Ebreu

10 Nájkiruka Lei xarhatajka sánderu ambakiti ambe enga sánderu orhepani juuaka, no inde ambeesti enga meru juuaka, ísï jimbo, Lei* ka ístu kéjtsïtakua ambe engaksï mándani uéxurhini únhajka, nóksï úsïndi jarhuataani imani kʼuiripuechani engaksï kómarhijka Tata Diosïni paraksï méntku iámindu ambe sési únia. 2 Jimboka engaksï jarhuajpepiringa, ¿andi útasï uétarhipirini eska kéjtsïtanhapiringa? Jimbokaksï imeecha engaksï Tata Diosïni kómarhijka, pímbinhajkunhantapirindiksïa ka nóteruksï no sési pʼikuarherapirindia jimbokaksï no sési ambe úska. 3 Joperu enga ísï kéjtsïtanhajka, kʼuiripuechaksï mándani uéxurhini miántasïndi eskaksï pekadoriiska, 4 jimboka toruecheeri ka chibuecheeri iurhiri no marhuasïnga para méntku kʼamajkuni pekadu ambe.

5 Ísï jimbo, jiáni enga ima echerirhu inchapka, uandaspti: “‘Nóri uékaska eskaksïni kéjtsïtakua ambe úchipiringa ka nijtu intsïmperata ambe, joperureni kuerpu ma íntskuska.* 6 Nóri jaiapanhentaska intsïmperata ambe enga kurhiranhajka ka nijtu intsïmperata ambe enga pekadu jimbo kéjtsïtanhajkaʼ. 7 Jiájkani ji uandaspka: ‘Exe, jurhaska parani úni ambe engari tʼu uéjka, oh, juchiiti Tata Diosï, —ísï karakata jarhasti imani karakateecharhu engaksï* juchiiti ambe uandajka—ʼ”. 8 Ueenani jámani, ima uandasïndi: “Nóri uékaska nijturi jaiapanhenta kéjtsïtakua ambe, nijtu intsïmperata ambe, ka nijtu imani intsïmperata ambe enga kurhiranhajka ka nijtu intsïmperata ambe enga pekadu jimbo kéjtsïtanhajka”, nájkiruka Lei uandajka eska inde ambesï jatsika para kéjtsïtanhani. 9 Ka tátsekua uandasïndi: “Exe, jurhaska parani úni ambe engari tʼu uéjka”. Ima kénditasïndi ambe enga orhetku uaxastapka para máteru ambe uaxastani. 10 Ka jimboka Tata Diosï ísï uékaska, iásïchi jucha pímbinhajkunhantaskia tata Jesukristueri kuerpu jimbo, enga ma ueltajku kéjtsïtanhaka ka para méntkisï.

11 Ístu, iámindu saserdotiichaksï pauani pauani nirasïndi ánchikuarhini paraksï Tata Diosïni kómarhini ka somenksï májku jásï ambe kéjtsïtani jarhasïndi. Ka inde kéjtsïtakua ambe no marhuasïndi para méntku kénditani pekadu ambe. 12 Joperu i achamasï ma ambejkusï kéjtsïtati kʼuiripuecheeri pekaduechani jimbo enga marhuauaka para méntkisï ka Tata Diosïiri jurhijkandani jimbo uaxakasti. 13 Ka jiáni uératini, erokuarhixati eska Tata Diosï imeeri jantsiricharhu peerakuauaka iámindu imeechani engaksï ikiakujka. 14 Jimboka ima ma ambejkusï kéjtsïtati para jarhuataani imeechani engaksï pímbinhajkunhantani jaka, paraksï iámindu ambe sési únia para méntkisï. 15 Ka espiritu santujtu uandantasïndi indeni ambe, jimboka orheta uandaska: 16 “Ísïsïni pakatperaaka imeecha jingoni engaksï na nitamaakia inde jurhiatikuecha, ísï uandasïndi Tata Diosï Jeoba. Ambe engani xáni juramujka ji, imeecheeri mintsitarhu peeraaka ka imeecheeri eratsekuarhu karaaka”. 17 Tátsekua uandasïndi: “Ka méntkuni no miáuaka ambe engaksï no sési ambe niátaaka*, nijtu imani ambe engaksï no sési ambe úka”.* 18 Ka enga Tata Diosï na puákuantajkia, nóteru uétarhisïndia eskaksï kéjtsïtaaka intsïmperata ma pekadu jimbo.

19 Ísï jimbo erachiicha,* jimbokachi iásï nóteru chésïngia imani xanharu jimbo nirani enga pímbinhasï kuarturhu pájpejka parachi jima inchani Jesúsiiri iurhiri jimbo 20 —jimbanhi xanharu ma mítasti para jucha enga tsípikuarhu pájpejka, enajki jima incha enga kortina jukaka ka inde kortina imeeri kuerpuni arhikuekasïndi— 21 ka jimbokachi jatsiska kʼéri saserdotini ma enga iámindu ambe exeni jaka Tata Diosïiri kʼumanchikuarhu, 22 ju je andarhierani Tata Diosïni iámu mintsita jingoni ka kánikua mintsikaparini, jimboka juchaari mintsita pímbinhajkunhantaskia* parachi nóteru no sési pʼikuarherania imani ambe jimbo engachi no sési niátaka;* ka ístu juchaari kuerpu juparhinhantastia pímbinhanharhi itsï jingoni. 23 Ju je no sáni chéparini seguiriini jarhani aianguani kʼuiripuechani ambe engachi erokuarhini jaka, mintsikaparini eska ísï úkuarhiaka, jimboka mintsinharhikueska ima engajtsïni indeni ambe aiachika. 24 Ka ju je pendienti jarhani máteruechani jimbo* parachi jarhuajperani xénchpeni ka ambakiti ambe úni 25 ka ju je méntkisï nirani tánguarhini ka no ísï eskaksï máru na pʼindeka no nirani. Sánderu sési, ju je uinhaperperantani ka sánderia iásï engachi exeni jaka eska ima jurhiatikua axuterku jarhaskia.

26 Jimboka engachi uékantku no sési ambe niátaska ka jinichi tʼuini sési mítenia jurhimbikua ambe, nóteruchi ambe ma uaakia kéjtsïtani pekadu jimbo. 27 Joperuchi kʼóru chétku erokuarhini jauaka eskachi kastigarinhaaka ka imani ikiatapuni enga ísïika komueska chpiri ka enga kʼamajkuauaka imeechani engaksï Tata Diosïni ikiakujka. 28 Jimboka enga kʼuiripu ma no újka ambe enga Moisésiiri Lei uandajka ka tsimani o tanimu kʼuiripuechaksï uandantani eska ísïiska, inde kʼuiripu no sáni pʼamojkunhasïndi ka uándikunhasïndi. 29 Jiájkani, ¿no jatsipirini para sánderu no sési kastigarinhani inde kʼuiripu enga tʼauanduntaka Tata Diosïiri Uájpani, enga ísku ambe máeni exeka imani iurhirini enga úka eska Tata Diosïiri pakatperakua ueenaka jarhani ka enga pímbinhajkuntaka Tata Diosïiri Uájpani, inde kʼuiripu enga no sési ambe uandaka ka no jaiapanhentani Tata Diosïiri espirituni enga újka eska Tata Diosï kánikua kóntpintaaka? 30 Jimbokachi jucha míteska imani enga uandaka: “Jíndentsïni jurajkuchi je; ji íntsauaka ambe engaksï jirinhakuarhika”. Ka ístu uandaspti: “Tata Diosï Jeoba jusgariuati imeeri iretani”. 31 Kánikua chékuarhisti eskajtsïni ma repentku Tata Diosï niáraaka kastigarini, ima Tata Diosï enga tsípiti jaka.

32 Joperu méntku miáni ja je ambe engajtsï nitamakuarhika ísï tátsekua engaksïni Tata Diosï na tʼíntskachipkia, chájtsï mámaru ambe nitamakuarhiska joperujtsï tekaantaska. 33 Ménisï, chájtsï niáraska no sési ambe arhinhani ka ístu no sési kánhani kʼuiripuechani japarini* ka ístujtsï niáraska imeecha jingoni jarhani engaksï indeni ambe nitamakuarhini jarheenga. 34 Jimbokajtsï chá pʼamojkuaska imeechani engaksï ónhakata japka ka chájtsï tsípikua jingoni jurajkuska eskaksïni euakuarhipiringa ambe engajtsï jatsikuarhepka, jimbokajtsï míteska eskajtsï chá sánderu ambakiti ambe jatsiska ka enga jindeeka para méntkisï.

35 Ísï jimbo, asï jáma je chéni* jimboka engajtsï no chéska, chájtsï kánikua ambe intsïnhaaka. 36 Jimbokajtsï chá jatsiska para tekaantani parajtsï pʼirani ambe engaksïni Tata Diosï aiachika engajtsï na uaakia ambe enga ima uéjka. 37 Jimboka no “ióni jimbo”, “ima enga jurhani jaka, janoati ka no ióndaati”. 38 “Joperu ima enga sési jámajka, irekaati jimboka mintsikasïnga”, ka “enga chérakuarheska ka jurajkundini, ji nóteruni jaiapanhentaakia”.* 39 Joperuchi jucha no ísïiska eskaksï ima kʼuiripuecha engaksï chérakuarhejka ka jurajkunksï Tata Diosïni ka engaksï tátsekua kʼamajkunhajka, sánderu sési, juchachi ísïiska eskaksï ima kʼuiripuecha engaksï mintsikajka ka engaksï tsípiti pakarajka.