Ka zilo zo bayisa nguvu a ku hanya nazo, a xinwe xa zona kuzwa lezaku a xaka kutani munghana wa hina wa hombe i susilwe bandleni hi ku nga ti soli xionhweni xakwe. Lezi hi gi hlamulisako zona a wurangeli ga Biblia mhakeni leyi zi nga komba a kueta ka liranzo la hina ka Nungungulu ni kutsumbeka ka hina ka lulamiselo gakwe.a Wona a ziwutiso zo kari zi humelelako xungetano hi mhaka leyi.

Xana hi fanele ku mu khomisa kuyini a munhu loyi a susilweko bandleni? A Biblia gi ngalo: “Loku a hi kona munhu loyi a vitwako makabye na hi xibhayi, kutani munaveli, kutani mukhozeli wa zifananiso, kutani murukateli, kutani xidakwa, kutani khamba; mu nga mahi wunghana naye, ge, hambu kuga naye.” (1 Va Le Korinte 5:11) Xungetano hi wihi ni wihi loyi ‘a nga namareliko gonzweni ya Kristu,’ hi gonza lezi: “Mu nga mu amukeli tindlwini ta nwina, hambu ku mu losa; hakuva loyi a mu losako wa hlengela naye mitirweni yakwe ya kubiha.” (2 Johani 9-11) A hi hlengeli navo zilweni za moya ge hambu ku hlakana ni lava va susilweko bandleni. A Sentinela ga 15 ka Dezembro wa 1981, phajina 21, gi wulile lezi: “A ku wula ntsena uku ‘Xewe’ ka munhu, ku nga hava zambo go sangula legi gi yisako ka mabhulo niku kuzilava hambu ni ka wunghana. Xana ha zi lava kuba a zambo lego go sangula ga ku tshinela ka munhu a susilweko bandleni?”

Xana za laveka futsi lezaku hi zama hi tindlela tontlhe a ku potsa lava va susilweko bandleni? Ina, hi zigelo zo hlaya. A xo sangula hi lezaku zi kombisa kutsumbeka ka hina ka Nungungulu ni ka Mhaka yakwe. A hi ingisi Jehova ntsena loku zi hi fambela khwatsi kanilezi hi simama ku mu ingisa hambu loku zi karata. A ku ranza Nungungulu zi hi kuca a ku ingisa a milayo yakwe yontlhe, hi vumela lezaku yena i lulamile niku wa hi ranza ni lezaku a milayo yakwe yi vuvumisa a za zi nene nguvu. (Isaya 48:17; 1 Johani 5:3) Xa wumbiri, loku hi tsawukana ni muonhi a nga ti soliko za hi vikela hina wutsumbu ni bandla gontlhe ka ku thapelwa hi kubiha ka moya ni ka mahanyela hi tlhela hi hlayisa a vito gi nene ga bandla. (1 Va Le Korinte 5:6, 7) A xa wunharu hi lezaku loku hi seketela a matshinya ya milayo ya Biblia hi kutsumbeka hi nga vuna loyi a susilweko bandleni. Hi ku seketela a xiboho xa kometi ya kulamula, hi nga ha khumba a mbilu ya muonhi loyi kala ka xikhati lexo a alileko a mizamo ya madota ya ku mu vuna. A ku luza a wuhlengeli gi nene ni varanzekako zi nga ha mu vuna lezaku a “ti alakanya,” a wona a wukulu ga xionho xakwe, a tlhela a maha lezi zi lavekako kasi a tlhelela ka Jehova. — Luka 15:17.

Ahati loku ku hi xaka gi susilweko bandleni ke? Mhakeni leyi, a kubohana loku a ziro za ngango zi nga nako ku nga ha vanga xikarato mhakeni ya kutsumbeka. Xana hi fanele ku gi khomisa kuyini a xaka gi susilweko bandleni? Laha a hi nge wulawuli hi ziyimo zontlhe lezi zi nga ha humelelako, kanilezi a hi yiseni kupima ka hina ka ziyimo-tshinya zimbiri.

Ka zikhati zo kari, a xiro xa ngango lexi xi susilweko bandleni xa zi kota ku ngha xa ha tshama ka muti munwe ni ziro lezi zinwani. Kota lezi a kuva a susilwe bandleni zi nga tsemiko wuxaka, a xiro lexo xi nga ha simama ku tirisana ni ngango ka mitiro ya siku ni siku. Kanilezi, hi kota ya mahanyela yakwe, a munhu loye i hlawulile ku tsema wuxaka ga moya ni maxaka yakwe ma nga makholwa. Hikwalaho, a ziro za ngango lezi zo tsumbeka a zi nge hlengeli naye zilweni za moya. Hi xikombiso, loku loyi a susilweko bandleni a hi kona, a nga faneli ku hlamula ge hambu ku wula gezu a xikhati lexi a ngango wu tlhanganako lezaku wu maha wukhozeli ga ngango. Hambulezo, loku loyi a susilweko bandleni a hi nwanana, a vapswali va ha hi ni fanelo ya ku mu gonzisa ni ku mu luleka. Hikwalaho, a vapswali va liranzo va nga ha maha malulamiselo ya ku fambisela xigonzo xa Biblia a nwanana loye.b — Mavingu 6:20-22; 29:17.

Ka ziyimo zinwani, a xaka legi gi susilweko bandleni gi nga ha hanya ka wutshamu ginwani go hambana ni legi a ziro lezi zinwani za ngango zi hanyako ka gona. Hambu lezi ku nga ha tshukako kuva ni xilaveko xa ku tlhangana naye ka zikhati zo kari kasi ku lulamisa timhaka to kari ta ngango, a kutlhangana loko ku fanele kuva ka xikhatanyana ntsena. A ziro za ngango wa maKristu zo tsumbeka a zi hloti zigelo za ku tirisana ni xaka gabye gi susilweko bandleni legi gi nga hanyiko zinwe navo. A ku hambana ni lezo, a kutsumbeka kabye mahlweni ka Jehova ni ka hlengeletano yakwe ku va kuca a ku seketela a lulamiselo ga lomu Mitsalweni ga ku susa bandleni. A mahanyela yabye yo tsumbeka ma komba ku va lava ku vuna muonhi lezaku a susa xivuno hi kutsayiswa loku a ku amukeleko.c — Maheberu 12:11.

Hi rini niku hikuyini a wasati wa muKristu a faneleko ku boha a xifenengeto xa hloko wukhozelini? A hi kambisiseni a tlhamuselo wu pimisilweko wa mupostoli Paule xungetano hi mhaka leyi. I nyika wurangeli legi hi gi lavako kasi ku maha ziboho za zi nene, lezi zi dzunzako Nungungulu. (1 Va Le Korinte 11:3-16) Paule i komba zilo zinharu hi faneleko ku zi alakanyela: (1) a mitiro leyi yi lavako lezaku a wasati a boha a xifenengeto lexo, (2) ziyimo lezi a ka zona a faneleko ku xi boha, ni (3) zigelo lezi zi mu mahako a lanzela a nayo lowo.

Mitiro. Paule i wulawula hi mitiro yimbiri: ku nga kukhongela ni kuprofeta. (Mavesi 4, 5) Hakunene, a kukhongela i ndlela ya ku tshinela ha yona ka Jehova wukhozelini. Inyamutlha, a kuprofeta ku nga ha ringaniswa ni ntiro wihi ni wihi wa ku gonzisa Biblia lowu a mutireli wa muKristu a wu mahako. Hambulezo, xana Paule i nyika maalakanyo ya lezaku a wasati i fanele ku fenengeta hloko a khati ni khati a khongelako kutani ku gonzisa a lisine la Biblia ke? Ahihi. A xiyimo lexi a wasati a khongelako kutani ku gonzisa ka xona hi xona xi to wula.

Ziyimo. A magezu ya Paule ma kombisa ziyimo zimbiri, kutani wutshamu legi a ntiro wu mahelwako ka gona — ku nga ngango ni bandla. I ngalo: “Ni hloko ya wasati hi nuna wakwe . . . A wasati munwe ni munwani loyi a khongelako, kutani ku profeta, na a nga fenengetangi a hloko yakwe, i yi chela tingana a hloko yakwe.” (Mavesi 3, 5) Laha ngangweni, a nuna hi yena loyi Jehova a mu