINWANI NI GINWANI”

5, 6. Hikuyini a xikombelo xa kuga ka siku ni siku xi nga xa lisima hambu loku hi hi nazo ke?

⁵ Wona lezaku Jesu i hi gonzisa ku kombela a “kuga ka hina” wutshanwini ga “kuga ka mina.” Victor, a nga muwoneleli a fambafambako le Afrika, i ngalo: “Nzi tala ku mu bonga nguvu Jehova hi lezi mina ni sati wa mina hi nga karatekiko nguvu hi ku lava ku tiva lomu hi to kuma kona zakuga kutani ku himani a to hi hakhelela yindlu. A vamakabye va hina va hi khatalela hi wunene siku ni siku. Kanilezi nza khongelela lezaku lava va hi nyikako xivuno va zi kota ku hlula a zikarato va lwisanako nazo kasi ku kuma zo ti hanyisa.”

⁶ Loku hi hi ni zakuga zo enela masiku yo tala, hi nga ehleketa hi vamakabye va hanyako wusiwaneni kutani va welweko hi makhombo. A hi faneli ku va khongelela ntsena, kanilezi hi fanele ku tlhela hi maha xokari mayelano ni lezi hi kombelako. Hi xikombiso, hi nga avela vakhozeli-kulori lezi hi nga nazo. Hi nga maha munyikelo kambe wa ntiro wa misava yontlhe, na hi zi tiva lezaku a mali leyo yi ta tirisiwa hi wutlhari. — 1 Joh. 3:17.

7. Jesu i nyikisile kuyini mufananiso wa wusungukati gakwe ga kuva hi nga “karatekeli za manziko”?

⁷ Laha a nga wulawula hi kuga ka hina ka siku ni siku, kuzilava Jesu i wa wula a zilaveko za hina za tshinya. Hikwalaho, i loya mahlweni a komba lezi Nungungulu a ambexisako zona a zitsangi za khwati, a guma aku: “Xana a nga ta mu ambexa nguvu, nwina lava va kukholwa ku tsongwanyani ke? Hikwalaho mu nga karateki, muku: . . . Xana hi ta zi kuma kwihi a za kuambala?” I lo gemeta mhaka hi ku phinda wusungukati legi ga lisima: “Mu nga karatekeli za manziko.” (Mat. 6:30-34) Lezi zi komba lezaku hi fanele ku xalala hi lezi zi nga zilaveko za hina za tshinya wutshanwini ga ku hlongolisela titshomba. A zilaveko lezo zi nga ha patsa muti wu nene, ntiro wo wundla hi wona ngango, ni wutlhari ga kulwa ni zikarato za lihanyo. Kanilezi, loku hi khongelela a zilaveko za hina za nyama ntsena, hi ta ngha hi nga hi na kuringanisela. Hi na ni zilaveko za moya lezi zi nga za lisima nguvu ku hunza lezi za nyama.

8. A magezu ya Jesu ya kuga ka siku ni siku ma fanele ku hi alakanyisa a xilaveko muni xa lisima? (Wona mufota kusanguleni ka nzima.)

⁸ A magezu ya Jesu ya kuga ka hina ka siku ni siku ma fanele ku hi alakanyisa a xilaveko xa hina xa zakuga za moya. A Mugonzisi wa hina i te ngalo: “A munhu a nga ta hanya hi xibaba xoce, kanilezi hi timhaka tontlhelele leti ti humako nonwini wa Nungungulu.” (Mat. 4:4) Hikwalaho hi fanele ku simama ku kombela lezaku Jehova a simama ku hi phamela zakuga za moya hi xikhati xi faneleko.

“HI TSETSELELE MILANZU YA HINA”

9. A zionho za hina “milanzu” hi ndlela muni?

⁹ Hikuyini Jesu a tirisileko a gezu “milanzu” kasi lezo ka khati ginwani i tile a ta wulawula hi “zionho” ke? (Mat. 6:12; Luka 11:4) Kwalomo ka 60 wa malembe ma hunzileko, a revista legi gi lo zi tlhamusela khwatsi giku: “A xionho xa ku hambunyeta a nayo wa Nungungulu xi hi maha hiva ni nanzu ka yena. . . . Hi kuonha ka hina, Nungungulu a nga lonza wutomi ga hina. . .  A nga hi susela kurula kakwe, a tsema gontlhe a wunghana gakwe na hina. . . . Hi na ni mangava ya ku mu kombisa liranzo, hi ku mu ingisa; niku loku hi onha ho tsika ku hakhela a mangava ya hina yo mu kombisa liranzo, hakuva a xionho a xi kombisi liranzo hi Nungungulu.” — 1 Joh. 5:3.

10. Jehova i hi tsetselela a zionho za hina hi xiseketelo muni, niku hi fanele ku ti zwisa kuyini hi zona?

¹⁰ A xilaveko xa hina xa ku tsetselelwa siku ni siku xi dlunyatisa a xiseketelo xinwe ntsena xi nga kona kasi kuva Nungungulu a vinya a zionho za hina — wu nga nzhiho wa Jesu. Hambu lezi a nzhiho lowu wu hakhelweko kwalomo ka 2.000 wa malembe nzhako, hi fanele ku wu nyika nguvu lisima a ku khwatsi xinyikiwo hi xi kumileko nyamutlha. A “nzhiho” wa ku tirula a wutomi ga hina ngwa “lisima” nguvu laha kaku a ku na nchumu wu nga mahiwako hi munhu a nga mbhelelangiko lowu wu nga vako kusuhani ni ku hakhela ntsengo lowo. (Gonza Tisimu 49:7-9; 1 Pedro 1:18, 19.) Kunene, hi nga tshuki hi nyima ku bonga Jehova hi xinyikiwo lexi xa hombe. A magezu “zionho za hina,” wutshanwini ga “zionho za mina,” ma fanele ku hi alakanyisa lezaku vontlhe ngangweni wa hina wa vakhozeli va na ni xilaveko xa lulamiselo legi ga tipswalo. Zi te dlunya lezaku Jehova a nga lavi lezaku hi karatekela kutshamiseka ka hina hoce ka moya, kanilezi ni loku ka vanwani, a ku patsa ni lava kuzilava va hi onheleko. A kutala ka zikhati a zionho lezo a zi nyawuli niku zi hi nyika lungelo ga ku komba lezaku hakunene ha va ranza vamakabye va hina niku ha zi lava ku va tsetselela, kota lezi Nungungulu a hi tsetseleleko hi matsenya. — Kol. 3:13.

11. Hikuyini zi nga za lisima kuva ni moya wa ku tsetselela vanwani?

¹¹ Lexi xi nga tsakisiko hi lezaku kota vanhu va nga mbhelelangiko, ha tshuka hi veka xiviti hi vanwani. (Levi 19:18) Loku hi bhula hi zona, a vanwani va nga ha yima na hina, hi vanga kuhambana lomu bandleni. Loku hi tsika xiyimo lexo xi simama, xi wa tava xikombiso xo kala hi nga bongi a wuxinji ga Nungungulu ni nzhiho. A Dadani wa hina i ta tsika ku tirisa a ntsengo wa nzhiho wa N’wana wakwe ka hina loku hi nga tsetseleli vanwani. (Mat. 18:35) Jesu i lo tekela ku tlhamusela mhaka leyi anzhako ka ku nyika a mukhongelo wa xikombiso. (Gonza Mateu 6:14, 15.) Hi kugumesa, kasi ku vuneka hi kutsetselela ka Nungungulu, hi fanele ku ti karatela ku potsa ku maha zionho za hombe. A kuxuva ka hina ko lava ku potsa ku maha zionho ku hi yisa ka xikombelo xi lanzelako. — 1 Joh. 3:4, 6.

“U NGA HI YISI MINZHINGWENI”

12, 13. a) Zini zi nga humelela Jesu xikhatanyana nzhako ka kubapatizwa kakwe? b) Hikuyini wu nga nanzu wa hina loku hi wela xiringweni? c) Zini lezi Jesu a kombisileko hi ku simama a tsumbekile kala kufeni?

¹² A ku kambisisa lezi zi humeleleko Jesu xikhatanyana anzhako ka kubapatizwa kakwe zi nga hi vuna ku zwisisa a xilaveko xa ku kombela hiku: “U nga hi yisi minzhingweni.” Jesu i lo yiswa xiwuleni hi moya wa Nungungulu. Hikuyini? “Kasi a ya ringwa hi Satani.” (Mat. 4:1; 6:13) Xana lezo zi fanele ku hi hlamalisa? Ahihi; hi nga ta hlamala loku hi zwisisa a xigelo tshinya xa kuva Nungungulu a rumele N’wana wakwe misaveni. I mu rumele kasi ku ta lulamisa a mhaka yi vuxilweko a xikhati lexi Adamu na Eva va nga ala a wuhosi ga Nungungulu. Ku wa hi ni ziwutiso zi nga lava hlamulo. Hi xikombiso: Xi kona lexi Nungungulu a nga xi phazama a xikhati a nga vanga munhu? Xana a munhu wo mbhelela i wa ta zi kota ku seketela a wuhosi ga Nungungulu na a kari a tshikelelwa hi “loyi wa kubiha” ke? Niku a vanhu va wa ta hanya khwatsi loku va tlhatlheka ka wuhosi ga Nungungulu, kota kuwula ka Satani ke? (Gen. 3:4, 5) A ku hlamula ziwutiso lezi zi wa ta teka xikhati kanilezi zi wa ta komba zivangwa zontlhe zo tlhariha lezaku Jehova i tirisa wuhosi gakwe hi ndlela yi vunako.

¹³ Jehova i basile, hikwalaho a nga tshuki a ringa munhu hi ku mu kokela kubiheni. Kanilezi, “a Muringi” hi Satani Diabolus. (Mat. 4:3) Satani a nga vanga ziyimo za xiringo. Hambulezo, zi salela munhu munwe ni munwani a ku vumela ku yiswa xiringweni kutani ku ala. (Gonza Jakobe 1:13-15.) Hi tlhelo gakwe, Jesu i lo tekela ku ala a xiringo xinwe ni xinwani hi ku tshaha a Mhaka ya Nungungulu. Hi ndlela leyo, Jesu i lo seketela a wuhosi ga Nungungulu legi gi mu lumbako. Kanilezi Satani a nga mu tsikangi. “I lo suka ka yena xikhatanyana” na a ha lava xikhati xinwani xo maheka. (Luka 4:13) Jesu i lo simama a ala mizamo yontlhe ya Satani ya ku lava ku tshova kutsumbeka kakwe. Kristu i lo seketela a kululama ka wuhosi ga Jehova a komba lezaku a munhu wo mbhelela a nga simama a tsumbekile hambu ka ziringo zo tshisa. Kanilezi, Satani i zama ku phasa valanzeli va Jesu, a ku patsa na wena.

14. Zini hi faneleko ku maha kasi hi nga yiswi kuringweni?

¹⁴ Hi kota ya mhaka ya kale ni kale mayelano ni wuhosi gakwe, Jehova wa tsika a Muringi a tirisa tiko gakwe kasi ku hi ringa. Nungungulu a nga hi yisi kuringweni. Kanilezi, wa hi tsumba niku i lava ku hi vuna. Hambulezo, Jehova i kombisa xichawo hi kutlhatlheka ka hina ka kuhlawula hi ku kala a nga hi valeli halahala ka ziringo. Hi fanele ku maha zilo zimbiri — ku nga etleli hi tlhelo ga moya ni ku khongela hi nga tsiki. Jehova i hlamulisa kuyini a mikhongelo ya hina?

15, 16. a) Hi zihi a ziringo zo kari hi faneleko ku zi ala? b) A nanzu wuya ka mani loku hi wela xiringweni?

¹⁵ Jehova wa hi nyika moya wakwe wa kubasa, lowu wu nga hi nyikako ntamu wu tlhela wu hi vuna ku ala xiringo. Wa hi tlharihisa kambe hi ku tirisa a Mhaka yakwe ni bandla xungetano hi ziyimo lezi hi faneleko ku zi potsa, zo kota ku mbheta xikhati xo tala, mali, ni ntamu ka zilo zi nga hiko na lisima. Espen na Janne va hanya tikweni go ganya ga Europa. Hi malembe yo tala, va wa hi maphayona ya xikhati xontlhe ka xipanze xi nga hi ni xilaveko xa hombe tikweni gabye. A xikhati va nga pswala a n’wana wa wabye wa matewula, va lo kurumeteka ku nyima ku phayona, niku zalezi va na ni wa wumbiri. Espen i ngalo: “Hi tala ku khongela ka Jehova hi kombela kuva hi nga weli kuringweni zalezi hi nga ha zi kotiko ku mbheta xikhati xo tala mitirweni ya moya a ku fana ni kale. Hi kombela Jehova lezaku a hi vuna ku hlayisa wumoya ga hina ni kuhiseka ka hina wutirelini.”

¹⁶ A xinwani xiringo xi wonekako nguvu inyamutlha ku hlalela zithombe za masango. Loku hi wela xiringweni lexi, hi nga mu lumbeti Satani. Hikuyini? Hakuva Satani ni tiko gakwe a va nge hi kurumeti ku maha nchumu na hi nga zi lavi. A vokari va ti peta xiringweni lexi hi ku tsika a mapimo yabye ma alakanyela zilo zo biha. Kanilezi hi nga ala, a ku fana ni lezi a makume ya mazana ya vamakabye va hina va mahako. — 1 Kor. 10:12, 13.

“HI TLHATLHISE KA LOYI WA KUBIHA”

17. a) Hi nga hanyisa kuyini hi kuyelana ni xikombelo xa hina xa ku tlhatlhiswa ka loyi wa kubiha? b) Kutlhatlhiswa muni ku tshinelako?

¹⁷ Kasi ku hanya hi kuyelana ni xikombelo xa ku ‘tlhatlhiswa ka loyi wa kubiha,’ hi fanele ku ti karatela ku hambana ni “tiko” ga Satani. Hi fanele ku “nga ranzi tiko [ga Satani], hambu ni zilo lezi zi nga lomu tikweni.” (Joh. 15:19; 1 Joh. 2:15-17) A ku maha lezo i yimpi ya siku ni siku. A hi kona kutlhatlheka hi tova nako a xikhati lexi Jehova a to hlamula xikombelo lexi hi ku lovisa Satani ni tiko gakwe! Hambulezo, hi fanele ku alakanya lezaku a xikhati lexi Satani a nga hlongoliwa le tilweni, i wa zi tiva lezaku i salelwe hi xikhatanyana. Hi kuzangara, i maha zontlhe a zi kotako kasi ku onha a kutsumbeka ka hina. Hikwalaho hi fanele ku simama hi khongela hi kombela ku tlhatlhiswa ka yena. — Kuv. 12:12, 17.

18. Kasi ku pona kugumeseni ka tiko legi, zini hi faneleko ku simama hi maha?

¹⁸ Wa zi tsakela ku wona makatekwa lawo? Loku zi hi lezo, simama ku khongelela lezaku a Mufumo wa Nungungulu wu basisa vito ga Jehova ni ku maha kuranza kakwe misaveni. Kombela Jehova lezaku a tatisa a zilaveko za wena za moya ni za nyama. Ti yimisele ku hanya hi kuyelana ni mukhongelo wa xikombiso.