• Hi vamani a Timboni ta Jehova?
    A Murinzeli—2015 | Setembro 1
    • Wasati a cuwukako Timboni ta Jehova na ti tirisa xikarinyana xa mabhuku kuxumayeleni

      HLOKO YA MHAKA YA KAPA

      Hi vamani a Timboni ta Jehova?

      “Nzi tiva Mike hi malembe yo tala. I Mboni ya Jehova. Hambulezo, kala zezi a wukhongeli gabye a nzi gi zwisisi. Himani Jehova? Hikuyini a Timboni ti nga mahiko mibuzo ya ku alakanya masiku ya tiferiado? Kasi i chechi muni leyi Mike a nga ti nghenisela ka yona?” — Becky, Califórnia, Estados Unidos.

      “A xikhati lexi a vaakelani va mina va nga sangula ku gonza a Biblia ni Timboni ta Jehova nzi lo ti wutisa lezi: ‘Kasi a vito legi ga ku Timboni ta Jehova gi wula yini? A vito ga wukhongeli legi a go ku hlamalisa!’” — Zenon, Ontário, Canadá.

      “Mina ni sati wa mina hi wa alakanya lezaku a Timboni ta Jehova ti wa hi enzela kasi ti ta hi khongelela hi kota ya lezi hi nga tizwa nanzu hi ku ngayi chechini. Niku hi lo alakanya ku loku ku hi lezaku lomu ka tichechi ta hombe lezi hi nga zi lava a zi kona, a ha ha wuli hi xichechana xo kala kutoloveleka xa Timboni ta Jehova.” — Kent, Washington, Estados Unidos.

      “Kasi ku wula lisine nzi wa nga zi tivi a ku [a Timboni ta Jehova] hi vamani.” — Cecilie, Esbjerg, Dinamarca.

      Kuzilava wa tshuka u va wona na va xumayela hi muti ni muti kutani laha kubaseni, na va nyikela mabhuku ma seketelwako lomu ka Biblia, va tlhela va fambisa zigonzo za Biblia za mahala. Niku ku nga hava vona va ku nyikileko a revista legi. Hambulezo, u nga ha ti wutisa ku kasi a Timboni ta Jehova hi vamani hakunene. Kuzilava u alakanya zo fana ni lava va nga kumbukiwa laha hehla.

      Loku u hi ni ziwutiso zo fana ni lezo ni kukarateka ko kari, u nga yi kuma kwihi a mihlamulo ya kona? U nga zi tivisa kuyini lezi hakunene a Timboni ta Jehova ti zi kholwako, niku ti yi kuma kwihi a mali ya ku hakhelela a ntiro wabye wa ku xumayela ni matshamu lawa va khozelako ka wona, niku hikuyini va tako le kaya ka wena va tlhela va ku tshinelela lomu ku nga ni vanhu vo tala?

      Cecilie, a kumbukilweko kusanguleni ka nzima leyi i wula lezi: “Nzi gonzile zotala hi Timboni ta Jehova lomu ka Internet. Zonake nzi kuma a mahungu ya hava xungetano hi Timboni ta Jehova ni kuzwa vanhu na va wulawula zilo zo kombisa ku ti venga. Kota wuyelo ga lezo, nzi lo sangula kuva ni mawonela ya hava hi Timboni ta Jehova.” Hambulezo, hi kugumesa i lo wulawula ni Timboni ta Jehova hi kukongoma zonake a kuma mihlamulo yo zwala ya ziwutiso zakwe.

      Xana wa zi lava ku kuma a mihlamulo ya lisine ya ziwutiso za wena xungetano hi Timboni ta Jehova? Hi ku kuca lezaku uya ka lava va zi tivako khwatsi — ku nga tona Timboni ta Jehova ha toce, lava va humesako a revista legi. (Mavingu 14:15) Hi na ni kutsumba ka lezaku a nzima yi lanzelako yi ta ku vuna ku wona ku hi hina vamani ni lezi hi zi kholwako, u tlhela u zwisisa a ntiro lowu hi wu mahako.

  • A Timboni ta Jehova vanhu va matshamela muni?
    A Murinzeli—2015 | Setembro 1
    • Timboni ta Jehova ta hlonge yo hambanahambana ti losanako Salawini ya Mufumo

      HLOKO YA MHAKA YA KAPA | HI VAMANI A TIMBONI TA JEHOVA?

      A Timboni ta Jehova vanhu va matshamela muni?

      Hi hlengeletano ya misava yontlhe yi nga tirisaniko ni mitlawa yinwani ya wukhongeli. Hambu lezi a tsinza ga hina ga misava yontlhe gi nga le Estados Unidos, a kutala ka Timboni ta Jehova ti hanya ka matiko manwani. Hi lisine, kwalomo ka 8 wa timiliyoni ta hina hi gonzisa vanhu a Biblia ka matiko yo hunza 230. Hi maha lezo hi kota ya lezi Jesu a nga wula lezi: “A ivangeli leyi ya mufumo yi ta kanelwa misaveni yontlhe, kasi yiva wukustumunyu ka matiko wontlhe; hi kona ku ta nga chikela a kugumesa.” — Mateu 24:14.

      Na ku khataliseki lomu hi hanyako kona, hi ti karatela ku ingisa milayo. Hambulezo, hi ti karatela ku nga ti ngheniseli ka politika. Hi maha lezo hi kota ya ku lanza xileletelo xa Jesu ka maKristu, xa lezaku ‘ma ngave ya tiko.’ Hikwalaho, a hi ti ngheniseli ka zilo za politika, kuya wusochweni kutani ku seketela tiyimpi. (Johani 15:19; 17:16) Nzeni ka Yimpi ya Wumbiri ya Misava, a Timboni ta Jehova ti valelwe mapaxweni, ti xanisiwa hambu ku mahiwa zo biha ku hunza lezo hi kota ya ku nga vumeli ku ti nghenisela ka politika. A wanuna wo kari a kale a nga hi bixopo, i lo tsala lezi: ‘A Timboni ti nga wula na ti tlhatlhekile lezaku ku vile tona toce ntlawa wa hombe wu nga ala ku ti nghenisela ka wusochwa ka Reich wa Wunharu hi kota ya tivalo tabye.’

      “[A Timboni ta Jehova] ti na ni mahanyela ya ma nene nguvu. Hi nga va tirisa ka zikhundla za lisima nguvu za politika kanilezi hi nga ta tshuka hi zi kota ku va nghenisa ka politika. . . . Va kombisa xichawo hi wuhosi ga tiko, kanilezi va kholwa lezaku a Mufumo wa Nungungulu hi wona woce wu nga ni ntamu wa ku mbheta a zikarato zontlhe za vanhu.” — Pepha-hungu ga Nová Svoboda, República Tcheca.

      Hambulezo, a hi hanyi hoce. Jesu i lo khongela ka Nungungulu hi kota ya valanzeli vakwe aku: “A nzi kombeli lezaku u va susa tikweni.” (Johani 17:15) Hikwalaho, kuzilava wa hi wona na hi tira, na hi hi lomu xitolo, ni loku hiya xikoleni xa lomu xipanzeni xa hina.

  • Zini lezi a Timboni ta Jehova ti zi kholwako?
    A Murinzeli—2015 | Setembro 1
    • Patswa wa Timboni ta Jehova wu gonzako Biblia ni vana vabye

      HLOKO YA MHAKA YA KAPA | HI VAMANI A TIMBONI TA JEHOVA?

      Zini lezi a Timboni ta Jehova ti zi kholwako?

      A Timboni ta Jehova ti kholwa lezaku “yontlhelele mitsalo yi pimisilweko vanhu hi Nungungulu ya vuna.” (2 Timote 3:16) Hi tirisa Biblia kota giya ga ku gonza xungetano hi Muvangi ni ku tiva lexi hi hanyelako xona.

      A Biblia gi ngalo: “Kasi va fela ku tiva lezaku hi wena wece u nga ni vito ga Jehova, loyi a Hunzeleleko Kutlakuka misaveni yontlhe.” (Tisimu 83:18) Hikwalaho, hi khozela Jehova Nungungulu ntsena, niku kota Timboni takwe hi ti karatela ku tivisa a vito gakwe. — Isaya 43:10-12.

      Kota maKristu, hi kholwa lezaku Jesu, a “N’wana wa Nungungulu,”a i tile laha misaveni a tlhela a maha Messia. (Johani 1:34, 41; 4:25, 26) Anzhako ka kufa kakwe, Jesu i lo vuxiwa aya tilweni. (1 Va Le Korinte 15:3, 4) Anzhako ka lezo i lo maha Hosi ya Mufumo wa Nungungulu. (Kuvululelwa 11:15) A Mufumo lowo mufumo wa lisine, lowu wu to maha misava yi tlhela yiva Paradise. (Danieli 2:44) A Biblia gi ngalo: “Lava va rulako va taga tshomba ya tiko, va ta xalaliswa hi kurula ka hombe.” — Tisimu 37:11, 29.

      “Loku va lera zilo lomu ka Biblia, va kholwa lezaku hi Nungungulu a wulawulako navo. Loku va tshuka vava ni zikarato wutomini gabye, va zama ku zi lulamisa hi ku tirisa a Mhaka ya Nungungulu. . . . Ka vona, a Mhaka ya Nungungulu ya ha hanya.” — Benjamin Cherayath, a nga murangeli wa chechi ya Katolika, Phepha-hungu ga Münsterländische Volkszeitung, Alemanya

      A Timboni ta Jehova ti kholwa lezaku a matshinya ya milayo ya Biblia ma nga vuna vanhu hambu inyamutlha. (Isaya 48:17, 18) Hikwalaho, hi ti karatela ku lanzela a matshinya lawo ya milayo. Hi xikombiso, a Biblia gi hi tlharihisa lezaku hi potsa mitiro leyi yi chakisako a kupima ni miri wa hina, a hi dzahi kutani ku tirisa mimuri ya ku lahlisa mapimo. (2 Va Le Korinte 7:1) Hi tlhela hi potsa a mitiro yi koniwako hi kongoma lomu ka Biblia yo kota wudakwa, matirisela ya hava ya ziro za wubeleki, ni kuyiva. — 1 Va La Korinte 6:9-11.

      a A Biblia kambe gi tlhamusela Jesu kota “N’wana a belekilweko yece wa Nungungulu,” hakuva Jesu hi yena yece xivangwa xo sangula xi vangilweko hi Jehova wutsumbu. — Johani 3:18; Va Le Kolosi 1:13-15.

  • Yita hi kwihi mali yo fambisa ntiro wa hina wo xumayela?
    A Murinzeli—2015 | Setembro 1
    • Munhu a mahako munyikelo wa kuziranza lomu ka bhokisa ga minyikelo

      HLOKO YA MHAKA YA KAPA | HI VAMANI A TIMBONI TA JEHOVA?

      Yita hi kwihi mali yo fambisa ntiro wa hina wo xumayela?

      A lembe ni lembe, hi gandla hi tlhela hi avela a maBiblia yo tala ni mabhuku manwani ma seketelwako lomu ka Biblia. Hi aka hi tlhela hi longisa tihofisa ta ravi ni matshamu ya ku gandla mabhuku ya hina misaveni yontlhe. A mazanazana ya mabandla ya hina ma tlhangana ka matshamu yo saseka ya ku khozela kona hi ma vitanako ku tiSalawu ta Mufumo. Himani a hakhelako zontlhe lezo?

      A ntiro wa hina wu seketelwa hi minyikelo ya kuziranza. (2 Va Le Korinte 9:7) Hi 1879, a wugandli ga wumbiri ga revista legi gi tlhamusele lezi: “A Torre de Vigia de Sião, [kota lezi gi nga vitaniswa zona kale] hi kholwa lezaku hi humesa a revista legi hi ku vuniwa hi JEHOVA, hi kota ya lezo hi nga ta tshuka hi kombela vanhu kasi va hi vuna.” Niku kala zezi a hi se cica a mahela lego.

      A minyikelo yi rumelwa hi kukongoma ka yinwe ya tihofisa ta hina ta ravi kutani ku cheliwa ka mabhokisa ya minyikelo ma nga ka Salawu yinwe ni yinwani ya Mufumo. Kanilezi a hi nyikeli za wukhume, ku maha mihlengo, hambu ku lonza mali hi kota ya ntiro wa hina wa kuxumayela kutani mabhuku lawa hi ma nyikelako. A hi holi kasi ku xumayela, ku gonzisa lomu bandleni, kutani ku vunetela ku aka matshamu ya wukhozeli. Jesu i te ngalo: “Mu amukele mahala, nyikani mahala.” (Mateu 10:8, Tradução do Novo Mundo) Vontlhe a vatiri va tihofisa ta hina ta ravi ni va tsinza ga misava yontlhe, a ku patsa ni ziro za Hubye yi Fumako ya Timboni ta Jehova, a va holi.

      “A ku fana ni mitiro yontlhe ya Timboni ta Jehova, a minyikelo leyi va yi mahako ya kuziranza, niku a munwe ni munwani i ti mahela xiboho ha yece lezaku i mali muni a lavako ku nyikela ni lezi a lavako ku nyikelisa zona a ‘munyikelo lowo wa kuziranza.’” — Corte Europeia dos Direitos Humanos, 2011

      A minyikelo ya kuziranza yi tlhela yi tirisiwa lomu ka timhango ta ntumbuluko. A maKristu yo sangula ma wa tsaka hi ku vunetela vanwani lava va nga hi kuxanisekeni. (Va Le Roma 15:26) Hi ndlela yo fana, hinawu hi vuna vanwani va nga kuxanisekeni hi ku va longisela tiyindlu tabye ni matshamu ya ku khozela kona, ku va nyika zakuga, tinguwo, ni ku va nyika mimiri.

  • Hikuyini hi xumayelako?
    A Murinzeli—2015 | Setembro 1
    • Timboni timbiri ta Jehova ti xumayelako laha kusuhani ni muti

      HLOKO YA MHAKA YA KAPA | HI VAMANI A TIMBONI TA JEHOVA?

      Hikuyini hi xumayelako?

      Kuzilava a ku na xinwani xi hi tivekisako nguvu a ku hunza a ntiro wa hina wa kuxumayela hi muti ni muti, laha kubaseni ni kwihi hi kumako vanhu. Hikuyini hi mahako lezo?

      A Timboni ta Jehova ti xumayela kasi ku dumisa Nungungulu ti tlhela ti tivekisa a vito gakwe. (Maheberu 13:15) Niku hi lava ku ingisa Jesu Kristu, loyi a leleteleko lezi: “Hikwalaho fambani, mu va maha vapizani a matiko wontlhe, . . . mu va gonzisa a ku gonga zontlhe lezi nzi mu layileko zona.” — Mateu 28:19, 20.

      Tlhatakumbiri, hi ranza vaakelani va hina. (Mateu 22:39) Niku ha zi tiva khwatsi lezaku a kutala ka vanhu va na ni wukhongeli gabye ni lezi va zi kholwako niku a hi vanhu vontlhe va ma tsakelako a mahungu lawa hi xumayelako. Hambulezo, ha zi tiva lezaku a tigonzo ta Biblia ta ponisa wutomi. Hi lezo zi hi mahako hi ‘nga tsiki ku gonzisa ni ku kanela mahungu yo saseka xungetano hi Kristu,’ a ku fana ni lezi ma nga maha a maKristu ya zana go sangula ga malembe. — Mitiro 5:41, 42.

      Antonio Cova Maduro a gonzako a matshamela ya vanhu ni kuxaxametwa kabye, i tsalile mahungu ma wulawulako hi ‘mizamo ni zikarato lezi a Timboni ta Jehova ti kumanako nazo, kasi ti zi kota ku haxa mitsalo ya kubasa kala magemeta-musi ya misava.’ — Phepha-hungu El Universal, Venezuela

      A kutala ka lava va gonzako a mabhuku ya hina a hi Timboni ta Jehova. Niku a timiliyoni ta vanhu lava hi gonzako navo a Biblia va lumba wukhongeli ginwani. Hambulezo, va zi tsakela nguvu a ku enzelwa hi Timboni ta Jehova.

      Kuzilava u na ni ziwutiso zinwani xungetano hi Timboni ta Jehova. Hi ku kombela lezaku u tiva mihlamulo ya kona hi ku:

      • Wutisa yinwe ya Timboni ta Jehova.

      • Hi ku nghena ka saite ya hina, ya www.jw.org/pt.

      • Hi kuya mitlhanganweni ya hina, a ku nghena mahala niku vontlhe va rambiwa.

      Jesu a rumako vapizani vambiri lezaku va ya xumayela