A vavasati lava va ngaya cilahleni va no ya wona ku ko khwatsi lomu cilahleni a ku na nchumu. Lezvi va nga dzukisa zvona! Mariya wa le Magdhala i no tekela ku tsutsuma a ya ka ‘Simoni Pedro, ni ka mupizani mun’wani loyi a nga kari a randziwa hi Jesu’ — ku nga mupostoli Johani. (Johani 20:2) Lava va nga sele laha cilahleni va no wona ngilozi. Lomu ndzeni ka cilahla ku wa hi ni ngilozi yin’wani yi nga “ambele a nguwo yo basa”. — Marku 16:5.

A ngilozi yin’we yi no va byela lezvi: ‘Mu nga chavi; hakuva ndza zvi tiva lezvaku mu lava Jesu, loyi a nga belelwe. A nga kona laha, hakuva i vhukile, kota lezvi a nga wulile. Tanani, mu ta wona a wutshamu laha a Hosi yi nga etlele kona. Hatlisani mu famba, mu ya byela vapizani vakwe, muku: I vhukile hi ka vafileko. Wa mu rangela a ku ya Galileya’. (Matewu 28:5-7) Makunu a vavasati lavo va no suka “hi kutsaka ka hombe” va tsutsuma va ya byela vapizani vakwe. — Matewu 28:8.

Ka cikhati leco, Mariya i wa mu kumile Pedro na Johani. I no va byela na a hefemuteka, aku: “Va yi susile Hosi nkeleni, a hi ku tivi laha va yi vekileko kona.” (Johani 20:2) Pedro na Johani va no tekela ku suka hi kutsutsuma. Johani i no ranga hi yena a chikela laha cilahleni. I no hlomela a wona zvitarapo, kanilezvi a nga nghenangi.

Laha Pedro a nga chikela, i no tekela ku swelekede! I no wona tinguwo ta wukene leti va nga tsondzelele hi tona a hloko ya Jesu. Johani yenawu i no nghena, a kholwa lezvi Mariya a nga wula. Hambu lezvi Jesu a nga sina a va byelile, ne mun’we a nga zvi zwisisangi ku i no vhuka. (Matewu 16:21) Va noya kaya na va karatekile. Kanilezvi Mariya i no sala laha cilahleni.

A vavasati lava van’wani va wa ha famba ku ya byela vapizani va Jesu a ku i vhukile. Laha va nga ha tsutsuma va famba, va no tlhangana na Jesu, aku: “Xeweni!” Va no khizama laha mikondzweni yakwe va kombisa cichawo. Jesu aku: “Mu nga chavi; fambani mu ya byela a vamakabye va mina lezvaku vaya Galileya, hi laho va ta nga ndzi wona kona.” — Matewu 28:9, 10.

A cikhati leci a misava yi nga tsekatseka ku woneka tingilozi, a masochwa lawa ma nga hi laha cilahleni ma no “rurumela,” ma guma ma ku khwatsi ma nofa. Laha a tipeni ti nga wuya makunu, va no nghena lomu dhoropeni ‘va ya bikela vapristi va hombe zvontlhe lezvi zvi nga mahekile.’ A vapristi va no bhula ni madhota ya vaJudha, va guma va maha ciboho ca ku va xava masochwa kasi ma nga wuli lisine, ma hemba maku: ‘A vapizani vakwe va nota ni wusiku, va ta mu yiva na hi etlele wurongo.’ — Matewu 28:4, 11, 13.

Makunu zvi wa ta mahisa kuyini lezvi ka ku a masochwa ya vaRoma ma wa dawa loku ma etlela laha ntirweni? A vapristi va no ma tsumbisa vaku: “Loku zvi zwiwa hi mufumeli [a mawunwa yaku a masochwa ma wa no etlela], hi ta mu kholwisa yena, hi mu vhikela.” (Matewu 28:14) A masochwa ma no vhumela ku xaviwa, ma maha lezvi a vapristi va nga wula. A mawunwa yaku a miri wa Jesu wu no yiviwa hi vapizani vakwe ma no hangalaka cikari ka vaJudha.

Mariya wa le Magdhala i wa ha hi laha cilahleni na a bayisekile. I no korama a hlomela lomu cilahleni zvonake a wona tingilozi timbiri ti nga bohile tinguwo to basa. A yin’we yi wa tshamile laha a miri wa Jesu wu nga latilwe kona hi le tihlokweni, leyi yin’wani hi le minengeni. Ti no wutisa Mariya tiku: “Wasati u rilela yini?” Mariya aku: “Va susile a Hosi ya mina, a ndzi ku tivi lomu va nga yi veka kona.” I no guma a hundzuluka a wona munhu. A munhu loye i no mu wutisa zvalezvi a tingilozi ti nga mu wutisile, a guma aku: “U lava mani?” Mariya i no pimisa ku a wanuna loye muhlayisi wa jardhim, a se mu byela lezvi: “Bava, loku ku hi wena u nga mu susa, ndzi byele ku u mu vekile kwihi, ndzi ta ya mu teka.” — Johani 20:13-15, NM.

Hi lisine, Mariya i wa wulawula na Jesu a vhukileko. Kanilezvi, i wa nga mu tivi. Hambulezvo, laha Jesu a ngaku: “Mariya!” i no tekela ku mu tiva. I no mu tiva ku hi Jesu hi kuzwa lezvi a nga tolovela ku wulawulisa zvona naye. I no tsaka nguvhu aku: “Raboni”! (Zvi wulako ku “Mugondzisi!”) I no pimisa ku Jesu o lava ku famba tilweni, a se mu khoma. Jesu a mu kuca aku: ‘U nga ndzi khumbi; hakuva a ndzi se kandziha a kuya ka . . . [Papayi]; kanilezvi famba ka . . . [vamakabye va mina], u yaku ka vona: Ndza kandziha ka . . . [Papayi] wa mina ni . . . [Papayi] wa n’wina, a Nungungulu wa mina ni Nungungulu wa n’wina.’ — Johani 20:16, 17.

I no tsutsuma a ya laha a vapostoli ni vapizani van’wani va nga tlhangene kona, a yaku: “Ndzi yi wonile Hosi”! Lezvi Mariya a nga wula, i no engetela ka lezvi va nga sina va wulile a vavasati lava van’wani. (Johani 20:18) Kanilezvi ka vapostoli ni vapizani, lezvo zvi wa “ku khwatsi mafenya.” — Luka 24:11.

Hi Soto ya 16 ka Nisani, a vapizani vakwe va wa mbhelile ntamu. Va wa nga zvi zwisisi a ku hikuyini a cilahla ci nga hi phanga. (Matewu 28:9, 10; Luka 24:11) Andzhako ka cikhati co kari, Kleyopasi ni mupizani mun’wani, va noya Emawusi, ku nga hi ka pfhuka wa 11 wa tikilometro kusukela Jerusalema.

Va wa famba na va bhula hi lezvi zvi nga humelele. Ku no humelela wanuna wo kala va nga mu tivi, a sangula ku bhula navo, aku: ‘Mahungu muni lawa mu wulawulako ha wona na mu famba ke?’ Kleyopasi aku: ‘Wena wova mupfhumba wo tshama wece lomu Jerusalema, u kohlwako lezvi zvi humeleleko masiku lawa ke?’ A wanuna loye aku: “Zvilo zva kuyini ke?” — Luka 24:17-19.

Vaku: “Lezvi zva Jesu wa le Nazareta, . . . hina hi wa tsumbile lezvaku hi yena a nga wa ta tirula Izrayeli”. — Luka 24:19-21.

Kleyopasi ni munghana wakwe va noya mahlweni va hlawutela lezvi zvi nga humelela siku lego, va wula lezvaku kuve ni vavasati vo kari va nga yile laha Jesu a nga lahlilwe kona va ya kuma ku a nga kona, va tlhela vaku a vavasati lavo va te va wonile nchumu wo kala ku toloveleka — ku nga tingilozi leti va nga ti wona tiku Jesu i vhukile. Va tlhelile vaku kuve ni van’wani kambe va ngaya cilahleni “va ya kuma kota lezvi va nga wulile a vavasati” lavo. — Luka 24:24.

Zvi wa woneka khwatsi ku a vapizani lavo va wa karatekile hi ku nga zvi tivi ku zvi wula yini lezvi zvi nga humelele. Makunu, a wanuna loye wo kala va nga mu tivi i no va vhuna ku zwisisa lezvi zvi nga va karata, lezvi zvi nga va tsandzekisa ku kholwa lezvaku Jesu i vhukile. I te: ‘Maphuphulu ndzi n’wina ya vanhu va mbilu yi nonokako ku kholwa zvontlhe lezvi zvi kanelweko hi vaphrofeti! Xana zvi wa nga faneli lezvaku Kristu a xaniseka kota lezvi, a nghena kungangameleni kakwe ke?’ (Luka 24:25, 26) I noya mahlweni a va tlhamusela Mitsalo yo tala yi nga yelana na Kristu.

Vontlhe va vanharu va no guma va chikela kusuhani ni Emawusi. A vapizani lava va vambiri va wa ha lava ku tiva zvin’wani. Hikwalaho, va no kuca wanuna loye, vaku: “Tshama na hina, hakuva gi phumile.” I no vhumela, va guma va longisela zvakuga kasi vaga. Laha a wanuna loye a nga maha mukhongelo, a khema pawa a va nyika, va no telela ku mu tiva ku hi Jesu; a se nyamalala! (Luka 24:29-31, NM) Makunu va wa nga ha kanakani a ku Jesu i vhukile.

A vapizani lava va vambiri va no bhula na va tsakile hi lezvi zvi nga va humelela, vaku: “Kasi a timbilu ta hina ti wa nga vhuri ndzeni ka hina, laha a nga kanela ka hina ndleleni, a hi vhululela mitsalo ke?” (Luka 24:32) Va no hatlisa va tlhela Jerusalema va ya kuma vapostoli ni van’wani. Kleyopasi ni munghana wakwe na va nga se hlawutela tshango gabye, va nozwa van’wani na vaku: “Kunene a Hosi yi vhukile, yi wonekile ka Simoni”! (Luka 24:34) Va no guma va hlawutela lezvi Jesu a nga wonekisa zvona ka vonawu. Makunu vonawu va wa zvi wonile hi la’ yabye ku Jesu i vhukile!

Vontlhe va no hlamala. Jesu i no humelela kwalomu ndlwini va nga hi kona! Zvi no va hlamalisa nguvhu, hakuva va wa khotsile tivati hi ku chava vaJudha. Hambulezvo, Jesu i wa yimile cikari kabye. I no va byela lezvi hi khwatsanyana: “A kurula a kuve ka n’wina.” Kanilezvi, va no chava. Khwatsi hi lezvi zvi nga mahekile ka khati gin’wani, a va mu tivangi a ku hi Jesu. — Luka 24:36, 37; Matewu 14:25-27.

Jesu i no va komba mandla ni mikondzo yakwe kasi ku va kholwisa lezvaku i wa hi munhu wa nyama ni nkhata, i wa nga hi ciruti kutani nchumu wa lomu ka tihloko tabye. A guma aku: ‘Hikuyini mu kanakanako timbilwini ta n’wina ke? Wonani a mandla ya mina, ni mikondzo ya mina, lezvaku hi mina wutsumbu; ndzi tsevheteleni, mu wona; hakuva a ciruti a ci na nyama ni marambu, kota lezvi mu wonako ndzi hi nazvo.’ (Luka 24:36-39) Va no hlamala va tlhela va tsaka nguvhu. Kanilezvi va wa nga kholwi khwatsi.

I no maha zvin’wani na a zama ku va vhuna ku va kholwa ku i vhuxilwe futsi. I no va wutisa aku: “Mu na ni zvakuga laha ke?” Va no khema njhanjhi va mu nyika aga, a guma aku: “Hi tona timhaka leti ndzi nga ti kanela ka n’wina [na ndzi nga se dawa], laha ndzi nga wa ha hi na n’wina, ndziku: Timhaka tontlhe leti ti tsalilweko ha mina Nayweni wa Mosi, ni ka vaphrofeti, ni lomu ka Tisimu, ti fanele ku tatiseka.” — Luka 24:41-44.

Jesu i wa vhunile Kleyopasi ni munghana wakwe ku zwisisa Mitsalo. Makunu i no tlhela a maha zvezvo ka lava va nga tlhangene laho, aku: ‘Ku tsalilwe lezvaku Kristu i ta xaniseka, a tlhela a vhuka hi ka vafileko hi siku ga wunharu; ni lezvaku a kuhundzuluka ni kutsetselelwa ka zviwonho ku ta kanelwa vitweni gakwe cikari ka matiko wontlhe, ku sangula hi le Jerusalema. N’wina mu vakustumunyu va timhaka leti.’ — Luka 24:46-48.

Hi cigelo co kari, mupostoli Tomasi i wa nga hi kona laho. Ka masiku ma nga landzela, lava van’wani va no mu byela hi kutsaka ka hombe vaku: “Hi yi wonile a Hosi!” Tomasi aku: “Loku ndzi nga ku woni lomu a zvipikiri zvi nga bhoxile hi kona lomu mandleni yakwe, ndzi nghenisa litiho lomu a zvipikiri zvi nga bhoxile, ndzi nghenisa ni canja ga mina laha reveni gakwe, ndzi nga ta tshuka ndzi kholwa.” — Johani 20:25, NM.

Loku ku hundzile 8 wa masiku, Jesu i no humelela kambe na a hi ni miri wa nyama, va mu wona kwalomu ndlwini va nga ti vhalele kona va khotsa ni tivati. Kanilezvi, ka khati lego Tomasi i wa hi kona. Jesu i no va losa aku: “A kurula a kuve ka n’wina.” I no guma a byela Tomasi aku: ‘Tisa litiho la wena laha, a mandla ya mina hi lawa; tisa a canja ga wena, u gi nghenisa laha reveni ga mina; u ngavi loyi a nga kholwiko’. Tomasi i no hlamala aku: “Hosi ya mina ni Nungungulu wa mina”! (Johani 20:26-28) A wu woni ka! Makunu i wa nga ha kanakani a ku Jesu i vhukile kota civangwa ca moya, a rumilweko hi Jehovha Nungungulu.

Jesu i no mu byela lezvi: “U kholwa hi lezvi u ndzi wonileko; va katekile lava va kholwako na va nga wonangi.” — Johani 20:29.