Timboni tingani ta Jehova u ti tivako? A to kari ta kona kuzilava vaakelani va wena, vatiri-kuloni, kutani zigonzani-kuloni. Niku kuzilava hi tshuka hi bhula na wena xungetano hi Biblia. Hi hina vamani hakunene, niku hikuyini hi huwelelako a kukholwa ka hina?

Hina hi vanhu vo toloveleka. Hita hi ka midawuko ni ziyimo za wutomi zo hambanahambana. A vokari va hina va wa lumba wukhongeli ginwani kuveni a vanwani va wa nga kholwi ka Nungungulu. Kanilezi, na hi nga seva Timboni, hontlheni hi lo ti nyika xikhati xa ku kambisisa khwatsi a tigonzo ta Biblia. (Mitiro 17:11) Hi lo kholwa lezi hi zi gonzileko zonake hi ti mahela xiboho xa ku khozela Jehova Nungungulu.

Ha vuneka hi ku gonza a Biblia. A ku fana ni vanwani vanhu, ha yimisana ni zikarato ni kutsanzeka ka hina wutsumbu. Kanilezi hi ku zama ku tirisa a matshinya ya milayo ya Biblia wutomini ga hina ga siku ni siku, ha chukwatisa nguvu a mahanyela ya hina. (Tisimu 128:1, 2) Lexo xinwe xa zigelo zi hi mahako hi bhulela vanwani a zilo za zi nene lezi hi zi gonzako lomu ka Biblia.

Hi hanya hi milayo ya Nungungulu. A milayo leyo, yi gonzisiwako lomu ka Biblia, yi vuvumisa a kutshamiseka ni xichawo hi vanwani, zinwe ni matshamela ya ma nene yo kota a kutsumbeka ni wunene. Yona ya vunetela lezaku kuva ni vanhu vo hanya khwatsi ni ku tira khwatsi, yi tlhela yi vuvumisa a kuzwanana ngangweni ni kuhlazeka ka mahanyela. Na hi tiyiseka lezaku ‘Nungungulu a nga na xihlawulela,’ hina hi lumba wumakabye ga moya legi hakunene gi nga ga misava yontlhe, gi nga hiko na mimbhingano ya tixaka kutani ya wupolitika. Hambu lezi hi nga vanhu vo toloveleka, hi hambene ni vanwani. — Mitiro 4:13; 10:34, 35.

• Xana a Timboni ta Jehova ti fana ni vanwani vanhu hi ndlela muni?

• Milayo muni leyi a Timboni ti yi kumako hi ku gonza a Biblia?

A vanhu vo tala va alakanya lezaku a Timboni ta Jehova i vito ga wukhongeli giswa. Kanilezi, kwalomo ka ku hunza 2.700 wa malembe ma hunzileko, a malanza ya Nungungulu loyi a nga yena yece wa lisine ma tlhamuselwe kota “timboni” takwe. (Isaya 43:10-12) Kala 1931, hi wa tiveka kota Zigonzani za Biblia. Hikuyini hi ti chulileko a vito ga Timboni ta Jehova?

A vito lego gi komba a Nungungulu wa hina. Hi kuya hi mabhuku ya kale yo tsaliwa hi mandla, a vito ga Nungungulu, Jehova, gi kumeka makhati ya ku hunza 7.000 lomu ka Biblia. Ka tixaka to tala ta wuhunzuluseli ga Biblia, a vito legi gi susilwe gi tlhela gi valetwa hi mavito yo kota Hosi kutani Nungungulu. Hambulezo, a Nungungulu wa lisine i wa sina a ti tivekisile ka Mosi hi vito gakwe wutsumbu, Jehova, hi ku wula lezi: Legi “hi vito ga mina ga kala kupinzuka.” (Eksodusi 3:15) Hi ndlela leyo, yena i lo ti hambanyisa ni vanungungulu vontlhe va mawunwa. Ha tizwa matshanza hi ku vitanwa hi vito go basa ga Nungungulu.

Gi tlhamusela a ntiro wa hina. Kusukela kale, a vanhu vo tala vo lulama vo kota Abeli, va nyika wukustumunyu ga kukholwa kabye ka Jehova. Kufambeni ka mazanazana ya malembe ma hunzileko, Noa, Abrahama, Sara, Mosi, Davida, ni vanwani va lo ti patsa ni ‘xidlemo lexi xa hombe xa vakustumunyu’ kutani timboni. (Maheberu 11:4–12:1) A ku fana ni lezi a munhu a zi kotako ku nyika wukustumunyu hubyeni ya kulamula kasi ku tlhatlhisa munhu a nga hiko na nanzu, hina hi ti yimisele ku tivekisa a lisine xungetano hi Nungungulu wa hina.

Ho pimanyisa Jesu. A Biblia gi mu vitana ku ngalo i “kustumunyu a tsumbekileko ni wa zinene.” (Kuvululelwa 3:14) Jesu wutsumbu i wulile lezaku ‘i tivisile a vito ga Nungungulu’ a tlhela a simama “ku kustumunya hi zinene” xungetano hi Nungungulu. (Johani 17:26; 18:37) Hikwalaho, a valanzeli va lisine va Jesu va fanele ku tirisa a vito ga Jehova va tlhela va gi tivekisa. Hi zalezo a Timboni ta Jehova ti ti karatelako ku zi maha.

• Hikuyini a Zigonzani za Biblia zi ti chulileko a vito ga Timboni ta Jehova?

• Xikhati muni xi hunzako na Jehova a hi ni timboni misaveni?

• Himani a Mboni ya Jehova ya hombe ka tontlhe?

A Biblia gi profetile lezaku anzhako ka kufa ka Kristu, ku wa ta humelela vagonzisi va mawunwa xikari ka maKristu yo sangula lava va nga wa ta onha a lisine la Biblia. (Mitiro 20:29, 30) Hi kufamba ka xikhati hi zalezo futsi zi nga humelela. Va lo xanganyela a tigonzo ta Jesu ni mawonela ya wukhongeli ga tiko, zonake ku humelela wuKristu ga mawunwa. (2 Timote 4:3, 4) Hi nga tiyisekisa kuyini lezaku inyamutlha hi na ni kuzwisisa ka lisine ka lezi a Biblia gi zi gonzisako hakunene?

Ku lo chikela xikhati xa kuva Jehova a kombisa a lisine. Yena i wa wulile na ka ha hi mahlweni lezaku ‘xikhatini xa magumo, a wutivi ga lisine gi wa ta enzeleka.’ (Danieli 12:4) Hi 1870, a ntlawa wutsongwani wa vahloti va lisine wu lo pola lezaku a tigonzo to tala ta tichechi ti wa nga yelani ni Mitsalo. Hikwalaho, va lo sangula ku hlota ku zwisisa a tigonzo ta lisine ta Biblia, niku Jehova i lo va katekisa hi ku va vuna ku zwisisa a Mitsalo.

A vavanuna va timbilu ti nene va lo gonza a Biblia hi wukheta. A Zigonzani lezo za Biblia zo tsumbeka zi lo lanzela magonzela lawa hinawu ha ha ma tirisako inyamutlha. Va lo kambisisa mhaka yinwe ni yinwani ya Biblia. Loku va kuma mutsalo wa Biblia wu nga karata ku wu zwisisa, va wo hlota tlhamuselo ka mavesi manwani. Loku va chikelela magumo ma zwananako ni Mitsalo yontlhe, va wo tsala. Hi ku tsika a Biblia gi ti tlhamusela ha goce, va lo pola a lisine xungetano hi vito ga Nungungulu ni Mufumo wakwe, kungo gakwe hi vanhu ni misava, xiyimo xa vafileko, ni kutsumba ka kuvuka ka vafileko. A kuhlota kabye ku lo va tlhatlhisa ka zilo zo tala za mawunwa lezi a vanhu va nga zi kholwa ni ku zi maha. — Johani 8:31, 32.

Hi 1879 a Zigonzani za Biblia zi lo pola lezaku ku wa chikele xikhati xa ku hangalasa a lisine. Hikwalaho, ka lembe galego, va lo sangula ku humesa a revista legi hinawu ha ha gi humesako inyamutlha, ku nga A Murinzeli i huwelela a Mufumo wa Jehova. Inyamutlha hi hlengela lisine la Biblia ni vanhu va matiko ya ku hunza 240 hi tirimi ta ku hunza 750. Hikwalaho, a wutivi ga lisine gi tiveka nguvu inyamutlha ku hunza tinguveni tontlhe ti hunzileko!

• Anzhako ka kufa ka Kristu, zini zi nga humelela a lisine la Biblia?

• Xini xi hi vunako ku pola a lisine Mhakeni ya Nungungulu?

Hi makume ya malembe, a Timboni ta Jehova ti tirisile, ti gandla, ti tlhela ti avela tixaka to hambanahambana ta wuhunzuluseli ga Biblia. Kanilezi hi lo guma hi wona a xilaveko xa ku humesa wuhunzuluseli giswa legi gi nga wa ta vuna khwatsi vanhu a kuva va gonza a lisine la Biblia, lezi zi nga kuranza ka Nungungulu hi vanhu vontlhe. (1 Timote 2:3, 4) Hikwalaho, hi 1950 hi lo sangula ku humesa zipanze za Biblia ga hina gi tirisako mawulawulela ya masikwana lawa, ku nga Tradução do Novo Mundo. A Biblia legi gi hunzuluselwe hi kutsumbekileko hi tirimi to hunza 130.

Ku wa laveka a Biblia gi olovako ku gi zwisisa. A tirimi ta cicacica hi kufamba ka xikhati, niku a tixaka to tala ta wuhunzuluseli ga Biblia ti na ni magezu ma nga zwisisekiko kutani ma hunzelweko. Ahandle ka lezo, ku polilwe mabhuku ya kale yo tsaliwa hi mandla lawa ma nga ni timhaka ta lisine ti fanako ni ta Biblia go sangula. Lezo zi hi mahile hi zwisisa khwatsi a xiHeberu, xiAramaiko, ni xiGreki xa Biblia.

Ku wa laveka wuhunzuluseli gi seketelako a mhaka ya Nungungulu. A wutshanwini ga ku engetela kutani ku susa zilo mitsalweni yi pimisilweko ya Nungungulu, a vahunzuluseli va Biblia va fanele ku tsala maalakanyo yalawa ma nga kona mitsalweni yo sangula ya gona. Hambulezo, ka tixaka to tala ta wuhunzuluseli, a vito ga Nungungulu, Jehova, a gi tiriswi Mitsalweni yo Basa.

Ku wa laveka Biblia gi dzunzako a Mutumbuluxi wa gona. (2 Samueli 23:2) Ka Tradução do Novo Mundo, a vito ga Jehova gi tlhelisilwe lomu gi kumekako kona a xipimo xa 7.000 wa makhati ka mitsalo ya Biblia ya kale nguvu ka yontlhe, kota lezi hi zi wonako ka xikombiso lexi lahasi. (Tisimu 83:18) Kota wuyelo ga kambisiso wo eta, a Biblia legi ga tsakisa ku gi lera niku gi kombisa khwatsi a maalakanyo ya Nungungulu. Kani u na ni Tradução do Novo Mundo hi lirimi la wena kutani a wu nago, ha ku kuca lezaku u ti mahela longoloko wu nene wa ku gonza a Mhaka ya Jehova siku ni siku. — Joxua 1:8; Tisimu 1:2, 3.

• Hikuyini hi wonileko xilaveko xa ku humesa wuhunzuluseli giswa ga Biblia?

• I longoloko muni wa siku ni siku wu nga wu nene ka vontlhe lava va lavako ku gonza a kuranza ka Nungungulu?