Zviwutiso zva vagondzi

Loku a wanuna ni wasati vo kala va nga chadhangi va ku pilapila wusiku gontlhe na va hi zvin’we na ku nga hi na cigelo co zwala, zvi wula ku va mahile ciwonho niku ku fanele ku wumbiwa a kometi ya kulamula ke?

A kuva va pileka wusiku gontlhe na va hi voce na ku nga hi na zvigelo zvo zwala zvi komba ku va mahile wubhayi. Hikwalaho, loku ku nga hi na zvigelo zvo zwala, ku fanele ku wumbiwa a kometi ya kulamula. — 1 Va Le Korinte 6:18.

A hubye ya madhota yi fanele ku hlola khwatsi ciyimo cin’we ni cin’wani kasi yi wona ku zva fanela ku ku wumbiwa a kometi ya kulamula kutani ahihi. Hi cikombiso: A maKristu lawo ma kari ma gangisana hi kale ke? A madhota ma wa va nyikile wusungukati xungetano hi lezvi va faneleko ku maha ni ku nga mahi ka cikhati leci va gangisanako? Hikuyini va nga pileka wusiku gontlhe na va hi zvin’we? Va wa no zvi mahela makungo ke? Ku wa hi ni ndlela yaku va nga pileki zvin’we kutani ku no humelela zvilo zvo hundza ntamu wabye, zvo kota zvilo zva citshuketi zvi va mahileko va nga hi na ndlela yo potsa ku pileka wusiku na va hi zvin’we? (Mutshawuteli 9:11) Va wa etlele kwihi? A zviyimo zvi hambene, hikwalaho ku ngava ni mahungu man’wani ma to khumba lezvi a madhota ma to boha.

Andzhako ka loku a hubye ya madhota yi hlolile zvontlhe zvi patsekileko, hi kona yi to boha ku zva fanela lezvaku ku wumbiwa kometi ya kulamula kutani ahihi.