Úkuecha
24 Ka sinko jurhiatikisï tátsekua, sánderu kʼéri saserdoti Ananíasi niraspti kétsemani máru orhejtsïkutiichani jingoni ka ístu achamasï ma jingoni enga Tértulu arhinheenga, i arhijtsïkpiti máespti* ka imeechaksï aianguspti juramutini ambesï no sési úpi Pablu. 2 Engaksï na uandajpapkia Tértuluni, ima ueenaspti juramuti Féliksini aianguni ambesï no sési úpi Pablu, arhispti:
“Jucha sési míteska eska tʼungini jimbochisï jucha sési irekani jaka ka eska iásï ireta sánderu sési jarhaskia, jimbokari tʼu kʼóru míteska néna sési juramuni. 3 Kánikua diosmaiamu tata Féliksi, jimboka jucha méntkisï ka iápurisïchi miáni jarhasïnga indeni ambe. 4 Joperu, paraksïni no ísku ióndachini jarhani, kurhachesïngakeni eskajtsïni kurhajchaaka sáni, jimbokachi míteska eskari ambakiti kʼuiripu máeska. 5 Jucha exeska na enga i achamasï iápurisï jámani jaka inchaakurhani. Jimboka iápurisï jámaxaka arhiani iámindu judiuechani eskaksï no kurhajchauaka juramutiichani ka grupuni ma* orhejtsïkusïndi engaksï arhikuarhijka nasarenuecha. 6 Ka ístu uékasïreendi ikichakueni jásï ambe úni templurhu, jimbochisï jupikaka. 7 * 8 Uaakari kurhamarhini ka exeakari eska ísïiska ambe engachi uandani jaka indeeri ambe”.
9 Ka iámindu judiuechaksï ueenaspti uandani eska ísïispka ambe enga ima uandani japka. 10 Tátsekua, juramuti manajtsïspti para arhini Pabluni eska iásï ima uandapiringia. Jiájkani ima uandaspti:
“Ji sési mítetixaka eska sáni ióniiskia engari juesiika ini iretani jimbo, jimbosïni kánikua tsípini jaka tʼungini japarini kuájpikuarhini. 11 Exe, 12 jurhiatikisïistia engani ji Jerusaléni karhamapka parani Tata Diosïni kómarhini, engari tʼu uéjka míteni sini ísïiski, uaakari kurhanguarhini. 12 Ka no nemarini exesti arhirperani jarhani nemani jingoni templurhu, ka nijtu ji úni jarhani eska kʼuiripu ueenaaka no sési jámani jima engaksï judiuecha tánguarhijka para Tata Diosïni kómarhini o iretarhisï. 13 Ka nijtuksïni uaa exerani eska ísïiska ambe engajtsïni iásï arhini jaka eskani no sési úska. 14 Joperu ambe engakeni kʼóru aianguaka jindeesti eskani ji ísï úxaka eskaksï na újka indeecha engajtsï chá arhiajka “jimbanhi relijioni ma”, ji marhuakuxaka juchaari ióntki anapu parientiicheeri Tata Diosïni, jimbokani jakajkusïnga iámindu ambe enga Leirhu uandajka ka ístu ambe engaksï karaka Tata Diosïiri Uandakua Páriicha.* 15 Ka májkueni eskaksï i achamasïicha na mintsikajka,* jíjtuni mintsikasïnga* eska Tata Diosï tsítantauaka imeechani engaksï sési jámaka ka ístu imeechani engaksï no káni sési jámaka. 16 Jimbosïni méntkisï jánguarhintajka sési jámani Tata Diosïni japarini ka ístu kʼuiripuechani japarini. 17 Ísï ióni jimbo, ji junguaspka parani íntspintani imani sentabuni enga tánakuarhipka* para jarhuataani juchiiti iretarhu anapuechani ka parani kéjtsïtakua ambe úni. 18 Ji pímbinhasï jarhaspka templurhu ísï eska Lei na uandajka ka indeni ambe úxapka engaksï indeecha jimajkisï niárapka. Jimaksï no uánikua kʼuiripuecha jarhaspti jíndeni jingoni ka nijtuni no sési ambe niátani japi. Joperuksï jima jarhaspti máru judiuecha engaksï Asiaisï anapueka 19 ka imeechaksïsï jatsipirindi para ixú jarhani paraksïni arhini ambesïni no sési ú, engachka ísïikia eskani no sési ambe úska. 20 O eskaksï i achamasïicha engaksï ixú jaka, eskaksï indeecha uandaaka ambe no sési úski jiáni engani Kʼérati Juesiichani* jingoni japka. 21 Imantkusïni miájka eskani uinhachaspka: ‘¡Iásï, chájtsïni jusgarixaka jimbokani jakajkusïnga eskaksï uarhiriicha tsíntaaka!’”.
22 Joperu Féliksi enga sési mítepka Tateeri Xanharueri ambe, uandaspti eska sánderu tátsekua exepiringia ambe úni ka arhiaspti iáminduechani: “Jiáni exeakia ambe engani uaaka indeni jingoni enga na Lisiasi ixú jauakia, ima enga sánderu kʼéri orhejtsïkutiika sondaduecheeri”. 23 Joperu arhispti sondaduecheeri orhejtsïkutini eska ónhapiringa achamasïni ka eska exeni japiringa, joperu eska jurajkupiringa máru ambe úni ka ístu eska jurajkuapiringa imeeri erachiichani* paraksï nirani jarhuatani.*
24 Máru jurhiatikua tátsekua, Féliksi jima niáraspti imeeri témba Drusila jingoni, i uarhiiti judia máespti, ka Féliksi pʼitajkuarhispti Pabluni ka arhispti eska aiangupiringa ambe arhikuekasïni jakajkuni tata Jesukristuni ka jingontku kurhajchaspti. 25 Joperu enga Pablu ueenapka uandani na enga jindeeka para sési jámani, para pʼíngukuarhini ka eska Tata Diosï jusgariuauaka kʼuiripuechani, Féliksi chérakuarhespti ka arhispti: “Níia. Jíkeni pʼitajkuarhiakia na engani jatini uaaka”. 26 Ka Féliksi uékasïreendi eska Pablu sentabu íntskupiringa jimbosï someni pʼitajkuarhiendi ka imani jingoni uandontskuarhisïreendi. 27 Ka enga na nitamapkia tsimani uéxurhini, Féliksi uéntaspti ka ueenaspti Porsiu Festu juramuni. Ka jimboka Féliksi uékasïreenga sési pakarani judiuechani jingoni, ónhakata jurajkuspti Pabluni.