• Zini zi humelelako munhu loku a file?
    A Murinzeli—2015 | Agosto 1

    • HLOKO YA MHAKA YA KAPA | A MUNHU A FILEKO — A NGA VUKA KE?

      Zini zi humelelako munhu loku a file?

      Vanhu va hombe ni vanana va renzelekeleko kaxawu laha xilahleni

      “Nzi wa alakanya lezaku ku na ni wutshamu ginharu legi a munhu a yaku ka gona loku a file: Tilweni, kusweni, kutani purgatório. Nzi wa zi tiva lezaku a nzi ringanelwe hi kuya tilweni niku nzi wa nga bihangi nguvu laha ka kuza nziya kusweni. A gonzo ya purgatório nzi wa nga yi zwisisi. Nzi wa nga se tshuka nzi wona a gezu purgatório lomu ka Biblia. Nzi wo zizwa ni vanhu ntsena.” — Lionel.

      “Nzi wa gonzisilwe lezaku loku a vanhu vafa vaya tilweni, kanilezi nzi wa nga zi kholwi khwatsi. Nzi wa alakanya lezaku a kufa kumbhela ka zontlhe — a ka hi na nchumu xi rinzelwako hi loyi a fileko.” — Fernando.

      Wa tshuka u ti wutisa a ku: ‘Zini lezi hakunene zi humelelako le kufeni? Xana a varanzekako va hina va fileko vo xaniseka hi ndlela yo kari? Hi ta tshuka hi va wona kambe? Xini xi nga hi tiyisekisako lezo?’ Kambisisa lezi a Mitsalo yi zi gonzisako hakunene. A kuranga a hi kambisise hi wona lezi a kufa ku nga tshamisa zona hi kuya hi lezi a Biblia gi zi wulako. Hi kulanzela hi ta kambisisa a kutsumba loku a Mhaka ya Nungungulu, a Biblia, yi hi nyikako.

      Hi xihi xiyimo xa vafileko?

      HLAMULO WA BIBLIA: “A vahanyako va zi tiva lezaku va tafa, kanilezi a vafileko a va tivi nchumu, ge, kuva ni nchachazelo, hakuva a va ha alakanyiwi. Ni xihi lexi a canja ga wena gi xi tirako, xi mahe hi ntamu wa wena: hakuva a ku na ntiro, hambu makungo, ni kutiva, ge, hambu wutlhari le Xeoli lomu u yako kona.”a — Mutshawuteli 9:5, 10.

      Hi ndlela yo tsema a gezu Xeoli, gi wula wutshamu ga lomu a vanhu vontlhe va yako ka gona loku vafa; wutshamu ga ku fananisa kutani lomu ni kwihi kupima ku tsikako ku tira. Xana a wanuna wo tsumbeka Joba i wa xi wonisa kuyini a Xeoli kutani Xilahla? I wa lahlekelwe hi zontlhe a nga hi nazo ni vana vakwe hi siku ginwe, a tlhela a telwa hi zidlayi a miri wakwe wontlhe. I lo khongotela Nungungulu aku: “O, loku ku wo khwatsi wa nzi fihla le Xeoli, u nzi veka kufihlaleni.” (Joba 1:13-19; 2:7; 14:13) Zi te dlunya lezaku Joba i wa nga woni a Xeoli kota wutshamu ga nzilo, lomu a kuxaniseka kakwe ku nga wa ta engetela. A kuhambana ni lezo i gi alakanyile kota wutshamu legi a nga wa ta kuma ku humula.

      Ku na ni ndlela yinwani ya ku gonza xungetano hi xiyimo xa vafileko. Hi nga kambisisa a Mitsalo yi pimisilweko leyi yi wulawulako hi 8 wa vanhu va vuxilweko hi ka vafileko. — Wona kwadru “8 wa vanhu va kumbukiwako lomu ka Biblia va nga vuxiwa hi ka vafileko.”

      Ka yontlhe ya 8 ku hava ni wunwe wu wulawulako hi wutshamu ga kutsaka kutani ga nzilo. Loku a vanhu lavo va nga vuxilwe hi ka vafileko va wa noya ka matshamu lawo, xana na va nga byelangi vanhu xungetano hi lezo? Niku na zi nga patsiwangi lomu ka Biblia gi pimisilweko kasi hontlheni hi zi tiva? A Mitsalo a yi kumbuki, ne xinwe xa zona. A vanhu lavo va 8 zi te dlunya lezaku va wa nga hi na xo wula hi mhaka leyo. Hikuyini? Hakuva va wa nga tivi nchumu, a ku fana ni wurongo ga hombe. Hi lisine, ka zikhati zinwani a Biblia gi tirisa a kuetlela kota mufananiso wa ku tlhamusela kufa. Hi xikombiso, a wanuna wo tsumbeka Davida na Stefani vontlhe va “lo etlela” kufeni. — Mitiro 7:60; 13:36.

      Makunu, kurinzela muni ku nga kona hi lava va fileko? Xana va nga tshuka va vuka hi kuetleleni loko?

      a Ka Tradução do Novo Mundo das Escrituras Sagradas, a gezu “Xilahla” hi xiGreki gi hunzuluselwa ku Xeoli, hi xiHeberu i “Hayidesi.” Ka maBiblia yo kari ku tirisiwa a gezu “kuswa,” kanilezi a maalakanyo ya wutshamu ga ku xanisa vafileko a hi ya lomu Mitsalweni.

  • Ku na ni kurinzela ko kari xungetano hi lava va fileko?
    A Murinzeli—2015 | Agosto 1

    • HLOKO YA MHAKA YA KAPA | A MUNHU A FILEKO — A NGA VUKA KE?

      Ku na ni kurinzela ko kari xungetano hi lava va fileko?

      A vafileko va nga tlhela va hanya kambe ke?

      HLAMULO WA BIBLIA: A “xikhati xa hata, laha vontlhe va nga le zilahleni va ta ngazwa a gezu gakwe, va huma.” — Johani 5:28, 29.

      Hi ndlela leyo, Jesu i lo profeta hi xikhati xa ha tako, laha a Xeoli xi to maha phanga mufunweni wakwe kota Hosi. Fernando a kumbukilweko mahlweni ka nzima leyi, i alakanya lezi: “Ka khati go sangula nzi nga lera Johani 5:28, 29 nzi lo hlamala nguvu. Zi lo nzi nyika a kurinzela ko kari ka lisine, niku nzi lo sangula ku rinzela zilo za ha tako na nzi nga kanakani.”

      Xikhatini xa kale, a wanuna wo tsumbeka Joba i wa rinzela lezaku anzhako ka kufa kakwe, Nungungulu i wa ta mu vuxa hi ka vafileko a tlhela a hanya kambe. Joba i lo wutisa lezi: “Loku a munhu afa, a nga tlhela a hanya kambe?” Zonake i lo gumesa a hlamula na a nga kanakani aku: “Xikhatini xa mina xontlhe xi yimisilweko [xa le Xeoli] nzi ta rinzela, kala kuta a kutlhatlhiswa ka mina. U ta vitana, mina nzi ku hlamula.” — Joba 14:14, 15, Tradução do Novo Mundo.

      The resurrected Lazarus embraces his sister

      A kuvuxiwa ka Lazaru hi ka vafileko ku nyika kurinzela ko kari xungetano hi xikhati xa ha tako

      A kuvuka va vafileko ku wa nga hi nchumu wa wuswa ka Maria, a makabye wa Lazaru. Anzhako ka kuva Lazaru a file, Jesu i lo byela Maria aku: “A makabye wa wena i ta vuka. Yena a hlamula aku: “Nza zi tiva lezaku i ta vuka hi siku go gumesa.” Zonake Jesu aku kakwe: “Mina nzi kuvuka ni wutomi; loyi a kholwako ka mina, hambu loku a file, i ta hanya.” (Johani 11:23-25) Na ku nga se hunza xikhati xo leha, Jesu i lo vuxa Lazaru hi ka vafileko! A matimu lawa yo tsakisa nguvu ma hi komba zilo za hombe za ha tako. Hi nga alakanyela a kuvuxiwa loko ka vafileko na ku maheka misaveni yontlhe!

      Xana a vokari va ta vuxiwa va ya hanya tilweni?

      HLAMULO WA BIBLIA: A Mhaka ya Nungungulu yi komba lezaku a kuvuxiwa ka Jesu ku hambene ni loku ka lava va 8. A vanhu lavo va 8 va vuxilwe va hanya kwalaha misaveni. Xungetano hi kuvuxiwa ka Jesu, hi gonza lezi: ‘Jesu Kristu i loya tilweni, a ya tshama reveni ga xinene ga Nungungulu.’ (1 Pedro 3:21, 22) Xana Jesu ku wa tava yena yece a vuxilweko hi ka vafileko kasi a ya hanya tilweni? Ka xikhati xo kari, Jesu i wa byelile vapostoli vakwe aku: “Loku nzi famba nzi ya mu longisela wutshamu, nzi ta wuya kambe, nzi ta mu teka muta ka mina; kasi laha nzi nga kona, mu fela kuva kona na nwinawu.” — Johani 14:3.

      Kristu i loya tilweni a ya longiselela a wutshamu ga valanzeli vo kari vakwe. A vanhu lavo va vuxelwako ku ya hanya tilweni hi kugumesa va ta wumba a ntsengo wa 144.000. (Kuvululelwa 14:1, 3) Kasi a valanzeli lavo va Jesu vaya va maha yini le tilweni?

      Va tava ni ntiro wa hombe nguvu! A Mitsalo yi hi byela lezi: “I katekile i basile loyi a nga ni xiavelo kuvukeni ko sangula, a kufa ka wumbiri a ku na ntamu hehla ka vakunghaho; kanilezi va tava vapristi va Nungungulu ni va Kristu, va ta fuma naye 1000 wa malembe.” (Kuvululelwa 20:6) A vanhu lavo va vuxelwako kuya tilweni va ta fuma kota tihosi ni vapristi zinwe na Kristu, va fumela a misava.

      Hi vamani va to vuxiwa hi ka vafileko anzhako ka ku vuxiwa ka lava va le tilweni?

      HLAMULO WA BIBLIA: Ka Mitsalo yi pimisilweko hi kuma magezu ya mupostoli Paule ma nge: “Nzi na ni kutsumba ka Nungungulu, loku va nga nako na vonawu, lezaku ku tava kona a kuvuka ka valulamileko ni va nga lulamangiko.” — Mitiro 24:15.

      Ka paradise gi tako, a wasati wo kari i angarela a xinhanyetana xa ha hi ku vuxiwako hi ka vafileko

      A Mhaka ya Nungungulu yi hi tiyisekisa lezaku a vanhu va tibiliyoni lava va fileko va ta tlhela va hanya

      Hi vamani va to patseka ka ntlawa lowu mupostoli Paule a nga wu wula kota wa “valulamileko”? Wona xikombiso xokari. A wununa wo tsumbeka Danieli i lo byeliwa xungetano hi kufa kakwe lezaku: “U ta humula, zonake u ta vuka u amukela a xiavelo xa wena a kumbheleni ka masiku.” (Danieli 12:13) Xana Danieli i ta vuxiwa na a hi kwihi? “A valulamileko va taga tshomba ya tiko, va aka ka gona kala kupinzuka.” (Tisimu 37:29) Jesu i profetile lezi: “Va tsaka lava va kurula, hakuva va taga tshomba ya misava.” (Mateu 5:5, NM) Danieli ni vanwani vavanuna ni vavasati vo tsumbeka va ta vuxiwa hi ka vafileko va tlhela va hanya kwalaha misaveni, kala kupinzuka.

      Hi vamani va to patseka ka ntlawa lowu mupostoli Paule a nga wu wula kota wa “va nga lulamangiko”? Vanhu va tibiliyoni lava va hanyileko va tlhela vafa, lava a kutala kabye va nga kala kuva ni lungelo ga ku zwisisa ni ku hanya hi lisine la Biblia. Anzhako ka kuvuxiwa kabye hi ka vafileko, va ta zi kota ku tiva Jehovaa na Jesu va tlhela va va bonga. Vontlhe lava va to hlawula ku tirela Nungungulu va ta rinzela ku hanya kala kupinzuka a ku fana na Jehova.

      Vontlhe lava va hlawulako ku tirela Nungungulu va ta hanya kala kupinzuka na va hi ni wutomi ni litsako lo mbhelela

      Ma tava wahi a matshamela ya misava?

      HLAMULO WA BIBLIA: Nungungulu “I ta kulula mihloti yontlhe mahlweni yabye. Ku nga ha ta va kona kufa, hambu ni hlomulo, kutani kurila ni kubayisa.” (Kuvululelwa 21:4) “Loku va aka tiyindlu va ta tshama ka tona, ni loku va byala zivina va taga mihanzu ya zona.” — Isaya 65:21.

      Hi nga alakanyela ku hanya ka matshamela lawo na wu hi ni varanzekako va wena va vuxilweko hi ka vafileko! Kanilezi ku vuka xiwutiso lexi: U nga tiyisekisa kuyini lezaku hakunene ku tava kona a kuvuka ka vafileko?

      a Jehova i vito ga Nungungulu kota lezi gi kombiswako lomu ka Biblia.

  • A vafileko va ta vuka — xini xi nga ku tiyisekisako lezo?
    A Murinzeli—2015 | Agosto 1

    • HLOKO YA MHAKA YA KAPA | A MUNHU A FILEKO — A NGA VUKA KE?

      A vafileko va ta vuka — Xini xi nga ku tiyisekisako lezo?

      Wupumbu a ku alakanya lezaku a vafileko va ta tlhela va hanya kambe? Mupostoli Paule i wa nga zi alakanyise lezo. I lo pimiselwa lezi hi Nungungulu: “Loku hi tsumbile ka Kristu a kuhanyeni loku ntsena, hi na ni khombo ku hunza vanhu vontlhe. Kanilezi futsi Kristu i vukile hi ka vafileko, hi yena matewula ya vona lava va etleleko” kufeni. (1 Va Le Korinte 15:19, 20) Paule i wa nga kanakani lezaku ku tava kona a kuvuka ka vafileko. Hi lisine i wa tiyisiwa hi kuvuxiwa ka Jesu wutsumbu.a (Mitiro 17:31) Hi lexo xi nga maha Paule a wula lezaku Jesu “matewula” — hi yena wo sangula ku vuxiwa kasi a hanya kala kupinzuka. Loku ku hi lezaku Jesu hi yena wo sangula, zi komba lezaku ku wa tava ni vanwani.

      Wasati a nga ni Biblia gi vululweko lomu mandleni na a hi ni xikanza xi kombisako kutsumba

      Joba i lo wula lezi: “U ta xuva a ntiro wa mandla ya wena.” — Joba 14:14, 15, NM.

      Ku na ni xinwani xigelo xi nga ku mahako u tiyiseka xungetano hi ku rinzela a kuvuka ka vafileko. Jehova i Nungungulu wa lisine. Niku i “Nungungulu loyi a nga hembiko.” (Titusi 1:2) Jehova a nga se tshuka a hemba, niku a nga ta tshuka a hemba. Xana Jehova a nga tsumbisa ku vuxa vafileko, a tlhela a kombisa lezaku i na ni ntamu wa ku maha lezo, hi magumo a nga tatisi lezi a nga tsumbisa? Zi wa nga ta koteka!

      Hikuyini Jehova a wulawulako hi kuvuka ka vafileko ka xikhati xa ha tako? I maha lezo hi kota ya liranzo lakwe. Joba i lo wutisa aku: “Loku a munhu afa, a nga tlhela a hanya kambe? U ta vitana, mina nzi ku hlamula. U ta xuva a ntiro wa mandla ya wena.” (Joba 14:14, 15, NM) Joba i wa tiyiseka lezaku a Dadani wakwe wa liranzo wa le tilweni i wa ta xuva ku mu vuxa hi ka vafileko. Xana Nungungulu i cicile? I ngalo: “Mina Jehova a nzi hunzuki.” (Malaki 3:6) Nungungulu wa ha simama ku xuva ku wona vafileko na va vukile va hanya khwatsi na va tsalile. Lezo hi lezi ni wihi mupswali a nga wa ta zi xuva anzhako ka ku felwa hi n’wana wakwe. A ku hambana na hina, Nungungulu i na ni ntamu wa ku maha lezi a zi xuvako. — Tisimu 135:6.

      A kufa xikarato xa hombe nguvu, kanilezi Nungungulu i na ni muri wa kona

      Jehova i ta nyika ntamu a N’wana wakwe, lezaku a neha litsako la pinzukelwa ka lava va felweko hi varanzekako vabye. Xana i wa ti zwisa kuyini Jesu hi kuvuxiwa ka vafileko? Na a nga se vuxa Lazaru hi ka vafileko, Jesu i rangile hi ku wona a kukarateka ka vamakabye va Lazaru, zonake “a rila.” (Johani 11:35) Ka ximaho xinwani, Jesu i lo kumana ni noni ya Naine, leyi yi nga felwe hi n’wana wa yona wa munwe. Jesu i ‘lo mu zwela wusiwana, aku ka yena: U nga rili!’ Zonake a tekela ku mu vuxa hi ka vafileko. (Luka 7:13) Hikwalaho, zi te dlunya lezaku Jesu wa karateka nguvu hi kubayiseka ni kufa. Hi nga alakanyela a kutsaka loku Jesu a tova nako a xikhati lexi a to maha vanhu va tsaka wutshanwini ga kubayiseka!

      Wanuna a angarelako a xinhanyetana xakwe

      U tshuka u bayiseka? Kuzilava u nga tshuka u alakanya lezaku a kufa xikarato xi kalako xi nga hi na muri. Kanilezi xi na ni muri — kuvuxiwa ka vafileko loku Nungungulu a to ku maha hi ku tirisa a N’wana wakwe. Alakanya lezaku Nungungulu i lava lezaku u wona a muri lowo na wu tira. I lava lezaku wenawu uva kona kasi u angarela a varanziwa wa wena. Hi nga ehleketa hi ku maha zilo za kala kupinzuka ni varanzekako va wena, ku nga havi ni salani!

      Lionel, hi mu kumbukileko, i ehleketa lezi: “Hi kugumesa nzi lo tiva tlhamuselo wa kuvuxiwa ka vafileko. Kusanguleni zi wa nzi karatela ku zi kholwa, niku nzi mu kanetile a munhu loyi a nga nzi byela lezo. Kanilezi nzi lo cuwuka lomu ka Biblia nzi wona lezaku lisine! Zalezi nzi rinzela ku tlhela nzi wona kokwani wa mina.”

      Wa zi lava ku tiva zinwani? A Timboni ta Jehova ti ta zi tsakela a ku ku komba lomu ka Biblia lezi zi ti mahako ti kholwa lezaku hakunene ku tava kona a kuvuka ka vafileko ka xikhati xa ha tako.b

      a Kasi ku wona a wukustumunyu ga lezaku Jesu i vuxilwe hi ka vafileko, wona a bhuku A Bíblia — Palavra de Deus ou de Homem? ka maphajina 78-86, gi humesilweko hi Timboni ta Jehova.

      b Wona xipimo 7 xa bhuku Zini Lezi A Biblia Gi Zi Gonzisako Hakunene? gi humesilweko hi Timboni ta Jehova.