Vanhu Vaswa — Lonzowotani A Xikola Xa Nwina

¹ Xana u ti zwisa kuyini xungetano hi ku tlhela xikoleni anzhako ka maferiya ya ximumu? U na ni kunavela ka hombe ka ku vuneka hi ginwani lembe ga xikola? Xana u ta lonzowota a malungelo lawa a xikola xi ku nyikako lezaku u hlengela zinene ni zigonzani-kuloni zinwe ni vagonzisi? Ha tsumba lezaku wa zi lava ku humelela xikoleni.

² Ngha Uva Xigonzani Xa Xi Nene: Loku u nghena lomu saleni na u vuxetile khwatsi u tlhela u khatalela khwatsi lezi u zi gonzako, u ta kuma mabhinzu ya pinzukelwa. Khatalela nguvu a ku maha tiT.P.C. ta wena, kanilezi u nga vumeli lezaku a mitiro ya xikola yi colopetela a mitiro ya Nungungulu.−Fil. 1:10.

³ Sangula a lembe giswa ga xikola hi ku gonza a broxura As Testemunhas de Jeová e a Educação. Zonake wena kutani vapswali va wena mu fanele ku nyika a broxura ginwe ka munwe ni munwani wa vagonzisi va wena. Va byele lezaku a xiwutiso xihi ni xihi lexi va nga ha vako naxo xi ta hlamuliwa. Lezo zi ta va vuna a ku zwisisa khwatsi a matshinya ya milayo lawa u hanyako hi wona ni lezi u zi kholwako va tlhela va tirisana na wena a xikhati lexi u tirisako lezi u gonzisilweko. Zi ta tlhela zi tiyisa a vagonzisi va wena lezaku wena ni vapswali va wena ma zi lava ku tirisana navo a xikhati lexi va ku vunako ku kuma a gonziselelo ya lisima.

⁴ Ngha Uva Mboni Ya Yi Nene: Hikuyini u nga woniko a xikola kota xipanze xa wena xa ku nyika wukustumunyu ga xitshuketi? Nzeni ka lembe ga xikola legi gi tako, u tava ni malungelo yo hlawuleka ya ku nyika wukustumunyu. Wena u na ni wutivi ga moya go hlamalisa legi loku gi hlengelwa ni vanwani gi zi kotako ku “hanyisa wutsumbu ga wena, ni lava va ku zwako kambe.” (1 Tim. 4:16) Hi kuva ni mahanyela ma nene ya wuKristu ni ku nyika wukustumunyu xikhati xontlhe laha zi faneleko, u ta ti vuna wena wutsumbu ni vanwani kambe.

⁵ A makabye wo kari wa xinuna loyi a ha hiko muswa i lo nyika wukustumunyu ga xitshuketi ka zigonzani-kulobye xikoleni xakwe. Xikari ka lava va nga vumela ku wa hi ni muKatolika, munwe a nga kholwiko a kuvakona ka Nungungulu loyi a nga tala ku tseketsela lava va kholwako ka Nungungulu, ni munhu muswa loyi a nga hi mudzahi wa hombe nguvu na a hi xidakwa. Hi ku patsa vontlhe, a makabye loyi wa xinuna i vunile 15 wa zigonzani-kulobye lezaku zi ti hendleleta ni ku bapatizwa!

⁶ Hizalezo vanhu vaswa, ti karateleni a ku gonza ni ku tira ka xipanze lexo xa nwina xo hlawuleka xa ku kustumunya. Zonake mu ta ti buza hi bhinzu ga hombe ka wontlhe legi gi kumiwako hi kuya xikoleni.