A vanhu vo tala va nyima ku hlengela mitirweni ya wukhongeli hi ku kala va nga kumi wurangeli ni kuchavelelwa ka moya. Makunu, hikuyini u faneleko kuya mitlhanganweni ya wuKristu leyi yi longiselwako hi Timboni ta Jehova? Zini u to ya zi kuma kwaseyo?

U ta ya kuma litsako la kuva xikari ka vanhu va liranzo ni va khatalako. Ka zana ga malembe go sangula, a maKristu ma wa xaxametilwe hi mabandla, niku ma wa maha mitlhangano kasi ku khozela Nungungulu, ku gonza a Mitsalo, ni ku tiyisana. (Maheberu 10:24, 25) Na va tlhangene ka wutshamu ku kombiswako liranzo, vona va wa tizwa na va hi xikari ka vanghana va lisine—ku nga vamakabye vabye va moya. (2 Va Le Tesalonika 1:3; 3 Johani 14) Hina hi lanzela a xikombiso xalexo hi tlhela hi kuma litsako lo fana ni lelo.

U ta ya vuneka hi ku gonza a matirisela ya milayo ya Biblia. A ku fana ni lezi zi nga mahisiwa zona xikhatini xa kutsaliwa ka Biblia, a vavanuna, a vavasati, ni vanana va tlhangana vontlhe hi khati ginwe. Ku na ni vagonzisi va ringanelwako lava va tirisako a Biblia kasi ku tlhamusela a matirisela ya milayo ya gona wutomini ga hina ga siku ni siku. (Deuteronome 31:12; Nehemia 8:8) Vontlhe va zi kota ku hlengela ka kubhulisana ni kuyimbelela, lezi zi hi vumelelako ku kombisa kutsumba ka hina ka wuKristu. — Maheberu 10:23.

A kukholwa ka wena ka Nungungulu ku ta ya tiyiswa. Mupostoli Paule i byelile a ginwe ga mabandla masikwini yakwe, aku: “Nza navela ku mu wona, kasi . . . nzi fela ku tsakiswa zinwe na nwina hi kukholwa loku ku nga kona ka hina hontlhe, a ka nwina ni ka mina.” (Va Le Roma 1:11, 12) A kutitlhanganyisa ka hina ko khanzakanya ni makholwa-kulori ka tiyisa a kukholwa ka hina ni kutiyimisela ka hina ka ku hanya wutomi ga wuKristu.

Ha ku ramba lezaku uta mutlhanganweni wa hina wu lanzelako kasi u ta wona zilo lezi ha wece. Hi ta ku amukela hi matsenya. A ku nghena mahala mitlhanganweni yontlhe niku a ku tshuki ku mahiwa mihlengo.

• Xikombiso muni hi xi lanzelako mitlhanganweni ya hina?

• Hi nga vunekisa kuyini hi kuya mitlhanganweni ya wuKristu?

Hambu loku ku laveka lezaku hi tsemakanya khwati go tshisa kutani ku yimisana ni xingulo, hina haya mitlhanganweni ya hina ya wuKristu hi kukhanzakanya. Hikuyini a Timboni ta Jehova ti mahako mizamo leyo ya ku ti tlhanganyisa ni makholwa-kulobye, hambu lezi ti yimisanako ni zikarato za wutomi zinwe ni mikaralo ya mitiro ya siku ni siku?

Za hi vuna kuva ni wutomi gi nene ni kutsaka. Na a wulawula hi lava hi tlhanganako navo bandleni, Paule i tsalile lezi: ‘Ngha mu khatalelana.’ (Maheberu 10:24) A magezu lawa ma wula “ku alakanyelana khwatsi,” lezi zi wulako lezaku hi fanele ku tivana khwatsi. Hikwalaho a magezu ya mupostoli loyi ma hi kuca ku khatalela vanwani. Hi ku ti nyika xikhati xa ku tiva mingango yinwani ya wuKristu, hi pola lezaku a yokari ya yona yi hlulile zikarato zo fana ni lezi za hina niku yi nga hi vuna na hinawu lezaku hi zi hlula.

Zi aka wunghana go tiya. Le mitlhanganweni ya hina, a hi lezaku ho tlhangana ni vanhu hi tivanako navo basi, kanilezi hi tlhangana ni ntlawa wa vanghana va laha kusuhani. Ka zikhati zinwani, hi mbheta zinwe xikhati zihungatweni zi basileko. I wuyelo muni ga gi nene gi nga kona ka kutihungata loko? Hi gonza ku nyikana nguvu lisima, niku lezo za tiyisa kuranzana ka hina. Makunu, loku a vanghana va hina va yimisana ni zikarato, hi hatlisa hi ya va vuna hakuva hi mahile wunghana go tiya navo. (Mavingu 17:17) Hi ku tolovelana ni ziro zontlhe za bandla, hi komba lezaku ha “zwelana” kutani ku hlayisana hi kufanana. — 1 Va Le Korinte 12:25, 26.

Ha ku kuca a kuva u hlawula ku maha wunghana ni lava va mahako kuranza ka Nungungulu. A vanghana lavo u ta va kuma xikari ka Timboni ta Jehova. Maha wuxinji u nga tsiki nchumu wu ku beletela ku ti tlhanganyisa na hina.

• Hikuyini zi nga ni xivuno ka hina a kuva zinwe mitlhanganweni ya hina?

• Hi rini u tsakelako ku ta tiva a bandla ga hina?

A mitlhangano ya maKristu yo sangula yi wa wumbiwa nguvunguvu hi tisimu, mikhongelo, kugonziwa ni kutlhamuselwa ka Mitsalo, na ku nga hi na zihena. (1 Va Le Korinte 14:26) A mitlhangano ya hina inyamutlha yonawu yi mahiswa zezo.

A gonziselelo ya kona yi seketelwa ka Biblia niku ya vuna. Kumbheleni ka viki, a bandla ginwe ni ginwani ga tlhangana kasi ku ingisela kanelo yi seketelwako ka Biblia ya 30 wa timeneti, yi wulawulako hi kuyelana ka Mitsalo ni wutomi ga hina zinwe ni zikhati lezi hi hanyako ka zona. Hontlheni ha kuciwa ku lanzela lomu ka maBiblia ya hina. Anzhako ka kanelo leyo, ku mahiwa Xigonzo xa “Murinzeli” xa hora, laha a ziro zontlhe za bandla zi zi kotako ku hlengela kukambisisweni ka nzima yo kari ya A Murinzeli. A xigonzo lexo xi hi vuna ku tirisa a wurangeli ga Biblia wutomini ga hina. A timhaka ti gonziwako hi taleti ta tinwe mabandleni wontlhe ya hina ya ku hunza 100.000 misaveni yontlhe.

Hi vuniwa ku chukwatisa a magonzisela ya hina. Hi tlhangana kambe lomu xikari ka viki ni gambo kasi hi maha mutlhangano wa zipanze zinharu wu vitaniwako ku i Ntiro wa hina ni mahanyela ya wuKristu; wu seketelwa ka mahungu ma humesiwako hweti ni hweti lomu ka Xibhukwana xa mutlhangano wa ntiro ni mahanyela. A xipanze xo sangula xa mutlhangano lowu, xi nge: Titshomba ti nga ka Mhaka ya Nungungulu, xi hi vuna ku zwisisa khwatsi a xipanze xo kari xa Biblia lexi a bandla gi sinako gi lerile. Lexi xi lanzelako, xi nge: Ti tsitsirite ntirweni wa kuxumayela, xi patsa mikombiso yi hi vunako ku bhulisana ni vanwani na hi tirisa Biblia. A makabye wo kari i nyika wusungukati ga lezi hi nga chukwatisisako zona a malerela ni mawulawulela ya hina. (1 Timote 4:13) A xipanze xo gumesa, xi nge: Mahanyela ya wuKristu, xi hi vuna ku tiva tindlela ta ku tirisa matshinya ya milayo ya Biblia wutomini ga hina ga siku ni siku. Ka xipanze lexi, ku na ni ziwutiso ni mihlamulo kambe zi hi vunako kuya mahlweni hi zwisisa Biblia.

Handle ko kanakana loku woya mitlhanganweni ya hina u ta ya hlamaliswa nguvu hi wuchukwana ga gonziselelo leyi u to yi kuma. — Isaya 54:13.

• Zini u zi kotako ku ya zizwa mitlhanganweni ya Timboni ta Jehova?

• Hi wihi a mutlhangano wa hina wa viki ni viki lowu u navelako ku hlengela na hina ka khati gi tako?

Xana wa zi wona ka mifota yi nga ka broxura legi lezi a Timboni ta Jehova ti ambalisako zona khwatsi loku tiya mitlhanganweni ya tona ya bandla? Hikuyini hi khatalelako nguvu a kuambala ka hina ni kutisasekisa?

Kasi ku kombisa xichawo hi Nungungulu wa hina. Lisine lezaku Nungungulu a nga cuwuki ntsena lezi hi wonekisako zona lahandle. (1 Samueli 16:7) Kanilezi, a xikhati hi tlhanganako kasi ku mu khozela, a kuxuva ka hina ka mbilu ku kombisa xichawo ka yena ni ka vakhozeli-kulori. Loku hi wo vitaniwa hubyeni ya valamuli, handle ko kanakana hi wa ta khatalela a kucuwukeka ka hina kota ndlela yo kombisa xichawo hi xiyimeko xabye. Hi kufanana, a kucuwukeka ka hina mitlhanganweni ku kombisa a xichawo xa hina hi Jehova Nungungulu, a “mulamuli wa tiko” gontlhe, ni hi wutshamu legi hi mu khozelako ka gona. — Genesisi 18:25.

Kasi ku kombisa a milayo leyi hi hanyako hi yona. A Biblia gi kuca maKristu lezaku ma ambala “hi xichawo ni kutikhoma” kota lava va ‘chavako Nungungulu.’ (1 Timote 2:9, 10) A ku ambala “hi xichawo” zi wula ku potsa tinguwo ti kokelako ka hina a kupima ka vanwani, ti vuxako manyawunyawu ya masango, kutani ku vangamela. Ahandle ka lezo, a kuva ni “kutikhoma” zi hi vuna a ku hlawula tinguwo to saseka kanilezi na ti nga koki nguvu mahlo kutani ku khunguvanyisa vanwani. A matshinya lawa ya milayo ma ha siya wutshamu ga kuva hi ti hlawulela tinguwo to hambanahambana. Na hi nga wuli gezu, a kucuwukeka ka hina ko saseka ni ka ku nene ku nga “bombisa a gonzo ya Nungungulu a Muhanyisi wa hina” ku tlhela ku “dumisa Nungungulu.” (Titusi 2:10; 1 Pedro 2:12) Hi ku ambala khwatsi loku hiya mitlhanganweni, ha khumba a mawonela ya vanwani xungetano hi wukhozeli ga Jehova.

U nga alakanyi lezaku loku u nga hi na tinguwo ta ti nene a wu faneli kuya mitlhanganweni Salawini ya Mufumo. A ku na xilaveko xa lezaku hi boha tinguwo to dura kutani ta moda, a xa lisima hi ku tiva to faneleka, ti basileko ni to cuwukeka.

• Hikuyini zi nga za lisima a ku khatalela maambalela ya hina a xikhati hi khozelako Nungungulu?

• Matshinya muni ya milayo ma rangelako a kuhlawula ka hina ka tinguwo ni kutisasekisa?

Loku ku hi lezaku u gonza a Biblia ni yinwe ya Timboni ta Jehova, kuzilava wa zama ku vuxeta a xigonzo na ka ha hi mahlweni. Kasi ku vuneka khwatsi, zi nene a ku maha zalezo kambe na u nga seya mitlhanganweni ya bandla. A wuyelo ga chukwana hi gi kuma loku hi ti vekela longoloko wu nene wa ku maha lezo.

Boha a xikhati ni wutshamu legi u to gonza ka gona. Hi xihi xikhati xa chukwana kasi ku wuyisa khwatsi a mapimo ya wena? Xana hi ni mixo nguvu, na u nga se sangula a ntiro wa siku, kutani hi ni wusiku, anzhako ka ku a vanana va etlele? Hambu loku u nga zi koti ku gonza hi xikhati xo leha, boha a xikhati u to mbheta na u gonza u tlhela u ti karatela ku nga vumeli ku colopetelwa hi nchumu. Lava wutshamu go rula u tlhela u susa zontlhe lezi zi nga wa ta ku colopetela hi ku tima radiyu, televizawu, ni selulari. A ku khongela mahlweni ka xigonzo lexo, zi ta ku vuna ku rivala a zikarato zontlhe za siku kasi u veka kupima Mhakeni ya Nungungulu. — Va Le Filipi 4:6, 7.

Tsala nzhati lahasi ka mihlamulo u tlhela u longa ku hlengela hi mihlamulo. Sangula hi ku zwisisa khwatsi a mongo wa mhaka. Alakanyela a hloko ya mhaka ya nzima leyo kutani xipimo lexo, u wona lezi a xihlokwana xa mhaka xinwe ni xinwani xi zwananisako zona ni hloko ya mhaka, zonake u kambisisa a zithombe ni ziwutiso za kuvuxeta lezi zi khanyisako a timhaka-tshinya. Anzhako ka lezo, gonza a nzimana yinwe ni yinwani u guma u lavetela a hlamulo wa xiwutiso xa kona. Lavetela u tlhela u gonza a mitsalo leyi yi kumbukiwako, u guma u alakanyela lezi yi seketelisako zona a nzima. (Mitiro 17:11) A xikhati lexi u kumako a hlamulo, tsala nzhati lahasi ka magezu lawa ma to ku alakanyisa a hlamulo lowo. Loku u hi mitlhanganweni, wa zi kota ku tlakusa woko loku u zi lava, u nyika hlamulo wo koma hi magezu ya wena wutsumbu.

Hi ku kambisisa a timhaka to hambanahambana leti ti to gonziwa ka viki ginwe ni ginwani mitlhanganweni, u ta engetela maalakanyo maswa ‘bakweni’ ga wena ga wutivi ga Biblia. — Mateu 13:51, 52.

• I longoloko muni u zi kotako ku ti mahela kasi ku longisela mitlhangano?

• U nga ti longiselisa kuyini lezaku u nyika hlamulo mutlhanganweni?

Kusukela kale, Jehova i lava lezaku a ngango wunwe ni wunwani wu mbheta xikhati na wu hi zinwe kasi ku tiyisa a wumoya gabye ni ku tiyisana kota ngango. (Deuteronome 6:6, 7) Hi xalexo xi mahako lezaku a Timboni ta Jehova ti ti vekela xikhati viki ni viki kasi ku a ngango wu khozela zinwe—hi ku bhulisana hi zilo za moya hi kuya hi zilaveko zabye na va hi kuruleni. Hambu loku u kari u hanya wece, u nga tirisa khwatsi a xikhati lexo na Nungungulu hi ku ti gonzela a Biblia hi ku lanzela a longoloko wa kuhlawula ka wena.

Xikhati xa ku tshinela ka Jehova. “Tshinelani ka Nungungulu, na yena i ta tshinela ka nwina.” (Jakobe 4:8) Hi mu tiva khwatsi Jehova a xikhati lexi hi gonzako a matshamela yo hambanahambana ya wumunhu gakwe ni mitiro yakwe hi ku tirisa maphajina ya Mhaka yakwe yi tsalilweko. A ndlela yo olova ya ku sangula a wukhozeli ga nwina ga ngango ku mbheta xikhati xo kari na mu gonza zinwe a Biblia hi gezu go tlakuka, kuzilava na mu lanzela a longoloko wa viki wa Mutlhangano wa ntiro ni mahanyela. Ku nga ha avelwa xipanze xa kugonza loko ka xiro xinwe ni xinwani xa ngango, mu guma mu bhulisana hi lezi mu zi gonzileko Mitsalweni.

Xikhati xa ku a ziro za ngango zi tshinelelana. A vanuna ni vasati, zinwe ni vapswali ni vana, va tiyisa a kubohana kabye a xikhati va gonzako a Biblia kota ngango. Xi fanele kuva xikhati xo tsakisa ni xo rula, lexi a xiro xinwe ni xinwani xa ngango xi xi rinzelako hi mahlo yo pswhuka. Na va khegela ka titanga ta vana vabye, a vapswali va zi kota ku hlawula timhaka ti vunako, kuzilava na va tirisa tinzima ta A Murinzeli ni ta Khindlimuka! Mu nga ha wulawula hi xikarato lexi a vana va nwina va kumeneko naxo xikoleni ni ndlela ya ku yimisana naxo. Zi ngo yini loku mo wona longoloko wo kari wa JW Broadcasting (tv.jw.org) mu gumesa mu bhula hi lezi mu zi wonileko? Mu nga ha ti buza ku vuxeta tisimu leti ti to tiriswa mitlhanganweni mu tlhela mu tshama zinwe mu miyeta nyakhwari anzhako ka wukhozeli ga ngango.

A xikhati lexi xo hlawuleka mu xi mbhetako viki ni viki na mu khozela zinwe Jehova xi ta vuna vontlhe laha ngangweni a kuva va zi tsakela ku gonza a Mhaka ya Nungungulu, niku yena i ta yi katekisa nguvu a mizamo ya nwina. — Tisimu 1:1-3.

• Hikuyini hi ti vekelako xikhati xa ku maha wukhozeli ga ngango?

• Xana a vapswali va nga maha yini kasi ku a xikhati lexi xiva xo tsakisa ka vontlhe laha ngangweni?

Hi xihi a xigelo xa litsako li wonekako tinghoheni ta vanhu lava? Va lomu ka wunwe wa mitlhangano ya hina ya hombe. A ku fana ni malanza ya Nungungulu ya kale, lawa ma nga leletelwa ku tsombana makhati manharu hi lembe, hinawu ha xuva ku tlhangana hi mitlawa ya hombe. (Deuteronome 16:16) Lembe ni lembe, hi na ni mitlhangano yinharu ya hombe: Mitlhangano yimbiri ya xipanze ya siku ginwe, ni gotsovanyano wa muganga wa masiku manharu. Xana hi vunekisa kuyini hi mitsombano leyi?

Yona ya tiyisa a wumakabye ga hina ga wuKristu. A ku fana ni lezi a vaIsraeli va nga tsaka hi ku “dumisa Jehova lomu mitsombanweni,” hinawu ha tsaka hi ku mu khozela zinwe mitlhanganweni yo hlawuleka. (Tisimu 26:12; 111:1) A mitsombano leyo yi hi nyika lungelo ga ku tlhangana ni ku bhulisana ni Timboni ta manwani mabandla; niku hambu ni ta matiko manwani. Hi dina, hi tshama zinwe hi ti gela kwalaho hi tlhanganako kona, lezi zi engetelako a moya wa wunghana lowu wu nga kona ka zimaho lezo za moya. (Mitiro 2:42) Kwalaho, ha zi kota ku li wona ha hoce a liranzo leli li tlhanganyisako “vamakabye” va hina va misava yontlhe. — 1 Pedro 2:17.

Yi hi vuna a ku kula hi tlhelo ga moya. A vaIsraeli va wa tlhela va vuneka hi kuva va “pimile a timhaka” ta Mitsalo leyi va nga tlhamuselwa. (Nehemia 8:8, 12) Hinawu ha nyika lisima a gonziselelo ya Biblia leyi hi yi kumako mitlhanganweni ya hina ya hombe. A longoloko wunwe ni wunwani wa mitlhangano leyo wu seketelwa ka hloko ya mhaka ya lomu Mitsalweni. Hi ku tirisa tikanelo, mixaxamelo, ni miwoniso yi kokako kupima, hi gonza ku maha kuranza ka Nungungulu wutomini ga hina. Ha tiyiswa a xikhati lexi hi zwako matshango ya lava va hlulako a xikarato xa ku hanya wutomi ga wuKristu masikwini lawa ya zikarato. Lomu migotsovanyanweni ya muganga, hi gonzisiwa zilo za lisima hi tidrama ti kombisako mitlhatlhambutelo ya Biblia hi ndlela yo hanya. Ka mitlhangano yontlhe ya hombe ka bapatizwa lava va lavako ku kombisa a kutihendleleta kabye ka Nungungulu.

• Hikuyini a mitlhangano ya hina ya hombe yi nga zikhati za kutsaka?

• U nga vunekisa kuyini hi kuva kona ka wunwe wa mitlhangano ya hina ya hombe?

Xikhatanyana mahlweni ka kufa kakwe, Jesu i tivisile lezi: “A ivangeli leyi ya mufumo yi ta kanelwa misaveni yontlhe, kasi yiva wukustumunyu ka matiko wontlhe; hi kona ku ta nga chikela a kugumesa.” (Mateu 24:14) Kanilezi wu wa ta mahiswa kuyini a ntiro lowo wa ku xumayela misaveni yontlhe? Hi ku lanzela a xikombiso lexi Jesu a hi vekeleko a xikhati a nga hi misaveni. — Luka 8:1.

Hi enzela vanhu mitini yabye. Jesu i gonzisile vapizani vakwe a ku xumayela ivangeli kutani mahungu yo saseka hi muti ni muti. (Mateu 10:11-13; Mitiro 5:42; 20:20) A vavangeli lavo va zana ga malembe go sangula va lo avelwa zipanze zo kongoma kasi ku xumayela ka zona. (Mateu 10:5, 6; 2 Va Le Korinte 10:13) Inyamutlha konawu, a ntiro wa hina wa kuxumayela wu xaxametilwe khwatsi, niku a bandla ginwe ni ginwani gi avelwa xipanze lezaku gi xumayela kona. Lezo zi hi vuna ku lanzela a kulaya ka Jesu ka ku “kanela ka vanhu” ni ku nyika wukustumunyu go mbhelela. — Mitiro 10:42.

Hi ti karatela ku bhula ni vanhu ni kwihi lomu va kumekako kona. Jesu i tlhelile a veka xikombiso xa ku xumayela vanhu lomu va nga tala ku kumeka kona, ko kota laha mbhirini ya bimbi kutani laha hloweni ya xitshungo. (Marku 4:1; Johani 4:5-15) Hinawu hi bhula ni vanhu xungetano hi Biblia ni kwihi lomu hi zi kotako—lomu maruweni, mitirweni, maparki, kutani hi telefone. Ha tlhela hi nyika wukustumunyu ka vaakelani, vatiri-kulori, zigonzani-kulori, ni maxaka loku hi kuma lungelo ga ku maha lezo. A mizamo yontlhe leyo yi maha lezaku a timiliyoni ta vanhu misaveni yontlhe ti zi kota kuzwa a mahungu yo saseka ya ‘kuhanyiswa.’ — Tisimu 96:2.

Xana wa alakanya munhu u tsakelako ku mu bhulela hi mahungu yo saseka ya Mufumo wa Nungungulu ni lezi a mahungu lawo ma khumbisako zona a wumanziko gabye? U nga va tsoni a mahungu lawo ma hanyisako. Hlengela navo neti zi koteka!

• ‘Mahungu muni yo saseka’ ma faneleko ku kanelwa?

• Xana a Timboni ta Jehova ti pimanyisisa kuyini a maxumayelela ya Jesu?

A kutala ka zikhati a gezu “phayona” gi wula lava va tirako ka zipanze za ziswa va tlhela va vulula ndlela yi to lanzelwa hi vanwani. Jesu i wa fana ni phayona, kota lezi a nga rumelwe misaveni kasi ku ta maha ntiro wu nyikako wutomi a tlhela a vulula ndlela ya kuhanyiswa ka vanhu. (Mateu 20:28) Inyamutlha, a valanzeli vakwe va mu pimanyisa hi ku mbheta xikhati xo tala hi laha zi kotekako hi kona na va “maha vapizani.” (Mateu 28:19, 20) A vokari va zi kota ku nghenela a ntiro lowu hi wu vitanako ku ngalo wuphayona.

A phayona munhu loyi a ntiro wakwe wu nga ku xumayela. A Timboni tontlhe ta Jehova vahuweleli va mahungu yo saseka. Kanilezi, a vokari xikari kabye va xaxameta wutomi gabye hi ndlela ya kuva va zi kota ku tira kota maphayona ya xikhati xontlhe, na va mbheta 70 wa tihora hweti ni hweti ntirweni wa kuxumayela. Kasi ku maha lezo, a kutala kabye va ti hanyisa hi ku ti mahela zigwaza. A vanwani va hlawuliwa kasi ku tira kota maphayona yo hlawuleka lomu ku nga ni xilaveko xa hombe xa vahuweleli va Mufumo, na va mbheta 130 wa tihora kutani kuhunza wutirelini hweti ni hweti. A maphayona ma xalala hi ku hanya wutomi go hehuka, na ma tsumba lezaku Jehova i ta tatisa a zilaveko za wona za wutomi. (Mateu 6:31-33; 1 Timote 6:6-8) Lava va kalako va nga zi koti ku tira kota maphayona ya xikhati xontlhe, va nga ha tira kota maphayona yo vunetela loku va zi kota, na va anzisa a ntiro wabye wa kuxumayela kala 30 kutani 50 wa tihora hi hweti.

A phayona gi kuciwa hi ku ranza Nungungulu ni vanhu. A ku fana na Jesu, hi wona a xiyimo xo tshisa xa moya lexi a vanhu vo tala va nga ka xona inyamutlha. (Marku 6:34) Kanilezi hina hi na ni wutivi legi gi zi kotako ku va vuna zezi, gi va nyika kutsumba ko tiya ka wumanziko. A ku ranza muakelane zi kuca a phayona lezaku gi tirisa a xikhati xa gona ni ntamu kasi ku vuna vanwani hi tlhelo ga moya. (Mateu 22:39; 1 Va Le Tesalonika 2:8) Kota wuyelo, a phayona ga tiyisa a kukholwa ka gona, gi tshinela ka Nungungulu gi tlhela gi kuma litsako la hombe. — Mitiro 20:35.

• Xini a phayona?

• Xini xi kucako vokari lezaku va tira kota maphayona ya xikhati xontlhe?

A Timboni ta Jehova ti tiveka nguvu hi ku lanzela a gonziselelo ya Nungungulu. Lava va tirisako xikhati xa vona xontlhe ntirweni wa ku xumayela a Mufumo va nyikwa gonziselelo yo hlawuleka lezaku va tatisa a wutireli gabye hi kumbhelela. — 2 Timote 4:5.

Xikola xa Ntiro wa Wuphayona. A xikhati lexi a phayona ga xikhati xontlhe gi tlhanganyisako lembe ntirweni wa xikhati xontlhe, gi tsalelwa ka xikola xa ntlhanu wa masiku ni ginwe lexi xi nga ha mahiwako Salawini ya Mufumo. A kungo ga xona ku vuna phayona a ku tshinela ka Jehova, ku maha khwatsi zontlhe zi yelanako ni ntiro wa gona, ni ku simama na gi tsumbekile wutirelini.

Xikola xa Vavangeli va Mufumo. A xikola lexi xi gonziwako hi tihweti timbiri xi mahelwe ku gonzisa lava va nga ni malembe na va tira wuphayona, na va hi lava va ti yimiseleko ku rura va ya tira lomu ku nga ni xilaveko. Hi ku maha lezo, vona ve ngalo, “Hi mina, ruma mina,” na va pimanyisa Jesu Kristu, a Muvangeli wa hombe ka vontlhe lava va tirileko misaveni. (Isaya 6:8; Johani 7:29) Lezi va rurako va ya tshama kule ni kaya, za koteka ku va kurumeteka ku hanya ka matshamela ya nyalidede ku hunza lawa va nga ma tolovele. A mahanyela, matshamela, ni zakuga za kwalomo zi nga ha hambana nguvu ni lezi va nga zi tolovele. Zi nga ha laveka kambe kuva va gonza lirimi liswa. A xikola lexi xi vuna vamakabye va xinuna ni va xisati va nga magwenza zinwe ni mipatswa ya vatekani, va malembe ya 23 kuya ka 65 wa malembe, a ku hlakulela matshamela ya moya lawa ma to laveka ziavelweni zabye. Xi tlhela xi va gonzisa wutlhari legi gi to va maha va tirisiwa nguvu hi Jehova ni hlengeletano yakwe.

Xikola xa Biblia xa Gileade xa Torre de Vigia. Hi xiHeberu, “Gileade” zi wula “Nhulu ya Wukustumunyu.” Kusukela xi sanguliwa hi 1943, a xikola xa Gileade xi gonzisile a ku hunza 8.000 wa maphayona lawa ma nga guma ma rumelwa kota varumiwa lezaku ma ya nyika wukustumunyu “le magemeta-musi” ya misava. (Mitiro 13:47) A varumiwa vo sangula va nga chikela Peru a va kumangi bandla ni ginwe tikweni gontlhe. Zezi ku na ni ku hunza 1.000 wa mabandla. A xikhati lexi a varumiwa va nga sangula ku tira le Japão, a Timboni ti wa nga chikeli khume tikweni lego. Zezi ku na ni ku hunza 200.000 wa tona. A kurso ya Gileade ya ntlhanu wa tihweti yi patsa a xigonzo xo eta xa Mhaka ya Nungungulu. Lava va tirako kota maphayona yo hlawuleka kutani varumiwa va le sinwini, vatiri va Beteli, kutani vawoneleli va zipanze va rambiwa ku ta gonza a xikola lexi lezaku va kuma gonziselelo yo eta kasi ku tiyisa a ntiro misaveni yontlhe.

• Hi gihi a kungo ga Xikola xa Ntiro wa Wuphayona

• Xana a Xikola xa Vavangeli va Mufumo xi mahelwe mani?