1-3. Ziwutiso muni lezi a vanhu va ti wutisako xungetano hi kufa, niku a wukhongeli go kari gi zi hlamulisa kuyini?

A BIBLIA gi hi tsumbisa lezaku xikhatini xi tako a ‘kufa ku nga ta hava kona.’ (Kuvululelwa 21:4) Lomu ka Xipimo 5, hi gonzile lezaku a nzhiho wu vululile ndlela ya ku hi kuma wutomi ga pinzukelwa. Kanilezi a vanhu va hafa. (Mutshawuteli 9:5) Hikwalaho, hi tolovela ku ti maha xiwutiso lexi xa lisima: Kasi loku munhu afa iya kwihi?

² A hlamulo wa xiwutiso lexi hi wu lava nguvu loku hi felwa hi munhu hi mu ranzako. Hi nga ha ti wutisa lezi: ‘Kasi i yile kwihi? Wa hi wona ke? A nga hi vuna? Kona ha ha ta mu wona ke?’

³ A wukhongeli gi hlamula ziwutiso lezo hi tindlela to hambana. A go kari gi gonzisa lezaku loku u maha za zi nene, u taya tilweni kanilezi loku u maha za kubiha, u taswa tilweni. A ginwani gi gonzisa lezaku loku munhu afa iya a ya ti patsa ni maxaka yakwe ma fileko kale. Niku a ginwani kambe gi wula lezaku loku munhu afa, iya a ya lamuliwa a gumesa a pswaliwa luswa, na a hi ni miri wunwani — a ngava munhu munwani kutani xihari.

4. I nchumu muni wa tshinya lowu a wukhongeli gi gonzisako xungetano hi kufa?

⁴ Zi wonekisa ku khwatsi a wukhongeli gi gonzisa zilo zo hambana. Kanilezi, tontlhe a tigonzo leto ti zwanana ka nchumu wunwe wa tshinya. Wu nga lezaku loku munhu afa, ku na ni xokari xi simamako xi hanya. Lezo lisine ke?

KASI LOKU A MUNHU AFA IYA KWIHI?

5, 6. Zini zi humelelako loku munhu afa?

⁵ Jehova wa zi tiva lezi zi humelelako loku hifa, niku i sina a wulile lezaku loku munhu afa, a nga ha hi na wutomi. A kufa zi wula ku kala u nga ha hanyi. Hikwalaho loku munhu afa, a kutizwa kakwe ni maalakanyo yakwe a zi simami ku hanya ka wutshamu ginwani.a Loku hifa a ha ha zi koti ku pimisa nchumu, ku wona, ne kuzwa nchumu.

⁶ Hosi Solomoni i tsalile lezaku “a vafileko a va tivi nchumu.” Loyi a fileko, a nga zi koti ku ranza kutani ku zonda munhu. Niku lomu ‘xilahleni, a ku na ntiro, hambu makungo ni wutivi, ne wutlhari.’ (Gonza Mutshawuteli 9:5, 6, 10.) Lomu ka bhuku ga Tisimu 146:4, a Biblia gi wula lezaku loku a munhu afa, a ‘kupima kakwe’ kafa.

LEZI JESU A ZI WULILEKO XUNGETANO HI KUFA

7. Zini lezi Jesu a zi wulileko xungetano hi kufa?

⁷ A xikhati lexi Lazaru a munghana wakwe wa mu nene a ngafa, Jesu i byelile a vapizani vakwe aku: ‘Lazaru, a munghana wa hina, i etlele.’ Kanilezi, Jesu i wa nga wuli lezaku Lazaru i wo etlela wurongo. I lo gumesa aku: “Lazaru i file.” (Johani 11:11-14) Hikwalaho, Jesu i fananisile a kufa ni kuetlela. A nga wulangi lezaku Lazaru i wa hi le tilweni kutani i wa yile a ya ti patsa ni maxaka manwani ma nga sina ma file. A nga wulangi lezaku Lazaru i woswa tilweni kutani ku pswaliwa luswa kota munhu munwani kutani xihari. Kanilezi, Lazaru i wa ku khwatsi hi loku a no etlela wurongo ga hombe nguvu go kala ni ku lora. A mitsalo yinwani yonawu yi fananisa a kufa ni kuetlela wurongo ga hombe. A xikhati lexi Stefani a nga dawa, a Biblia gi wula lezaku “i lo etlela.” (Mitiro 7:60) Mupostoli Paule yenawu i tsalile lezaku a maKristu yo kari ma ‘etlele’ kufeni. — 1 Va Le Korinte 15:20.

8. Hi zi tivisa kuyini lezaku Nungungulu a nga vangangi vanhu kasi va gumesa vafa?

⁸ Xana Jehova i vangile Adamu na Eva lezaku va gumesa vafa? Ahihi! Jehova i va vangile na va hi ni wutomi go mbhelela kasi va hanya kala kupinzuka. Jehova i vangile vanhu na va xuva ku hanya kala kupinzuka. (Mutshawuteli 3:11) Hi tolovelo, a vapswali a va tsaki hi ku wona vana vabye na va khosahala va tlhela vafa. Jehova yenawu a nga tsaki. Hambulezo, loku ku hi lezaku Jehova i hi vangele ku hi hanya kala kupinzuka, hikuyini hi fako?

HIKUYINI HI FAKO?

9. Hikuyini a nayo lowu Jehova a nga nyikile Adamu na Eva wu nga kala wu nga karati?

⁹ Le sinwini ga Edeni, Jehova i lo byela Adamu aku: ‘A tisinya tontlhe ti nga lomu sinwini u ngaga hi matsenya; kanilezi a sinya ya ku tiva kusaseka ni kubiha u ngagi; hakuva a siku legi u to yiga, u tafa.’ (Genesisi 2:9, 16, 17) A nayo lowo wo zwisiseka khwatsi wu wa nga karati a ku wu ingisa, niku Jehova i wa hi ni fanelo ya ku byela Adamu na Eva lezi zi nga zi nene ni lezi zi bihileko. Loku va wa no ingisa Jehova, na va kombisile lezaku va na ni xichawo hi wuhosi gakwe. Na va kombile kambe lezaku va mu bonga nguvu hi kota ya zilo zontlhe za zi nene lezi a nga va nyikile.

10, 11. a) Xana Adamu na Eva va kalavelisilwe kuyini hi Satani? b) Hikuyini ku nga hiko na kutsetselelwa hi kota ya lezi Adamu na Eva va zi mahileko?

¹⁰ A ya kubiha hi lezaku Adamu na Eva va hlawulile ku nga ingisi Jehova. Satani i lo wutisa Eva aku: “Hakunene Nungungulu i wulile lezaku mu ngagi ni sinya yinwe ya simu ke?” Eva a hlamula aku: ‘Hi ngaga a mihanzu ya tisinya tontlhe, kanilezi a mihanzu ya sinya leyi yi nga xikari ka simu, Nungungulu i te ngalo, mu ngagi, hambu ni ku yi henya, kasi mu ngafi.’ — Genesisi 3:1-3.

¹¹ Satani a gumesa aku: ‘Mu nga tafa futsi; hi lezaku Nungungulu wa zi tiva lezaku, a siku lego mu toga, a mahlo ya nwina ma ta vululeka, mu fana na Nungungulu, mu tiva kusasa ni kubiha.’ (Genesisi 3:4-6) Satani i wa lava ku Eva a kholwa lezaku i wa ta zi tiva ha yece lezi zi nga zi nene ni lezi zo biha. Hi magezu yalawo, Satani i lo tlhela a hemba hi lezi zi nga wa ta humelela loku Eva a nga ingisi. Satani i te Eva i wa nga tafa. Hikwalaho, Eva i loga hanzu lowo a gumesa a nyika ni nuna wakwe kambe. Adamu na Eva va wa zi tiva khwatsi a ku Nungungulu i wa va byelile ku va ngagi a hanzu lowo. A xikhati lexi va ngaga, va lo hlawula ku nga wu ingisi ha womu a nayo lowo wo zwisiseka ni wo olova. Hi kuga a hanzu lowo, va lo kanyisa a Dadani wabye wa liranzo. Ku wa nga hi na ku tsetselelwa hi kota ya lezi va zi mahileko!

12. Hikuyini zi bayisako nguvu lezi Adamu na Eva va nga tsika ku ingisa Jehova?

¹² A hi kubayisa ka zona lezi a vapswali va hina vo sangula va nga kala ku mu kombisa xichawo a Muvangi wabye! U wa ta ti zwisa kuyini loku u wo pswala mufana ni nhanyana, u ti karata hi ku va wundla, zonake va tsika ku ku ingisa ha womu, va maha zalezi u nga va byela ku va nga mahi? Zi wa nga ta ku panza mbilu ke?

13. Jehova i wa lava ku wula yini a xikhati a ngaku ‘u ta tlhelela ntshurini’?

¹³ A xikhati lexi Adamu na Eva va nga tsika ku ingisa, va lo luza lungelo ga ku hanya kala kupinzuka. Jehova i wa byelile Adamu aku: ‘Wena u ntshuri, u ta tlhelela ntshurini.’ (Gonza Genesisi 3:19.) Lezo zi wula ku Adamu i wa ta tlhela ava ntshuri kambe, a kufana ni xikhatini lexi a nga kala a nga se vangiwa. (Genesisi 2:7) Anzhako ka loku a onhile, Adamu i lofa zonake a tlhela ka xiyimo xo kala a nga ha hi kona.

14. Hikuyini hi fako?

¹⁴ Loku Adamu na Eva va wa no ingisa Nungungulu, na va ha hanya kala nyamutlha. Kanilezi, laha va nga tsika ku mu ingisa, va lo onha zonake hi kufamba ka xikhati vafa. A xionho xi fana ni mababyi ya hombe lawa hi ma kumileko ka vapswali va hina. A vanhu vontlhe va pswaliwa ni xionho. Lezo hi zona zi hi mahako hifa. (Va Le Roma 5:12) Kanilezi, lezo a hi zona lezi Nungungulu a nga zi lava kusanguleni. Nungungulu a nga zangi a lava ku a vanhu vafa, niku a Biblia gi wula lezaku a kufa i “nala.” — 1 Va Le Korinte 15:26.

A KU TIVA LISINE ZA HI TLHATLHISA

15. A ku tiva lisine xungetano hi kufa zi hi tlhatlhisisa kuyini?

¹⁵ A ku tiva lisine xungetano hi kufa za hi tlhatlhisa ka maalakanyo yo tala ya hava. A Biblia gi hi gonzisa lezaku lava va fileko a va zangari ne kuzwa kubayisa. A hi nge wulawuli navo, ne vona a va nge wulawuli na hina. Lava va fileko, a va nge hi vuni, ne hina a hi nge va vuni. A va nge hi maheli zo biha kambe. Hikwalaho, a ku na xigelo xa ku va chava. Hambulezo, a wukhongeli go tala gi wula lezaku lava va fileko va simama ku hanya ka wutshamu go kari, niku hi nga va vuna loku hi nyikela mali ka vafundisa. Kanilezi, loku hi tiva lisine xungetano hi lava va fileko, a hi nge kalavelwi hi mawunwa lawo.

16. Mawunwa muni lawa a wukhongeli go tala gi ma gonzisako xungetano hi vafileko?

¹⁶ Satani i tirisa a wukhongeli ga mawunwa lezaku a hi hembela ni ku hi maha hi alakanya lezaku a vafileko va ha hanya. Hi xikombiso, a wukhongeli go kari gi gonzisa lezaku loku munhu afa, ku na ni xipanze xi sukako xi ya hanya ka wutshamu ginwani. Le chechini ka nwina ke, va mu gonzisa zezo ni ku va mu gonzisa lezi a Biblia gi zi wulako xungetano hi vafileko? Kala nyamutlha, Satani wa ha tirisa mawunwa kasi ku kalavela vanhu lezaku va nga ingisi Jehova.

17. Hikuyini a gonzo ya kuswa tilweni yi rukako Jehova?

¹⁷ A wukhongeli go tala gi gonzisa zilo zo tshisa nguvu. Hi xikombiso, a gokari gi gonzisa lezaku a vakubiha va taswa tilweni. A wunwa lego gi ruka Jehova. Jehova i wa nga ta tshuka a tsika vanhu va xaniseka hi ndlela leyo. (Gonza 1 Johani 4:8.) U wa ta ti zwisa kuyini hi munhu wa ku tsayisa n’wana wakwe hi ku hisa xiwokwana xakwe laha nzilweni? U wa taku i na ni xapi ya hombe; a hi zona? Hambu ni ku mu tiva u wa nga ta zi lava. Hi zalezo Satani a lavako ku hi mu wonisa zona Jehova!

18. Hikuyini hi nga faneliko ku chava lava va fileko?

¹⁸ A wukhongeli go kari gi gonzisa lezaku loku a vanhu vafa va gumesa va maha tinguluve. A wukhongeli lego gi gonzisa lezaku a mimoya leyo hi fanele ku yi kombisa xichawo hambu ku yi chava futsi, hakuva yi nga tshuka yiva vanghana kutani valala va hina. A vanhu vo tala va gi kholwa a wunwa lego. A ku chava lava va fileko, zi maha vanhu lavo va tsika ku khozela Jehova va khozela tinguluve tabye. Alakanya lezaku lava va fileko, a va tivi ne a vazwi nchumu. Hikwalaho, a hi na xigelo xa ku va chava. Jehova hi yena Muvangi wa hina. Hi yena Nungungulu wa lisine, niku hi fanele ku khozela yena basi. — Kuvululelwa 4:11.

19. A ku tiva lisine xungetano hi kufa zi hi vunisa kuyini?

¹⁹ A ku tiva lisine xungetano hi vafileko zi hi tlhatlhisa ka mawunwa ma gonzisiwako hi wukhongeli. Niku zi hi vuna ku zwisisa a zitsumbiso zo saseka za Jehova xungetano hi wutomi ga hina ni lezi zi to maheka xikhatini xi tako.

20. Zini hi to gonza ka xipimo xi lanzelako?

²⁰ Xikhatini xa kale nguvu, a nanza go kari ga Jehova ga ku hi Joba, gi wutisile lezi: “Loku a munhu afa, a nga tlhela a hanya kambe?” (Joba 14:14, NM) Xana za koteka futsi a ku loyi a fileko, a vuka a hanya? A hlamulo lowu Nungungulu a hi nyikako hi kutirisa Biblia wa tsakisa nguvu. A hlamulo lowo, hi ta wu wona ka xipimo xi lanzelako.

1-3. Hontlheni hi zibochwa za yini, niku Jehova i ta hi tlhatlhisisa kuyini?

TI ALAKANYE na u valelwe paxweni na u nga hi na nanzu, ne na ku nga hi na ndlela ya ku ku humesa. Zi wonekisa ku khwatsi a ka hi na lexi u xi rinzelako, niku a wu nge mahi nchumu kambe. Kanilezi, laha makunu u ti byelako ku u ta fela paxweni, u tiva lezaku ku na ni wokari a zi kotako ku ku humesa niku i tsumbisile ku ku vuna! U wa ta ti zwisa kuyini?

² Hontlheni hi zibochwa za kufa. Kani xini hi xi mahako, a ku na ndlela ya ku pona. Kanilezi, Jehova i na ni ntamu wa ku hi tlhatlhisa. Niku i tsumbisile lezaku ‘a nala loyi wo gumesa, ku nga kufa, i ta lobyiswa.’— 1 Va Le Korinte 15:26.

³ Hi nga alakanyela lezi u to tsakisa zona hi ku hanya na u nga ha karateki hi ku alakanya lezaku u tafa! Jehova i ta fuvisa kufa. Kanilezi, a nga ta fuvisa kufa zi nyima kwalaho, i ta tlhela a vuxa lava va to ngha va file ka xikhati lexo. Hi nga alakanyela lezi u to vunekisa zona! Jehova i tsumbisa lezaku a “vafileko” va ta vuka va tlhela va hanya kambe. (Isaya 26:19) Lezo hi lezi a Biblia gi zi vitanako ku kuvuka ka vafileko.

LOKU KUFA MUNHU HI MU RANZAKO

4. a) Hi nga chavelelwa hi yini loku hi felwa hi xaka kutani munghana? b) Wula a vanghana vo kari va hombe lava Jesu a nga hi navo.

⁴ Loku hi felwa hi xaka kutani munghana wa hina wa hombe, a kubayiseka loku hi ku zwako ka tshuka ku karata a ku ku timisela. Hi tizwa na hi nga hi na muvuni. A xi kona hi nga mahako kasi ku mu vuxa. Kanilezi, a Biblia ga hi chavelela. (Gonza 2 Va Le Korinte 1:3, 4.) Zezi a hi wone a xikombiso xinwe xi kombako lezi Jehova na Jesu va zi lavisako zona ku vuxa maxaka ni vanghana va hina va fileko. A xikhati lexi Jesu a nga hi laha misaveni, i wa tolovela ku vuxela Lazaru ni vamakabye vakwe, Maria na Marta. Vontlhe va vanharu va wa hi vanghana va va nene nguvu va Jesu. A Biblia gi ngalo: “Jesu i wa ranza Marta, ni makabye wakwe, na Lazaru.” Kanilezi, Lazaru i lo gumesa afa. — Johani 11:3-5.

5, 6. a) Zini lezi Jesu a nga maha a xikhati lexi a nga wona a maxaka ni vanghana va Lazaru na va bayisekile hi kota ya ku felwa? b) Hikuyini zi hi chavelelako a ku tiva lezi Jesu a nga ti zwisa zona hi kufa?

⁵ Jesu i loya chavelela Marta na Maria. A xikhati lexi Marta a ngazwa lezaku Jesu wata, i lo huma lomu doropeni a mu khinga. I lo tsaka hi ku wona Jesu, zonake a mu byela lezi: ‘Loku u wa hi kona laha, a makabye wa mina na a nga fangi.’ Marta i wa alakanya lezaku Jesu i hlwelile ku chikela. Anzhako ka lezo, Jesu i lo wona Maria makabye wa Marta na a rila. Laha a nga wona kubayiseka kakwe, yenawu i lo bayiseka a gumesa a rila. (Johani 11:21, 33, 35) Jesu i lozwa kubayisa loku hi ku zwako loku hi felwa hi munhu hi mu ranzako.

⁶ A ku tiva lezaku Jesu i ti zwisa lezi hinawu hi ti zwisako zona xungetano hi kufa, za hi chavelela. A kubayiseka ka Jesu ka hi tiyisa hlana. Jesu i fana ni Dadani wakwe. (Johani 14:9) Jehova i na ni ntamu wa ku fuvisa kufa kala kupinzuka, niku hi zalezo a to zi maha futsi na ku nga hi kale.

“LAZARU, HUMA!”

7, 8. Hikuyini Marta a nga kala a nga zi lavi a ku a ribye gi susiwa laha xilahleni xa Lazaru, kanilezi zini lezi Jesu a nga maha?

⁷ A xikhati lexi Jesu a nga chikela, a nkele lowu Lazaru a nga lahlilwe ka wona wu wa valilwe hi ribye ga hombe. I lo va byela lezi: “Susani ribye.” Kanilezi, Marta i wa nga zi lavi lezaku va susa. Ku wa hunza mune wa masiku Lazaru na a lahlilwe. (Johani 11:39) Marta i wa nga zi tivi lezi Jesu a nga lava ku mahela Lazaru.

⁸ Jesu i lo vitana Lazaru aku: “Lazaru, huma!” Lezi Marta na Maria va nga zi wona hi kulanzela, za hlamalisa nguvu. Ku lo maheka lezi: “Loyi a nga file i lo huma, na a bohilwe mandla ni mikonzo hi miceka ya zilahlelo.” (Johani 11:43, 44) Lazaru, i lo vuxiwa hi ka vafileko, a hanya! I lo tlhela a tlhangana ni maxaka ni vanghana vakwe. Zi wa koteka ku mu henya, va mu khoma, va tlhela va bhula naye. Lexo, xive xihlamaliso! Lazaru i wa vuxilwe hi Jesu.

“NHANYANA, NZIKU KA WENA, VUKA!”

9, 10. a) Jesu i nyikilwe himani a ntamu wa ku vuxa vanhu? b) Hikuyini a matimu ya kuvuxiwa ka vafileko ma nga ya lisima ka hina?

⁹ Xana Jesu i wa vuxa vanhu hi ntamu wakwe? Ahihi. Na a nga se vuxa Lazaru, i lo ranga hi ku maha mukombelo ka Jehova zonake Jehova a mu nyika ntamu wa ku vuxa Lazaru. (Gonza Johani 11:41, 42.) Lazaru a hi yena yece a nga vuxiwa hi ka vafileko. A Biblia gi wulawula hi nhanyana wa 12 wa malembe, loyi a nga babya nguvu. A papai wakwe Jairo, i wa nga ha xi tivi ni xo maha. Hikwalaho, i lo khongotela Jesu lezaku a hanyisa nhanyana wakwe. Jairo i wa nga hi na n’wana munwani. Laha a nga kari a wulawula na Jesu, ku lota vavanuna vo kari va taku: ‘A nhanyana wa wena i file, hi yini wa ha karatako Mugonzisi ke?’ Kanilezi, Jesu i lo byela Jairo aku: ‘U nga chavi, wena kholwa ntsena.’ Hi kulanzela, Jesu i lo famba na Jairo kaya kakwe. Laha va nga kari va chikela, Jesu i lo wona vanhu na va rila. Zonake a va byela lezi: ‘Mu nga rili; hakuva a nga fangi, i no etlela.’ Za koteka ku a papai wa nhanyana loye ni mamani wa kona va ti wutisile a ku kasi Jesu i lava ku wula yini. Jesu i lo kombela vontlhe lezaku va suka, zonake a teka vapswali va kona a nghena navo lomu a nhanyana a nga hi kona. Jesu i lo khoma a canja ga nhanyana aku: “Nhanyana, nziku ka wena, vuka!” Hi nga alakanyela lezi a vapswali va kona va nga tsakisa zona a xikhati lexi a nhanyana wabye a nga tekela ku vuna zonake a sangula ku fambafamba! Jesu i lo vuxa a nhanyana wabye. (Marku 5:22-24, 35-42; Luka 8:49-56) Kusukela ka siku lego, loku va wona a nhanyana wabye, va wo alakanya lezi Jehova a nga va mahele hi ku tirisa Jesu.a

¹⁰ Kunene, lava va vuxilweko hi Jesu va gumesile vafa. Kanilezi, lezi hi lerako xungetano hi vona za lisima hakuva zi hi maha hi rinzela zilo za zi nene xikhatini xi tako. Jehova wa zi lava ku vuxa vanhu va fileko, niku i ta va vuxa futsi.

LEZI A MATIMU YA KUVUXIWA KA VAFILEKO MA HI GONZISAKO

11. Zini lezi a bhuku ga Mutshawuteli 9:5 gi hi gonzisako xungetano hi Lazaru ka xikhati lexi a nga file?

¹¹ A Biblia gi wula laha kubaseni giku a vafileko “a va tivi nchumu.” Lazaru i wa hi ka xiyimo xalexo. (Mutshawuteli 9:5) Khwatsi hi lezi Jesu a nga wula, zi wa fana ni loku Lazaru a no etlela. (Johani 11:11) A xikhati lexi a nga hi lomu xilahleni, Lazaru i wa nga “tivi nchumu.”

12. Hi zi tivisa kuyini lezaku hakunene Lazaru i vuxilwe hi ka vafileko?

¹² Jesu i vuxile Lazaru na a woniwa hi vanhu vo tala. Hambu a valala va Jesu va wa zi tiva a ku i mahile xihlamaliso lexi. Lazaru i vuxilwe hi ka vafileko. Lezo zi komba lezaku hakunene a vanhu va ta vuka hi ka vafileko futsi. (Johani 11:47) A vanhu vo tala kambe, va yile va ya wona Lazaru niku lezo zi va mahile va kholwa lezaku hakunene Jesu i wa rumelwe hi Nungungulu. A valala va Jesu a va zi tsakelangi. Hikwalaho, va lo xuxa xikungo xa ku daya Jesu na Lazaru. — Johani 11:53; 12:9-11.

13. Xini xi hi kholwisako lezaku hakunene Jehova i ta vuxa vafileko?

¹³ Jesu i te “vontlhe va nga le zilahleni” va ta vuxiwa. (Johani 5:28) Lezo zi komba lezaku ku na ni vanhu lava Jehova a to va vuxa hi ka vafileko. Hambulezo, kasi Jehova a vuxa wokari, i fanele ku alakanya zontlhe lezi a munhu loye a nga hi zona. Xana Jehova a nga zi alakanya zontlhe futsi? Ehleketa hi lezi: Le tilweni ku na ni tinyeleti ta tsanza vahlayi. Hambulezo, a Biblia gi wula lezaku Jehova i tiva vito ga nyeleti yinwe ni yinwani. (Gonza Isaya 40:26.) Makunu, lezi Jehova a zi kotako ku alakanya vito ga nyeleti yinwe ni yinwani, zi komba khwatsi lezaku wa zi kota niku a zi mu karateli ku alakanya zontlhe zi yelanako ni wutomi ga lava a to va vuxa hi ka vafileko. A xa lisima ka zontlhe, Jehova hi yena a nga vanga zilo zontlhe. Hikwalaho, a hi kanakani lezaku i na ni ntamu wa ku vuxa vanhu va fileko.

14, 15. A magezu ya Joba ma hi gonzisa yini xungetano hi kuvuka ka vafileko?

¹⁴ A wanuna wo tsumbeka wa ku hi Joba i wa kholwa lezaku a vanhu va ta vuxiwa. I te: “Loku a munhu afa, a nga tlhela a hanya kambe?” I lo gumesa a wula lezi ka Jehova: “U ta vitana, mina nzi ta ku hlamula. U ta xuva a ntiro wa mandla ya wena.” Kunene, Joba i wa zi tiva lezaku Jehova i xi rinzela hi mahlo yo pswhuka a xikhati lexi a to vuxa vafileko. — Joba 14:13-15, NM.

¹⁵ U ti zwisa kuyini hi xitsumbiso lexi xa kuvuxiwa ka vafileko? Kuzilava wa karateka u ti wutisa lezi: ‘Ahati a maxaka ni vanghana va mina ke, vonawu va ta vuxiwa?’ Za hi chavelela a ku tiva lezaku hakunene Jehova wa zi lava ku vuxa lava va fileko. Zezi a hi wone a ku a Biblia gi le hi vamani va to vuxiwa, niku va ta hanya kwihi.

‘VA TAZWA A GEZU GAKWE, VA HUMA’

16. Lava va to vuxiwa lezaku va hanya laha misaveni, va ta hanya wutomi muni?

¹⁶ Xikhatini xi hunzileko, vontlhe lava va nga vuxiwa hi ka vafileko va tlhelile va tlhangana ni vanghana zinwe ni maxaka yabye kwalaha misaveni. Hi zalezo zi to maheka xikhatini xi tako. Hambulezo, va tava ka xiyimo xa xi nene nguvu. Hikuyini? Hakuva lava va to vuxiwa va tava ni lungelo ga ku hanya kala kupinzuka, va nga hafi. Ahandle ka lezo, va ta hanya ka tiko ga gi nene nguvu ku hunza legi hi hanyako ka gona nyamutlha. Ku nga tava ni tiyimpi, wugevenga ne mababyi.

17. Hi vamani va to vuxiwa hi ka vafileko?

¹⁷ Hi vamani va to vuxiwa hi ka vafileko? Jesu i te ‘vontlhe va nga le zilahleni va tazwa a gezu gakwe [Jesu], va huma.’ (Johani 5:28, 29) A bhuku ga Kuvululelwa 20:13 gonawu gi hi byela lezi: “A bimbi gi lo humesa a vafileko lava va nga hi ka gona, a lifu ni wutshamu ga vafileko zi lo humesa lava va nga hi ka zona.” Hakunene, ku ta vuxiwa vanhu va tsanza vahlayi. Mupostoli Paule yenawu i wulile lezaku “ku tava kona a kuvuka ka valulamileko ni ka va nga lulamangiko.” (Gonza Mitiro 24:15.) Xana lezo zi wula yini?

18. Hi vamani a “valulamileko” lava va to vuxiwa hi ka vafileko?

¹⁸ A ka “valulamileko” lava, ku patsiwa malanza ya Jehova yo tsumbeka lawa ma hanyileko Jesu na a nga seta laha misaveni. Noa, na Abrahama na Sara, na Mosi, na Rute, na Estere, va ta vuxiwa lezaku va hanya kwalaha misaveni. U nga kuma a matimu ya vavanuna ni vavasati lavo lomu ka bhuku ga Maheberu xipimo 11. Ahati a malanza ya Jehova yo tsumbeka lawa ma fako masikwini ya hina ke? Vonawu “valulamileko.” Hikwalaho, va ta vuxiwa.

19. a) Hi vamani a “va nga lulamangiko”? b) Xana Jehova i ta va nyika xikhati xa ku maha yini?

¹⁹ A “va nga lulamangiko” va patsa vanhu vo tala nguvu va fileko na va nga mu tivangi Jehova. Hambu lezi va fileko, Jehova a nga va rivalangi. I ta va vuxa zonake a va nyika xikhati xa ku gonza va mu tiva ni ku mu tirela.

20. Hikuyini ku to kala ku vuxiwa a vanhu vontlhe va fileko?

²⁰ Lezo zi wula lezaku vontlhe lava va fileko va ta vuxiwa ke? Ahihi. Jesu i wulile lezaku ku na ni lava va to kala ku vuxiwa. (Luka 12:5) Himani a lamulako ku loyi i ta vuxiwa ni ku loyi a nga ta vuxiwa ke? Jehova hi yena Mulamuli wo gumesa. Kanilezi, Jesu yenawu i nyikilwe ntamu wa ku ‘lamula va hanyako ni vafileko.’ (Mitiro 10:42) Vontlhe lava va to woniwa kota vakubiha ne na va nga zi lavi ku cica, va nga ta vuxiwa. — Wona Tlhamuselo wa wu 19.

KU NA NI LAVA VA TO VUXIWA VAYA TILWENI

21, 22. a) Lava va to ya hanya le tilweni va ta vuxiwa na va hi ni miri muni? b) Himani a munhu wo sangula ku vuxiwa lezaku a ya hanya le tilweni?

²¹ A Biblia kambe gi hi byela lezaku ku na ni lava va to ya hanya le tilweni. Loku a wokari a vuxiwa kasi a ya hanya le tilweni, a nga vuxiwi ni miri wa nyama ni nkhata. I vuxiwa ku ya hanya le tilweni kota munhu wa moya.

²² Jesu hi yena wo sangula ku vuxiswa lezo. (Johani 3:13) Loku ku hunzile masiku manharu na a delwe, Jehova i lo mu vuxa. (Tisimu 16:10; Mitiro 13:34, 35) Jesu a nga vuxiwangi ni miri wa nyama ni nkhata. Mupostoli Pedro i tlhamusela lezaku Jesu i ‘dayilwe nyameni, a hanyiswa hi ka moya.’ (1 Pedro 3:18) Jesu i lo vuxiwa a hanya kambe kota ngelosi ya ntamu! (1 Va Le Korinte 15:3-6) Kanilezi, a Biblia gi wula lezaku a hi yena yece Jesu, ku wa tava ni vanwani kambe va nga wa ta vuxiswa lezo.

23, 24. Hi vamani lava va “ntlhambi wu tsongwani” lava Jesu a nga wulawula hi vona, kona vangani?

²³ Na ku kiyela xikhati xitsongwani lezaku a dawa, Jesu i lo va byela lezi a vapizani vakwe vo tsumbeka: “Nza famba a ku ya mu longisela wutshamu.” (Johani 14:2) Lezo zi komba lezaku a vokari xikari ka valanzeli vakwe, va wa ta vuxiwa lezaku va ya hanya le tilweni. Vanhu vangani va nga wa ta vuxiwa vaya tilweni? Jesu i wulile lezaku ku wa tava vanhu va va tsongwani nguvu. I “ntlhambi wu tsongwani.” (Luka 12:32) Mupostoli Johani i wulile a ntsengo wa kona hi kukongoma a xikhati lexi a nga wona Jesu na a ‘yimile Xitsungeni xa Zioni [le tilweni], na a hi ni 144.000’ wa vanhu. — Kuvululelwa 14:1.

²⁴ Makunu, a maKristu lawa ya 144.000 ma wa ta vuxiwa rini lezaku maya tilweni? A Biblia gi hi byela lezaku va wa ta sangula ku vuxiwa anzhako ka ku Jesu a sangulile ku fuma le tilweni. (1 Va Le Korinte 15:23) Zezi hi hanya ka xikhati lexo, niku a kutala ka lava va 144.000 makunu va vuxilwe vaya tilweni. Lava va ha hiko laha misaveni, ni lava va fako zezi, va ta tekela ku vuxiwa vaya tilweni. Hambulezo a kutala ka vanhu, va ta vuxiwa xikhatini xi tako kasi va hanya Paradiseni kwalaha misaveni.

25. Zini hi to gonza ka xipimo xi lanzelako?

²⁵ Na ku nga hi kale, Jehova i ta maha lezaku a vanhu va nga hafi a tlhela a fuvisa kufa kala kupinzuka! (Gonza Isaya 25:8.) Hambulezo, kasi lava va vuxiwako lezaku vaya tilweni, vaya va ya tira yini? A Biblia gi tlhamusela lezaku vaya va ya fuma na Jesu. Hi ta gonza zinwani xungetano hi Mufumo lowo ka xipimo xi lanzelako.