Sábado, 18 ka Outubro
Tamani mi kombela, mi ta nyikiwa; tamani mi lava, mi ta swi kuma; tamani mi gongondza, mi ta pfuleliwa. — Luk. 11:9.
Khongela u kombela Yehovha a ku pfuna swaku u ya u va munhu wa ku lehisa mbilu. Ku lehisa mbilu i wun’wani wa mihandzu ya moya wa ku kwetsima. (Gal. 5:22, 23) Hi mhaka leyo hi fanele hi khongela, hi kombela swaku Yehovha a hi nyika moya wa yena wa ku kwetsima ni ku hi pfuna swaku hi kombisa wumunhu leli fambelanaka ni moya wa ku kwetsima. Loko hi kumana ni xiyimu lexi yendlaka swi hi karhatela ku lehisa mbilu, hi ta ‘tama hi kombela’ moya wa ku kwetsima swaku wu hi pfuna ku lehisa mbilu. (Luk. 11:13) Hi nga tlhela hi khongela, hi kombela swaku Yehovha a hi pfuna ku vona swilo xileswi yena a swi vonisaka swona. Loko se hi khongelile, hi fanele hi yendla hinkwaswu leswi hi nga swi kotaka swaku hi lehisa mbilu siku ni siku. Nkama lowu hi yaka hi khongela hi tlhela hi yendla hinkwaswu swaku hi va vanhu va ku lehisa mbilu a swi nga ha ta hi karhatela ku lehisa mbilu, se swi to va matshamelo ya hina. Xin’wani lexi nga ku pfunaka i ku pimisa hi swikombiso leswi nga ka Bibele. Bibele li ni swikombiso swa vanhu va vanyingi lava va nga lehisa mbilu. Loko hi pimisa hi swikombiso leswi, hi ta djondza tindlela ta ku va hi lehisa mbilu. Murindzi 08/23 mapaj. 22-23 mapar. 10-11
Domingo, 19 ka Outubro
Mi peta maredi ya n’wina leswaku mi ta phasa. — Luk. 5:4.
Yesu a tiyisekise mupostolo Pedru swaku Yehovha a a ta mu hlayisa. Nkama lowu a nga pfuxiwa, Yesu a yendle swaku Pedru ni vapostolo lavan’wani va phasa tihlampfi ta tinyingi hi ndlela ya ku hlamalisa. (Yoh. 21:4-6) Leswo swi yendle swaku Pedru a swi twisisa swaku Yehovha a nge tsandzeki ku mu nyika swilo hinkwaswu leswi a swi lavaka swaku a tihlayisa. Swi nga yendleka leswi Yesu a nga swi yendla swi yendle swaku Pedru a khumbuka marito lawa Yesu a a ma vulile ka masiku lawa a ma hundzile, nkama lowu a nga vula swaku Yehovha a a ta hlayisa vanhu hinkwavu lava tamaka va lava Mfumu wa Xikwembu ku sungula. (Mat. 6:33) Hinkwaswu leswo swi pfune Pedru kuva a rhangisa ntirho wa ku chumayela ka wutomi la yena ku nga li wa ku phasa tihlampfi. Phela Pedru a a nga chavi nchumu funtshi a chumayelile hi siku la Pentekoxta ka lembe la 33 ka nguva ya hina, a pfuna vanhu va vanyingi swaku va yamukela mahungu ya ku tsakisa. (Min. 2:14, 37-41) Hi ku famba ka nkama a pfune vanhu va Samariya ni vanhu lava a va li va matiko swaku na vona va va valandzeli va Kreste. (Min. 8:14-17; 10:44-48) Ha tiyiseka swaku Yehovha a mu tirhisile Pedru hi ndlela ya ku hlamalisa kuva a pfuna vanhu va vanyingi va mixaka ya ku hambanahambana swaku va lumba bandla la Wukreste. Murindzi 09/23 paj. 20 par. 1; paj. 23 par. 11
Segunda-feira, 20 ka Outubro
Loko mo kala mi nga ni byeli leswi ni nga swi lorha mi tlhela mi ni tlhamusela swona, mi ta phatluleliwa. — Dan. 2:5.
Loko se ku hundze kolomuyani ka malembe mambirhi loko Vababilona va helise doropa la Yerusalema, Hosi Nebukadinazara wa Babilona a lorhe swilo swa ku chavisa, lani a nga vona xifaniso xaxikulu swinene. Hosi yi vule swaku a yi ta dlaya vavanuna hinkwavu va ku tlhariha ku patsa na Daniyele loko va nga mu byeli leswi a nga swi lorha ni ntlhamuselo wa kona. (Dan. 2:3-5) Phela a swi lava swaku Daniyele a yendla xanchumu hi ku hantlisa hikusa wutomi la vanhu va vanyingi a li li nghozini. Se “Daniyele a ye ka hosi a ya kombela nkama wa leswaku a yi tlhamusela leswi yi nga swi lorha.” (Dan. 2:16) Leswo swi kombise swaku Daniyele a a nga chavi nchumu naswona a a ni lipfumelo. Hi mhaka muni hi vula leswo? Ka Bibele a ku na nchumu lexi kombisaka swaku Daniyele a a tshame a tlhamusela milorho. Se a kombele swaku vanghanu va yena va “khongela va kombela swaku Xikwembu xa le tilweni xi va komba timpsalu hi ku va pfuna va kota ku tlhamusela xihundla lexi.” (Dan. 2:18) Yehovha a swi hlamulile swikhongelo swoleswo. Hi ku pfuniwa hi Xikwembu, Daniyele a swi kotile ku tlhamusela leswi Nebukadinazara a nga swi lorha. Leswo swi yendle swaku Daniyele ni vanghanu va yena va nga dlayiwi. Murindzi 08/23 paj. 3 par. 4