Wa tshuka u ti maha ziwutiso zo fana ni lezi? Loku zi hi tano, a hi wena wece. A vanhu misaveni yontlhe va ti maha ziwutiso za lisima wutomini. Xana u nga yi kuma a mihlamulo ya kona?

A vanhu vo tala va wa taku: “Ina!” Hikuyini? Hakuva va kumile mihlamulo yo tsakisa ya ziwutiso zabye lomu ka Biblia. Xana wa zi lava ku tiva lezi a Biblia gi zi wulako? Loku u zi lava, wa rambiwa ku gonza a Biblia mahala ni Timboni ta Jehova.a

Lisine lezaku a vanhu vo kari loku zita mhakeni ya ku kuma mihlamulo hi kuva va gonza a Biblia, ve ngalo: “A nzi na xikhati.” Kutani ku: “Ga karata.” Hambu ku: “Nza chava a ku tsumbisa ku nzi ta gonza.” Kanilezi, a vanwani va na ni mawonela yo hambana ni lawo. Va gi tsakela nguvu a lungelo ga ku tiva lezi a Biblia gi zi gonzisako. Wona zikombiso zi tsongwani lahasi:

• “Nzi nghenile a chechi ya Katolika, ya vaProtestante, ya vaSique, ni wukhongeli ga xiBuda, nzi tlhela nzi gonza zilo za wukhongeli le Universidade. Hambulezo, a kutala ka ziwutiso za mina xungetano hi Nungungulu zi wa nga hlamuliwi. Hi kugumesa ku lota a Mboni yo kari ya Jehova laha kaya. Hi ku hlamaliswa hi mihlamulo ya yona yi nga kari yi seketelwa lomu ka Biblia, nzi lo vumela ku gonza a Biblia.” — Gill, Inglaterra.

• “Nzi wa hi ni ziwutiso zo tala xungetano hi wutomi, kanilezi a mihlamulo ya varisi va le chechini ya mina yi wa nga nzi tsakisi. Hambulezo, a Mboni yo kari ya Jehova yi lo hlamula ziwutiso za mina hi ku tirisa a Biblia basi. A xikhati a nga nzi wutisa lezaku nza zi lava ku tiva zinwani ke, nzi lo vumela.” — Koffi, Benin.

• “Nzi wa lava ku tiva xiyimo xa vafileko. Nzi wa kholwa lezaku a vafileko va nga va mahela za kubiha a vahanyako, kanilezi nzi wa lava ku tiva lezi a Biblia gi zi wulako. Hikwalaho, nzi lo sangula ku gonza a Biblia ni munghana wo kari a nga hi Mboni.” — José, Brasil.

• “Nzi wa zama ku lera a Biblia kanilezi nzi wa nga gi zwisisi. Zonake ku lota a Mboni ya Jehova yi ta nzi tlhamusela a ziprofeto zo tala za Biblia hi ndlela yo dlunyateka. Nzi wa lava ku tiva zinwani kambe.” — Dennize, México.

• “Nzi wa ti wutisa ku xana Nungungulu wa khatala hi mina ke. Hikwalaho, nzi lo boha ku maha mukhongelo ka Nungungulu loyi a kumbukiwako lomu ka Biblia. Ka siku gi nga lanzela a Mboni yo kari yi lo ta gongonza a livati la mina, zonake nzi vumela xigonzo xa Biblia.” — Anju, Nepal.

A matshango lawa ma hi alakanyisa a magezu ya Jesu yaku: “Va tsaka lava va khatalako hi xilaveko xabye xa moya.” (Mateu 5:3, Tradução do Novo Mundo) Kunene, a vanhu va na ni kunavela ka mabeleko ka ku lava ku tiva Nungungulu. Niku hi Nungungulu ntsena a zi kotako ku enelisa a kunavela loko, niku i maha lezo hi ku tirisa Mhaka yakwe, a Biblia.

Makunu, zini zi patsekako ka xigonzo xa Biblia? Xi nga ku vunisa kuyini? A ziwutiso lezi zi ta hlamuliwa ka nzima yi lanzelako.

A Timboni ta Jehova ti tiviwa nguvu hi ntiro wa tona wa kuxumayela laha kubaseni. Kanilezi, u wa zi tiva lezaku hi na ni longoloko wa ku fambisa zigonzo za Biblia misaveni yontlhe?

Hi 2014, a ku hunza a 8.000.000 wa Timboni ta Jehova ka 240 wa matiko, ti fambisile a zigonzo za Biblia zi nga kusuhani ka 9.500.000 ka hweti yinwe ni yinwani.a Hi lisine, a ntsengo wa vanhu hi gonzako navo a Biblia, wu hunza a ntsengo wa vanhu va hanyako nzeni ka matiko yo kari yo ringana a 140 wa wona!

Kasi ku maha ntiro lowu wa ku gonzisa, a Timboni ta Jehova ti humesa a xipimo xa biliyoni yinwe ni khihlanya ya maBiblia, mabhuku, marevista, ni zitiro zinwani zi vunako ku gonza a Biblia, ka lembe ginwe ni ginwani — hi tirimi to ringana a 700 wa tona! A kutikarata loku ka hombe ka kuhumeswa ka mabhuku ku maha vanhu va gonza a Biblia hi lirimi leli va li hlawulako.

MIHLAMULO YA ZIWUTISO ZI TOLOVELAKO KU MAHIWA XUNGETANO HI LONGOLOKO WA HINA WA XIGONZO XA BIBLIA.

Xi fambisiswa kuyini a xigonzo xa Biblia?

Hi bhula hi timhaka to hambanahambana ta Biblia, hi kambisisa mavesi ma yelanako ni timhaka leto. Hi xikombiso, a Biblia gi hlamula ziwutiso zo kota lezi: Himani Nungungulu? I tshamisile kuyini? I na ni vito? Xana i tshama kwihi? Hi ngava kusuhani naye? A xikarato hi lexi xaku u ta yi kuma kwihi a mihlamulo ya kona lomu ka Biblia ke.

Kasi ku vuna vanhu lezaku va kuma a mihlamulo, hi tolovela ku tirisa a bhuku Zini Lezi A Biblia Gi Zi Gonzisako Hakunene?b A bhuku legi gi mahelwe ku vuna vanhu lezaku va tiva a tigonzo-tshinya ta lezi a Biblia gi zi gonzisako. Lezo zi patsa a zigonzo xungetano hi Nungungulu, Jesu Kristu, kuxaniseka ka vanhu, kuvuka hi ka vafileko, mukhongelo, ni timhaka tinwani to tala.

Xana a xigonzo xi nga mahiwa kwihi niku hi xikhati muni?

A xigonzo xi nga fambisiwa ka wutshamu ni xikhati xa xi nene ka wena.

Xana a xigonzo xa Biblia xi mbheta xikhati muni?

A vanhu vo tala va ti vekela xipimo xa hora kutani ku nga chiketi nzeni ka viki ni viki, kasi ku gonza a Biblia. Kanilezi, a xikhati lexi hi xi mbhetako ka xigonzo ha cica loku zi laveka. Hi nga xi zwananisa ni matirela ya wena. Ka viki ginwe ni ginwani a vokari va mbheta 10 kutani 15 wa timeneti ntsena na va gonza.

I mali muni yi lavekako kasi ku gonza?

A ku gonza ni mabhuku ya ku gonza hi wona, mahala. Lezo zi yelana ni lezi Jesu a leleteleko a vapostoli vakwe aku: “Mu amukele mahala, nyikani mahala”. — Mateu 10:8, NM.

Hi ta gonza kala rini?

A ku u ta gonza kala kwihi, zi le ka wena. A bhuku Zini Lezi A Biblia Gi Zi Gonzisako Hakunene? gi na ni 19 wa zigonzo. U nga gonza a zipanze zontlhe hi zambo ga gi nene ka wena.

Nzi fanele ku gumesa nzi maha Mboni ya Jehova ke?

Ahihi. Hi kombisa xichawo ka lezi a munhu ni munhu a hlawulako ku zi kholwa. Hambulezo, a vanhu lava va tivako tigonzo-tshinya ta Biblia, va nga zi kota ku hlawula zilo hi ku zi tiva.

Nzi nga ma kuma kwihi a manwani mahungu?

Lomu ka site jw.org ku na ni mahungu yo tsumbeka xungetano hi lezi a Timboni ta Jehova ti zi mahako ni lezi ti zi kholwako.

Nzi nga kombelisa kuyini a xigonzo xa Biblia?

• 

  Rumela xikombelo xa wena ka www.jw.org/tsc hi ku tirisa a Internet.

• Tsalela a makhero lawa ma xaxametilweko laha ka phajina 2.

• Wulawula ni Timboni ta Jehova ti nga laha kusuhani ni kaya ka wena.