Markusï

13 Enga Jesúsi uéntani japkia templurhu, imeeri chúxapati ma arhispti: “Jorhentpiri, ¡exe na engaksï xáni sési járhaka ka na engaksï xáni kʼéka tsakapuecha ka kʼumanchikuecha!”. 2 Joperu Jesúsi arhispti: “¿Exeaxakiri ini xáni kʼérati kʼumanchikuechani? No ma tsakapu tsïntsïkata pakaraati. Méntku iámindu ambe xerenhantaati”.

3 Enga Jesúsi juáta Olibusïrhu uaxakatini japka, jima uératini eraaxapti templuni ka Pedru, Santiagu, Juanu ka Andrési, arini ambeksï kurhamarhispti enga ima jandiajkuterku japkia: 4 “Aiangujtsïni, ¿na jatini úkuarhia i ambe ka nénachi mítea eska iámindu i ambe niáraaka kʼamakurhini?”. 5 Ísï jimbo, Jesúsi ueenaspti arhiani: “Xéparini je. Eskaksïni no nema támisï jánhastaaka.* 6 Uánikuaksï juuati juchiiti nombrini úraparini ka uandaatiksï ‘Ji jindeeska ima’, ka uánikua kʼuiripuechanksï támisï jánhastauati. 7 Ístu, engajtsï kurhauaka eska uarhiperanhaxaka, asï ché je jimboka i ambe jatsiska para ísï úkuarhini, joperu nótki kʼamajkunhaati parhakpini.*

8 ”Jimboka ireta ma uarhiperaaka máteru ireta jingoni ka juramukua ma máteru juramukua jingoni ka uápurisï jencheati, ístu kʼarhimakua ambe jauati. Ka ini ambe jimbo, kʼuiripuechaksï úndaati kánikua no sési nitamakuarhini.*

9 ”Ka jingontku jáma je. Chájtsï iretarhu anapu juesiichani jingoni pánhaaka ka ataatiksïni jima engaksï judiuecha tánguarhijka para Tata Diosïni kómarhini, ka jíndeni jimbo, afuersaksïni paati juramutiicha ka reiicha jingoni. I ambe marhuauati parajtsï aianguani imeechani ambe engajtsï chá jakajkujka. 10 Ístu, orheta jatsisti para iámindu ireteecharhisï uandanhantani ambakiti aianhperakua. 11 Joperu engaksïni juramutiicha jingoni paaka, asï uandanhia je eratseparini ambe engajtsï uandaaka; imani ambe uanda je engajtsï jiáni arhinhaaka. Jimbokajtsï no chásï uandaaka, sánderu sési, espiritu santusï uandaati chánksïni jimbo. 12 Ístu, ermanu ma íntspintaati ermanu jémbani paraksï uándikuni ka taati imeeri uájpani ka sapiichaksï nóteru uékaatia kurhajchaani taati jémbeechani ka uándikutarkuarhiauatiksï. 13 Iámindu kʼuiripuechaksïni kurhunhiati jíndeni jimbo. Joperu ima enga tekaantaaka astaka kʼamajkunhaaka parhakpini* pʼímutantskata uéraati.

14 ”Ísï jimbo, engajtsï exeaka anhandetini jarhani jima enga no jatsika para jarhani imani ikichakueni jásï ambe enga iámindu ambe kʼamajkujka —kurhanguntee ima enga arhintajka—* eska imeecha engaksï Judea jauaka, eskaksï juátarhisï niuaka sïpakuarhini. 15 Ima enga kʼumanchikuarhu karhakua jámani jauaka, eska no kétsentaaka nijtu inchaakuntani para petakuarhini ambe ma 16 ka ima enga tarhetarhisï* jámani jauaka, eska no kʼuanhatsentaaka para jirinhantani imeeri xukuparhakuani. 17 ¡Lástima ima uarhiitiicha engaksï embarasada jámani jauaka imani jurhiatikuecha jimbo o ima uarhiitiicha engaksï útasï tʼirerani* jauaka charhakuni! 18 Méntku kómarhini ja je Tata Diosïni paraka i ambe no jiánisï úkuarhiaka enga iauani* jauaka. 19 Jimboka imani jurhiatikuechani jimbo, kánikua no sési nitamakuarhinhaati. No méni ísï nitamakuarhinhaxapti desde enga Tata Diosï kueraaka parhakpinini ka nóteru méni ísï nitamakuarhinhaatia. 20 Ka enga Tata Diosï Jeoba no arisku nitamatarapiringa ini tiempuni, no nema* pʼímutantskata uérapirindi. Joperu ima arisku nitamataraati ini tiempuni erakukateechani jimbo, imeechani jimbo enga ima erakuaka.

21 ”Ístu, engaksïni nema arhiaka ‘¡Exe je, Kristu ixú jarhasti!’ o ‘¡Exe je, jini jarhasti!’, asï jáma je jakajkuni. 22 Jimbokaksï niáraaka jarhani kʼuiripuecha engaksï uandaaka eskaksï kristueska o eskaksï Tata Diosïiri uandakua páriiska.* Ka kʼérati milagruechanksï uaauati ka uánikua máteru ambe* paraksï jánguarhintani támisï jánhastaani erakukateechani. 23 Ísï jimbo, xéparini jáma je. Jíksïni xarheni aianguxaka ambe enga niáraaka úkuarhini.

24 ”Joperu imani jurhiatikuecha jimbo, enga na nitamaakia ima tiempu enga xáni no sési nitamakuarhinhaaka, jurhiata pátakuarhiati, luna nóteru tʼíntskaatia, 25 jóskuechaksï uekorhepaati ka ambe enga auandarhu jaka méntku jiniani ka ixúani manatanhaati. 26 Jimajkani, exeatiksï Achamasïiri Uájpani nubeecharhisï jurhani jarhani iámu imeeri uinhapikua jingoni. 27 Ka ima axauati ánjeliichani paraksï tánaantani imeeri erakukateechani engaksï iámu parhakpinirhu jaka,* jima uératini enga sánderu iauaniika echerirhu asta jiniani enga sánderu iauaniika auandarhu.

28 ”Exe je jígusïiri anhatapuni. Enga tsikirhikuarhentani jarhajkia, chájtsï míteska eska no ióni jimbo emendeuakia. 29 Májkueni, engajtsï chá exeaka eska i ambe úkuarhixakaia, mítetini ja je eska Achamasïiri Uájpa janoxakaia, eska puertarhu jarhaskia. 30 Jíksïni sési jimbo arhisïnga eskaksï iásï anapu kʼuiripuecha útasï jauaka enga iámindu i ambe úkuarhiaka. 31 Auanda ka echeri no méntkisï jauati, joperu ambe engani ji uandajka pakaraati para méntkisï.

32 ”Joperu no nema mítesti na jatini o na jandora úkuarhia i ambe, ánjeliichajtuksï no mítesti engaksï auandarhu jaka, nijtu Uájpa, Taatijkusï míteti. 33 Jingontku ja je, tsínharhitini ja je jimbokajtsï no míteska na jatini uaxastaski Tata Diosï eska úkuarhiaka i ambe. 34 Ísïisti komu achamasï ma enga iauanisï nípka ka imeeri jántspiriichani jurajkukuaspti imeeri kʼumanchikuani, arhiaspti ambe engaksï úpiringa mándani arhini, ka imani enga puertarhu japiringa, arhispti eska méntkisï jingontku japiringa. 35 Ísï jimbo, méntkisï jingontku ja je, jimbokajtsï no míteska na jatini jungua kʼumanchikuarhu anapu achamasï, sini inchatirisï, terujkani chúrisï o ante de erandeni* o xarhentku. 36 Jamberi jimajkisï niántaati ka exenunguanksïni chá kʼuíni jarhani. 37 Ambe engaksïni chánksïni arhijka, iáminduechani arhiasïnga: méntkisï jingontku ja je”.