Kuvuka Ka Jesu Hi Ka Vafileko Kala Kuvalelweni Ka Paule

Hi siku ga wunharu anzhako ka kufa kakwe, Jesu i lo vuxiwa hi ka vafileko. Ka siku lego i lo woneka ka valanzeli vakwe a ntlhanu wa makhati yo hambanahambana. Jesu i lo simama ku woneka kabye hi 40 wa masiku. Makunu, na a kari a woniwa hi vapizani vakwe vo kari, Jesu i lo tlakukela tilweni. Loku ku hunzile a khume ga masiku Nungungulu i lo chulula a moya wa ku basa ka valanzeli va Jesu va nga kari va rinzela le Jerusalema.

Anzhako ka xikhati, a valala va Nungungulu va lo hoxa a vapostoli lomu paxweni, kanilezi va lo tlhatlhiswa hi ngelosi. Mupizani Stefani i lo gandliwa hi maribye kala afa hi vakaneti. Kanilezi hi tiva lezi Jesu a nga hlawulisa zona munwe wa vakaneti lavo akuva a maha nanza gakwe go hlawuleka, zonake yena loye i lo maha mupostoli Paule. Makunu, loku ku hunzile malembe manharu ni khihlanya anzhako ka kufa ka Jesu, Nungungulu i lo rumela mupostoli Pedro a ku ya xumayela Korneliu, loyi a nga hiko muJuda, zinwe ni ngango wakwe.

Loku ku hunzile a xipimo xa 13 wa malembe Paule i lo sangula a pfhumba gakwe go ranga ga kuxumayela. Ka pfhumba gakwe ga wumbiri Timote i lo patsana na Paule. Hi tiva lezi Paule ni vapangalati vakwe va pfhumba va nga tlhanganisa zona ni zikhati zi khumbako mbilu ntirweni wa Nungungulu. Hi kugumesa, Paule i lo valelwa paxweni le Roma. Anzhako ka malembe mambiri i lo tlhatlhiwa, kanilezi i lo tlhela a valelwa kambe paxweni zonake a dawa. A zimaho za XIPANZE 7 zi humelele nzeni ka xikhati xa kwalomo ka 32 wa malembe.