A mhaka-tshinya ya Bhibhiliya Mufumo wa Nungungulu. Jehovha i ta tirisa a Mufumo lowo kasi ku maha lezvi a nga lava ku a misava yi tshamisa zvona kusukela kusanguleni. Kanilezvi, cini a Mufumo lowo? Hi zvi tivisa kuyini ku wu sangulile kufuma? Zvini lezvi makunu wu zvi mahileko? Zvini lezvi wu to maha cikhatini ci tako? A cigondzo leci ni lezvi zva zvimbiri zvi landzelako zvi ta hlamula a zviwutiso lezvo.

1. Cini a Mufumo wa Nungungulu niku himani a Hosi ya wona?

A Mufumo wa Nungungulu wuhosi gi yimisilweko hi Jehovha Nungungulu. A Hosi ya wona hi Jesu Kristu niku i fuma na a hi le tilweni. (Matewu 4:17; Johani 18:36) A Bhibhiliya gi wula ku Jesu ‘i ta fuma . . . kala kupindzuka’. (Luka 1:32, 33) Kota Hosi ya Mufumo wa Nungungulu, Jesu i ta fumela vontlhe laha misaveni.

2. Hi vamani va to fuma zvin’we na Jesu?

Jesu a nga ta fuma yece. A “vanhu va tixaka tontlhe, ni tirimi, ni mifumo, ni matiko . . . va ta fumela misava”. (Kuvhululelwa 5:9, 10) Vanhu vangani va to fuma zvin’we na Kristu? Kusukela ka cikhati leci Jesu a ngata laha misaveni, ku na ni vanhu va timiliyoni va nga maha valandzeli vakwe. A ku vontlhe lavo va ta fuma zvin’we naye? Ahihi! I 144 000 wabye basi va yako tilweni kasi va ya fuma na Jesu. (Lera Kuvhululelwa 14:1-4.) A maKristu wontlhe lawa man’wani ma ta fumelwa hi Mufumo wa Nungungulu laha misaveni. — Lisimu 37:29.

3. Hikuyini a Mufumo wa Nungungulu wu nga wunene nguvhu a ku hundza leyi ya vanhu?

Hambu loku a vanhu lava va fumako va zama ku maha zva zvinene, a va na ntamu wa ku maha zvontlhe lezvi va zvi lavako. Va gumesa hi ku vhaletiwa hi van’wani vafumeli va matshandza va ku kuzvilava a va na mhaka ni ku vhuna vanhu. Kanilezvi Jesu, a Hosi ya Mufumo wa Nungungulu, a nga ta tshuka a vhaletiwa hi mun’wani. Nungungulu i yimisile “a mufumo wa ku wu nga ta tshuka wu lovisiwa”. (Dhaniyeli 2:44) Jesu i ta fumela a misava yontlhe niku a nga tava ni cihlawulela. Yena munhu wa lirandzo, wa munene, wa kululama niku i ta gondzisa vanhu a ku vonawu va khoma van’wani hi lirandzo, ni wunene, ni kululama. — Lera Isaya 11:9.

4. A Mufumo wa ntamu wu ta fumela a misava yontlhe

Jesu i na ni ntamu wa hombe wa ku fuma a ku hundza ni yihi hosi yi tshukileko yi fuma. Lerani Matewu 28:18, mu gumesa mu bhula hi ciwutiso leci:

• Hi kwihi kuhambana ku nga kona cikari ka ntamu lowu Jesu a nga nawo wa kufuma ni lowu a tihosi ta vanhu ti nga nawo?

A mifumo ya vanhu yi tshama hi ku cica, niku a mufumo wun’we ni wun’wani wo fuma ntsena a cipandzana co kari ca misava. Ahati a Mufumo wa Nungungulu ke? Lerani Dhaniyeli 7:14, mu gumesa mu bhula hi zviwutiso lezvi:

• Hikuyini zvi nga zvinene a ku tiva ku a Mufumo wa Nungungulu “wu nga ta lovisiwa”?

• Hikuyini zvi nga zvinene a ku tiva ku wu ta fumela a misava yontlhe?

5. A mifumo ya vanhu yi fanele ku vhaletiwa

Hikuyini a Mufumo wa Nungungulu wu faneleko ku vhaleta a mifumo ya vanhu? Bisani VHIDHIO, mu gumesa mu bhula hi ciwutiso ci landzelako.

VHIDHIO: Cini a Mufumo wa Nungungulu? — Cipandzana (1:41)

• Zvini zvi mahekako hi kota ya lezvi ku fumako vanhu?

Lerani Mutshawuteli 8:9, mu gumesa mu bhula hi zviwutiso lezvi:

• U alakanya ku a Mufumo wa Nungungulu wu fanele ku vhaleta a mifumo ya vanhu? Hikuyini?

6. A Mufumo wa Nungungulu wu na ni tihosana ti hi zwisisako

Kota lezvi Jesu, a Hosi ya hina, a hanyileko kota munhu, a nga “hi zwela wusiwana gomeni ga hina”. (Mahebheru 4:15) A vavanuna ni vavasati vo tsumbeka lava va 144 000 lava va to fuma zvin’we na Jesu va hlawulilwe hi Jehovha cikari ka “vanhu va tixaka tontlhe, ni tirimi, ni mifumo, ni matiko”. — Kuvhululelwa 5:9.

• Zva ku tiyisa a ku tiva ku Jesu ni vontlhe lava a to fuma navo va zvi tiva ku zvi wula yini a ku hanya kota munhu? Hikuyini?

7. A Mufumo wa Nungungulu wu na ni milayo ya yinene nguvhu a ku hundza mifumo ya vanhu

A mifumo ya vanhu yi yimisa milayo yi mahelwako ku vhuna ni ku vhikela lava yi va fumelako. A Mufumo wa Nungungulu wonawu wu na ni milayo yi faneleko ku landzelwa hi lava va fumelwako hi wona. Lerani 1 Va Le Korinte 6:9-11, mu gumesa mu bhula hi zviwutiso lezvi:

• U alakanya ku a misava yi ta tshamisa kuyini a cikhati leci vontlhe va to landzela a milayo ya Nungungulu?a

• U alakanya ku Jehovha i na ni fanelo ya ku rindzela ku lava va fumelwako hi Mufumo wakwe va ingisa a milayo leyo? Hikuyini?

• Cini ci kombako ku a vanhu lava va kalako va nga ingisi a milayo leyo va nga cica? — Wona vhesi 11.

LEZVI HI NGA GONDZA

A Mufumo wa Nungungulu wuhosi ga le tilweni gi to fuma a misava yontlhe.

Zviwutiso zva kuvhuxeta

• Hi vamani a tihosi ta Mufumo wa Nungungulu?

• Hikuyini a Mufumo wa Nungungulu wu nga wunene nguvhu a ku hundza leyi ya vanhu?

• Zvini lezvi Jehovha a zvi rindzelako ka lava va to fumelwa hi Mufumo wakwe?

GONDZA ZVIN’WANI

Wona lezvi Jesu a gondzisileko xungetano hi ku a Mufumo wa Nungungulu wuta hi kwihi?

“A Mufumo wa Nungungulu wu mbilwini ya wena ke?” (Ndzima yi nga ka jw.org)

Hikuyini a Vakustumunyu va Jehovha va hlawulako kutsumbeka ka Mufumo wa Nungungulu va tsika ku tsumbeka ka mifumo ya vanhu?

Va kombile ku va lumba a Mufumo wa Nungungulu (1:43)

Wona lezvi a Bhibhiliya gi zvi gondzisako xungetano hi lava va 144 000 lava Jehovha a va hlawulako kasi va ya fuma zvin’we na Jesu.

“Hi vamani va yako tilweni?” (Ndzima yi nga ka jw.org)

Cini ci nga kholwisa a wasati wo kari a nga hi paxweni a ku hi Nungungulu ntsena loyi a nga nehako a misava yo lulama?

“Lezvi ndzi nga wu kumisa zvona a hlamulo wa mina wa ku lava kululama” (Khindlimuka!, Novembro wa 2011)

A Mufumo wa Nungungulu wu sangulile ku fuma le tilweni hi 1914. Kuve ka cikhati leco kambe ku nga sangula a masiku yo gumesa ya mifumo ya vanhu. Hi zvi tivisa kuyini? Hi ta wona lezvi a Bhibhiliya gi nga sina gi wulile, ni lezvi zvi mahekako laha misaveni, ni matshamela lawa a vanhu va ma kombisako kusukela hi 1914.

1. Zvini lezvi a Bhibhiliya gi nga sina gi phrofetile?

Lomu ka Bhibhiliya, ka bhuku ga Dhaniyeli ku kombilwe ku a Mufumo wa Nungungulu wu wa ta sangula ku fuma kugumeseni ka cikhati ci vitaniwako ku i “7 wa zvikhati”. (Dhaniyeli 4:16, 17) Hi ndzhako ka cikhati, Jesu i wulawulile hi cikhati caleci ca cin’we a ci wula ku “cikhati ci yimisilweko ca matiko”, niku i gondzisile ku a cikhati leco ci wa nga se mbhela. (Luka 21:24) Kota lezvi hi to zvi wona, a 7 wa zvikhati zvi mbhelile hi 1914.

2. Zvini zvi mahekako laha misaveni, niku matshamela muni lawa a vanhu va ma kombisako kusukela hi 1914?

A vapizani va Jesu va no mu wutisa, vaku: “Ci tava cihi a cikombiso ca kuvakona ka wena ni ca kugumesa ka tiko?” (Matewu 24:3) Jesu i no va hlamula hi ku va byela zvilo zvo tala zvi nga wa ta humelela andzhako ka loku a sangulile kufuma le tilweni kota Hosi ya Mufumo wa Nungungulu. A zvin’we zva lezvi zvi nga wa ta humelela tiyimpi, ni tindlala, ni kutsekatseka ka misava. (Lera Matewu 24:7.) A Bhibhiliya kambe gi wa sina gi wulile ku a matshamela ya vanhu va ‘masiku yo kugumesa’ ma wa ta maha ku a wutomi gi ‘nonoha a ku gi timisela’. (2 Timote 3:1-5) A matshamela lawo ma sangulile ku woneka nguvhunguvhu hi 1914.

3. Hikuyini a misava yi nga biha nguvhu kusukela loku a Mufumo wa Nungungulu wu sangulile kufuma?

Cikhatanyana mahlweni ka ku Jesu a yimisilwe kota Hosi ya Mufumo wa Nungungulu, i nolwa yimpi le tilweni na Sathani ni madhimoni yakwe. Sathani i no hluliwa. A Bhibhiliya gi wula ku “i no hoxiwa lahasi misaveni, niku a tingilozi takwe ti no hoxiwa zvin’we naye”. (Kuvhululelwa 12:9,10, 12) Sathani i kwatile nguvhu hakuva wa zvi tiva ku i ta lovisiwa. Hikwalaho, i vanga kuxaniseka misaveni yontlhe. A zvi hlamalisi lezvi a matshamela ya tiko ma bihileko nguvhu! Kanilezvi a Mufumo wa Nungungulu wu ta mbheta a zvikarato lezvi.

GONDZA ZVI ETA

4. A ciphrofeto ca Bhibhiliya ci komba ku a Mufumo wa Nungungulu wu sangulile ku fuma hi 1914

VHIDHIO: A Mufumo wa Nungungulu wu sangulile ku fuma hi 1914 (5:02)

Nungungulu i mahile ku hosi Nebhukadnezare, wa Bhabhuloni wa kale, ava ni noro. Ka noro lowo, Nungungulu i no mu komba lezvi zvi nga wa ta maheka ka masiku ma nga hata. A noro lowo ni tlhamuselo wa kona lowu Dhaniyeli a wu nyikileko wu wa wula a mufumo wa Nebhukadnezare ni Mufumo wa Nungungulu. — Lerani Dhaniyeli 4:17.a

Lerani Dhaniyeli 4:20-26, mu gumesa mu tirisa a kwadru legi kasi ku hlamula a zviwutiso zvi landzelako:

• (A) Zvini lezvi Nebhukadnezare a nga zvi wona lomu norweni? — Wona mavhesi 20 ni 21.

• (B) Zvini zvi nga wa ta humelela a sinya? — Wona vhesi 23.

• (C) Zvini zvi nga wa ta humelela andzhako ka “7 wa zvikhati”? — Wona vhesi 26.

Lezvi a noro wa sinya wu yelanisako zvona ni Mufumo wa Nungungulu

CIPHROFETO (Dhaniyeli 4:20-36)

Mufumo

• (A) Sinya ya hombe nguvhu

A nyima ku fuma

• (B) “Tsemani sinya” mu yi tsika “kala ku hundza a 7 wa zvikhati”

A vhuxetela ku fuma

• (C) “A mufumo wa wena wu ta tlhela wuva wa wena”

Kutatisekeni ko sangula ka ciphrofeto leci . . .

• (D) A sinya yi yimela mani? — Wona vhesi 22.

• (E) I nyimile rini ku fuma? — Lerani Dhaniyeli 4:29-33.

• (F) Zvini zvi nga humelela Nebhukadnezare kumbheleni ka “7 wa zvikhati”? — Lerani Dhaniyeli 4:34-36.

KUTATISEKA KO SANGULA

Mufumo

• (D) Nebhukadnezare, hosi ya Bhabhuloni

A nyima ku fuma

• (E) Andzhako ka 606 A.E.C., Nebhukadnezare i no hlanya a nga zvi koti ku fuma hi 7 wa malembe yo kongoma

A vhuxetela ku fuma

• (F) A kupima ka Nebhukadnezare ku no wuyelelana, a sangula kufuma kambe

Kutatisekeni ka wumbiri ka ciphrofeto leci . . .

• (G) A sinya yi yimela vamani? — Lerani 1 Kronekele 29:23.

• (H) Va nyimile rini a kufuma? Hi zvi tivisa kuyini ku va wa nga fumi a cikhati leci Jesu a nga hi laha misaveni? — Lerani Luka 21:24.

• (I) Hi kwihi, kona hi rini laha a Mufumo lowu wu nga sangulisa ku fuma?

KUTATISEKA KA WUMBIRI

Mufumo

• (G) Tihosi ta Izrayeli ti nga yimela a Mufumo wa Nungungulu

A nyima ku fuma

• (H) Jerusalema a lovisiwa, ku nyima ku fuma a lixaka la tihosi ta Izrayeli hi 2520 wa malembe

A vhuxetela ku fuma

• (I) Jesu a sangula ku fuma tilweni kota Hosi ya Mufumo wa Nungungulu

5. A zvilo zvi cicile nguvhu tikweni kusukela hi 1914

Bisani VHIDHIO.

VHIDHIO: A tiko gi cicile kusukela hi 1914 (1:10)

Jesu i kombile lezvi a tiko gi nga wa ta tshamisa zvona andzhako ka loku a sangulile kufuma. Lerani Luka 21:9-11, mu gumesa mu bhula hi ciwutiso leci:

• Ka zvilo lezvi, hi zvihi u zvi wonako na zvi maheka kutani u zvi zwako na zvi maheka?

Mupostoli Pawule i kombile lezvi a vanhu va nga wa ta tshamisa zvona ka masiku yo gumesa ya mifumo ya vanhu. Lerani 2 Timote 3:1-5, mu gumesa mu bhula hi ciwutiso leci:

• Ka matshamela lawa, hi wahi u ma wonako na va ma kombisa a vanhu nyamutlha?

6. Komba ku wa kholwa ku a Mufumo wa Nungungulu wa fuma

Lerani Matewu 24:3, 14, mu gumesa mu bhula hi zviwutiso lezvi:

• I ntiro muni wa lisima nguvhu wu kombako lezvaku a Mufumo wa Nungungulu makunu wa fuma?

• U nga hlengelisa kuyini ntirweni lowo?

A Mufumo wa Nungungulu makunu wa fuma, niku gi laha kusuhani a siku legi wu to fuma a misava yontlhe. Lerani Mahebheru 10:24, 25, mu gumesa mu bhula hi ciwutiso leci:

• Zvini lezvi a mun’we ni mun’wani wa hina a faneleko ku maha laha hi wonako “a siku na gi tshinela kusuhani”?

LEZVI HI NGA GONDZA

A zviphrofeto zva Bhibhiliya ni matshamela ya tiko ma komba lezvaku a Mufumo wa Nungungulu makunu wa fuma. Hi komba ku ha kholwa lezvo hi ku chumayela ni kuva kona mitlhanganweni ya bandla.

Zviwutiso zva kuvhuxeta

• Zvini zvi nga maheka kumbheleni ka 7 wa zvikhati lezvi zvi wuliwako lomu ka Bhibhiliya ka bhuku ga Dhaniyeli?

• Zvini zvi ku kholwisako ku a Mufumo wa Nungungulu wu sangulile ku fuma hi 1914?

• U nga zvi kombisa kuyini a ku wa kholwa ku a Mufumo wa Nungungulu makunu wa fuma?

GONDZA ZVIN’WANI

Wona lezvi a vatsali va matimu ni van’wani vanhu va wulako xungetano hi lezvi zvi humelelako tikweni kusukela 1914.

“A vanhu va sangulile rini a ku nga ha cheli kota hi milayo ya mahanyela?” (Khindlimuka!, Abril wa 2007)

Lera u wona lezvi a ciphrofeto ci nga ka Matewu 24:14 ci nga cicisa zvona a wutomi ga wanuna wo kari.

“Ndzi wa randza a basebol a ku hundza ni wihi nchumu!” (A Murindzeli N.° 3 wa 2017)

Hi zvi tivisa kuyini ku a ciphrofeto ci tsalilweko ka Dhaniyeli cipimo 4 ci wulawula hi Mufumo wa Nungungulu?

“A Mufumo wa Nungungulu wu sangulile rini ku fuma? — Xipanze 1” (A Murindzeli wa 1 ka Outubro wa 2014)

Cini ci kombako ku a “7 wa zvikhati” zvi kumbukiwako ka Dhaniyeli cipimo 4 zvi mbhelile hi 1914?

“A Mufumo wa Nungungulu wu sangulile rini ku fuma? — Xipanze 2” (A Murindzeli wa 1 ka Novembro wa 2014)

A Mufumo wa Nungungulu wu kari wu fuma le tilweni. Zvezvanyana wu ta fuma misaveni yontlhe. Wu ta cica misava yiva wutshamu ga ginene nguvhu. A hi wone a zvilo zvo kari zva zvinene lezvi a Mufumo wa Nungungulu wu to maha.

1. A Mufumo wa Nungungulu wu ta nehisa kuyini a kurula ni kululama laha misaveni?

Jesu, a Hosi ya Mufumo wa Nungungulu, i ta lovisa vanhu va kubiha ni mifumo ya vanhu yimpini ya Armagedhoni. (Kuvhululelwa 16:14, 16) Ka cikhati leco, ku ta tatiseka a citsumbiso leci ca Bhibhiliya, caku: “Ka ha hi cikhatanyana, a vakubiha va nga ta hava kona.” (Lisimu 37:10) Jesu i ta tirisa a Mufumo kasi a maha ku yontlhe misava yi tala hi kurula ni kululama. — Lera Isaya 11:4.

2. A wutomi gi ta tshamisa kuyini a cikhati leci a kurandza ka Nungungulu ku to mahiwa laha misaveni?

A cikhati leci a Mufumo wa Nungungulu wu to fuma misava, “a valulamileko va taga tshomba ya misava, va hanya ka yona kala kupindzuka”. (Lisimu 37:29) Hi nga ti alakanyela na u hanya ka tiko legi a vanhu vontlhe va lulamileko, va randzako Jehovha va tlhela va randzana! A ku na munhu a to babya, a vanhu vontlhe va ta hanya kala kupindzuka.

3. Zvini lezvi a Mufumo wa Nungungulu wu to maha andzhako ka ku lovisiwa ka vanhu va kubiha?

Andzhako ka ku lovisiwa ka vanhu va kubiha, Jesu i ta fuma a 1000 wa malembe. Ndzeni ka cikhati leco, yena ni lava va 144 000 va to fuma zvin’we naye, va ta vhuna vanhu laha misaveni a kuva vo mbhelela. Kumbheleni ka 1000 wa malembe, a misava yontlhe yi tava paradhise go saseka niku a vanhu vontlhe va ta ti buza hi litsako hakuva va tava na va ingisa a milayo ya Jehovha. Hi kulandzela, Jesu i ta tlhelisa a Mufumo mandleni ya Papayi wakwe, Jehovha. Ka cikhati leco, a vito ga Nungungulu gi ta ‘basisiwa’. (Matewu 6:9, 10) Zvi tava zvi tiyisilwe ku Jehovha Mufumeli wa munene, loyi a khatalako hi lava a va fumelako. Hi kugumesa, Jehovha i ta lovisa Sathani, ni madhimoni, ni lava va to hlawula ku vhukela a wuhosi gakwe. (Kuvhululelwa 20:7-10) Hi kota ya lezvi a Mufumo wa Nungungulu wu to maha, a wutomi gi ta tsakisa hi matlhelo wontlhe niku zvi ta tshamisa lezvo kala kupindzuka.

GONDZA ZVI ETA

4. A Mufumo wa Nungungulu wu ta fuvisa a mifumo ya vanhu

A Bhibhiliya gi wula lezvi: ‘A munhu i fumela mun’wani kasi a mu mahela kubiha.’ (Mutshawuteli 8:9) Jehovha i ta tirisa Mufumo wakwe kasi ku fuvisa a kubiha loku ku mahiwako hi mifumo ya vanhu.

Lerani Dhaniyeli 2:44 na 2 Va Le Tesalonika 1:6-8, mu gumesa mu bhula hi zviwutiso lezvi:

• Zvini lezvi Jehovha ni N’wana wakwe Jesu va to maha a mifumo ya vanhu ni lava va yi seketelako?

• Lezvi u nga gondza xungetano hi Jehovha na Jesu, zvi ku tiyisekisa kuyini ku a kulamula kabye ku tava ko lulama?

5. Jesu i Hosi ya yinene nguvhu

Kota Hosi ya Mufumo wa Nungungulu, Jesu i ta vhuna vanhu laha misaveni hi tindlela to tala. Bisani VHIDHIO kasi ku wona lezvi Jesu a sinako a kombisile zvona ku i na ni kuxuva ni ntamu a nyikilweko hi Nungungulu kasi ku vhuna vanhu.

VHIDHIO: Jesu i kombile lezvi a Mufumo wa Nungungulu wu to maha(1:13)

A cikhati leci Jesu a nga hi laha misaveni, i nyikile a masemanyana ya lezvi a Mufumo wa Nungungulu wu to zvi maha. Zvilo muni zvi xaxametilweko laha u zvi donelako mari? Lerani a mitsalo leyi yi hi vhunako a ku gondza zvotala xungetano hi zvilo lezvo.

6. A Mufumo wa Nungungulu wu ta hi mahela zvilo zva zvinene

VHIDHIO: Masemanyana ya zvilo zvi tako zvo tsakisa (4:38)

Lerani Lisimu 145:16, mu gumesa mu bhula hi ciwutiso leci:

• U ti zwisa kuyini hi ku tiva ku Jehovha i ta “xurisa a kunavela ka zvontlhe zvi hanyako”?

LEZVI HI NGA GONDZA

A Mufumo wa Nungungulu wu ta maha lezvi Nungungulu a lavako ku wu maha. Wu ta hundzula misava yontlhe yiva paradhise gi talileko hi vanhu va vanene, lava va to khozela Jehovha kala kupindzuka.

Zviwutiso zva kuvhuxeta

• A Mufumo wa Nungungulu wu ta gi basisisa kuyini a vito ga Jehovha?

• Hikuyini hi nga kholwako ku a Mufumo wa Nungungulu wu ta tatisa a zviphrofeto zva Bhibhiliya?

• Ka zvontlhe a zvilo zvo tsakisa lezvi a Mufumo wa Nungungulu wu to zvi maha, hi zvihi lezvi u zvi donelako mari?

GONDZA ZVIN’WANI

Tiva ku cini a Armagedhoni.

“Cini a yimpi ya Armagedhoni?” (Ndzima yi nga ka jw.org)

Wona lezvi zvi to maheka kufumeni ni kugumeseni ka kufuma ka Jesu ka 1000 wa malembe.

Cini a kuxaniseka ka hombe?” (Ndzima yi nga ka jw.org)

Wona lezvi a mingango yi nga ehleketisako zvona zvin’we hi makatekwa ma to nehiwa hi Mufumo wa Nungungulu.

Ti wone na u hi Paradhiseni (1:50)

Ka matimu lawa yaku: “Ndzi wa hi ni zviwutiso zvo tala zvi nga ndzi karata,” wona lezvi a muhluwuki wo kari wa politika a nga yi kumisa zvona a mihlamulo ya lezvi zvi nga mu karata.

“A Bhibhiliya ga cica wutomi ga vanhu” (A Murindzeli wa 1 ka Janeiro wa 2012)