CIGONDZO 24
Zvini a tingilozi niku hi wihi a ntiro wa tona?
Jehovha i lava lezvaku hi gondza hi ngango wakwe wa le tilweni. A ngango lowo wu patsa a tingilozi leti ti vitaniwako ku i “vana va Nungungulu”. (Joba 38:7) Zvini lezvi a Bhibhiliya gi wulako xungetano hi tingilozi? Hi wihi a ntiro wa tona? Xana a tingilozi tontlhe zviro zva ngango wa Nungungulu?
1. Zvini a tingilozi?
Jehovha i rangile hi ku vanga tingilozi na a nga se vanga misava. A kufana naye, a tingilozi zvivangwa zva moya zvi nga wonekiko niku ti hanya le tilweni. (Mahebheru 1:14) Ku na ni timiliyoni ta tingilozi niku a yin’we ni yin’wani yi na ni matshamela ya yona. (Kuvhululelwa 5:11) Ti ‘tatisa a mhaka ya [Jehovha], ti ingisa a gezu gakwe’. (Lisimu 103:20) Cikhatini ci hundzileko, ka zvikhati zvo kari Jehovha i tirisile tingilozi kasi ku tivisa mahungu, ku vhuna malandza yakwe ni ku ma ponisa loku a wutomi gabye gi hi mhangweni. Inyamutlha, a tingilozi ti rangela maKristu kasi ma kuma vanhu va lavako ku gondza hi Nungungulu.
2. Himani Sathani ni madhimoni yakwe?
A tingilozi to kari ti tsikile ku tsumbeka ka Jehovha. A ngilozi yo sangula leyi yi tsikileko ku ingisa Nungungulu hi leyi yi “vitaniwako ku hi Dhiyabho ni Sathani, loyi a kanganyisako tiko gontlhe”. (Kuvhululelwa 12:9) Sathani i wa lava ku fumela van’wani, hikwalaho i kucetele a vanhu vo sangula, Adhamu na Evha, niku hi ndzhako ka cikhati i no kucetela a tingilozi to kari lezvaku ti ti patsa naye kuhluwukeni kakwe. A tingilozi leto ti nga tsika ku ingisa Nungungulu ti vitaniwa ku madhimoni. Jehovha i ti hlongolile le tilweni tita laha misaveni niku ti ta lovisiwa. — Lera Kuvhululelwa 12:9, 12.
3. Sathani ni madhimoni va zamisa kuyini ku hi kanganyisa?
Sathani ni madhimoni va kanganyisa vanhu vo tala hi ku tirisa wudhimoni kutani wungoma, ku nga mukhuvo wo biha wa ku zama ku wulawula ni vafileko. Hi cikombiso, a vanhu vo kari va wutisa a vahlahluvi va tirisako tinyeleti, ni vavhumbi, ni vasalamusi, ni tin’anga. A vokari va zama ku lava tindlela ta ku tiriwa mababyi ti yelanako ni wudhimoni. A vanhu va kanganyisiwa kambe va kholwa lezvaku va nga zvi kota ku wulawula ni vafileko. Kanilezvi Jehovha wa hi tlharihisa, aku: “Mu ngayi tin’angeni ni ka vavhumbi.” (Levhi 19:31) I hi nyika citlharihiso leci kasi ku hi vhikela ka Sathani ni madhimoni. Sathani ni madhimoni valala va Nungungulu niku va lava ku hi mahela kubiha.
GONDZA ZVI ETA
Gondza u tiva a zvilo zva zvinene lezvi a tingilozi ti mahako, a mhango ya wudhimoni, ni lezvi hi nga ti vhikelisako zvona ka Sathani ni madhimoni.
4. A tingilozi ti vhuna vanhu a ku gondza hi Jehovha
A tingilozi ta Nungungulu a ti chumayeli vanhu hi kukongoma, kanilezvi ti rangela maKristu kasi ma kuma vanhu va lavako ku gondza xungetano hi Nungungulu. Lerani Kuvhululelwa 14:6, 7, mu gumesa mu bhula hi zviwutiso lezvi:
Hikuyini hi lavako ku vhuniwa hi tingilozi kasi hi chumayela?
Zva ku tiyisa a ku tiva lezvaku a tingilozi ti nga ku rangela a kuya ka vanhu lava va lavako ku gondza Bhibhiliya? Hikuyini?
5. Ala wungoma
Sathani ni madhimoni valala va Jehovha niku valala va hinawu. Lerani Luka 9:38-42, mu gumesa mu bhula hi ciwutiso leci:
Zvini lezvi a madhimoni ma mahako vanhu?
A hi lavi ku tsika madhimoni ma nghena wutomini ga hina. Lerani Dhewuteronome 18:10-12, mu gumesa mu bhula hi zviwutiso lezvi:
A madhimoni ma zamisa kuyini ku hi kucetela ni ku wulawula na hina? Zvilo muni zvi yelanako ni wungoma zvi talako ku mahiwa lomu u hanyako kona?
U alakanya ku zvi nene lezvi Jehovha a betelako a wudhimoni? Hikuyini?
Bisani VHIDHIO, mu gumesa mu bhula hi zviwutiso zvi landzelako.
U alakanya ku a citshungulo leci ci nga bohilwe hi n’wanana wa Teresa ci wa hi ni mhango? Hikuyini?
Zvini lezvi Teresa a nga fanele ku maha kasi a ti vhikela ka madhimoni?
Kusukela kale a maKristu ya lisine ma fambela kule ni madhimoni. Lerani Mitiro 19:19 na 1 Va Le Korinte 10:21, mu gumesa mu bhula hi ciwutiso leci:
Hikuyini zvi nga zva lisima a ku hisa kutani ku fuvisa ni wihi nchumu u nga nawo wu yelanako ni wudhimoni?
6. Hlula Sathani ni madhimoni yakwe
A madhimoni ma fumelwa hi Sathani. Kanilezvi a tingilozi leti to tsumbeka ti rangelwa hi Ngilozi ya hombe, Mikayeli, gi nga vito gin’wani ga Jesu. Mikayeli i na ni ntamu wo kota kwihi? Lerani Kuvhululelwa 12:7-9, mu gumesa mu bhula hi zviwutiso lezvi:
Laha ka Mikayeli ni tingilozi takwe na Sathani ni madhimoni yakwe hi vamani va nga ni ntamu wo hundza lava van’wani?
U alakanya ku a valandzeli va Jesu va fanele ku chava Sathani ni madhimoni yakwe?
U nga zvi kota ku hlula Sathani ni madhimoni yakwe. Lerani Jakobe 4:7, mu gumesa mu bhula hi ciwutiso leci:
U nga ti vhikelisa kuyini ka Sathani ni madhimoni yakwe?
A VOKARI VE: “A ku bela tijogo ni ku sixtira a mafilmi ma wulawulako hi wungoma a zvi bihangi. Zvi mahela ku pepisa maalakanyo.”
Hikuyini zvi nga mhango a kuva ni maalakanyo lawo?
LEZVI HI NGA GONDZA
A tingilozi to tsumbeka ta hi vhuna. Sathani ni madhimoni yakwe valala va Jehovha. Va tirisa a wungoma kasi ku kanganyisa vanhu.
Zviwutiso zva kuvhuxeta
A tingilozi ta Jehovha ti va vhunisa kuyini vanhu lezvaku va gondza hi yena?
Himani Sathani ni madhimoni yakwe?
Hikuyini u lavako ku fambela kule ni wungoma?
GONDZA ZVIN’WANI
Gondza u tiva ku hi zvi tivisa kuyini ku Jesu hi yena Mikayeli, a Ngilozi ya hombe.
“Himani Mikayeli, a ngilozi ya hombe?” (Ndzima yi nga ka jw.org)
Wona a zvitiyisekiso zva lezvaku Dhiyabho munhu wa lisine, na ku nga hi wubihi ntsena gi nga mbilwini ya munhu.
Wona lezvi a wasati wo kari a nga ti tlhatlhisisa zvona ka madhimoni.
“I polile a kungo ga wutomi” (A Murindzeli wa 1 ka Julho wa 1993)
Gondza u tiva lezvi Sathani a gi tirisisako zvona a wudhimoni kasi ku kanganyisa vanhu.