Roma

3 Jimajkani, ¿ambe marhuasïni judiueni? ¿Ka ambe marhuasïni pasïri pʼikujtsïkukuni tsʼiuerakuani?* 2 Uánikua ambe jimbo marhuasïndi, orheta jimbokaksï judiuechanisï aianguapti ambe enga Tata Diosï uandajka. 3 Ka engaksï máru judiuecha nóteru mintsikajkia, ¿jiájkani máteru kʼuiripuechajtuksï nóteru uaaia mintsikani Tata Diosïni nomasi jimbokaksï judiuecha no mintsikasïnga? 4 ¡Nómbe! Nájkirukaksï iámindu kʼuiripuecha chkuanderajka, Tata Diosï xarhatasïndi eska jurhimbitiiska, ísï eska na karakata jaka: “Imani ambe jimbo engari uandajka, xarhataakari eskari iámindu ambe sési úsïnga, ka engaksï uandaaka eskari tʼu no sési ambe úxaka, tʼuri xarhataaka eska no ísïiska ambe engaksï uandani jaka”. 5 Engachi jucha no sési ambe újka, kʼuiripu úsïndi sánderu sési exeni eska Tata Diosï iámindu ambe sési úsïnga. Ka engajtsïni Tata Diosï kastigarijka, ¿jiájkani ima no sési úxaki? —Máru kʼuiripuechaksï ísï eratsesïndi—. 6 ¡Méntku no ísïisti! Jimboka enga Tata Diosï no iámindu ambe sési úpiringa, jiájkani, ¿néna jusgariuaua parhakpini anapuechani?

7 Engani ji chkuanderapiringa ka ísï sánderu sési xarhatani eska ísïiska ambe enga Tata Diosï uandajka ka indeni ambe jimbo kʼuiripuechaksï sánderu kʼéri ambe arhini Tata Diosïni, ¿jiájkani andisï Tata Diosï uandajki eskani no sési niátaxaka?* 8 Ka, ¿andichisï no uandajki “Ju je no sési ambe úni parakajtsïni sési nicheaka”? Jimbokaksï máru kʼuiripuecha uandasïnga eskachi jucha ísï uandasïnga. Inde kʼuiripuechaksï jatsisti para sési jusgarinhani.

9 Jimajkani, jucha engachi judiueka, ¿sánderuchi ambarhati kʼuiripueski ka eskaksï máteruecha? ¡No ísïisti! Jimboka ísï eskachi na exekia, iámindu judiuecha ka grieguechaksï pekadoriisti. 10 Ísï eska na karakata jaka: “Méntku no ma achamasï jarhasti enga méntkisï sési jámaaka, méntku no nema; 11 no nema jarhasti enga iauani jamberi sési eratsentaaka; no nema jarhasti enga uéjka jirinhantani Tata Diosïni. 12 Méntkuksï iáminduecha jurajkustia Tata Diosïni, nóteruksï ambe ma marhuasïndia; no nema jarhasti enga sési kámpiaka, méntku no nema”. 13 “Imani ambeksï uandasïndi enga uándikpijka; imeecheeri katamba jingonksï chkuanderakua ambe uandasïndi”. “Ambe engaksï uandajka, ísïisti komueska akuitsiiri kuechenda”.* 14 “No sési jásï ambeksï uandasïndi ka ikiatkuksï uandasïndi ambe ma”. 15 “No sésiksï jámasïndi ka uándikpisïndiksï”. 16 “Kánikuaksï no sési ambe úkuasïndi kʼuiripuechani ka ístuksï úsïndi eskaksï kómu nitamakuarhiaka, 17 ka nóksï mítesti néna sési pájperani máteruechani jingoni”. 18 “Nóksï janhanharhisïndi Tata Diosïni”.

19 Ka mítetixakachi eska iámindu ambe enga Leirhu karakata jaka jindeeska para imeecha engaksï újka ambe enga Lei uandajka, ka Lei jindeesti para no nema úni uandani eska no mítespka ka para xarhatani eskaksï iámindu kʼuiripuecha no sési ambe niátaska Tata Diosïni japarini ka eskaksï jatsiska para kastigarinhani. 20 Ísï jimbo, no jimboka kʼuiripu ma úni jauaka ambe enga lei uandajka arhikuekasïndi eska Tata Diosï ísï exesïnga komueska kʼuiripu ma enga sési jámajka, jimboka leini jimbochisï jucha újka kurhanguni ambesï no sési jaki.*

21 Joperu iásï Tata Diosï xarhatastia ambesï sési jaki, joperu nóteru leini jimboia; ísï úkuarhisti eska na karakata jaka Leirhu ka ístu eskaksï Tata Diosïiri Uandakua Páriicha* na karaka, 22 ima kʼuiripuecha engaksï mintsikajka, jo, imeecha engaksï mintsikajka tata Jesukristuni, Tata Diosï ísï exeasïndi imeechani komueska kʼuiripuecha engaksï sési jámajka. Jimboka Tata Diosï iáminduechani májkueni kaasïnga. 23 Jimbokaksï iáminduecha pekadoriiska ka nóksï méni uaati xáni kʼéri ambeeni eska Tata Diosï.* 24 Kristu Jesúsi euajpiantasti jimboka maiampiska paraksï nóteru pekadoriinia, ka ísï úparini, Tata Diosï ísï exeasïndi komueska kʼuiripuecha engaksï sési jámajka, ka Tata Diosï ísï kóndeantasti jimboka kánikua xénchaasïnga. 25 Tata Diosïjtsïni mítetarasti nénachi uaa ménderu sési pájperantani imani jingoni, ka jindeesti engachi mintsikaska Kristueri iurhirini. Tata Diosï indeni ambe ústi para xarhatani eska ima méntkisï sési úsïnga iámindu ambe, jimboka Tata Diosï tekaantaska ka puákuantasti imani kʼuiripuechani engaksï ióntki no sési ambe niátaka. 26 Ka ístujtsïni exerasti eska ima méntkisï sési úsïnga iámindu ambe, jimboka enga kʼuiripu ma niáraska mintsikani Jesúsini, Tata Diosï ísï exesïndi komueska kʼuiripu ma enga sési jámajka.

27 Jiájkani, ¿jatsipirinchi para arhikuarhini ambe ma jimbo? Méntku nómbe. ¿Jatsipirinchi para arhikuarhini jimbokachi úxaka ambe enga lei uandajka? Méntku nómbe. Leisï uandajti eskachi jatsiska para mintsikani. 28 Jimbochisï iásï mítekia eska Tata Diosï ísï exesïnga nemani komueska kʼuiripu ma enga sési jámajka, jimboka mintsikasïnga ka no jimboka úsïnga ambe enga lei uandajka. 29 ¿Andi Tata Diosï judiuecheerku Tata Diosïiski? ¿Andi no ístu jindeeski no judiuecheeri Tata Diosï? Jo, ístu no judiuecheeri Tata Diosïisti. 30 Ka jimboka ma Tata Diosïjkusï jaka, imasï uandaati eskaksï sési jámaxaka ima kʼuiripuecha engaksï mintsikajka na uéjkiksï pʼikujtsïkuni pasïri tsʼiuerakuani o nómbe. 31 Jimajkani, engachi uandajka eskachi jatsiska para mintsikani, ¿arhikuekaxakichi eska lei nóteru marhuasïngia? ¡Méntku nómbe! Sánderu sési, kuájpixakachi leini.