CIGONDZO 20

Jehovha i gi rangelisa kuyini a bandla ga wuKristu?

Ka bhuku go gandliwa

Jehovha a hi Nungungulu wa vhilinganya. (1 Va Le Korinte 14:33) Hikwalaho, hi rindzela ku Jehovha a rangela a vanhu vakwe. I rangelisa kuyini bandla hi ku tirisa Jesu? Zvini lezvi hina hi nga mahako kasi zvontlhe zvi famba khwatsi?

1. Himani hloko ya bandla?

‘Kristu i hloko ya bandla.’ (Va Le Efesusi 5:23) Na a hi le tilweni, i rangela a mitiro ya vanhu va Jehovha misaveni yontlhe. Jesu i yimisile a “nandza go tsumbeka ni go tlhariha”, ku nga ntlawa wutsongwani wa madhota yo buvha, lowu wu vitaniwako kambe ku i Hubye yi Fumako. (Lera Matewu 24:45-47.) Cikhatini ci hundzileko, a vapostoli ni madhota le Jerusalema hi vona va nga ma nyika zvileletelo a mabandla ya nguva leyo. (Mitiro 15:2) Hi kufanana, nyamutlha, a Hubye yi Fumako yi ma nyika zvileletelo a mabandla misaveni yontlhe. Kanilezvi a vavanuna lava a hi varangeli va hlengeletano ya hina. Va gondza Bhibhiliya kasi va tiva lezvi Jehovha a lavako lezvaku va maha niku va ti koramisa va landzela a wurangeli ga Jesu.

2. Hi wihi a ntiro wa madhota?

A madhota vavanuna va nga maKristu yo buvha. Ma tirisa a Bhibhiliya kasi ku gondzisa a vanhu va Nungungulu va va vhuna ni ku va tiyisa. A ma holi nchumu hi ntiro wabye. Kanilezvi va tira “hi kuzvirandza mahlweni ka Nungungulu; na ku nga hi ku khwatsi [vo] tirela bhindzu, kanilezvi hi kuxuva ka hombe”. (1 Pedro 5:1, 2) A madhota ma vhuniwa ntiro hi malandza yo vhunetela. Andzhako ka cikhati co kari, a malandza yo vhunetela wonawu ma nga ringanelwa hi kuva madhota.

A Hubye yi Fumako yi yimisa a madhota yo kari kasi mava vawoneleli va zvipandze. Va endzela a mabandla yo hambanahambana kasi ku va nyika zvileletelo a vamakabye ni ku va tiyisa. A vawoneleli va zvipandze va yimisa madhota ni malandza yo vhunetela, andzhako ka loku va hlolile va wona ku va tatisa matshamela lawa ma wuliwako hi mitsalo ke. — 1 Timote 3:1-10, 12; Titusi 1:5-9.

3. Hi wihi a ntiro wa Kustumunyu mun’we ni mun’wani?

Vontlhe lomu bandleni va ‘dhumisa a vito ga Jehovha’ hi ku hlamula, ku veka tikanelo, ku maha mikombiso, ni ku yimbelela mitlhanganweni ya bandla zvin’we ni ku chumayela hi kuya hi ciyimo cabye. — Lera Lisimu 148:12, 13.

GONDZA ZVI ETA

U ta gondza u tiva ku Jesu murangeli wo tshamisa kuyini, a madhota ma ci pimanyisisa kuyini a cikombiso cakwe, kona hina hi nga tirisanisa kuyini na Jesu ni madhota.

4. Jesu murangeli wa munene

Jesu wa hi ramba hi ndlela ya lirandzo. Lerani Matewu 11:28-30, mu gumesa mu bhula hi ciwutiso leci:

Jesu murangeli wo tshamisa kuyini niku i lava ku hi ti zwisa kuyini?

A madhota ma ci pimanyisisa kuyini a cikombiso ca Jesu? Bisani VHIDHIO.

VHIDHIO: A madhota ma maha cokari kasi ku vhunetela ka kutsekatseka ka misava le Nepal (4:56)

A Bhibhiliya gi zvi tlhamusela khwatsi lezvi a madhota ma faneleko ku wu mahisa zvona a ntiro wa wona.

Lerani Isaya 32:2 na 1 Pedro 5:1-3, mu gumesa mu bhula hi zviwutiso lezvi:

U ti zwisa kuyini hi ku tiva lezvaku a madhota ma ti karatela ku khoma vamakabye hi ndlela yinene, a ku fana na Jesu?
Hi tihi tin’wani tindlela leti a madhota ma mu pimanyisako hi tona Jesu?

5. A madhota ma hi vekela cikombiso cinene

Jesu i lava ku a madhota ma wu wonisa kuyini a ntiro wa wona? Bisani VHIDHIO.

VHIDHIO: Madhota vekani cikombiso! (7:39)

Jesu i va nyikile zvileletelo lava va rangelako bandla. Lerani Matewu 23:8-12, mu gumesa mu bhula hi zviwutiso lezvi:

Zvini lezvi a Bhibhiliya gi nge a madhota ma fanele ku maha? U alakanya ku a varangeli va wukhongeli va maha lezvo?

A. Mifota: I dhota gi ti gisako hi tlhelo ga moya gi tlhela gi vhuna a ngango wa gona lezvaku wuga hi tlhelo ga moya. 1. Gi khongela na gi nga se lera Bhibhiliya. 2. Gi ci gondzisa Bhibhiliya a cinhanyetana ca gona na gi vhuniwa hi sati wa gona.

B. I dhota galegi ga gin’we ni sati wa gona va vhuxelako a makabye wa cisati a bhaxarileko cipitali.

A madhota ma tiyisa a wunghana ga wona na Jehovha ma tlhela ma vhuna a mingango ya wona a ku maha lezvo
A madhota ma khatalela vontlhe lomu bandleni
A madhota ma chumayela hi kukhandzakanya
A madhota ma gondzisa a Mhaka ya Nungungulu ma tlhela ma vhunetela ku basisa Salawu ya Mufumo ni ku maha mitiro yin’wani

6. Hi nga vhunetela madhota

A Bhibhiliya gi hi nyika cigelo co zwala ca kuva hi vhunetela madhota. Lerani Mahebheru 13:17, mu gumesa mu bhula hi zviwutiso lezvi:

Hikuyini a Bhibhiliya gi wulako lezvaku hi fanele ku ingisa madhota hi mbilu yontlhe? Wena ke, u zvi wonisa kuyini?

Lerani Luka 16:10, mu gumesa mu bhula hi ciwutiso leci:

Hikuyini zvi nga zva lisima a ku ingisa madhota contlhe cikhati, hambu ka timhaka ta titsongwani?

A VOKARI VE: “A zvi bohi ku ndziya chichini kasi ndzi khozela Nungungulu.”

U alakanya ku mabhindzu muni u nga ma kumako loku u khozela Nungungulu zvin’we ni bandla?

LEZVI HI NGA GONDZA

Jesu i hloko ya bandla. Zva hi tsakisa a ku tirisana ni madhota lawa ma rangelwako hi Jesu, hakuva ma hi khoma hi ndlela yinene ma tlhela ma hi vekela cikombiso cinene.